Wapëgwala
Wade yehëhna hnë iŋi kayëte
Namu vële hwëtahnëka Këris va lehnëkëfu Moỹis herëk iŋi kayëte. Mpëd yëbëlan bëhn wuli wakeme wahnah gë wafëhw wahnah g'imbëɗ gë ryaw̃ gë bëhn wuli gë wakeme wanah g'imbëɗ g'iryaw̃ (1446 gë 1406) ani gë naganëhnënde Këris ỹa hnë wati bëhn wafëhw wahnah (40) hna nte nkeho wula hna gë ɓulunda Isërayel ỹa. Cape ndënkwëryënkw kayëte Wapëgwala ŋa Mesopotami hna ntiyak do cape kigëna ŋa Esipët hna.
Kayëte ŋa nësëɗ soŋe wapëgwala fop viỹë vi: idi ɗuniỹa ỹi, idi ahnë, do ankeya fagant ahnë gë W̃ën. Kayite Wapëgwala ŋa gaband ile nkentik uw̃eh w̃a ɗuniỹa li do tufahnëɗ ile ntiɗëhëni vahnë ỹa hnë ɓëmënkël ntëw̃ lëw̃ hni hna do gë W̃ënu ŋa.
Paɓ g'uwám vacërakëlo va (Adam, Nowe, Abëraham, Isak, Sakob, Yosef) do ile ntehnëk W̃ën ntinëhnëɗëhëhni ỹa, pëhwëtaninëkëfu karaŋin fop kayëte wanës W̃ënu ŋa njëtahnin gante ntiɗ ile ntehnëko ỹa, njonëhnihni ipeh ŋa fop vile ñahanëk va.
Wasapitër warar waryënkwëryënkw w̃a nësëɗ soŋe viw̃ëntëlah wale ye hnë wasapitër warar Wapuyala hna. Awa, wanës W̃ënu ŋa pëgwëhnahnëɗ do patahnëɗ g'uhnës urac fo.
Wëlin wanës wakwëhn nafa hn'iŋi kayëte: W̃ënu ŋa, Abëraham, Sakob, Yosef, Kanan, ɓulunda, wusaw̃, rëm/ajë, nkal.
Wëlin gante nke kayëte ka:
Wapëgwa hna 1–11
Abëraham 12–25
Sakob 25–36
Yosef 37–50
Wapëgwa hna wasapitër 1–11
1
Gante ntiko fop W̃ënu ŋa
1 Ante pëgwëko W̃ën ntind viỹë ŋa, ambin ŋa g'inkal iŋa ntiko ten.
2 Hara ɗuniỹa ỹi ki fo nkeyarëko do ñoñ gelohna hnam. Hn'ile nkeho w̃ënka watëw̃ah hna umëhwëry cankaf yeho do iƴir W̃ënu ŋa, le yeho had sël, cëpëko w̃ënka watac. 3 Awa W̃ënu ŋa më ntehnëk: «Araɓi humpen ha nke!» Do humpen ha nkelehn. 4 W̃ënu ŋa njëkëko do nëŋëkawo gë hutac; më pitëndëlehnëk humpen ha g'umëhwëry uŋa. 5 W̃ënu ŋa më macëk humpen ha «fac» do mëhwëry uŋa «umëɗ». Nkeho umëɗ, tac gë fac; fac ryënkwëryënkw ỹa yeho.
6 W̃ënu ŋa më mbok ntehnëk: «Araɓi igwac nke fagant w̃ënka hna, pitëlahn w̃ënka ŋa.» 7 Do koyëna nkeho. W̃ënu ŋa koyëna ntiko igwac nte fitëndëlehnëk w̃ënka waɓë gëɗ ŋa gë waɓë g'ambin ŋa. 8 W̃ënu ŋa më macëk igwac tac «ambin». Nkelehn umëɗ, tac gë fac; fac higëna ỹa yeho.
9 W̃ënu ŋa më mbok ntehnëk kat: «Araɓi w̃ënka wante sëpëk ambin ŋi mbarëpël sëñ ryampo fo nkehahn nkal iŋa!» Do koyëna nkeho. 10 W̃ënu ŋa më macëk hn'ile nkok gena w̃ënka hna «nkal» do w̃ënka wante varëpëlëk ŋa «wov». Njëkëko do nëŋëkawo gë rac. 11 Do W̃ënu ŋa më ntehnëk: «Araɓi hnë nkal hna pëhn ile hwëhnak yaryef, vile lëw̃ëɗ uhnëɗa lëw̃u do gë vatëh vante lëw̃ëɗ wadëwel wadëw̃u ŋa dënk!» Do koyëna nkeho. 12 Nkal iŋa pëhnëndanëko fop sifa vile hwëhnak yaryef va le-wo-le sifa uhnëɗa lëw̃u w̃a ntëw̃ëko do gë vatëh vante lëw̃ëɗ wadëwel wadëw̃u ŋa dënk. W̃ënu ŋa njëkëko do nëŋëkawo gë rac. 13 Nkeho umëɗ, tac gë fac; fac rarëna ỹa yeho.
