Kayëte kigëna mba Pol nte kerëhnëkëhni vëvë Tesalonik
Wade yehëhna hnë iŋi kayëte
Kayëte kigëna mba vëvë Tesalonik va nëmpëlëna ɗus gë ndënkwërënkw ŋa. Iŋi kayëte fëna vëhni Pol gë Silas do gë Timote matik wati nte nkeniho Korent hna mpëdara yëbëlan bëhn wafëhw wahnah g'imbëɗ gë wahnah gë bëhn wafëhw imbëɗ gë wahi (49 gë 52). Pol camehnëɗëha W̃ënu ŋa soŋe ile nkoni kahnëndani harënkw wahorot hna. Kamënaỹehnëɗëhëhni tëfëni nkaw̃ nte tëhnani hnë Këris ŋa do kamënaỹehnëɗëhëhni ntini fop vantiyehn vante w̃atik hn'ikwëtahn hna.
Vële hwëtahnëk va fop ɓoka Ahwëhn a napëɗëni do Pol pacëhnëndëhëhni iỹin diyana ten. Pol ndëkwëtehnëɗëhëhni wëdahëse wante ryënkwëhniɗ iɓoka Këris ŋa. Ani g'umë, had fuhnë, macinëkëfu nufin nkaf ɗoku hnë ɗuniỹa li.
Wëlin wanës wakwëhn nafa hn'iŋi kayëte: aỹënta, Pol, iɓoka, kayëte, ƴam, ikwëtahn, fanka, satah, Ayapah, ɗoku.
Wëlin gante nke kayëte ka:
Simpaỹi (1.1-2)
Ahwëhn a njijëɗ kitiŋ ɗuniỹa ỹi (1.3-12)
Ile ryënkwëhniɗëha mbokahnind Ahwëhn a (2.1-12)
Iƴaw̃ hn'ikwëtahn (2.13-17)
Pol tëƴëɗ wayëfa (3.1-5)
Imac ɗokuŋa had Pol (3.6-15)
Iƴëfa gë simpaỹi (3.16-18)
1
Simpaỹi
1 Ami Pol gë Silëve*1.1 Silëve: Ale w̃acik Silëve ỹa w̃acik fëna Silas hnë kayëte 1 Vëvë Tesalonik hna. do gë Timote herëhnëryiɗëhu, w̃uhnë vëvë cery sali vë Tesalonik le kwëhnëk W̃ën Rëm fu ỹa do gë Ahwëhn a Yesu Këris. 2 Araɓi W̃ënu ŋa Rëm fu ỹa do gë Ahwëhn a Yesu Këris njëɗënihu ipërëna gë ƴam ỹa!
Ahwëhn a njijëɗ kitiŋ ɗuniỹa ỹi
3 Vëỹënta fu, tëfëkëfu samehnëndëfuna kwëlëkwël W̃ënu ŋa soŋe hun. Umë saŋah ye, kaɓi ikwëtahn hun ŋa nayiŋa nayëɗ, do iŋahnël nte hwëhnarun ŋa gwëna ŋa nkwënaɗ. 4 Soŋe rac, cëkwaryëɗerun hnë vacery sali vakaw̃ary vëmba W̃ën hna. Ha, njaw̃ënërun do kwëtarun ikwëtahn hun ŋa la gante korotehnëɗerun ki do ɗuñënaɗun hnë vambër vasiyamah. 5 Vëyin fop fëhnëtanëɗ kiti W̃ënu ŋa satah ye, gante nuhanderun had vële tëfëk Inaw̃ W̃ënu ŋa, soŋe rac horotahnëɗun.
6 Paryi nke, W̃ënu ŋa catëk: horot cosëɗëhëhni vële horotehnëɗëhu va 7 do njinëgehnëɗëhu w̃uhnë vële horotëɗ vi, do fuhnë fëna. Watac nkeɗ ge Ahwëhn a Yesu matini g'ambin gë wamëleka wadëw̃u wakwëhn fanka ŋa; 8 hnë fagant hwëɗëh hucankaf njijëɗ, do piniŋëɗëhëhni vële wok vëyëtëɗilahna W̃ën va do wok vëw̃aw̃ëhnëɗina Wanës Wakasëk Ahwëhn fu Yesu ŋa. 9 Iɓëv kwëlëkwël ŋa yeɗ icos dëw̃ hni ŋa gë ŋaw̃ëta Ahwëhn ŋa do gë ŋaw̃ëta icëmb fanka falëw̃u fa, 10 ge njijëk hnë fac rac soŋe cëmbëniha do naỹënëniha vële kwëhnëk do hwëtahnëka umë va. W̃uhnë dënk gë vëhni nkentëɗerun, kaɓi kwëtahnërun wante rëfëtanëhnirun ŋa.
11 Soŋe rac ye, ƴinëgaɗilëfuhna iƴëfan hun ŋa. Njëfaɗëfunëha W̃ën fu ŋa gante ntihandëhu vële tëfëk uw̃ac lëw̃u w̃a ile macëku. Njëfaɗëfunëha araɓi, gë fanka falëw̃u fa, ndemawu aliwu fop iña përën ŋa gë fop ntiyehn nte w̃atik hn'ikwëtahn hna. 12 Koyëna, uw̃ac Ahwëhn fu ỹa Yesu ntënënëɗe soŋe hun ỹa do w̃uhnë ntënënëɗerun soŋe lëw̃u ỹa gante nke ipërëna W̃ën fu gë Ahwëhn a Yesu Këris.