1 Tsa'caen tsomba omboe Jesúsja ccase inginga attian, ingi Tiberias mar otafani can'jen'ni. Qquen tsu tiseja attian:

2 Fae'ngae gi can'jen'fa Simón Pedro, Tomás –tsa Gemelo qquen su'cho, Natanael– tsa Galilea'su Caná canqque'su, ña quindya Santiago, ña, faesu dos Jesúsma shondosundeccu. 3 Tsa'caen can'jemba Simón Pedroja su:

—Avu ttatta'su gi jayi.

Tsa'caen susi ingi'qque su'fa:

—Ingi'qque quei'ccu jiye.

Tsomba japa shavonga otse'fa. Tsa'ma tsequi cose ni fae avuveyi'qque indi'fambi gi. 4 A'taningae Jesúsja mar otafani ccutsu. Tsa'ma ingija tise've atesu'fambi. 5 Tsonsi Jesús inginga su:

—Dushundeccu, ¿avumanda ti qui indi'fambi?

Ingija su'fa:

—Me'i'fa.

6 Tsonsi Jesúsja su:

—Shavo tansinfama vacho'yita qui avuma indi'faya.

Tsa'caen vachopa gi vacho'vama somboeñe osha'fambi tsain'bitssia avusi. 7 Tsomba ña Jesús in'jan'cho gi Pedroma su:

—¡Na'su tsu!

Nane ondiccu'jema oshichhapa shacari'ccuyi vacho'jepa Simón Pedroja “Na'su” qquen pañamba tise ondiccu'jema ondiccupa marnga butto ca'ni otafani somboye. 8 Tsonsi ingija vacho'vama qquitsapa shavoma ccattufaen'fa patundu'ndunga. Biambi'cco tsu, cien metroqquia'can. 9 Ccattufapa gi si'nge oque'choma atte'fa. Tsani avu otta'choma panma'qque atte'fa. 10 Tsonsi Jesúsja su:

—I'faja que'i indi'cho'su avuma.

11 Tsa'caen susi Simón Pedro shavonga japa va'chovama sania qquitssa somboen patundu'ndunga. Nane rande avu ciento cincuenta y tres tsu jin. Tsa'caen tsain'bitssia avuma indi'ma vacho'vaja ttumbi. 12 Tsonsi Jesúsja su:

—Jipa an'gi'faja.

Majañi'qque gi “¿majan qui?” qquen iñajampaña'fambi Na'susi atesupa. 13 Tsonsi Jesúsja catsepa panma isupa inginga afe. Avuma'qque afe.

14 Jesúsja pa'cho'ye qquendyapa tsequi'ccu tres se tsu ingi tisema shondosundeccunga attian.

15 An nanimba Jesúsja Simón Pedroma iñajampaña:

—Simón, Jonás dutssi'ye, ¿vandeccuma ti'tsse ti qui ñame ñotsse in'jan?

Pedroja su:

—Ju Na'su, que qui atesu ña quema in'jan'choma.

Jesúsja su:

—Oveja du'shuma o'fianqquia'caen ña a'ima atesianjan.

16 Tse'ttie ccase iñajampaña:

—Simón, Jonás dutssi'ye, ¿ñama ti qui ñotsse in'jan?

Pedroja su:

—Ju, Na'su, que qui atesu ña quema in'jan'choma.

Jesúsja su:

Tsa'caenda ña a'ima coiraja ovejama'caen.

17 Tsomba ccase, tercera se iñajampaña:

—Simón, Jonás dutssi'ye, ¿aqquia ti qui ñama in'jan?

Pedroja ñombi'ye, ja'ño tres se iñajampaña'ba “¿Aqquia ti qui ñama in'jan?” qquen iñajampañasi. Ñombi'yepa su:

—Na'su, que qui pa'ccoma atesucho. Que qui atesu ña quema in'jan'choma.

Tsonsi Jesúsja su:

—Tsa'caenda ña a'ima atesianjan ovejama'caen. 18 Nane ñoa'me gi su, que chuiteja tisu qui ondiccupa mani jaye in'jan'da ja. Tsa'ma coenza ccashe'yeve da'ta qui que tivema yasasi faesu tsu quema ondiqquiamba que jaye in'jambinia angaya.

19 Tsa'caen supa Jesúsja condaye in'jan ma'caen Pedro pa'ta poiyi'cco a'inga canjaeñe Chigaja ti'tsse'tssiave. Tsomba Jesúsja su:

—Ñai'ccu jija.

20 Piyicamba Pedroja ñama atte, tise sepaccofae jiña'choma. (Nane Jesús ñama ñotsse in'jansi gi an'jen'choni tisei'ccu pporotsse dyaipa iñajampaña: “Na'su, ¿majan tsu quema indiye afe'su?”) 21 Pedro ñama attepa Jesúsma iñajampaña:

—Na'su, ¿vaja ma'caen tsu daya?

22 Jesúsja su:

—Ña, ña ccase jiya'ngae tise canseye in'jan'ninda ¿jongoesie qui fundo'je? Queja ñai'ccu jija.

23 Tsa'caen susi fae'ngae in'jan'chondeccunga aya'faja asitta ñajan paya'bi'choa've. Tsa'ma: “Juanjan paya'bi” qquen Jesúsja Pedronga condambipa: “Ña, ña ccase jiya'ngae tise canseye in'jan'ninda ¿jongoesie qui fundo'je?” qquen tsu su.

24 Ña gi tsa shondo'su. Osha'choma ña tso'fei'ccu attepa gi qquen tevaen. Poiyi'cco tsu atesu'fa ñajan tansintsse afa'su.

25 Toya tsu tsain'bitssi Jesús tson'choja. Nane pa'tssima fae'cco fae'ccove tevae'ninda va ande'qque pa'cco tsesu tevaen'jema an'biañe oshambi, qquen gi in'jan.

Tsangaeyi.