Kayëte nte kerëhnëkëhni Pol vëvë Efes
Wade yehëhna hnë iŋi kayëte
Afaƴik Pol hërëhnëkëhni aŋi kayëte vële hwëtahnëk hnë nkol Efes hna. Ɓare vikerëh vicër vindaw̃ hn'iŋi kayëte nësëna soŋe Efes. Mpëd umë ỹak kayëte ŋi cahini vëvë vacery sali vajaɓah vamb nkal Asi Toƴ va fop. Anjiko Efes hna wati nte njasëɗëho nkaw̃ ntëw̃u kigëna ŋa (Vantiyehn 18-20) do wati nte mbokako rarëna ŋa añëw̃ëko hnam wabëhn watar. Akerëk mpëd wati nte nkeho hnë kaso mbë Sesare (yëbëlan bëhn wafëhw imbëɗ gë warar gë bëhn wafëhw imbëɗ g'imbëɗ gë warar (53 gë 58) ga ndëcëk hnagi Yesu ỹa) ma hnë kaso mbë Rom (yëbëlan bëhn wafëhw imbëɗ gë ryaw̃ gë bëhn wafëhw imbëɗ gë ryaw̃ gë wahi (60 gë 62) ga ndëcëk hnagi Yesu ỹa).
Pol kerëk aŋi kayëte gante ndënkwëtehnahnëɗëhëhni vële hwëtahnëk va bi vëhni mo yeyinëk paɓ gë Këris. Fop kayëte ŋi nësëɗ iɓëmënkël fu gë Këris ŋa do karaŋëɗëhëfu iɓank nte rëfëka kwëhnalin gë umë. Iƴir Ipacah ŋa ryemaɗëhëfu ŋahnëlënden do maw̃ëhnëlënden: ten w̃asëwif w̃a gë vële wok vëyena wasëwif, tac yëbëlan fop vële hwëtahnëk hnë cery sali va, yëbëlan vësëval gë vësan hni, vutah gë warëm hni do gë vëramp gë vële hwëhnëkëhni.
Pol nësëɗ soŋe ɗoku Sintani ale yëkëlehnëɗ tavëtehnëni vahnë va iŋi ɓëmëkël. Akaraŋëɗëhëfu hak mëtaryëɗen iỹi w̃ët hn'ile njëɗaɗëhëfu W̃ën viw̃ëta: toña, usatah, fanka pëƴahn Wanës Wakasëk, ikwëtahn, ipeh. Antehnëɗëhëfu njëfayin wati-wo-wati.
Wëlin wanës wakwëhn nafa hn'iŋi kayëte: uyas, ile sow̃iko, fanka.
Wëlin gante nke kayëte ka:
Simpaỹi (1.1-2)
Iɓëmënkël wasëwif gë vële wok vëyena wasëwif Këris hna (1.3–3.21)
Iɓëmënkël ɓulunda vële hwëtahnëk hna (4.1–6.9)
Iɓëmënkël vële hwëtahnëk
W̃ët ikwëtahn (6.10-20)
Simpaỹi rëkwa (6.21-24)
1
Simpaỹi
1 Ami Pol, ale ye afaƴik Yesu Këris kaɓi W̃ënu ŋa ỹak koyëna, kerëhnëɗëmu w̃uhnë vëfacah do vële hahnëndahnëka Yesu Këris: 2 Araɓi W̃ënu ŋa, Rëm fu ỹa g'Ahwëhn a Yesu Këris ndëwanihu do njëɗënihu ƴam ỹa!
3 Cëmbënëfuna ale ye W̃ën gë Rëm Ahwëhn fu ỹa Yesu Këris! G'iɓëmënkël fu gë Këris ỹa ndëwak vintaw̃ary vidëw̃ fu va gë fop waɗëwara wadëw̃u wade w̃atik mbin hna. 4 Ani gë ntihahnënd ɗuniỹa ỹa W̃ënu ŋa rëko tëhnafu, g'iɓank fu gë Këris, ɗanko nkehahnin vëfacah do vële wok vëhwëhnana dahëse w̃eh haryënkw lëw̃u.
