Vantiyehn Vëfaƴik
Wade yehëhna hnë iŋi kayëte
Ale herëk kayëte Itëfëta nte kerëk Lik paŋare Yesu ŋa ye ale herëk Vantiyehn Vëfaƴik ŋa. Gante nke ka namu vacërakëlo vële hwëtahnëka Yesu va ayehna Lik herëk iŋi kayëte.
Mpëd kayëte Vantiyehn kerik yëbëlan wabëhn wafëhw imbëɗ gë ryaw̃ gë wahnah gë wabëhn wafëhw imbëɗ gë warar g'imbëɗ (64 gë 85) ga ndëcëk hnagi Yesu ỹa, ante ndëcëko wëyas Pol ŋa. Njëtinëk Lik arëfëlënta Pol yeho wati wëyas walëw̃u w̃a ɓare gena kwëlëkwël nkelahnëniho. Njëtinëk rac kaɓi, kas fagant kayëte hna, rëkëk ntehnënd «fuhnë» hnë vikerëh vidëw̃u hna.
Age Itëfëta nte kerëk Lik ŋa nësahnëɗ soŋe uwám Yesu gëɗ hnani, Vantiyehn Vëfaƴik ŋa nësëɗ vile rëfiɗëha va, ɗoku vëfaƴik soŋe ntëɗahnëni mbara vële hwëtahnëk va gante-wo-gante fagant ɓulunda wasëwif gë vële wok vëyena wasëwif. Age wapëtala kayëte Lik ŋa ntehnëk Ajë W̃ënu ŋa kërënakëhni, rëk pëgw wapëgwala Vantiyehn ŋa Iƴir Pacah iŋa njëɗahnik ntapëhnahni.
Wëlin yëb ryampo, 1.8, ile hnëfak: «Ɓare ƴëtëryin iỹin: Iƴir Ipacah iŋa cëliɗ hnë w̃uhnë do nuỹaɗun fanka falëw̃u fa do waseɗe mën yeɗun Yerusalem hna, Yuɗe hna fop do gë Samari hna, do hafo hn'ile tëkwik ɗuniỹa hna.»
Wëlin wanës wakwëhn nafa hn'iŋi kayëte: Pol, wasëwif, Ahwëhn, Iƴir Ipacah, vëfaƴik, kulu, Rom, mbara vële hwëtahnëk, Wanës Wakasëk.
Wëlin gante nke kayëte ka:
Wafac warëkwa Yesu Këris nkal li (1.1-11)
Inap gë iƴij Iƴir Ipacah (1.12–2.13)
Ipëƴahn Wanës Wakasëk Yerusalem hna (2.14–8.3)
Ipëƴahn Wanës Wakasëk hnë vankol Yuɗe gë Samari hna (8.4–12.25)
Ipëƴahn Wanës Wakasëk gante-wo-gante nkal li (13.1–21.16)
Apëlaniha Afaƴik Pol Yerusalem hna soŋe cëɗëniha (21.17–23.22)
Njoniha Pol Sesare hna (23.23–26.32)
Njoniha Pol Rom hna (27.1–28.31)
1
Iƴir Ipacah nte njëɗahnëɗ W̃ënu ŋa
1 Aỹënta mën Tewofil, kayëte ndënkwëryënkw mën hna nësëɓuho fop ile pëgwëko ntind Yesu do karaŋëndëhëni vahnë ỹa 2 hafo hnë fac le nufiko nji g'ambin ỹa. Ani gë kaƴahnënd ỹa, umë nkabëkëhni gë fanka Iƴir Ipacah ŋa vële tëhnako had vëfaƴik va ile rëfëka ntini ỹa. 3 Vëhni, ante mbëhnëko ŋa, Yesu tufëhnakëhniwo do tufëkëhniwo yaɓah njëtahnëni paryi nke mbëhnëk. Hnë wafac wafëhw wahnah tufëhnakëhniwo do nësëhnëhni soŋe Inaw̃ W̃ënu ŋa. 4 Fac ryampo, wati nte mbarëniho ŋa, më ntehnëkëhni: «Ant'aỹaw̃ëtawu Yerusalem; napëryin ile ntehnëko Rëm njëɗaɗëhu ỹa, umë ye uyëɗ ule fëƴamuno w̃a. 5 San gë w̃ënka njaryëɗëho, ɓare w̃uhnë, ani gë wafac toƴe, g'Iƴir Ipacah iŋa njaryëɗerun.»
Kaƴënda Yesu
6 Ante mbarëniho vëfaƴik va gë Yesu, më tëƴëniha: «Ahwëhn, iỹi wati bi mbësaɗuhëhni naw̃ iŋa ɓulunda Isërayel ỹa?»
7 Më ntëkwakëhni: «Rëm ỹa fo yëtëk ante ntiyaɗ vëỹin ŋa; w̃uhnë maw̃ëryaniluhna ayëtu wati ma ƴamani ile ntiyahnëɗ ỹa. 8 Ɓare ƴëtëryin iỹin: Iƴir Ipacah iŋa cëliɗ hnë w̃uhnë do nuỹaɗun fanka falëw̃u fa do waseɗe mën yeɗun Yerusalem hna, Yuɗe hna fop do gë Samari hna, do hafo hn'ile tëkwik ɗuniỹa hna.»
