69
Jeꞌej tɨ tyíꞌjijhuaj aꞌɨ́jna ɨ tɨ jeꞌej tyóomuaꞌtzej
Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jɨmeꞌ ɨ cuíinarij tɨ aꞌyan huatóomuaꞌaj tɨjɨn: “Tzuhuáa.” David tɨ jaꞌaꞌrij.
1 Pataꞌaj huatányuunyij, nyaj Dios,
jiꞌnye nuꞌríj tɨn atyámuɨꞌsij a jáataꞌ;
2 nuꞌríj ajoꞌcárutyij aꞌájna joꞌtɨj vaꞌtɨ́j jaꞌajréxaj
ajta quee jeꞌej tyíɨꞌrij jóꞌnyaj jaꞌrányacaꞌnyej.
Aꞌáa nuꞌríj jaꞌráꞌaj joꞌtɨj jéetzeꞌ jaꞌtyáatɨꞌ
ajta arí tɨn nɨeꞌtarɨésij ɨ tɨ caꞌnyíin jɨn muɨꞌyej.
3 Capu cheꞌ nyaɨꞌriityeꞌ nyaj caꞌnyíin jɨn huajíjhua,
jéehua puꞌríj huápuɨꞌɨj naꞌantyáacuiꞌ,
ɨ nyajɨꞌɨj nu nyajta nyeríj jɨn huácuaꞌnaxɨj
aꞌɨ́jcɨ jɨmeꞌ nyaj jéehua nyeríj áꞌtyeej nyaj tyiꞌijchóꞌveꞌ ɨ Dios jimi.
4 Muꞌríj jéetzeꞌ huatámuiꞌriacaꞌ ɨ maj chaꞌmanaꞌaj tyiꞌtɨ́j jɨn nyaxanaꞌveꞌej
quee aꞌchu nyaj puaꞌmácan cájcɨpuaj ɨ nyamuꞌuj jitze,
muꞌríj huatámuiꞌriacaꞌ ɨ maj nyéjchaꞌɨɨreꞌ,
ɨ maj chaꞌmanaꞌaj naꞌantyipuáꞌrityaꞌmuꞌ
majta nyahuavii nyaj huoꞌtátuiireꞌen tyiꞌtɨ́j nyaj quee huanáhuaj.
5 Nyaj Dios, muáaj paj jamuaꞌreej nyaj huápuɨꞌɨj quee tyúꞌnamuajracaꞌaj;
capu jeꞌej tyíɨꞌrij nyaj jaatyáꞌavaaj tyiꞌtɨ́j nyaj jɨn ootyáꞌɨtzee.
6 Tavástaraꞌ, Dios mu paj néijmiꞌi putyíꞌuurej pajta néijmiꞌi jɨn antyíaꞌmuaꞌreej,
micheꞌ quee tyéviꞌsiꞌ huataséjreꞌen nyáaj nyej nyij puéꞌeenyeꞌ,
aꞌɨ́ɨmaj ɨ maj muéetzij jitze tyíꞌcaꞌnyej,
huaꞌ Dios aꞌɨ́ɨjma ɨ maj Israel jitze ajtyámaꞌcan,
micheꞌ quee jeꞌej tyityóomuaꞌajcaj nye jitze maꞌcan
aꞌɨ́ɨmaj ɨ maj jéehua muéetzij muahuoo.
7 Aꞌ jitze maꞌcan nu nyeríj néijmiꞌi tyoꞌtáviicueꞌriꞌ ɨ maj jeꞌej puaꞌaj tyíꞌnyaxaj,
nye nyéerimij pu arí jitze séejreꞌ ɨ tɨ tyéviꞌsiꞌ huaséꞌrin,
8 aꞌyaa nu een tɨꞌɨj ɨ tɨ seequéj huaséꞌrin majta quee nyamuaꞌtyej
aꞌɨ́ɨmaj ɨ maj nyeꞌihuáamuaꞌ puéꞌeen.
9 Jéehua nu huápuɨꞌɨj jaxɨeꞌveꞌ aꞌɨ́jcɨ aꞌ tyeyúuj,
nye jitze pu arí tyiꞌráꞌaj aꞌɨ́jna ɨ tɨ jeꞌej puaꞌaj tyíꞌeen
aꞌɨ́jcɨ jɨmeꞌ maj muéetzij jeꞌej puaꞌaj tyíꞌmuaxaj.
