1 Opisa Na jun sieteca seyo mancaca bolee. Junni ya junpaluca wiruraminla manca pae. Ya pánanun cunta cuwenta joe. Junni yari laca jato quirade! tinaminca meráyoe. 2 Jun quiranari fibaden calu jae. Calubi chumin arcobe flechabe tan joe. Mantaminla ponun coronaca yachi cuwae. Junni quera quicaato fe lomin joto, manan quera quito fe lobi jie.

3 Junsi manca seyocaman Opisa Na bolee. Junni junpaluca wiruraminla mancaman pato, jato quirade! tinaminca meráyoe. 4 Junni tsantinunsi, manca caluman lae. Lubaden calu joe asan tsanni quiran. Junni jun calubi chuminchi mantá cuwae yape tsachilaca pa tala nenasa carino podeisa, yape totaalaquisa. Junsi yachi wa espada cuwae.

5 Junsi manca seyocaman Opisa Na bolee. Junni junpaluca wiruraminla mancaman pato, jato quirade! tinaminca meráyoe. Jun quiranari pabaden calu lae. Jun calubi chuminni tedechi romana chumi jun joe. 6 Junni junpaluca wiruraminlachi quitsale nechi fiqui merajaniquee. Itsantie:

—Trico duque mica jonan, palu libra nacári cachun man malon entero trabajaquino joe tie. Sebadacanan sota libra nacári cachun man malon entero trabajaquino joe tie. Aseitecanan, binocanan tina yucapiyarilaquituna! tie duque mica jono joeque.

7 Junsi manca seyocaman Opisa Na bolee. Junni junpaluca wiruraminla mancaman pato, jato quirade! tinaminca meráyoe. 8 Jun quiranari, laquebalaraden calu lae. Jun calubi chumin “Totemin” tinun mumun joe. Yachi benele manca jae. Yari “Puyan Ocolachica Eremin” mumun joe. Yalachi mantá cuwae yape tsachilaca totelaquisa. Yalari tsachila junpalucale nechi mancaca toteno mantá talarae. Yala totenunla weyanlari quicaato puyan, weyanlari ano mochi puyan, weyanlari quiyanchi puyan, weyanlari papun animali toteca jun puyan, ilaichunae.

9 Junsi manca seyocaman Opisa Na bolee. Jun quiranari, Diosichi tobi Diosichi titiya epe cuwanun mesa tenpe duque tsachilachi tencala chularae. Ya tsachilari Diosichi fiquica meráminla jonun tenchi, Jesucrístoca cuenta quiminla jonun tenchi totaicala jominue. 10 Yalari sonba pato, itsanlatie:

—Miya Diosi, tsara sen joto, tsarasica pamin joe latie. ¿Junni chiquilaca toteminlaca casticaquino nisi cajoyun? tilatie. Tote chuminla chiquilaca totelaquee. ¿Numasi yalacanan casticaquino joyun? tilatie.

11 Junni tsantiminlachi fibaquin camisa cuwae. Junsi jeralelachi jun fibaquin camisaca cuwato, yalabe itsantie:

—Nasi cameralarana! tie. Weyanla catotainola joe nula cuwentanan. Nulachi acola, soquila, yalanan Diosichi mantate nenaminla joto, nula cuwenta totainola joe. Junni nula caméranola joe tie yalaca totelaquino fecári.

12 Junsi manca seyocaman Opisa Na bolee. Jun quiranari duque to wequee. To duque wenan, yo paba quidon ie duque pabaquin panunan quiran. Penan lubacan ie asannan quiran. 13 Tsabola yoquidobi nechi darapatilaie. Jana ico pucaca duque sonba wu quito jera darapatarimanhe. Jun cuwentanan tsabo darapatilaie. 14 Yo quidori tsanle piyapoleniie pilaquidoca tiwinanun cuwenta. Jerale wa dula, jerale pisala, uyanchi jera weto jilaie. 15 Junni tobi chuminla jele tilatie. Miyala, mantaminla, ocola, capitanla, sonbanla, titiya piyanlela jele tilatie. Peyunlanan, patronlanan jele tilatie. Jele tito, du minu tsaibi jera jilaie. Wa subinan wa forochinan tsailaie. 16 Junni duca pato, suca pato, itsanlatie:

—Chiquilaca dole cade! latie yape mantamin chununbi chumin chiquilaca quiratusa. Dode! latie yape Opisa Na chiquilaca paito catusa. 17 Yala paino ma numa fee tilatie. Tsachila monantiya junca wantailaituchunae tilatie.