1 ¡Alelúuyaj!

¡Setyuꞌtatyójtziꞌreꞌ ɨ Tavástaraꞌ jútyeꞌ ɨmuáj u tajapuá!

¡Setyuꞌtatyójtziꞌreꞌ ɨ Tavástaraꞌ jútyeꞌ ɨmuáj!

2 ¡Muaꞌaj xu siajta tyaatatyójtziꞌreꞌen, néijmiꞌi mu siaj jimi tyíꞌhuɨɨreꞌ!

¡Muaꞌaj xu siajta tyaatatyójtziꞌreꞌen, tajapuá siaj tyíꞌchaꞌɨj!

3 ¡Setyuꞌtatyójtziꞌreꞌ siajta muaꞌaj, xɨcáj ajta ɨ máxcɨrɨeꞌ!

¡Muaꞌaj xu siajta tyaatatyójtziꞌreꞌen, tatzárij siaj naa huaséꞌrin!

4 ¡Tyuꞌtatyójtziꞌreꞌ, tajapuá jútyeꞌ ɨmuáj paj jáꞌsejreꞌ,

pajta muáaj jájtyij, japuan paj jáꞌsejreꞌ ɨ tajapuá tɨ séejreꞌ!

5 Setyuꞌtatyójtziꞌreꞌ ɨ tɨ jɨn ántyapuaj ɨ Tavástaraꞌ,

jiꞌnye aꞌɨ́ɨ pu séej naꞌaj jɨn tyuꞌtaꞌíjtacaꞌ aj puꞌij néijmiꞌi tyúꞌtaavijhuacaꞌ;

6 aꞌɨ́ɨ pu aꞌyan tyeetyájtoo tɨꞌij jusén jɨmeꞌ séjreꞌej,

ajta nyúucarij jɨn tyuꞌtaꞌíjtacaꞌ tɨ aꞌyan tyúuxɨeꞌveꞌ maj néijmiꞌi aráꞌastej.

7 ¡Setyuꞌtatyójtziꞌreꞌ ɨ Tavástaraꞌ ɨ cháanacaj japua,

tyiꞌtyán maj viváajmaꞌaj tyíꞌtyesejreꞌ ɨ jájritzeꞌ, ɨ jájritzeꞌ joꞌtɨj jaꞌtyáatɨꞌ!

8 ¡Ɨ maj tyóonaꞌaxcavaꞌra majta ɨ tyéetyee, ɨ séerij ajta ɨ tɨ huarɨéenajyiꞌij!

¡Ajta ɨ áacaj tɨ aꞌyan rɨcɨj jeꞌej tɨ tyuꞌtaꞌíjtyiꞌhuacaꞌ!

9 ¡Ɨ jɨríj ajta ɨ tɨ caviꞌyetzeꞌejmee!

¡Néijmiꞌi ɨ jucúj ajta ɨ ítyeɨꞌrij tɨ tyíꞌtajcaa!

10 ¡Tyiꞌtyán yaꞌmuáatyee majta ɨ simuáruunyij!

¡Ɨ pínaꞌsee majta ɨ chóotaꞌ maj huacɨ́ɨnyajcɨꞌɨj!

11 ¡Ɨ maj tyíꞌijta ɨ cháanacaj japua majta ɨ chájtaꞌnaj jitze!

¡Ɨ maj tyíꞌijta majta ɨ tajtúhuaanyij cháanacaj japua maj tyíꞌijta!

12 ¡Tyétyacaa majta ɨ úucaa, tyáamua majta ɨ huáasij!

13 ¡Néijmiꞌi xu tyaatatyójtziꞌreꞌen ɨ Tavástaraꞌ tɨ jɨn ántyapuaj,

jiꞌnye aꞌɨ́ɨ puꞌuj aꞌɨ́jna jɨn ántyapuaj ɨ jútyeꞌ ɨmuáj tɨ jáꞌmaꞌcan!

¡Ɨ tɨ jɨn néijmiꞌ putyiꞌuurej tajapuá pu jáꞌsejreꞌ ajta íiyan cháanacaj japua!

14 ¡Aꞌɨ́ɨ pu tyuꞌtáꞌ mej mij néijmiꞌi putyíꞌuuriaj ɨ maj jitzán ajtyámaꞌcan!

¡Aꞌɨ́ɨ mu néijmiꞌi tyaatatyójtziꞌreꞌej ɨ maj jimi tyámuaꞌ een,

aꞌɨ́ɨmaj ɨ maj Israel jitze ajtyámaꞌcan, chájtaꞌnaj tɨ jimi véjriꞌ séejreꞌ!

¡Alelúuyaj!