14 W̃ënu ŋa më mbok ntehnëk kat: «Araɓi ambin hna nke wahumpen pitëndëlehnahni fac ỹa gë umëhwëry uŋa; do nkehahn wëdahëse vambënt va, gë wafac w̃a do gë wabëhn ŋa. 15 Araɓi nke ambin hna wahumpen pëtënahn nkal iŋa!» Do koyëna nkeho. 16 W̃ënu ŋa ntiko wahumpen wahi wasankaf: hunte ỹako naỹ ha, ulav w̃a yeho, soŋe fac ỹa, do hunte vako ha, lepera w̃a yeho, soŋe mëɗ uŋa. Ntiko fëna wahol w̃a. 17 W̃ënu ŋa g'ambin kwëtëko soŋe pëtënënd nkal iŋa, 18 soŋe fac ỹa g'umëɗ uŋa do pitëndëlehn humpen ha gë umëhwëry uŋa. W̃ënu ŋa njëkëko do nëŋëkawo gë rac. 19 Nkeho umëɗ, tac gë fac; fac hnahëna ỹa yeho.
20 W̃ënu ŋa më mbok ntehnëk kat: «Araɓi sifa viỹë fop pëɓëni wov hna, do wusëry w̃a nkwayëndëni g'ambin, cëpëni nkal iŋi!» 21 W̃ënu ŋa ntikëhniwo wulaw̃ wësankaf wavë wov do gë fop sifa vile fëɓëk do yasëlehnëɗ hnë w̃ënka hna. Ntikëhniwo fëna sifa wusëry w̃a fop. W̃ënu ŋa njëkëko do nëŋëkawo gë rac. 22 W̃ënu ŋa më ndëwakëhni ntehnëhni: «Araɓi fop vile ye w̃ënka vi nagëlëni, njaɓëni, pëɓëni wov hna do araɓi wusëry w̃a fëna njaɓëni nkal li.» 23 Nkeho umëɗ, tac gë fac; fac vëryëna ỹa yeho.
24 W̃ënu ŋa më mbok ntehnëk kat: «Araɓi nkeni nkal li wasifa w̃a fop: wusaw̃, gë wulaw̃ do gë fop vihaw̃ary vile yasëɗ nkal li! Do koyëna nkeho.» 25 Koyëna ntikëhniwo W̃ënu ŋa wasifa wulaw̃ gë wusaw̃, gë wulaw̃ wuhnëmpëlah w̃a do gë fop vihaw̃ary vile yasëɗ nkal li. W̃ënu ŋa njëkëko do nëŋëkawo gë rac. 26 Tac W̃ënu ŋa më mbok ntehnëk rëkwa ỹa: «Dinëfuni vahnë mëntëlin gë fuhnë, mëntëlin ɗus! Kwëhnënihëhni wuwis wavë wov w̃i, gë wusëry wavë g'ambin w̃i, do gë wusaw̃ gë wulaw̃ do gë fop vihaw̃ary vile yasëɗ nkal li.»
27 Awa W̃ënu ŋa ntikëhni vahnë va
mëntëlëni g'umë dënk;
ntikëhni asan g'asëval.
28 Tac më ndëwakëhni ntehnëhni: «Nagëlëryin, ƴaɓëryin, pëɓëryin nkal li, naw̃ëryin nkal li; kwëhnëryinëhni wuwis wavë wov w̃i, gë wusëry wavë g'ambin w̃i do gë fop vile yasëɗ nkal vi.» 29 Ntehnëkëhniwo fëna: «Njëɗamu arokëndu wanëɗa wante lëw̃ëɗ nkal ŋi fop do gë vatëh vante lëw̃ëɗ vi fop. 30 Wulaw̃ w̃i fop vëhni njëɗaɓuhëhni tokëndëni dël iŋi gë wusaw̃ wavë nkal w̃i fop, gë wusëry w̃i fop, do gë fop vihaw̃ary vile yasëɗ nkal li.» Do koyëna nkeho. 31 W̃ënu ŋa njëkëko fop ile ntiko ỹa do nëŋëkawo ɗus gë rac. Nkeho umëɗ, tac gë fac; fac hwëhn mbëɗ gë ryaw̃ ỹa yeho.