1 Junni tseinunbi, mantá tan patelelabe, mantá tan unicalabe, mantaca micariminlabe, uyan mantaminlabe, jeralela tenpalaquinue. Junto Jesuca teleto, miya Pilátochica tanjito cuwapolaquinue. 2 Junni Pilátori Jesube panhato ¿Nuri israelítalachi miya joyun? tinue. Junni Jesuri tsan joyoe tinue. 3 Junni mantá tan patelelari Jesuca Pilátochi cale duque culpa quilaquinue. 4 Junni Pilátori Jesube manpanhato itsantinue:

—Nuca duque culpa quilaquinae tinue. ¿Nuri beconan pátiyun? tinue.

5 Aman Jesús mantimini man fiquinantiya beco patunue. Junni Pilátori junca duque wepananue.

6 Aman casa ma fiestate Pilátori doramin tsachi mancaca manlarimin jominue. Tsachilabe panhamin jominue moca manlarisa tenjanque. 7 Junni jun mate doraminla weyanlari miyachi soldadolabe totaalaquinato, tsachilaca totecala jominue. Junni yala manca Barrabás tinun jominue. 8 Junni duque tsachila layaica joto, Pilátobe manrocailainue yape jun watatenan doramin mancaca manlarisa. 9-10 Junni Pilato mantimini ura tenhinue israelita mantá tan patelelari pachisiri Jesuca cuwapolaqueeque. Junto israelítalari doramin mancaca manlarisa rocailainasanan, Pilátori itsantinue:

—Nulari israelítala joto, ¿nulachi miyaca manlarisa munaralarayun? tinue.

11 Aman tsan josanan mantá tan patelelari jerale layaica jun tsachilaca payica jominlanue niyaque Pilátobe panola jonunca. Jesuca natiya manlarituto, Barrabácari manlarisa carilaquina! tica jominlanue. 12 Junni tsachilari tsanque Barrabaca manlarisa rocailainasa, Pilátori itsantinue:

—Junni Barrabaca laritori, ¿nula israelítalachi miya joe tinun tsachicari niyan quisa tenjalaquin? tinue.

13 Junni layaica jun israelítalari beconan sonba pato, yaca corosibi totesa caride! tilatinue. 14 Junni Pilato yalabe manan manpato itsantinue:

—¿Niya jonan Jesuca tsanlatinayun? tinue. ¿Niyaque seiton quica jun? tinue.

Junni tsachilari jun fiquica natiya tennatuto, fécari sonba pato, corosibi totesa caride! latinue.

15 Junni Pilátori tsachilaca son josa carichique Barrabaca manlarinue. Junto Jesuca asotaquisa carito, soldadolachi cuwaponue yape corosibi totelaquisa. 16 Junni soldadolari Jesuca miyachi yabi wa tamochi tanwito, jerale jun bolon soldadolacanan layaisa carilaquinue. 17 Junni Jesuca duque lucarilaquinue. Miya ponun uraran morado camisaca yaca pocarilaquinue. Junsi po silica torinca quito, yachi misubi polaquinue yaca miyae tito. 18 Tsanquesiri, Jesuca miyaca cuwenta biba quito, israelítalachi miyaca biba quilaquisa! tilatinue. 19 Junni misule peso tede tsanchi quin, pipichi quin, quito quiralaquinue. Junsi miyachi cale cuwenta yachi cale telenhilainue. 20 Junni Jesuca michi pamiyato quiratobi, ya morado camisaca manlarito, yachi camisaca manpocarito, corosibi totebi tanjilainue.

21 Junni toteno jonun postoca tanjilainasa, Cirene tobi chumin tsachi, Simón tinun, witabi nechi manjanaminue. Ya Simón Alejándrochi, Rúfochi apa jominue. Junni soldadolari yaca Jesús puyano jun corosica nanasa carilaquinue.

22 Junni Jesuca Gólgota tinun posto fecári tanjilainue. Aman yalachi fiquichiri misu chide postoca “cólcota” tinun jominue. 23 Junni binobe mira tinun pilube palato, Jesuchi cutsawochi latinasanan, yari cuchitunue. 24-25 Junni quepenan, nuebe tsansite Jesuca corosibi wilocarilaquinue yape puyasa. Junni corosibi wilorasanan, soldadolari yachi panuca, camisaca quitsaleto calaquinue. Apostaito sorteaito miilainue mo yachi tsanpaca cano jonunca. 26 Junsi pila chutelaquinue ti culpa tenchi puyananunca. IN ISRAELITALACHI MIYA JOE que chuteca jominue.

