1 Acola, soquila, chiquilachi tsara sen Miya Jesucrístobe cayaica junla joto, cala tanlacanan, cala itonlacanan, jun tsanquenan seque tennalarana! 2 Pansile tsachila nula layainun yabi wiyalaichunae. Mancari oro aniyo pun, sen camisa pun, jochunae. Junni mancari cala iton, camisa unica pun, jochunae. 3 ¿Junni ya paluca tsachilaca niyaque panola joyun? Sen camisa punca se tito, inte sen postote chudide! tituntsan jochunae. Aman cala iton tsachica pato, junte wirurade! o lachi nedele chudide! tituntsan jochunae. 4 Tsanlatitori, nula seitonque tenca caminla jochunae. Weyanlaca cala tannun tenchiri sen jolajoe timinla jochunae; weyanlaca cala itonun tenchiri seiton jolajoe timinla jochunae.

5 Acola, soquila, nulaca duque laquirato payinan, seque meralaquede! ¿Cala itonlacari Diosi patsanan wenteca joco? yape yabe cayailaisa. Tsachilari yalaca poperela joe latinasanan, Diosica tsaracari quereiminla joe. Aman Diosi yaca laquiraminlaca seque queyanae tinue. Ya mantananun tsachi bolonbi penenasa cariyanae tinue. Junni Diosi poperelaca fécari wentenue yape jun bolonbi penenamin jolajosa. 6 Junto Diosiri poperelaca tsanque seque pánasanan, nulari yalaca epe poperelari jolajoe tito, natiya laquiratuminla joe. Tenca calaquede! ¿Cala tanlari nulaca fécari seiton quito dosa carichi timinla joco? 7 Aman nulaca Jesucrístochi tsachila jolajoe timinlae. ¿Junni cala tanlari Jesucrístochi sen mumunca fécari yucacuraminla joco? 8 Miya Diosichi Pilabi itsanque fe merántsan mantaca chuteca joe: Tencachique laquiranun cuwenta, uyanlacanan jun tsanquenan laquiralaranaque chuteca joe. Jun mantaca merátori, seque nenaminla jochunae. 9 Aman cala itonlaca laquiratutori, cala tanlacasiri laquiraminla jotori, jutsa quilaquinachunae. Diosichi mantate culpa talarachunae.

10 Aman Diosichi manca mantá nacaca merátutori, jerale mantaca merátuminla cuwenta jochunae. 11 Diosi yachi pilabi matu mate itsanque mantaca chutesa carinue: Leyan sona tatusa tinue. Junsi tsachilaca totetusa tinue. In palunan Diosichi mantá joe. Junni nuri leyan sona catutonan, tsachica totetori, mantaca merátumin patichunae.

12 Nulachi mantimini Diosi casan mantaman cuwaca joe yape meralaquisa. Nulachi tencabinan mantá cuwaca joe yape nulachi tenca munatenan seque nenano munaralarasa. Junni Diosi nulaca jun casan mantate miichunae seque nenaminla jonunca o seitonque nenaminla jonunca. Aman junca mantenhito, seque cuenta quito nenalarana!

13 Uyanlaca laquiratuminlaca Diosi laquiratuto casticaquichunae. Aman uyanlaca laquiraminlaca Diosi casticaquituchunae.

14 Lachi acola, soquila, tsachila seitonque canenato Diosica quereimin joyoe titori, epe palaquichunae. Tsanque quereiminlari se lonola itochunae. 15 Manca aco jali iton, ano iton, padeseinanari, ¿niyan quicaino junhun? 16 Jali cuwatuminnan lobainiide! tino itochunae. Ano cufituminnan peyainiide! tino itochunae. Sequenan manjiniide! titonan, ticanantiya cuwatunari, padeseiminchiri seitochunae. 17 Junni Diosica quereimin joyoe tinatonan, seque quitutori, epele quereiminla jochunae. Puyaca cuwenta jochunae.

18 Inca pansile nulari itsanlatichunae. Chiquilari seque quitumin jotonan, Diosica quereiminla joto, sen jolajoyoe latichunae. Junsi nulari laca pato, itsanlatichunae: Nuri Diosica quereituminnan, tenca mántanan seque quinae latichunae. Te, natiya tsan itoe. La seque nenayoe yape Diosica quereimin joeque miilaisa. Nula mantimini seque quitunari, ¿niyaito miintsan jochunan? nula Diosica quereiminla joeque. 19 Nulari Diosicari quereito, mancasiri Diosi joeque quereiyoe latichunae. Se joe. Juntonan, yucanchi ocolanan nula cuwentanan quereiminla joe mancasiri Diosi joeque. Tsanque quereito, Diosica jelechi jowinpominlae.

20 Nulari tenca itolajoe. Seque nenatutori, Diosica tennano epe jochunae. Aman junca miino muquilaquinari, in fiquica meralaquede! 21 Chiquilachi matu to tata Abrahanca tenca calaquede! Yari Diosica obedeseito, yachi nao Isaac mumun jominca su mesabi tsoreto, Diosichi cuwachinaminue. Tsanque seque quinanun tenchi Diosiri yaca sen tsachi joe tinue. 22 Yari Diosica quereimin joto seque quinue. Seque quitumanpari, Diosica epenan quereimin jono jomin jonhoe. 23 Junca Diosichi Pilabi itsanque chuteca joe: Abraham Diosica quereimin jonun tenchi Diosiri yaca sen joe tinueque chuteca joe. Yaca Diosichi amico tilatinueque chuteca joe. 24 Junni Abrahanca paca fiquica meráto, tsara miinola joe. Seque quiminlacasiri Diosi sen jolajoe tichunae. Diosica quereiminla jototiya, seque quituminlacari sen jolajoe tituchunae.

25 Aman Rahab niyan unilalabetiya seiton imin sona jotonan, yachi puebloca quirabi jaminlaca se larinue. Tsacarito, uyan minuse manherenue yape jun pueblobi mantaminla totelaquitusa. Tsanque se quinun tenchi Diosi Rahábicanan sen joe tinue. 26 Aman jana tsachila puyato, pucari jera epe iminla joe tenca loto. Junni Diosica quereinatonan seque quitutori, jun tsanquenan epe jochunae puyaca jun tsachi puca cuwenta.