3
Itsavetantanaquequea Joanca Viñacajatantatsica oquitamampororoipojaquegueti
(Mt. 3.1-12; Mr. 1.1-8; Jn. 1.19-28)
1 Coramani imajirontaca Tiverio Sesa Iromaqui. Iroompa ovegaratacagueti 15 ajagantsini imajirontacagueti, choocaquea iramajirore pajitatsica Pontsio Pirato itigarancaqueca irinetsanajiaqueneriniji Joreaquitica. Iriraquea Erorishi*Iriratica Erorishi irio icantajitica Erorishi Antipashi. Iririni aisa ipajita Erorishi, irio majirontanquitsica ivoaquegueti Jesoshi (pamenero Irc. 1.5; Mt. 2.1-19). iriguentiquea netsanajiguirica Garireaquitica. Choocaquea iriguentijeguite pajitatsica Jeripe, iriatimpaquea iriguentiquea netsanajiguirica Itoreaquitica aisa Teraconitequitica. Iriraquea netsanatantatsica ontaniqui Aviriniaqui ariguenti ipajica Irisaniashi. 2 Aisa choocaquea mavite saserorote anaantamajatanquitsica. Aparoquea ipajitaquea Anashi, iriraquea itsipa ipajita Caipashi. Iriraquea Joanca, irijanite Sacaria, choocaquea ontaniqui, ichoocaquequea osamani oquitamampororoitapojigueti. Ariquea iquenquetsatacaaqueri Aapani Irioshi. 3 Iquemaquerigueti Joanca yoanaquequea icantanacaroquea Jororanequi, itsitacavaejianaqueriqueate choocajiatsica oraniqui, itsavetantavaetanaqueroqueate icantajiguiriquea: “Pincantashitatijaianajempa povashiantajianajero pipeacaaguishejiavecaca, piviñacajajianaquempaquea aatonijite icatsimatimentajiguimpiroquea Aapani Irioshi maasanopae pigovaeguisherejia, manaqueate irishetajempiroquea.”
4 Aritarite itionquicaroquea Isaiashini coramani icanquequea:
“Inquenquetsataquequea oquitamampororoitapojigueti iririjencani, incanquequea:
‘Pinetsanatashijiavaquempari Amajirote inquenantapojempaca,
pintanarejagueteneri iguenavoquiropae ontampaticapoquitantanaquempaca.
5 Querocacaquea oquichovitoquiaguecagueti intijajiquero cameetsanijite ovepampajantanajempaca.
Oraquea otsempiguetatsica aisa otsonquiinapae irivepampajajiguequero.
Oraticaquea quenavoquirontsi ticopoquiguetanquitsica ontampaticavoquitanaque.
Irooqueate quenavoquirontsi quichovitoquiaguetanquitsica irivevajajiguetaqueroqueate.
6 Ariquea iramenajiaque maasano caquinte quero icota Aapani Irioshi imeshiantigueti.’ ”✡Is. 40.3-5.
7 Oraqueate yoayoaitanaquegueti tirorerere caquintejia iriviñacajajigueriquea Joanca, iriatimpa icantajiavaqueriquea: “¡Quejejiaquempiquea irijanijiate sanatari! Pitsanirovetacaquea. ¿Taate cantajiaquempi picoraquecoraqueitantacaca acaniqui noviñacajajiaquempiquea aatonijite icatsimajiguimpiquea Aapani Irioshi oncoramanitapojajegueti incatsimatimentajiaquerigueti maasano igovaeguisherejia? 8 Iintsija pinetsanamajajianaquempaja iramenajiaquempinijite maasano arimajaca picantashitatijaianaja povashiantajianajiro picovaeguishevetacaca, pintsaroventamajatanajemparija Aapani Irioshi. Imaica aatoja picantajigui: ‘Aatoqueate icatsimajigana Aapani Irioshi, naroguentitari ichoviquijiani Averaameni.’ Pamenajigueroja oratica mapiporoqui. Irininquegueti Aapani Irioshi iragavejaquequeate impeacaajiaquemparoquea ichoviquivaejianaqueca Averaameni. 9 Jac, yaajitiro poshontyo, itsitijitanaquero inchaquijitaquero ovari maasano inchato teeca oncameetsateji oitsoqui, ariquea intajaiquero paamariqui.”
