Kayëte nte kerëhnëkëhni Pol vëvë Kolos
Wade yehëhna hnë iŋi kayëte
Nkol nte wacëɗe Kolos ŋa ŋaw̃ëlëna g'ankol Efes ŋa hnë Asi Toƴ hna (nte wacëɗe iỹi wati Turëki). Afaƴik Pol kerëk mpëd wati nte nkeho hnë kaso mbë Sesare (yëbëlan bëhn wafëhw imbëɗ gë warar gë bëhn wafëhw imbëɗ g'imbëɗ gë warar (53 gë 58) ga ndëcëk hnagi Yesu ỹa) ma hnë kaso mbë Rom (yëbëlan bëhn wafëhw imbëɗ gë ryaw̃ ma bëhn wafëhw imbëɗ gë ryaw̃ gë wahi (60 gë 62) ga ndëcëk hnagi Yesu ỹa). Ƴina nkol Kolos (Vëvë Kolos 2.1) ɓare ale hwëtahnëk yeho hnam macënde Ëpafëras (Vëvë Kolos 4.12). Umë sampehnëk Wanës Wakasëk ŋa do fëgwëk Cery Sali ŋa hnam (Vëvë Kolos 1.7). Ga ndëcëk wabëhn kore Epafëras njiko njëkehna Pol kaso hna pëƴahna vëharaŋ wamër va Cery Sali hna nkeni. Ankabahnëɗëni tëfi vile wok tëfëlana toki, tëfi ntaw̃ëla ŋa, háci ỹa, gë vantiyehn ikwëtahn kaw̃ary g'icëmb wamëleka gante nëŋahnëɗëha W̃ënu ŋa gë vëhni. (Vëvë Kolos 2.16-18). Pol kerëhnëkëhni vële hwëtahnëk ye Kolos va tufahnëni soŋe ye mehahnëk viŋi vinahan: Këris ye fop ile valëkëfu ỹa! Fop vile ỹaɗ nkwëna hnë vile ntik Këris kërëwa va wamër ye. Këris ntik fop ile rëfëka ỹa soŋe ipeh fu ŋa g'icëm ntëw̃u do g'iɓëhn ntëw̃u ŋa.
Wëlin wanës wakwëhn nafa hn'iŋi kayëte: fop, ile sow̃ik ỹa, yasery, ɓëmënkël fu hnë Yesu.
Wëlin gante nke kayëte ka:
Simpaỹi (1.1-2)
Pol camehnëɗëha W̃ënu ŋa do njëfanëhnëɗëhëhni vëvë Kolos va (1.3-14)
Ahnë gë antiyehn Këris (1.15-23)
Uw̃ët afaƴik Pol (1.24–2.19)
Uwám hasëk gë Këris (2.20–3.17)
Vankeya soŋe watere (3.18–4.6)
Simpaỹi rëkwa (4.7-18).
1
Simpaỹi
1 Ami Pol, ale ye afaƴik Yesu Këris ỹa kaɓi W̃ënu ŋa ỹak koyëna, do gë Timote, aỹënta fu, herëhnëɗëhu, 2 w̃uhnë vëỹënta fu vëvë Kolos va, vëfacah do vëhahnëndak hn'iɓëmënkël fu gë Këris hna: Araɓi W̃ënu ŋa Rëm fu ỹa ndëwaw̃u do njëɗaw̃u ƴam ỹa.
Iƴëfa Pol soŋe vëvë Kolos
3 Acamehnëɗenëha kwëlëkwël W̃ënu ŋa, Rëm Ahwëhn fu Yesu Këris ỹa, hnë wayëfa fu soŋe hun ỹa, 4 kaɓi nkwëryëɓun ga nësëɗe ikwëtahn hun Yesu Këris ŋa do g'iŋahn hun fop vëfacah va. 5-6 Ante tëkëk ỹal hun wanës toña, Wanës Wakasëk, wati ryënkwëryënkw ỹa, njëtarun W̃ënu ŋa kwëtëk hn'ambin hna ile ramahnërun ỹa; ikw̃ëtahn hun ŋa do iŋahn hun ŋa hn'itama tac matik. Ha, hnë ɗuniỹa li fop waŋi Wanës Wakasëk kwëhnak wadëw̃el do wok sampëɗ. Koyëna ntiɗ fagant hun koɓëri fac le wëryërun do yëtërun ipërëna W̃ënu ŋa gë toña lëw̃u ỹa fop. 7 Epafëras, lawo lëw̃ fu do aryokuŋëntal aỹahnik fu, umë ale haraŋëku, andokuŋëhnëɗëhu had aryokuŋëhn Këris ahahnëndak. 8 Njëtëndanëkëfu iŋahn nte njëɗaku Iƴir Ipacah iŋa.
