1 ¿La titiya jera quino mantá tatuan? ¿Crístochi mantá tan jotuan? ¿Chiquilachi Miya Jesucrístoca quiraca jotuan? ¿Yachi mantate nulaca Jesube cayaisa carimin jotuan? 2 Uyanlari laca Crístochi mantá tan itoe tilatinasatiya, nulari laca Crístochi mantá tan joe tinola joe. Nulaca Miya Jesucrístobe cayaisa cariyoe. Junca tenhito miintsan joe yachi mantá tan joeque.

3 Weyanlari laca epe joe timinla joe. Yalaberi itsanque beconan pachinayoe: 4-5 Uyan Crístochi mantá tanlari tiletiya nenato, yalachi sonalabenan jiminla joe. Pédronan, Miya Jesuchi acolanan tsanque nenano mantá talarae. ¿Junni lanan tsanque Crístobe penenamin sonaca cano mantá itono jowan? ¿La micarinunlari ano ticatiya lachi cuwano jotun? 6 Uyan Crístochi mantá tanlari cala cachun trabajaquituminla joe. ¿Junni labe Bernabébesiri tsantin chunola itolajoiin? 7 Soldadola cuwenta, o uyan quiraque trabajaquiminla cuwenta jochunae. Soldadolari yalachi tencachique calachi quituminla joe. Uyanlanan yalachi cuwaminla joe. Uba wita quiminlanan uba pucaca pefiminla joe. Wala cuidaiminlanan wala cupi pecaminla joe. Junto Crístochi mantate micariminlanan, tsanque micarinanun tenchi ticatiya canola jochunae.

8 Tsachilachi tencaberi tsantitiyoe. Diosichi Pilabi yachi mantate jun tsanquenan chuteca joe trabajaquiminla pecanola joeque. 9 Jana wala trico nica terechunae yape trico ni latsaisa. Junni Moisés Diosichi mantaca yachi pilabi chuteto, ya walaca itsanque chuteca joe: Jun walachi fiqui foroca teletuntsan joeque chuteca joe yape walanan nasi trico nica fide nenasa. Junni Diosi yaca tsantito, wala tenchiri tsantitue. 10 Chiquilachi tenchinan petsantica joe. Tsachilachi tenchinan tsanque chuteca joe yape trabajaquiminlanan son jolajosa. To buleminlabe, ni lachiminlabe son jolajochunae yala petrabajaquica juncari yalanan nasi pecanola joyoeque ya nica lachimin wala cuwenta.

11 Junni chiquilanan Diosichi fiquica micarinaminlanan jun tsanquenan jolajoyoe. Nulaca micarinato, nulachite trabaja pequilaquiyoe wita quiminla cuwenta. Nulachi tencabi sen nica cuwenta waquelaquiyoe yape sen ilaisa. Junni waqueminlanan yalachi man parte pecano jonari, chiquilanan jun wacaca pemancanun cuwenta nulachi ti cosacatiya nasi nacá pecanari se jochunae. 12 Uyan micariminlari nulachi ti cosacatiya canola joyoe timinla joe. Junni yalari cano mantá tanari, chiquilari nantanancari cano mantá tanla joyoe.

Junni chiquila cano mantá tatonan, nulachi ti cosacatiya natiya catuminlayoe. Tinantiya catuminnan poleniiminlayoe yape nulari Crístoca paca sen fiquica fe seque quereilaisa.

13 Mantenhilaide! Weyanlari Diosichi yabi petrabajaquiminla jonan, Diosichi yabinan ano cuwaminlae. Aman Diosichi yabi mesa manca joe. Animalica toteto Diosichi cuwachun tsorenun mesa joe. Junni jun mesate trabajaquiminlari ya tsachicaca pefiminla joe. 14 Miya Jesucrístori mantaca joe chiquilanan jun tsanquenan jolajosa. Diosichi sen fiquica micariminla jun fiquica micarinun tenchi cala canainola joeque mantaca joe.

15 La mantimini nulaca cala cano mantá tatonan, natiya catumanyoe. Cala cachique in pilaca quitiyoe. Meralaquede! Laca mantaca joe yape nulaca micarisa. Junni nulaca cala catuminnan micarinatori, junni la quino mantaca jonunca fécari duque seque quimin joichunae. Junni la fécari duque seque quimin joyoe tino munarayoe. Nulachi cala canamanpari, tsantino podeino itomin joinhie. Yari seiton jochunae. Puyano jonunca fe seiton jochunae. Jun tenchi nulachi cala catiyoe tsantino podeichun. 16 Jesucrístoca paca sen fiquica micarinatonan, jun tsanquinun tenchiri fécari duque seque quimin joyoe tino podeitiyoe. Diosi laca mantaca joe ya sen fiquica micarisa. Yaca micaritutori, lachi tenca duque padeseino jomin joinhie quino jonunca quitiyoeque. 17 Junni cala catutonan lachi tenca munateri micarimin jotori, junto aman tsanque micarinun tenchi premio cano joichunae. Diosi mantaca junsiri micarimin jotori, junto micarinanun tenchi premio cano itoyoe. Mantaca juncari quimin joichunae. 18 ¿Junni ti premioca cano joinhin? Cala cano mantá tatonan, cala catuminnan micarino podeiyoe. Tsanquino podeinari, ya lachi premio jono joe. Tsanquino podeito duque son timanyoe tsara sen premio caminla cuwenta.

19 La mochinantiya peyun itotonan, jeralelachi peyun cuwenta imin joyoe fécari tsachilaca Jesucrístobe cayaisa carichun. 20 Israelítala tenchiri israelítala cuwenta imin joyoe israelítalaca Jesucrístobe cayaisa carichun. Yalari Diosichi unica mantabe mantaiminla jonan, lanan yala cuwentanan imin joyoe yalaca Jesucrístobe cayaisa carichun. Tsan inatonan, lari jun unica mantabe mantaitumin joyoe.

21 Junsi Diosichi unica mantaca meráno itonlachi tenchi yala cuwentanan imin joyoe yalaca Jesucrístobe cayaisa carichun. Tsan jotonan, Diosichi unica mantabe mantaitutonan, la Diosi pacaca merátumin nenatiyoe. Crístochi mantabe mantaimin joyoe. 22 Junni cumana tenca tanlachi tenchiri yala cuwenta imin joyoe yalaca Jesucrístobe cayaisa carichun. Jerale tsachilachi tenchi man quiraque man quiraque imin joyoe weyan weyanlaca niya quiraquetiya Jesucrístobe se losa carichun. 23 Diosichi sen fiqui tenchi jera titiya quimin joyoe jun fiquica seque pemicarimin jochun.

24 Carera sujiminlaca tenca calaquisa! Duque tsachila sujilaitonan, mancasiri tsachi premioca cachunae. Junni premioca cachique sujiminla cuwenta Diosibe seque penenachique tenfelaina! 25 Jerale deporte quiminla tencachique seque cuidaiminla joe sonban jochun. Premioca cachiqueri tsanquiminla joe. Juntonan, yalachi premiori yucapiyamin joe. Chiquila cano jun premio mantimini numatotiya yucapiyatumin jochunae. 26 Epele sujiminlari numanan fe lolaituchunae. Tedechi quicaaminla epele quitori, numanan fe lolaituchunae. Junni la Jesucrístobe penenato, yala cuwenta itoyoe. 27 Pucaca sonba micarica cuwenta lachi tencaca micarimin joyoe sonba tenca ichun. Tsantutori pansile uyanlaca micarimin jomin jototiya, lari epe cuwenta joichunae.