Kayëte nte kerëhnëkëhni Pol vëvë Galasi
Wade yehëhna hnë iŋi kayëte
Afaƴik Pol herëhnëkëhni vacery sali vante ye Galasi va iŋi kayëte yëbëlan bëhn wafëhw wahnah g'imbëɗ gë warar gë bëhn wafëhw imbëɗ g'imbëɗ (48 gë 55) ga ndëcëk hnagi Yesu ỹa. Pol njihahnëko vankol Galasi va soŋe karaŋëhni Wanës Wakasëk ŋa. Ntik rac fagant vële ye wasëwif gë vële wok vëyena wasëwif do vëyaɓah kwëtahnëniha Yesu.
Ante kërënak Pol ŋa, ɓiỹëna dënk vëryampo njijëni pëƴanihëhni vële hwëtahnëk va tëfëka kacini had gante tëƴëk sariya Moyis soŋe W̃ënu ŋa maw̃ëhni. Ga nkwëryëk Pol ga nësëɗe watac kerëk aŋi kayëte. Nësëɗ gë wanës waƴaw̃ah soŋe pacënëhnëhni vëvë Galasi va afo ikwëtahn ntëw̃ hni Yesu ŋa hoɗ pehëtëhni. Ntehnëkëhni W̃ënu ŋa maw̃ëko Abëraham cat haryënkw lëw̃u ani gë kacahnënde ỹa. Afo ikwëtahn ŋa hoɗ ntihna ahnë asatah haryënkw W̃ënu ŋa, do rac hoɗ njiryerya ahnë a nuỹa uwám ule hnëŋëɗëha W̃ënu ŋa.
Wëlin wanës wakwëhn nafa hn'iŋi kayëte: Sariya Moyis gë Wanës Wakasëk, vëfaya gë vëramp, wasëwif gë vële wok vëyena wasëwif.
Wëlin gante nke kayëte ka:
Simpaỹi (1.1-5)
Paryi Pol afaƴik ye do ile nësëk ya toña ye (1.6–2.21)
Sariya ma ikwëtahn (3.1–4.7)
Uryëñah Pol soŋe vëvë Galasi (4.8-20)
Soŋe Agar gë Sara (4.21-31)
Igo afaya (5.1-15)
Imbahn gë Iƴir (5.16–6.10);
Wanës watëkwa (6.11-18).
1
Simpaỹi
1-2 Ami Pol herëhnëryiɗëhu aŋi kayëte, w̃uhnë vëvë vacery sali vambë Galasi vi. Yesu Këris gë W̃ën Rëm le vëhnëndanëka vësëm ỹa rëhnako, matina hnë vahnë, gena gë fere ahnë liko afaƴik. Nkaỹëryiɗerun, ami gë vëỹënta mën vële yeɓun ani vi fop:
3 Araɓi W̃ënu ŋa, Rëm fu ỹa g'Ahwëhn a Yesu Këris ndëwanihu do njëɗënihu ƴam ỹa! 4 Ahwëhn a njëɗahnëk ntaw̃ary dëw̃u ŋa soŋe cosahnahn inav wameh fu ŋa. Koyëna ntihëtëkëfu hnë imëk meh iỹi ɗuniỹa vë gaki ỹi, gante ñaɗëho W̃ën Rëm fu ka. 5 Araɓi cëmbënde W̃ënu ŋa kwëlëkwël! Amina.
Wanës Wakasëk wëɗampo fo
6 Ami pëmpëhnahnëko soŋe gante njancërun aravuna W̃ën ki! Macëku gë ipërëna Këris ŋa, ɓare w̃uhnë, tavërun Wanës Wakasëk wadëw̃u ŋa, wakaw̃ary hnëpaɗun. 7 Do ile ye toña ỹa, umë ye wakaw̃ary gena. Vahnë fo ỹaɗ nkwëcëtëni Wanës Wakasëk Këris ŋa do waỹëmpaỹehnëɗëhu. 8 Awa ge ahnë yijëk pëƴahnënd Wanës Wakasëk wante hnëmpëlëk gë wante fëƴayirun ŋi, wëla nke aryampo hnë fuhnë vëfaƴik hna ma wëla nke dënk mëleka ile w̃atik g'ambin, araɓi ndëwani w̃eh! 9 Tëkëmu fëƴaw̃u do mbokëɓu rëfëtanëhnëndu tame: ge ahnë pëƴaɗëhu Wanës Wakasëk wanëmpëlah gë wante w̃aw̃ërun ŋi, araɓi ndëwani w̃eh!
10 Tame maw̃ëhnëniho vahnë bi yëkëlehnëɗëfu? Ma W̃ënu ŋa ỹaɗëfu maw̃ëhno? Vahnë bi yëkëlehnëɗëfu nëŋahnëhni g'ami? Ge vahnë rëkakëndëɓu yëkëlehnëndu ha gaki, nëŋahnëhni g'ami, gekënda aryokuŋëhn Këris ỹa.
W̃ënu ŋa tëhnaka Pol nke afaƴik
11 Vëỹënta mën, ñaɗëfu ayëtu wapacëk: Wanës Wakasëk wante hnësëhnëɗëmuno ŋa matina hnë vahnë. 12 Gena ahnë yëɗako ma haraŋëko, ɓare Yesu Këris yëtëndanëko.
13 Nkwëryërun ga nësëɗe gante nkeho nkeya mën ŋa ante nkoɓuho hnë ikwëtahn wasëwif ŋa. Njëtërun gante koroteyehnëɗëfuho ɗus cery sali W̃ënu ỹa do njëkëlehnëɗëfuho rëkwehnu ka. 14 Hnë wati rac, ntëbëɓuhëhniwo hnë ikwëtahn wasëwif hna vëjarënta mën wasëwif vëyaɓah. Ha, njaw̃ënëɓuho namu warëm fu w̃a. 15 Ɓare W̃ënu ŋa tëhnakowo koɓëri nte nkoɓuho nagila ŋa do, g'ipërëna dëw̃u ŋa, macëko soŋe ryokuŋëhnëndëw̃a. Do ante tëkëko wati ŋa, 16 nëŋëkawo njëtëndanowa Aju soŋe yiwu fëƴaw̃ëhni vële wok vëyena wasëwif va. Awa, hnë wati rac wëla aryampo tëƴëlëwawohna nkabo ile rëfëko liwu ỹa. 17 Wëla Yerusalem hna dënk ƴilëw̃ohna soŋe hnulëfu vële ryënkwëko nkeni vëfaƴik va. Ɓare taŋ njiɓuho Arabi hna, tac vokaw̃ Damas.
18 Tac, ante ndëcëko wabëhn watar ŋa, njiɓu Yerusalem soŋe yëtëlëfu gë Piyer, do wafac ipëhw g'imbëɗ ỹëw̃ëlahnëɓunëho. 19 Hnë wati rac nulëwaw̃ohna afaƴik ahaw̃ary; Sak fo nuɓuho, aheryu Ahwëhn a. 20 Ile herëndëmu ỹi toña ye, gena wamër. W̃ënu ŋa seɗe ye. 21 Ga matëɓu hnam umë yiɓu hnë waresiỹo Siri do Silisi hna. 22 Hnë wati rac fop vëvë vacery sali vambë Yuɗe va vëyëtëlowohna. 23 Wanës ŋa fo nkwëryëɗëniho ga nësëɗe: «Ale horoteyehnëɗëhëfuno ỹa, fëƴahnëɗ tame ikwëtahn nte njawërëɗëho tëkwehn ŋa», 24 do cëmbëɗënihawo W̃ënu ŋa soŋe lëmën ỹa.