1 Acola, soquila, Jesucristo numasi manpatano jonunca nulachi pila quituntsan joe. 2 Nulanan numa miralarae monantiya yari numasi manpatano jonunca miitolajoeque. Aman meralaquede! Monantiya miituminla joe numasi tarinpunla janola jonunca. Junni Jesucristo manpatano ma jun tsanquenan jochunae. Yaca quiraituchunae latinasanan manquiraichunae. 3 Jana na pun sonalaca tenhilaide! Yala moora sen jominnan quiyaiminla joe. Jun tsanquenan tsachila wepanatuto pansi chularayoe latinasanan, moora to yucapiyarino ma patichunae. Natiya se lono podeilaituchunae.

4 Nula mantimini yala cuwenta itolajoe. Nulachi tenca nemen cuwenta seiton itolajoe. Tarinlaca cuwenta wepanatuntsan jochunae. 5-7 Nulari Diosichi tsente nenato, tenca nemen nenatuminla joe. Nula tenca calaquede! Catsominlari quepen catsolaimanhe. Winan iminlari quepen winan ilaimanhe. Junni Jesucrístobe penenatuminlachi tenca jun tsanquenan jolajoe. Yalachi tenca catsoto, winan ica cuwenta jolajoe. Chiquilari tsanque nenalaratuntsan joe. Son cuwenta nenanola joyoe. Quepen nenaminla cuwenta itolajoyoe; malon nenamin cuwenta tsente nenaminlayoe. 8 Tsan jotori tenca tan nenantsan joe.

Soldadola cuwenta jolajoichunae. Soldadola poloquin camisa, casco polarachunae isaichun. Tsan punlari pa jominlaca jeleralaratuchunae. Junni chiquilari jun soldadola cuwenta jolajoyoe. Diosica tennato, tsachilaca laquirato nenanola joyoe. Tsanque nenatori, poloquin camisa pun cuwenta jolajoichunae. Chiquilaca Diosi se larichunaequeri tenca cato nenantsan joe. Tsanque nenatori, yucanca jelenasa nenacaituchunae casco pun cuwenta joto. 9 Diosi chiquilaca wentenato, casticaquichunni wentetue. Chiquilachi Miya Jesucrístobe se lolaisa wentee. 10 Ya chiquilachi tenchi puyae yape casonnatonan, o puyaca jotonan, yabe sonnalarasa. 11 Junni nula tala sonban tenca suwacaalaquina! Tsanlaquinato, fécari tsanlaquina!

12 Acola, soquila, Miya Jesucrístochi tsachila tala, weyan weyanlari mantá tanla joe. Yalari nulaca cuidainato payiminla joe. Aman nulabe rocailainayoe yalaca respetailainaque. 13 Nulaca seque cuidailainan, yalaca laquirato respetailaina! Junsi nula tala pacaatuto nenalarana!

14 Acola, nula tala itsanque nenalarana! Lan punlaca payilaquina! Pele tencalacanan sonba tenca suwalaquina! Cumana tenca junlacanan ayudailaina! Junsi tsachila niyan tilatinasatiya, pailaituna! 15 Seiton quinaminlaca nulanan beconan seiton quilaquituna! Numasitiya uyanlabe sen jochique tenfelaina! Nula tala laquiracaato nenalarana! Uyan jeralelabenan sen jolajona! 16 Numasitiya son tilatina! 17 Junsi numasitiya Diosibe rocailaina! 18 Nulaca niyan quilaquinasatiya, Diosibe acradeseilaina! Nulaca Jesucrístochi tsachila jolajonan, Diosi tsanque seque nenalarasa munarae.

19 Diosichi Tenca nulaca ticatiya quisa carichi tinari, yaca tina porelaquituna! 20 Diosichi mantate paca jun fiquica epe fiqui joe tilatituna! 21 Tsan jotonan, jerale fiquica sen joe titulajona! Seque meráto miintsan joe seiton fiqui jonunca o sen fiqui jonunca. Junni sen fiquicari meralaquina! 22 Titiya seitonari, meralaquituna!

23 Diosi chiquilaca pansi chusa carimin joe yape wepanatuto chularasa. Junni yabe rocainayoe yape nulaca jera se suwasa. Nulaca cuidaisa rocainayoe yape nulachi tencanan, nulachi pucanan, sen jolajosa. Se suwasa rocainayoe yape Jesucristo manpatano mate culpa iton jolajosa. 24 Diosi epele patumin joe. Nulaca yachi tsachila josa tito, yanan nulaca jera se suwachunae.

25 Acola, soquila, nulanan chiquilachi tenchinan Diosibe perocailaina!

26 Acola, soquila, Diosichi tsachila jolajoto, jeralelabe caforole mo tito saludaicaalaquina! 27 Jesucrístochi cale nulaca mantanayoe yape in pilaca jerale Jesucrístochi tsachilaca merása carilaquisa.

28 Chiquilachi Miya Jesucristo nulaca laquirasa rocainayoe. Tsanqueri joe.