10 Nyatɨꞌɨjta nyeyiinyej nyajta nye ítziꞌveꞌej, aꞌɨ́ɨmaj mu jeꞌej tyíꞌnyaxaj;
11 tɨpuaꞌaj nyényaxaamujrityaꞌaj, néijmiꞌi mu aꞌɨ́ɨmaj naatyáꞌaꞌtzij.
12 Néijmiꞌi mu nyéetzij nyetyáxajta,
majta ɨ maj taꞌruj aꞌɨ́ɨmaj mu nyéetzij nyetyéchuiicaj.
13 Nyajta nyáaj, Tavástaraꞌ, nyáaj nu muéetzij jimi huatyényuusij.
Nyaj Dios, ¡pataꞌaj ijíij naatáhuɨɨreꞌen!
Aꞌɨ́jcɨ jɨmeꞌ ɨ paj jéehua nyaxɨeꞌveꞌ, ¡ijíij paj naatájeevej!
Aꞌɨ́jcɨ jɨmeꞌ paj jɨn tyámuaꞌ een, ¡nyajapuáj paj huatányuunyij!
14 ¡Capáj tyiꞌtáꞌcareꞌen nyej nyij atyájrutyej joꞌtɨj joꞌjáxuꞌtaꞌ!
¡Nyajapuáj paj huatányuunyij aꞌɨ́ɨjma jimi ɨ maj nyaxanaꞌveꞌ
pajta aꞌájna joꞌtɨj ɨ jájtyij jaꞌtyáatɨꞌ!
15 ¡Capáj tyiꞌtáꞌcareꞌen tɨ nɨeꞌtárɨeenyij ɨ tɨ caꞌnyíin jɨn muɨꞌyej!
¡Capáj tyiꞌtáꞌcareꞌen tɨ ɨ jájtyij tɨ viváajmaꞌaj atyúutaꞌhuaj
anyojoꞌcárujtyeꞌen ajta jeꞌen naꞌváꞌnaj!
16 Tavástaraꞌ, pataꞌaj naatájeevej;
¡muáaj paj néijmiꞌi jɨn tyámuaꞌ een pajta jéehua taxɨeꞌveꞌ!
Aꞌɨ́jcɨ jɨmeꞌ ɨ paj jéehua tyámuaꞌ tyihuojóꞌmuaꞌraj, nyejitzé paj rányeerej;
17 ¡capáj manúujɨpuan nyéetzij ɨ nyaj muahuɨɨreꞌ!
¡Caꞌnácan paj naatájeevej, jiꞌnye jeꞌej pu puaꞌaj tyíꞌnyaꞌuurej!
18 Nyejitzé paj ajtyáxɨɨrej, pajta jeꞌen nyajapuáj huatányuunyij;
¡nyajapuáj paj huatányuunyij aꞌɨ́ɨjma jimi ɨ maj nyéjchaꞌɨɨreꞌ!
19 Muáaj paj jamuaꞌreej maj jeꞌej puaꞌaj tyíꞌnyaxaj,
nyajta japuéjtzitarej aꞌɨ́jcɨ jɨmeꞌ ɨ tɨ tyúꞌtyeviꞌrasteꞌ nyajta ɨ maj jɨn náꞌxaahuaj,
muáaj paj huáꞌmuajtyej aꞌtyán maj aꞌɨ́ɨn puéꞌeen ɨ maj nyéjchaꞌɨɨreꞌ.
20 Puꞌríj nyatzájtaꞌ jeꞌej puaꞌaj náaruj ɨ maj jeꞌej puaꞌaj tyíꞌnyaxaj,
¡capu núꞌcaꞌnyistiꞌ nyajta quee cheꞌ nyacaꞌnyej!
Chaꞌnaꞌaj nuꞌuj jahuoo
aꞌɨ́jcɨ ɨ tɨ tyámuaꞌ tyinaatyéjeevej ajta náꞌancuꞌvaxɨꞌ.
21 Huáꞌveꞌrij mu atyájraj ɨ nyacueꞌraj jitze,
ajta nyatɨꞌɨj huataíꞌimuj nahuáj mu naatáꞌ tɨ ántzinaj.
22 ¡Cheꞌ aꞌɨ́jna ɨ huaꞌ méesaj joꞌmaj tyajáꞌcuaꞌcaa huaꞌ jamuán ɨ juꞌ amíincustyamuaꞌ
cheꞌ aꞌɨ́ɨn tyiꞌpueꞌéenyeꞌej jáꞌraꞌnyij ɨ maj jɨn huavíviꞌriꞌhuaj!
23 ¡Pataꞌaj huoꞌtáꞌan mej mij aracúcuꞌnyij muáꞌraꞌnyij
ajta mej mij aꞌnáj tɨnaꞌaj juviváaj ɨ jutɨ́jchij jitze!