9 Wëlin soŋe ye, cape lëw̃ fu ỹa, koɓëri fac le wëryëɓun paŋare hun ỹa, tavëlëfuhna iƴëfan hun ŋa. Tëƴëɗëfunëha W̃ënu ŋa ɗanko pëɓahnu uyët ile ñaɗ ỹa gë fere fop useryah w̃a do gë hakili nte njëɗaku Iƴir ntëw̃u ŋa. 10 Koyëna koɗun ayasu had gante tëfëka njasënd aryokuŋëhn Ahwëhn ka do aliwu fop vële hnëŋëɗëha va. Alëw̃u fop wasifa vantiyehn vapërën had atëh nte lëw̃ëɗ vantëw̃el vapërën do njëtëɗunëha W̃ënu ŋa gë haw̃ary. 11 Tëƴëɗëfunëha kwëlëkwël njaw̃ënu hnë fop gë fanka samah falëw̃u fa ɗanko aw̃ëkaw̃u fop gë ɗuñëna. 12 Camehnëryina g'uhnatah W̃ënu ŋa Rëm ỹa, ale lik aholu ahnuỹawu sah hnapul va vëfacah hn'ile kwëtëhnëku humpen hna. 13 Ankëcëkëfu hnë fanka imëhwëry hna do pakëtëfu hnë naw̃ Ajë aỹahnik alëw̃u; 14 hnë umë apehëtinëkëfu, wameh fu ŋa tavëhninëkëfu.
Ahnë gë antiyehn Këris
15 Aju ale nuɗe ỹa ye aw̃ëntëlënta W̃ën hunte woyik nuɗena, ale ryënkwëk hnagik hnë fop vile liyik va. 16 Ha, g'umë W̃ënu ŋa ntik fop, hnë mbin hna do hnë nkal li, vile hnuɗe gë vile woyik nuɗena: wafanka wale ye mbin hna, vësankaf vële lañak tinki unaw̃ ntëw̃ hni, do vëvë haryënkw gë vële hwëhnak ucankaf. Umë liyehnëk fop do soŋe lëw̃u, 17 do umë ye haryënkw fop; fop pëlalëk hnë umë 18 do umë ye ankaf cery sali, nte ye mbahn ntëw̃u. Umë ye wapëgwala, aryënkw nagi fagant vësëm, ɗanko nkehahn avë haryënkw hnë fop, 19 kaɓi nëŋëka W̃ënu ŋa ile nke ỹa fop ntëɗ hnë Aju hna. 20 Gë fere Aju ỹa, W̃ënu ŋa ñak konjëndëlehn fop g'umë hnë nkal li do hnë mbin hna. Antik ƴam ỹa gë sat Aju ỹa hnë kërëwa hna.
21 W̃uhnë, koɓëri ŋa gelunohna gë W̃ënu ŋa, vëỹew̃ vëlëw̃u yerunëho soŋe fop wameh wante hnahaɗunëho do liɗunëho ŋa. 22 Ɓare gaki, W̃ënu ŋa gë umë gë icëm Aju ŋa, ale sëmëk hnë mbahn ntëw̃u ahnë hna ɗanko mëk tufahnu vëfacah konjëndëlehnëku fo haryënkw lëw̃u dënk, ale wok kwëhnana dahëse w̃eh, do ile keyande këm. 23 Ɓare tëfëka awow̃u vëỹaw̃ah hnë ikwëtahn hna, soŋe antë aỹaw̃ëtaw̃u hnë tama Wanës Wakasëk hna wante w̃ëryërun, wante pëƴayini vahnë vëvë ɗuniỹa vi fop do, ami Pol, yehahnëɓu aryokuŋëhn.
Uw̃ët afaƴik Pol
24 Tame natëko ile horotëɗëfu soŋe hun ỹi, kaɓi padënëɗëfu aki mbahn mën hna ile wojëk hnë wahorot Këris hna, soŋe cery sali nte ye mbahn ntëw̃u. 25 W̃ënu ŋa ntiko aryokunkëhn cery sali. Ha, akwëtehnahnëko iỹi ɗoku soŋe hun: tëfëka fëƴaw̃u Wanës W̃ënu ŋa fop. 26 Waŋi Wanës yabahnëɗ vile cow̃iniho koɓëri ŋa fop vanjeh, ɓare tame tufëkëhni vëfacah vëlëw̃u va. 27 Añak njëtëndanëhni gante naỹëk ka uvetak viỹë vile sow̃ik, vile ye hnë ile pëhwëtanëhnëkëhni vële wok vëyena wasëwif: Këris hnë w̃uhnë. Hnë umë nke tama hun ŋa ayentahniw̃u Naw̃ W̃ën hna.
28 Awa, Këris fëƴaɗëfunëhëhni vahnë va fop. Niraɗëfunëhëhni do karaŋëɗëfunëhëhni gë fop yasery, ɗanko nkehahnëni vëhnaỹah hnë iɓëmënkël dëw̃ hni gë Këris. 29 Soŋe idi iỹin fop ỹa liɗëfu ɗoku hambah ɗus do w̃ëtëɗëfu gë fanka samah ile w̃atik hnë Këris do hn'ami ɗokuŋëɗ.