10 Iriatimpajia icantsijigariquea:
—¿Querocaquea noncojiaquempani?
11 Icantiriquea Joanca:
—Choocagueti ashintanquitsica mavite iitsaare irojocagaranqueneriquea quericaca teeca inchoocatacoteji. Aisa quericaca choocatacotanquitsica isheca irojocaqueneriquea teeca inchoocatacoteji.
12 Ariquea ichoocajiaquequea oraniqui capiocapinijiguinirica majirontatsica imentaquipae,†imentaqui. Coramani tee inchoocavetempaji quenapapana ipeacaantajitaca paperipana, iroguenti choocatanquitsi imentaqui cavorejatatsica. Irootaque ivegaratantajitaca coramani. iroguentiquea icoraquetashijiaque iriatimpajia aisa incampojeriquea Joanca iriviñacajajiaqueri. Iquemajiaquerigueti iquenquetsavaequegueti Joanca icantsitanacaquea iriatimpajia:
—Tsatacaantantatsica, naatimpajia, ¿querocaquea noncojiaquempani?
13 Icantsijigariquea:
—Imaicaquea aviatimpajia aatoja poganaajiguiniriquea pigonorojia, iroguenti paajiaque intati icanqueca majirontatsica.
14 Ariquea icoacojiaqueriqueate coaretapae aisa icantsijigariquea:
—Naatimpajia, ¿querocaquea noncojiaquempani?
Icantajiguiriquea Joanca:
—Aviatimpajia aatoqueate paapitsajiguiritsi taaca opajitapae yashincaca itsipapae aisa aatoquea picantajiguiri: ‘Aatogueti pojocanaro noninqueca noncatsimaquempiquea.’ Aatoja pamanantajigui imentaquipae itsipa, aatoja picantitsi: ‘Aatogueti pojocana nontsojevenquempiquea incatsimaquempiquea majirontatsica.’ Iriraquea imentaquitsite ivegaraquempica majirontatsica ariotapojaquequea, aatoquea pinintajiguitsi itsipapae.
15 Irirajiaquea maasano capiocajianquitsica oraniqui ariquea icojianaca inintamajajianaquequea intsamajajiaqueri Joanca iriocajate Quirishitotatsica.‡Quirishitotatsica. Iguenquetsatsarequi guiriegojia icanquegueti Christos (Quirishito) manaquea ocanque “Ishaguijitaqueca” aisa “Icoguiaqueca”, irishaguijitaqueritari orejiqui orivo irirajia icoguiajiaqueca impeaquempa imajirojiate irooca isaserorotejiate. Irira Quirishito iriotaquequea itsavetacotsitacaca tsavetantajiatsica coramanitica intigarancaque Aapani Irioshi impeaquempaniji Imajirojiate maasano. 16 Cotanquitsiquea Joanca icantajiguiriquea maasano: “Naatimpa iroguenti nantaque noviñacajatantajiaquempiro oja iramenantajiquemparoca arimajaca picantashitatijaianaca povashiantajianajiroquea pipeacaaguishetacaca, cotanquitsiquea incoraquepoje impoitapojenaneca caaviji yanaaquenaquea yagavejamajati. Ooshiatsi, aatotarite noquempejitaritsiquea iriatimpa nompeaquempame amiquerineca noishorejacoquerimeca igaviguitire. Iriatimpa inquempetacaantaquemparo iroviñacajatantajiaquempiri Ishire Aapani Irioshi aisa paamari.§Paamari oquenquetsatacotaquero mavitepae. (1) Pamenero otsapa 17 acaniqui ocantacoquerogueti camorecari intaantajitaquempaca caarica netsanatiro ininqueca Aapani Irioshi. (2) Pamenero aisa Ya. 2.3 ocantacoquerogueti icoraquepojaquegueti Ishire yamenajiquero quejevetaca paamari. (3) Pamenero aisa 1 Co. 3.13 ocantacoquerogueti iramenantajitaquemparogueti yantaguetaqueca maasano caquinte. 17 Incoraquepojaquegueti iroashiguetapojempariquea queri tsaroventamajacarica. Inquempetanaquemparoquea aguerogueti oitsoqui, asagorejitemparo, ampishoncavaqueroquea oncoraquejencaquegueti chovigajenca, aanaqueroquea osagoma, onchoocatashitanaquempa oitsoqui. Aguijaavaqueroquea shimatoqui anquempoguijitemparoquea. Oraquea osagoma antaitemparoquea. Ariquea inquempetaquempaquea Amajirote incapiocajiapojaqueriquea tsaroventamajacarica intsipatsipaitanajempari jenoqui ichoocatigueti Aapani Irioshi. Iriraquea teeca intsaroventajiguempariji intigarancaqueriquea camorecariqui teeca ontsivacavaete, incoquempaniquea irantsipevaejiaquempaquea.”