24 Huaꞌ jitze paj jarárɨeenyij ɨ paj jɨn nyúꞌcamuɨꞌ;
¡pajta aꞌɨ́jna jɨn huoꞌtyátɨeeraj ɨ paj jɨn nyúꞌcamuɨꞌ!
25 Cheꞌ quee cheꞌ ajaꞌtyiꞌtɨ́ɨtaj aꞌájna joꞌmaj tyojoꞌtyáꞌɨnaamuaa,
ajta quee cheꞌ aꞌtɨ́j aꞌáa jaꞌchajca joꞌmaj aꞌɨ́ɨmaj joꞌcháatɨmaꞌcaa;
26 jiꞌnye aꞌɨ́ɨmaj mu jamuarityeꞌ aꞌɨ́jcɨ ɨ paj muáaj puéjtzij jaatáꞌ,
majta jáꞌxaahuaj ɨ tɨ jatyácuiꞌnyij aꞌɨ́jcɨ ɨ paj muáaj tyaapuéj.
27 Aꞌɨ́j paj pajta huoꞌriaꞌrɨeeraj ɨ tɨ jeꞌej puaꞌaj een;
¡cheꞌ quee huoꞌcɨꞌtyij pej pij tyihuoꞌtúꞌuunyiꞌ!
28 ¡Huoꞌrioꞌuunaj jeꞌej maj ántyaꞌruj aꞌɨ́jcɨ jitze ɨ yuꞌxarij júuricamej tɨ jitzán séejreꞌ!
¡Capáj huáꞌyuꞌxaj joꞌmaj jaꞌyuꞌsiꞌ ɨ maj quee tyiꞌtɨ́j jɨn áꞌɨtzeereꞌ!
29 Pajta nyéetzij, ɨ nyaj tyíꞌcuiꞌ nyajta jeꞌej tyéꞌnyamuaꞌtzej,
naꞌajriáj, nyaj Dios, pajta nyajapuáj huatányuunyij.
30 Nyetyatatyójtziꞌreꞌej nyetyiꞌchuíicaj ɨ Dios,
jimi nu tyuꞌtáchuiicaj nyetyaatatyójtziꞌreꞌej,
31 Tavástaraꞌ puꞌij jéetzeꞌ tyámuaꞌ tyoꞌtóomuaꞌsij
quee tɨpuaꞌaj túuruꞌ jimi naatámuꞌvejritaj
naꞌríij visáaruꞌ tɨ avaꞌahuájmee ajta anacáarɨeꞌejmee.
32 Matɨꞌɨj aꞌíj huaséj, aꞌɨ́ɨmaj mu huatóotyamuaꞌveꞌsij ɨ maj jeꞌej tyityóomuaꞌtzej
ajta caꞌnyíjraꞌaj huataséjreꞌsij aꞌɨ́ɨjma jimi ɨ maj jahuoo ɨ Dios;
33 jiꞌnye ɨ Tavástaraꞌ pu huáꞌnamuaj aꞌɨ́ɨjma ɨ maj quee jeꞌej tyéejviicueꞌ
ajta quee huaꞌxanaꞌveꞌ aꞌɨ́ɨjma ɨ maj eetyánamiꞌ ɨ maj jitzán ajtyámaꞌcan.
34 ¡Setyuꞌtatyójtziꞌreꞌ ɨ Tavástaraꞌ tajapuá tɨ séejreꞌ, ɨ cháanacaj ajta ɨ jájrij,
majta néijmiꞌi aꞌɨ́j maj jitze tyíꞌtyesejreꞌ!
35-36 Jiꞌnye Dios pu aꞌɨ́j japua huatányuusij ɨ Sión
ajta tyámuaꞌ jaꞌuurej ɨ chájtaꞌnaj aꞌáa tɨ tyejeꞌejtyámaꞌcan a Judá.
Huaꞌyojmuaꞌ ɨ maj tyíꞌhuɨɨreꞌ aꞌɨ́ɨjma pu aꞌrij jaꞌmej ɨ chájtaꞌnaj Sión tɨ ántyapuaj,
aꞌáa mu mij jaꞌcháaj muáꞌjuꞌun majta néijmiꞌi tyuꞌtyóoaꞌrityeꞌsij,
aꞌɨ́ɨmaj ɨ maj jaxɨeꞌveꞌ ɨ tɨ jɨn ántyapuaj aꞌɨ́ɨ mu aꞌáa joꞌcháatɨmaꞌaj muáꞌjuꞌun.