9 Yesu, ga nësëk watac, nufiko g'ambin, do njëkëɗënihawo vëhni fop; tac aŋar cankëlehna hafo nambëniha.
10 Nkoniho ntaŋëniha Yesu g'ambin wati nte ŋaw̃ëtahëɗëho ŋa, tëketëni vësan vëhi vële suɗak viỹi viyah haryënkw lëw̃ hni do ntehnënihëhni: 11 «Vësan vëvë Galile, soŋe ye ỹëw̃ërun aki ayëkëndu ambin ŋi? Asan ale w̃acëɗun Yesu ỹa, hnufëhnirunëha nji g'ambin do koyëna mbokajëɗ.»
Ahnëmpët Yuɗa
12 Awa vëfaƴik va matëlehnëni Kuŋ Oliviye hna mbokani Yerusalem. Yëbëlan Kuŋ Oliviye ŋa gë Yerusalem tëkëko kilo uyas gë toƴe. 13 Tëkëndëni tuŋ, kaƴëlehnëni ƴaŋ etas hna, hnë cery ante rëkëniho nkehahnëndëni ŋa. Wëlin wamac vële yeho hnam va: Piyer, gë San, gë Sak, gë Andëre, gë Filip, gë Toma, gë Barëtelemi, gë Matiye, gë Sak aju Alëfe, gë Simo nte w̃acëɗeho Ahahnëndak, do gë Yuɗa aju Sak. 14 Mawalëniho mbarëlëndëni kwëlëkwël soŋe ƴëfa gë Mari hnëmu Yesu, gë vësëval vëryampo, do gë vëheryu Yesu.
15 Fac ryampo, ante mbarëɗëniho ŋa, Piyer matëko tase vële hwëtahnëk hna vële rëkëko mpëd keme gë wafëhw wahi (120), do ntehnëhni: 16 «Vëỹënta mën, ile fëƴahnik Vikerëh hna, watac tëfëkawo ntiya. Iƴir Ipacah iŋa pëƴahnëk koɓëri fo w̃ës David hna soŋe Yuɗa nte ryënkwaryëkëhniwo vële fëlaka Yesu va. 17 Aỹi asan, aryampo hnë fuhnë yentiko, do ɗoku rac fo hwëtehnahninëkëfuno.
18 «Kaỹ law̃ahniko koryi ile cosiko soŋe iƴëɗahn Yesu ŋa. Hnam njoko, hafo tënka ɗonk iŋi, cahnëlehna wabeỹ ŋa. 19 Vahnë vële lëɗëk Yerusalem va fop njëtaniho watac: soŋe umë w̃acahnik iŋi kaỹ gë wanës wadëw̃ hni ŋa: “Akëlëdama.” Umë fëhnëtanëɗ: “Ikaỹ Wasat.”»
20 Piyer më mbok ntehnëk: «Wëlin ile herik Kayëte Wahnëw̃ hna soŋe Yuɗa ỹa:
«“Araɓi tere lëw̃u ỹa tavi, ahnë antë ntëɗahn kwëlëkwël.”✡1.20: Wahnëw̃ 69.26
Mbok keri fëna:
“Araɓi ahaw̃ary nuf ɗoku lëw̃u ile njëɗakawo W̃ënu ŋa.”✡1.20: Wahnëw̃ 69.26
21 Tëfëka tëhnayina aryampo hnë vële lapëhnaɗëhëfuno gante-wo-gante, ante njasëlehëɗenëho gë Yesu Ahwëhn a, 22 koɓëri ante njaryëkawo San Yesu hafo ante nufëhninëkëfuna nji g'ambin. Asan a rac nkentëɗe koyëna seɗe gë fuhnë, iɓëhn dëw̃u ŋa.»
23 Awa, ga nësëk watac Piyer më tahnënihëhni vësan vëhi: Matiyas, gë Yosef, nte w̃acëɗeho Barësabas, (w̃ëcako fëna Yusëtis). 24 Awa vële hwëtahnëk va më njëfani aki: «Wëjë, Ahwëhn, njëtëru iña vahnë ŋa fop; tufëryifuna bi mo rëhnaru hnë vëỹi vësan vëhi 25 Soŋe nke afaƴik nëmpëta Yuɗa nte yik gë ỹëw̃a ile rëfëka.» 26 Tac njëlëniho wanjël njëtahnëni bi mo yeɗ. Awa, më tufahnëk Matiyas ye. Nkwënëlehnëniha vëfaƴik pëhw g'aryaw̃ hna.