1 Tavástaraꞌ, pataꞌaj tyámuaꞌ tyinoꞌxáꞌpuɨꞌɨntariꞌtzeꞌen,

jiꞌnye tyámuaꞌ nu tyiꞌtyínyechaꞌɨj canu tyiꞌtɨ́j jɨn áꞌɨtzeereꞌ.

Muéetzij nu jimi Tavástaraꞌ, tyámuaꞌ naa tyíꞌcaꞌnyej,

2 tyámuaꞌ paj naa tyinaaséj, pajta aꞌnáj tɨnaꞌaj nyeséejra,

¡pajta jaatyéesej jeꞌej nyaj tyíꞌmuaꞌtzej

pajta aꞌɨ́j huaséj jeꞌej tɨ een tyétyeꞌ ɨmuáj ɨ nyamuaꞌtzíiraꞌaj!

3 Aꞌnáj tɨnaꞌaj pu nye jitze séejreꞌ ɨ paj jɨn nyaxɨeꞌveꞌ

nyajta quee tyiꞌtɨ́j jɨn áꞌɨtzeereꞌ aꞌ jimi,

4 canu aꞌnáj huaꞌ jamuán tyuꞌxájtacaꞌ ɨ maj tyíꞌhueꞌtacaa

canu nyajta huaꞌantyánaxcacaꞌ aꞌɨ́ɨjma ɨ maj quee maꞌumuámuaꞌreꞌ.

5 Capu naꞌráanajchij maj jusɨꞌrihuaꞌan aꞌɨ́ɨmaj ɨ maj jeꞌej puaꞌaj tyityetyúuchaꞌɨj,

canu aꞌnáj huaꞌ jamuán tyuꞌyéꞌestej ɨ maj jeꞌej puaꞌaj rɨcɨj.

6 Nuꞌríj tyámuaꞌ naa tyaꞌnányamuejtyej nyajta quee cheꞌ tyiꞌtɨ́j jɨn tyiꞌijxánaꞌcɨraꞌ,

Tavástaraꞌ aꞌyaa nu tyáꞌxɨeꞌveꞌ nyaj ajtyáxɨɨrej joꞌtɨj joꞌtyéjvee ɨ nyaj japuan muatyáanajche,

7 nyajta jeꞌen muéetzij jimi tyuꞌtáchuiicaj,

nyajta aꞌɨ́j huataxáj ɨ tɨ jéehua naa tyuꞌséꞌrin muéetzij jimi.

8 Tavástaraꞌ nyáaj nu jaxɨeꞌveꞌ, aꞌɨ́jcɨ ɨ tyeyúuj ɨ paj tzajtaꞌ séejreꞌ,

joꞌtɨj jáꞌsejreꞌ aꞌɨ́jna ɨ paj jɨn huápuɨꞌɨj naa huaséꞌrin.

9 Capáj náaꞌriꞌracareꞌen ɨ nyajúuricamej huaꞌ jamuán ɨ maj tyiꞌijxánaꞌcɨraꞌ,

capáj tyiꞌtáꞌcareꞌen tɨ nye jimi aꞌyan tyéꞌyiꞌcan tɨꞌɨj tyihuáꞌuurej aꞌɨ́ɨjma ɨ maj tyíꞌtyacuiꞌcaa,

10 aꞌɨ́ɨjma ɨ tɨ huaꞌ muácaꞌ jitze séejreꞌ

ɨ maj jɨn jeꞌej puaꞌaj tyityetyúuchaꞌɨj ajta tyiꞌtɨ́j maj jɨn tyeɨ́tyee cuanamuaj.

11 Nyajta nyáaj canu tyiꞌtɨ́j jɨn áꞌɨtzeereꞌ

¡pataꞌaj nyajapuáj huatányuunyij, náꞌancuꞌvaxɨꞌ nyéetzij!

12 Tyámuaꞌ nu naa tyaꞌrányacaꞌnyej ɨ nyaꞌ ɨ́ɨcaj jɨmeꞌ,

tyámuaꞌ nu tyeetyátoosij ɨ Tavástaraꞌ metyiꞌséeracaj ɨ tyeɨ́tyeristyamuaꞌmeꞌen!