Kayëte ndënkwëryënkw mba San
Wade yehëhna hnë iŋi kayëte
Ale herëk iŋi kayëte ŋa tufëhnana ɓare namu cery sali ŋa ntehnëk Afaƴik San herëk. Kerëk yëbëlan bëhn wafëhw imbëɗ gë wahi do gë bëhn keme (70 gë 100) ga ndëcëk hnagi Yesu. Kerëhnëkëhni vële hwëtahnëk do waỹëmpayehnik gë vakaraŋa vakaw̃ary, ñaɗ ŋaw̃ëtëhni gë ikwëtahn paryi Këris ŋa. Kerëhnëkëhni soŋe kamënaỹehnëhni do nko mbëmënkëlëni vëhni do nkoni kahnëndani gë Yesu Këris. Rac tëfëka ntini g'iña vëỹëntaw̃. Tëfëka fëna njolaryëni vinahan vinte wok gena toña do kehani wameh ŋa.
Iŋi kayëte nësëɗ soŋe ɓëmënkël nte rëfëka kwëhnani vële hw̃ëtahnëk va gë Yesu Këris, do gë ɓëmënkël ntëw̃ lëw̃ hni; nke hnë humpen hna kaɓi W̃ënu ŋa humpen ye. Ge ñaɗëni ntini rac tëfëkëhni njasëni hnë ikwëɗa iŋahn hna. Vëỹew̃ Këris va ye vëw̃ër vële yahëtak Yesu ye Këris ỹa do paryi njijëko hn'imbahn. Ɓare vële hwëtahnëk va tëfëka kwëhnani nkeya vutah W̃ën paryi iŋahn hna. Afo mëkëni këncëtëlehnëni dënt ŋa gë toña ỹa. Ikwëhn W̃ënu ŋa fëhnëtanëk ŋahnihnëk, kaɓi W̃ënu ŋa iŋahn ye. Ikwëtahn ye imëk ŋa.
Wëlin wanës wakwëhn nafa hn'iŋi kayëte: Toña, ɗuniỹa, vutah, iŋahn, humpen, wameh, akwëɗa, uwám.
Wëlin gante nke kayëte ka:
W̃ënu ŋa humpen ye (1.1–2.6)
Akwëɗa kasëk (2.7-17)
Vële ỹew̃ëka Këris va gë vutah W̃ën va (2.18–3.10)
Iŋahnël ntëw̃ lëw̃ fu (3.11-24)
Gante njavëtëɗe Iƴir W̃ën (4.1-6)
W̃ënu ŋa iŋahn ye (4.7-21)
Imëk fu hnë ɗuniỹa li (5.1-21)
1
Kayëte ndënkwëryënkw nte njëɗahnëk San
1 Kerëhnëryiɗerun soŋe Wanës, wante yëɗahnëɗ uwám paryi. Ani nkeho koɓëri hnë wapëgwa hna. Nkwëryëɓun do nuɓun gë vinkër vidëw̃ fu va dënk, njëkëɓun wapacëk do ñakëɓun gë wëɓák wadëw̃ fu ŋa. 2 Ha, uwám rac tufëhnak. Nuɓun, waseɗe walëw̃u w̃a yeɓun do pëƴaɗerun uwám usër ule yeho gë Rëm ỹa do ule rufëhnakëfu. 3 Ile hnuɓun do wëryëɓun ỹa umë ye ile fëƴaɗerun ỹi gante koɗen mbëmënkëlin hn'ikwëtahn hna, ndanko fo; do ibëmënkël fu ŋa ibëmënkël gë Rëm ŋa ye do gë Aju Yesu Këris. 4 Kerëhnëryiɗerun waŋi soŋe uhnatah fu w̃a padahn.
W̃ënu ŋa humpen ye
5 Wëlin wante pëƴahnëk Yesu Këris, wante wëryëɓun do fëƴaɗerun ŋa: W̃ënu ŋa humpen ye do iw̃ëhëryah gena hnë umë. 6 Ge ntehnëɗen gë umë mbëmënkëlinëk do njasatënden hn'umëhwëry hna, mërëɗen do diɗenëhna gante nke toña ka. 7 W̃ënu ŋa humpen hna nke. Ge fuhnë fëna, hnë humpen hna njasëɗen, awa mbëmënkëlinëk. Do sat Yesu Aju ỹa pacënëɗëhëfu wameh ŋa fop. 8 Ge ntehnëɗen kwëhnayilënëhna wameh, vankaf vantëw̃ fu va dënk rokaɗen do toña ỹa gena hnë fuhnë. 9 W̃ënu ŋa ahahnëndak do asatah ye. Ge putayinëk wameh fu ŋa, koɗen tamahnina umë: tavëhnëɗëhëfu wameh fu ŋa do pacënëɗëhëfu hnë urumpak hna fop. 10 Ge ntehnëɗen menilënëhna, aw̃ër liɗenëha W̃ënu ŋa do wanës wadëw̃u ŋa gena hnë fuhnë.