Kayëte ndënkwëryënkw mba Pol nte kerëhnëka Timote
Wade yehëhna hnë iŋi kayëte
Afaƴik Pol kerëhnëka Timote vëkayëte vaki do aŋi ye ndënkwëryënkw ŋa. Pol kerëk iŋi kayëte mpëdara hnë bëhn wafëhw mbëɗ g'iryaw̃ g'imbëɗ (65) ga ndëcëk hnagi Yesu ỹa, Masedëwan hna.
Timote asan ale hwëtahnëka Yesu Këris yeho. Hnëmu ỹa Gërek yeho do rëmu ỹa sëwif yeho. Matiko hnë nkol Lisëter hna (Vantiyehn 16.1) do nke lawo paryi Pol hnë ɗoku lëw̃u vacery sali hna. Atëko njasëndëni gë Pol do Pol macëɗëha aju hn'ikwëtahn hna. Umë wogëko gë Pol ɓare Pol tamahnëkawo ɗus. Pol tavëka Timote Efes hna soŋe karaŋëhni vëvë cery sali va.
Soŋe ile kerëhnanëka iŋi kayëte ŋa umë ye, kaɓi nkeni vëryampo vële haraŋëɗëhëhni vile wok gena toña va. Anahaɗëni viỹë vile ye ɗuniỹa vi mek do koɗena njiyi g'ambin afo gë uyët ile sow̃ik do g'ikeha iñëlël gë virokëtok viryampo. Pol ntehnëk, fop vile ntik W̃ën va nkwamëk do ndënkwëtehnëɗëha Timote karaŋëndëhni watac vacery sali va.
Kayëte ntëw̃u ŋa nësëɗ viỹë vërar: wahnira vële hwëtahnëk va, vëvë haryënkw vële hwëtahnëk va gë Timote dënk.
Wëlin wanës wakwëhn nafa hn'iŋi kayëte: ikwëtahn, cery sali, ɗuniỹa, ikaraŋ, Sintani, ɗoku, vësëval, vësan, toña.
Wëlin gante nke kayëte ka:
Simpaỹi (1.1-2)
Kwëtëryin hakili gë vële haraŋëɗëhëhni vahnë wamër va (1.3-20)
Ikaraŋ soŋe iƴëfa do vëvë haryënkw cery sali (2.1–4.16)
Ile rëfëka ntini vële hwëtahnëk va (5.1–6.2)
Uw̃ët fërën (6.3-19)
Simpaỹi rëkwa (6.20-21)
1
1-2 Timote, ami Pol herëhnëryiɗëhi. W̃ënu ŋa Afehët fu ỹa gë Yesu Këris itamahn dëw̃ fu ŋa vëhni lehnëko yewu afaƴik Yesu Këris ỹa do wëjë ye fatah mën paryi hnë ikwëtahn hna. Araɓi W̃ën Rëm ỹa gë Yesu Këris Ahwëhn fu ỹa njëɗënihi ipërëna, ikaỹëhnahn gë ƴam ỹa!
Kwëtëryin hakili gë vële haraŋëɗëhëhni vahnë wamër va
3 Gory Efes hna, had gante ntehnëmino ani gë yihahnëryindu gë Masedëwan ka, kaɓi nkeni hnam vële haraŋëɗëhëhni vahnë wamër ŋa; dehnëryihni tavëni. 4 Dehnëryihni tavëni itëfëta wëhnantul wahwëhn nafa këm g'iɗëkw vimbaỹ vacërakëlo vële wok vëfuɗina. Umë gwajëtël fo njojëɗ, ƴiryeryëɗina gë ikaraŋ W̃ën ile liyaɗ hn'ikwëtahn hna. 5 Ge ntehnëmi ali koyëna soŋe naỹëni iña nte w̃atik hnë sakahn facah hna gë inahan ipërën do g'ikwëtahn paryi ye. 6 Vëryampo tavëni nkaw̃ tac do tëfëni vankwajëla vakwëhn nafa këm. 7 Vëharaŋ sariya W̃ën ñaɗëni nkeni, ɓare vëyëtëna ile nësëɗëni ỹa, vëyëtëna fëna iñë ile njaw̃ënëni paryi ỹi.