27 Junnasa mantimini paluca tarinlaca Jesube parejo corosibi wilocarilaquinue manca yachi tsa nanchi, manca yachi jala nanchi. 28 Aman matu mate Diosichi Pilabi Jesuca itsanque pila chuteca jominue: Yari seitonlabe man parejori joe latichunaeque chuteca jominue. Junni tarinlabe corosibi pepuyanan, ya fiqui tsarasi lonue.

29 Junni junse polenaminlari Jesuca yucacurato, pachi misuca disi disi quito itsantilatinue:

—¿Nuri Diosichi yaca araleto peman mate manqueyanae tinuco? 30 Junni nuri tsansi poden jotori, tenca mántanan se lode! Corosibi nechi manpataniide! latinue.

31 Junni mantá tan patelelanan, mantaca micariminlanan Jesuca seitonque pato, lucarito quiralaquinue. Yaca yucacurato, yala tala itsanticaalaquinue:

—Ja tsachiri uyanlaca se larimin joyoe titonan, tencachiquenan natiya se lono podeitue. 32 Yari Diosi wenteca jun Cristo tinun tsachi joyoe ticae latinue. Chiquilachi miya jotori, corosibi nechi manpatantsan joe latinue yape chiquila yaca quirato quereilaisa.

Junni Jesube parejo wiloraminlanan yaca yucacuralaquinue.

33 Junnasa aman yotute nechi peman óra fecári jerale jun tote nemen inue. 34 Junni tre de la tardete Jesuri sonba pato itsantinue:

—Lachi Diosi, lachi Diosi, ¿niya jonan laca puraca joyun? tinue.

Aman yalachi fiquichi pato, “Elí, elí, lama sabactaní” tinue. 35 Junni jun quelole raminla weyanlari yaca “elí” tinaminca meráto, se merátuto, matu to Elíaca otinae latinue. 36 Tsanlatinunsiri tsachi manca sujito, cuwa tsanbi pele binoca atasuwato, chidebi chuteto, Jesuchi fiqui forole tilicarinue yape chusa. Junto camérantsan joe tinue. Pansile Elías yaca manpataribi jachunae tinue. 37 Jesús mantimini sonba atito puyanue. 38-39 Junni soldado capitan Jesuca ca tala ca tala quirato, Jesús atinanunca meráto, niyaque puyananunca quirato, itsantinue:

—In tsachiri Diosichi tsa Nao jominue tinue.

Aman Diosichi ya tamo quitsabi wa jali tsan dole tinraminue. Junni Jesús puyanasaleri, ya jali jamochi nechi jera chile sujinue.

40 Junni aman sonalanan jabile nechi pequiranaminlanue. María Magdalena, Salomé, manca María jominlanue. Ya María Josechi ayan, junsi nalalan Jacóbochi ayan jominue. 41 Jesús Galilea tobi canenasanan, ya sonala yabe penenato cuidaimin pejominlanue. Junsi duque uyan sonalanan Jerusalén puebloca Jesube pejato, corosite peraminlanue.

42 Junni ayuna jasaino ma ichun quebi inaminue. Jasaino ma tenchi jera seno ma jominue. 43 Junni duque mantá tan tsachi manca jominue José tinun. Yari Arimatea pueblobi chumin jominue. Yanan méraminue yape Diosi ya mantananun tsachi bolon pesuwasa. Ya mantimini sonba tenca ito, Pilátochica jito, Jesús puyacaca mancuwasa rocainue. 44 Junni Pilátori wepananue Jesús numa puyaca junhunque. Junni capitanca jasa carito, yabe panhanue Jesús numa puyanque. 45 Junni capitan Jesús numa puyaca joe tinan, Jesús puyacaca Josechi mancuwasa mantanue. 46 Junni Joseri sen jalica cato, Jesús puyacaca corosibi nechi patarito, jalichi lapito, menanun forochi tsorenue. Su chupaca bobeda cuwenta foro quisa carica jominue puyacalaca tsorechun. Junni Jesuca jun forochi tsoreto wa suca elanpolarito, jun foroca donue. 47 Tsanlaquinasanan, María Magdalénabe, Josechi ayan Maríabe, quiraca jominlanue tile Jesús puyacaca tsorecala jonunca.