2
1 Junni natiya pacaalaquituna! Niyaquenantiya natiya encanalaquituna! Nene pato, fe sen joyoe titulajona! Uyanla nulaca feinari, junni paitulajona! Quiranilaquina! Uyanlaca natiya yucacuratulajona! 2-3 Nulari Diosichi fiquica nasiri miito, Diosica sen joeque miicala joe. Junni amanari tsotsoca nalala cuwenta jonola joe. Nalalari sen cupi duque munaraminla joe tenca tan uwaichun. Junni nulari jun tsanquenan Diosichi sen fiquica munaralarana! fe seque miito se lochun.
Son su cuwenta jonunca
4-8 Jesucrístobe cayaicala joto, Diosi chunun ya cuwenta jolajochunae. Diosichi Pilabi matu tote Jesucrístoca itsanque pato pila chuteca joe:
Quiralaquede! Diosiri israelítalachibi ya quichun su cuwenta tsoreno joyoe tie tinue.
Diosi jun suca duque mica sen su jochunae tie tinue.
Jun suca tsorechun wentecayoe tie tinue.
Junto ya quichun fécari munaranun su cuwenta jochunae tie tinue.
Junni Diosi tsanque suca cuenta quinato, Crístoca tsantinaminue. Yari son su cuwenta joe. Jun tenchi Diosichi Pilabi itsanquenan chuteca joe:
Yabe cayaiminlari lu tituminla jochunaeque chuteca joe.
Nulari yabe cayaicala joto, yasiri duque sen joe timinla jochunae. Uyanla mantimini Jesucrístoca quereituto, yaca telaquepolaquinue. Jun tenchi Diosichi Pilabi Jesucrístoca su tito itsanque chuteca joe:
Suca ya quiminlari jun suca quirato, seitoe tito, telaquepolaquichunaeque chuteca joe.
Tsan josanan, ya quichun fécari munaranun su cuwenta jochunaeque chuteca joe.
Junni suca telaqueponun cuwenta Jesucrístoca quereituto munaratiyoe latie. Tsan josanan Diosiri Jesucrístoca wenteto, tsara sen joe tinue. Diosichi Pilabi chuteca jominue yalari quereituminla jochunaeque. Itsantinue:
Jun suri quepoisa carimin su jochunae tinue yape quepoilaisa.
Junni Diosichi Pilaca merátuto quepoiminlae. Matute tsanhichunae tica josa, jun tsanquenan patinue. Junni nulanan son su cuwenta jonola joe. Aman jana suca ya quinun joe. Junni nulanan layaito, Diosichi ya cuwenta jolajochunae yape nulachibi chusa.
Junni man talaman cuenta quilaquisa! Diosi nulaca yachi sen patelela suwanue. Patelelari Diosica se tito, yachi ticatiya epe cuwaminla joe. Aman nulari jeralela patelela joto, nulachi tencacanan Diosichi cuwalaquichunae. Jesucrístochi mantate tsanque cuwanari, Diosi se joe tichunae.
Diosichi tsachila niyaque nenanola jonunca
9 Junni nulari tsara mantá tan sen patelela jolajoto, Diosi wenteca sen bolon tsachila jolajoe. Diosichi tsachila jotori, yari tsara se quimin joeque cuenta quinola jochunae. Yucanbe canenaminlanan, nemen minu cuwenta seitonque nenamin jominlanue. Junni Diosi nulaca nemenbi nechi manlaricato, yachi uraran tsenbi seque penenasa carinue. 10 Casale nulari Diosichi tsachila itominlanue; amanari Diosichi tsachila pejolajoe. Casaleri laquiratunun jominlanue; amanari Diosi nulaca laquirae.
11 Lanan nulaca laquirato payinayoe. Nulari in tote tsachila itolajoe; Diosichi to tsachila jolajoe. Junto Diosichi tobi chuminla cuwenta in totenan seque nenalarana! Uyan tsachilari yalachi tenca munate nenato, seiton quichi timinlae. Yalari seiton quinato, tencabi yucapiyaminla joe. Junni nulari tsanque nenatuchique tenfelaina! 12 Nulari Diosica quereituminlachi quelote chutonan, seque nenalarana! Nulari seque nenalarasanan, pansile nulaca seiton jolajoe tinilatichunae. Junni seque quinaminlaca quirato, Diosi yalaca tenhisa carino mate uyan tala palaquichunae. Jun mate Diosica duque seque panola jochunae nula seque quinun tenchi.
13 Mantaminlaca meralaquina! chiquilachi Miya Jesucrístochi tenchi. Nula jeralelaca mantamin miyaca fe merántsan jochunae. 14 Aman ya miyari uyanlacanan mantá tan suwamin joe. Manca tobi manca tobi mantasa timin joe yape seitonque nenaminlaca casticaquilaquisa, seque nenaminlacari sen jolajoe tilatisa. Junni ya mantaminlacanan merántsan jochunae. 15 Diosiri nulaca tsanque mantaca joe yape nulari ya mantá tanlaca meralaquisa. Junni seque nenato, tenca itonlaca nosa isa carilaquinachunae.
16 Peyun ituminlari patronbe mantaituto yalachi tenca munate pansi nenalarachunae. Junni nulanan tsanquenan pansi nenanola joe. Weyanla mantimini uyanlabe mantaitiyoe tito, seiton quito nenaminla joe. Junni yala cuwenta itolajona! Diosichi peyunla cuwenta jolajoyoeque tenca cato nenalarana! 17 Jeralelaca respetailaina! Acolaca, soquilaca laquiralarana! Diosica jeleralarana! Miyaca respetailaina!
Jesucristo cuwenta padeseinunca
18 Peyunlari yalachi patronlaca respetaito yala panunca meránola joe. Seque mantaminlacasiri merátuntsan joe. Paito paminlacanan meránola joe. 19 Junni pansile seque nenamincanan patronla casticaquilaquichunae. Tsanlaquinari, Diosica tenca cato yaca wantainari, nulaca sen jolajoe tichunae. 20 Nula seiton quilaquinari, ¿niyaito casticaquituno junhun? Junni nula tsanque casticaito paituto wantaitori, sen tsachi joyoe titulajona! Aman seque quinamincanan nulaca epele casticaquinari, uyan quiraque joe. Yaca paituto wantailainari, Diosi nulaca sen tsachila jolajoe tichunae.
21 Diosiri nulaca tsanque mantanae yape padeseinanunca wantailaisa. Crístori nulachi tenchi padeseie. Junni junca tenca cato, ya cuwentanan nenanola joe. 22 Yari natiya jutsa quitumin jominue. Junsi nene patumin jominue. 23 Yaca yucacuralaquinasa, beconan patue. Casticaquinasanan, paito patue. Diosi seque miito casticaquimin joe tito, pansi jonijominhe. 24 Chiquilachi jutsa tenchi corosibi wiloito puyae. Yari chiquilachi jutsaca piyarichun puyae yape seque nenalarasa. Ya fudainun tenchi nula manseilaie. 25 Nulari opisa cuwenta epele topiyaca nenamin jominlanue. Topiyaca nenaminnan, nulachi tencaca mantato cuidaiminchica manjalaie.