18 Ariquea iquejetacaquea imaica Joanca icamantajiaqueri maasano quero incojiaquempani, oshequi icamantaguetaqueri, itsavetacotimojiaqueri Quenquetsatsarentsi Oganejencatatsica.
19 Aisa icantomajaqueriquea majirontatsica Erorishi, yamenaqueriquea yaapitsaqueriqueate iriguentijeguite imanquigare pajitatsicaquea Eroriashi. Teetarite aparoquea onchoocateji ocatica. Icantimentaguequeriquea aisa taaca opajitapae icovaeguisheguetacaca. 20 Ariquea yogaavaetanaca Erorishi, yogavitaquero oca: isantanatacotsitariquea Joanca.
Iviñacajatacaantacaquea Jesoshi
(Mt. 3.13-17; Mr. 1.9-11)
21 Oraqueate tequerataguetiquea irisantanatacojiteriji Joanca, choocatirajaquea iviñacajatantaguitiniquea, ariquea iviñacajatacaantajiaca oshequini caquintejia, ariquea iquejetacaquea aisa Jesoshi iviñacajatacaantacaquea iriatimpa. Ariquea iriraquea Jesoshi yamanaqueriquea Iriri. Iroompaquea yamanaquitiguiriquea otanarejanacaquea inquite 22 yamenajitavaqueriquea Ishire Aapani Irioshi iquempetapojacariquea emoreni yampiguiricashipojacariquea iriatimpaqui. Ariquea iquenquetsajencajitanaque jenoqui inquitequi, icanque:
—Aviguentiquea Irijani nopintsamajatacaca, noshineventamajataquempiquea aviatimpa.
Choviquijianaquerica Jesoshi
(Mt. 1.1-17)
23 Ariquea yajagantsitacotanaquequea Jesoshi 30 ajagantsini iparianacarogueti itsatacaantaque. Ijijitaquejiquea iriojiquea irijanintamajatari Jose, cotanquitsiquea iriguentiquea choviquitanaqueri Eri.*Omanaca ocatica oguipitsocaquerogueti. Oraquea iguenquetsatsarequi guiriegojia icanquegueti huios, chooca mavite aguenquetsatsarequi oguipitsocaquerogueti: oconoagarantaca ocanque “irijanite”, oconoagarantaca aisa ocanque “ichoviquitanaqueca”. Omanaca aisa otsipa: tee onconigamajateji queri ocantacotaqueca ichoviquitanaqueca Eri. Iriogueti Jose ocantacotaque guiriegotsaqui ocanquegueti huios...tou Eli, oguipitsocaquero “irijanite Eri”. Cotanquitsiquea iriogueti ocantacotaque Jesoshi, oguipitsoqueroquea “ichoviquitanaqueca Eri”. Mateo 1.16 ocanti iriri Jose ipajita Jacovo, irootaquequea namenantacaca acaniqui irio ocantacotaque Jesoshi ichoviquitanaqueca Eri. Chooca otsipa itioncaqueca jorio coramani ocanti iri Maria ipajita Eri. Irioca tioncacotanquitsica acaniqui, iriotari choviquitanaquerica Jesoshi.