Hnë iŋahn hna, 5 rëko tëhnafu nkeyin vërahu gë fere iɓank fu gë Yesu Këris. Rac ye ile ñaɗëho W̃ënu ŋa do pëhnako nti 6 ɗanko cëmbinëhna soŋe ipërëna camah dëw̃u nte njëɗakëfu aki fo hn'iɓëmënkël fu g'Aju aỹahnik a! 7 Hn'iɓëmënkël fu hna gë umë, gë sat lëw̃u ỹa pehëtinëkëfu, tavëhninëkëfu wameh fu ŋa. Aki W̃ënu ŋa tufahnëk had gante naỹëk ipërëna dëw̃u ka. 8 Njëɗakëfu ɗus ipërëna tac do ntik rac gë fop yasery do hakili fërën. 9 Ha, njëtëndanëkëfu ile ñaɗëho ỹa, ile sow̃iko ỹa, ile pëhnako, hnë përëna dëw̃u hna, nti hnë Këris hna. 10 Ile pëhnako ỹa ntiyehnëɗ ge wati ỹa padëk: rac ye ɓarëp hnë asankaf aryampo fo, Këris, fop vile yehëhna mbin hna do nkal hna.
11 Hnë iɓëmënkël fu hna gë umë, nuỹaɓun lëw̃ fu ỹa, gante pëhnako W̃ën ka. Rëkëɗ ntind fop kaɓi pëhnako do ñak koyëna 12 ɗanko icëmb ntëw̃u ŋa njëw̃i soŋe fuhnë vële ryënkwëk hwëtahnëka Këris va.
13 W̃uhnë fëna, ante nkwëryërun wanës toña ŋa, Wanës Wakasëk wante fehëtëku ŋa, kwëtahnërunëha. Hnë iɓëmënkël hun hna gë umë, w̃uhnë fëna njëɗayirun iyavëta ile ntëhnëkuno njëɗaɗëhu ỹa, iyavëta rac ye Iƴir Ipacah ŋa. 14 Umë ye sah ryënkwëryënkw hnë idëw̃ nte hnapëɗen hafo nuỹayin fop ile ntehnëko W̃ënu ŋa njëɗaɗëhëfu. Iỹin fop soŋe icëmb ntëw̃u ŋa njëw̃i ye.
Iƴëfa Pol soŋe vëvë Efes
15 Soŋe rac ye, ami fëna, koɓëri ga nkwëryëɓu ga nësëɗe soŋe ikwëtahn hun ŋa hnë Ahwëhn fu Yesu do iŋahn hun vëfacah fop ŋa, 16 camehnëɗëfuha kwëlëkwël W̃ënu ŋa soŋe hun ỹa. Anahaɗëmu wayëfa mën hna. 17 Tëƴëɗëfuha W̃ën Ahwëhn fu Yesu Këris ỹa, Rëm le hwëhnëk icëmb ŋa, njëɗaw̃u iƴir yasery g'itufëhnahn nte yëtëndanëɗëhuna W̃ënu ŋa. 18 Tëƴëɗëfuha ntancën wahakili hun w̃a gë humpen Iƴir Ipacah ŋa, soŋe ayëtu itama nte njëɗaku imac ntëw̃u ŋa, g'uvetak icëmb ntëw̃ dëw̃u ŋa, antëw̃ nte cahëɗëhu gë vëfacah vëỹëntaw̃ va, 19 do gë fanka samah lëw̃u soŋe fuhnë vële hwëtahnëk va. Fanka farac ye fale 20 vokaryika Këris fagant vësëm do ntañënda farëhw lëw̃u hnë mbin hna, 21 cëpëk inaw̃ ŋa fop, cankaf, fanka, gë fop uw̃ëka do fop wamac wale hoɗe maci hnë iỹi ɗuniỹa ɓare fëna ɗuniỹa ile yejëk ỹi. 22 Ha, W̃ënu ŋa hwëtëk fop hnë wakwër Këris hna. Umë ale sëpëk fop, W̃ënu ŋa njëɗahnëka nke nkaf Cery Sali ŋa. 23 Vële hwëtahnëk va ye mbahn Këris ŋa, do Këris hnë vëhni ntëɗëk; padënëkëhni fop, umë ale fadënëɗ fop.