8 Ha, njëtëɓun sariya ỹa përënak, ge ntiyinëk gante tëfëka ka. 9 Tëfëka njëti iỹin: sariya ỹa gena vësatah linëhnik. Soŋe vële wok vëw̃aw̃ëhnëɗina gë vële wok vëlënënëɗina sariya ỹa, vële wok vëhwëhnana ikwëtahn gë vële w̃enëɗ va, vële wok vëlënënëɗilahna W̃ën gë vile facëk va, vële ryaw̃ëɗëhëhni warëm hni ma wahnëm hni, vëryaw̃ vahnë vëhaw̃ary fëna, 10 vële liɗ ndakëntal nte ñew̃ëk W̃ën gë vësan vële ryakëɗ gë vësanëntahni, vële wafëɗëhëhni vëramp, vële w̃ërëɗ, vële ye waseɗe hnë wamër do gë fop vële hwëhnak nkeya meh, vile hnëmpëlëk gë ikaraŋ catah ŋa linëhnik. 11 Ikaraŋ tac tëfëlëk gë Wanës Wakasëk wante hwëtehnaniɓu, wante w̃atik hnë W̃ën hunte lënënik, hunte sëmbik.
Icamehn soŋe ipërëna W̃ën
12 Camehnëɓuha Yesu Këris Ahwëhn fu ỹa, umë ale yëɗako fanka fa: ha, Ahwëhn a nuko kahnëndaɓu, umë tëhnako liwu ɗoku lëw̃u ỹa, 13 mama nkehahnëɓuho koɓëri ŋa aỹew̃ alëw̃u, ahorotehn do ayapah. Ɓare kaỹëhnahnëkawo g'ami, kaɓi kwëtahnëlëwawohna do ƴëtëlëwohna ile liɗëfuho ỹa. 14 Ha, ipërëna Ahwëhn fu ŋa njaɓëkowo, nuỹaɓuho ikwëtahn ŋa do gë iŋahn nte hwëhnayinëk, vankinëk gë Yesu Këris.
15 Wëlin wanës toña wante rëfëka kacahnini vahnë fop: Yesu Këris njijëk ɗuniỹa li soŋe pehëtëhni vëw̃en. Do ami aw̃en asankaf yeɓu. 16 Ɓare wëli soŋe ile kaỹëhnahnëka g'ami: Yesu Këris w̃aw̃ëk tufahn hn'ami, aw̃en asankaf a, iɗuñëna ipadah idëw̃u ŋa. Koyëna dahëse iɗuñëna dëw̃u yeɓu soŋe vële hwëtahnëɗëha va, gante nuỹahnëɗëni uwám usër w̃a.
17 Araɓi untënah gë icëmb
nke g'ahnaw̃ avë kantëm, gë W̃ën hunte wok cëmëɗina,
hunte wok nuɗena, hunte wok mëntëlëntina,
dol gë kantëm! Amina.
18 Timote, ajë mën, ntehnëmi ali fop wanës watac wante hwëtehnahnëmi, rëfëlëk gë wanës wante fëƴahniko koɓëri ŋa soŋe lëw̃ hu ỹa. Waŋi wanës njaw̃ënëɗëhi do koɗu aw̃ët uw̃ët fërën w̃a; 19 kwëtary ikwëtahn hu ŋa do g'inahan ipërën hu ŋa. Vëryampo tavëni watac do koyëna përëkanëni ikwëtahn dëw̃ hni ŋa. 20 Hnë vahnë vërac nkentiniho Imene gë Alekësandër; vëhni njëɗahnëɓuhëhni gë Sintani. Koyëna, ñëŋaɗëni antë mbok njew̃ëniha W̃ënu ŋa.