24 Iriraquea Erini iriguenti irijanite Matate.
Irira Matateni iriguenti irijanite Irevi.
Irira Irevini iriguenti irijanite Merequi.
Irira Merequini iriguenti irijanite Jana.
Irira Janani iriguenti irijanite Jose.
25 Irira Joseni iriguenti irijanite Matatiashi.
Irira Matatiashini iriguenti irijanite Amoshi.
Irira Amoshini iriguenti irijanite Naomo.
Irira Naomoni iriguenti irijanite Eseri.
Irira Eserini iriguenti irijanite Nagai.
26 Irira Nagaini iriguenti irijanite Maati.
Irira Maatini iriguenti irijanite Matatiashi.
Irira Matatiashini iriguenti irijanite Semei.
Irira Semeini iriguenti irijanite Joseco.
Irira Joseconi iriguenti irijanite Jora.
27 Irira Jorani iriguenti irijanite Joanani.
Irira Joananini iriguenti irijanite Iresa.
Irira Iresani iriguenti irijanite Sorovaveri.
Irira Sorovaverini iriguenti irijanite Saratieri.
Irira Saratierini iriguenti irijanite Neri.
28 Irira Nerini iriguenti irijanite Merequi.
Irira Merequini iriguenti irijanite Ari.
Irira Arini iriguenti irijanite Cosame.
Irira Cosameni iriguenti irijanite Erimarami.
Irira Erimaramini iriguenti irijanite Eri.
29 Irira Erini iriguenti irijanite Josoe.
Irira Josoeni iriguenti irijanite Eriesere.
Irira Eriesereni iriguenti irijanite Jorimo.
Irira Jorimoni iriguenti irijanite Matate.
30 Irira Matateni iriguenti irijanite Irevi.
Irira Irevini iriguenti irijanite Shimeone.
Irira Shimeoneni iriguenti irijanite Joraa.
Irira Joraani iriguenti irijanite Joname.
Irira Jonameni iriguenti irijanite Eriaquime.
31 Irira Eriaquimeni iriguenti irijanite Merea.
Irira Mereani iriguenti irijanite Mena.
Irira Menani iriguenti irijanite Matata.
Irira Matatani iriguenti irijanite Natani.
32 Irira Natanini iriguenti irijanite Taavi.
Irira Taavini iriguenti irijanite Isai.
Irira Isaini iriguenti irijanite Overi.
Irira Overini iriguenti irijanite Voose.
Irira Vooseni iriguenti irijanite Saramoni.
Irira Saramonini iriguenti irijanite Naasone.
33 Irira Naasoneni iriguenti irijanite Aminaravo.
Irira Aminaravoni iriguenti irijanite Arame.†Oconoagarantaca paperi ocanti ocaniqui: “Irira Aminaravoni iriguenti irijanite Aramini. Irira Araminini iriguenti irijanite Arini.”
Irira Arameni iriguenti irijanite Eserome.
Irira Eseromeni iriguenti irijanite Parese.
Irira Pareseni iriguenti irijanite Joraa.
34 Irira Joraani iriguenti irijanite Jacovo.
Irira Jacovoni iriguenti irijanite Ishaaco.
Irira Ishaaconi iriguenti irijanite Averaame.
Irira Averaameni iriguenti irijanite Tare.
Irira Tareni iriguenti irijanite Nacori.
35 Irira Nacorini iriguenti irijanite Serogui.
Irira Seroguini iriguenti irijanite Iragao.
Irira Iragaoni iriguenti irijanite Peregui.
Irira Pereguini iriguenti irijanite Evere.
Irira Evereni iriguenti irijanite Shera.‡Shera. Icantajitiri aisa “Sara” (Sala).
36 Irira Sherani iriguenti irijanite Cainane.
Irira Cainaneni iriguenti irijanite Arepaquisare.
Irira Arepaquisareni iriguenti irijanite Sheme.
Irira Shemeni iriguenti irijanite Noe.
Irira Noeni iriguenti irijanite Irameco.
37 Irira Irameconi iriguenti irijanite Matosare.
Irira Matosareni iriguenti irijanite Enoco.
Irira Enoconi iriguenti irijanite Jarete.
Irira Jareteni iriguenti irijanite Maarareere.
Irira Maarareereni iriguenti irijanite Cainane.
38 Irira Cainaneni iriguenti irijanite Enoshi.
Irira Enoshini iriguenti irijanite Sete.
Irira Seteni iriguenti irijanite Arai.
Irira Araini iriguenti irijanite Aapani Irioshi.§Icanque Irira Araini iriguenti irijanite Aapani Irioshi, teenica inchoocatenica caquinte irijanintacarica Arai, mana ipeacaacariquea Aapani Irioshi.
*3:1 Iriratica Erorishi irio icantajitica Erorishi Antipashi. Iririni aisa ipajita Erorishi, irio majirontanquitsica ivoaquegueti Jesoshi (pamenero Irc. 1.5; Mt. 2.1-19).
✡3:6 Is. 40.3-5.
†3:12 imentaqui. Coramani tee inchoocavetempaji quenapapana ipeacaantajitaca paperipana, iroguenti choocatanquitsi imentaqui cavorejatatsica. Irootaque ivegaratantajitaca coramani.
‡3:15 Quirishitotatsica. Iguenquetsatsarequi guiriegojia icanquegueti Christos (Quirishito) manaquea ocanque “Ishaguijitaqueca” aisa “Icoguiaqueca”, irishaguijitaqueritari orejiqui orivo irirajia icoguiajiaqueca impeaquempa imajirojiate irooca isaserorotejiate. Irira Quirishito iriotaquequea itsavetacotsitacaca tsavetantajiatsica coramanitica intigarancaque Aapani Irioshi impeaquempaniji Imajirojiate maasano.
§3:16 Paamari oquenquetsatacotaquero mavitepae. (1) Pamenero otsapa 17 acaniqui ocantacoquerogueti camorecari intaantajitaquempaca caarica netsanatiro ininqueca Aapani Irioshi. (2) Pamenero aisa Ya. 2.3 ocantacoquerogueti icoraquepojaquegueti Ishire yamenajiquero quejevetaca paamari. (3) Pamenero aisa 1 Co. 3.13 ocantacoquerogueti iramenantajitaquemparogueti yantaguetaqueca maasano caquinte.
*3:23 Omanaca ocatica oguipitsocaquerogueti. Oraquea iguenquetsatsarequi guiriegojia icanquegueti huios, chooca mavite aguenquetsatsarequi oguipitsocaquerogueti: oconoagarantaca ocanque “irijanite”, oconoagarantaca aisa ocanque “ichoviquitanaqueca”. Omanaca aisa otsipa: tee onconigamajateji queri ocantacotaqueca ichoviquitanaqueca Eri. Iriogueti Jose ocantacotaque guiriegotsaqui ocanquegueti huios...tou Eli, oguipitsocaquero “irijanite Eri”. Cotanquitsiquea iriogueti ocantacotaque Jesoshi, oguipitsoqueroquea “ichoviquitanaqueca Eri”. Mateo 1.16 ocanti iriri Jose ipajita Jacovo, irootaquequea namenantacaca acaniqui irio ocantacotaque Jesoshi ichoviquitanaqueca Eri. Chooca otsipa itioncaqueca jorio coramani ocanti iri Maria ipajita Eri. Irioca tioncacotanquitsica acaniqui, iriotari choviquitanaquerica Jesoshi.
†3:33 Oconoagarantaca paperi ocanti ocaniqui: “Irira Aminaravoni iriguenti irijanite Aramini. Irira Araminini iriguenti irijanite Arini.”
‡3:35 Shera. Icantajitiri aisa “Sara” (Sala).
§3:38 Icanque Irira Araini iriguenti irijanite Aapani Irioshi, teenica inchoocatenica caquinte irijanintacarica Arai, mana ipeacaacariquea Aapani Irioshi.