8
Yesu, asankaf vësëna wasaɗëha fu
1 Wëlin ile ỹak nëfak ỹa hn'ile ỹaɗëfun hnësëfu ỹa: iỹi sifa asëna wasaɗëha asankaf hwëhnayinek. Ntañak mbin hna, farëhw tinki W̃ën hwëhn fanka hna. 2 Ntiɗ ɗoku lëw̃u ỹa hn'ile cëvak hna, hn'usank paryi nte kahnëndëk Ahwëhn a, gena gë wëɓák vahnë.
3 Asëna wasaɗëha asankaf-wo tëhnayik soŋe njëɗahnënd wayëɗ w̃a gë wasaɗëha vahnë; afo alëw̃ fu ỹa fëna kwëhna ile njëɗahnëɗ. 4 Age Këris nkal hna nkokënd, gekëndina asëna wasaɗëha, kaɓi nkeni vësëna vële yëɗahnëɗ wayëɗ had gante tëƴëk sariya Moyis ka. 5 Usank le ndokuŋëhnëɗëni ỹa iw̃ëntëlënta do cën usank vë ambin ỹa ye. Ante ñaɗëho Moyis pëgw ƴëry sank w̃a, W̃ënu ŋa pëƴaka: «Ƴëkëry, ntiɗu fop had gante nke sifa vile rufiru kuŋ vi.»✡8.5: Icahn 25.40 6 Ɓare gaki, ɗoku le nuỹak Yesu ỹa cëpëk ɗoku lëw̃ hni ỹa, kaɓi umë ye arëkëtëlehn kwëtëla nte lëbëk ɗus ñëntaw̃ ŋa, nte hahnëndik hnë ile ntëhnëkëhniwo W̃ën ntiɗ ỹa kaɓi rac lëbëk fop. Ɓare gaki, ile ntehnëk W̃ën ntiɗ ỹa fecek. Rac lik ɗoku asëna wasaɗëha le nuỹak Këris ỹa cëpëk fop waỹëntaw̃ w̃a had gante nke ikwëtëla, le nke Këris arëkëtëlehn hna, nte lëbëk ndënkwëryënkw ŋa.
7 Age kwëtëla ndënkwëryënkw ŋa kwëhnakëndina ile keyande, ɓalakëndilëfuhna nëmpëti gë haw̃ary. 8 Ɓare soŋe walënt ɓulunda lëw̃u ỹa keyahnëɗëhëhni W̃ënu ŋa do ntehn: «Ami Ahwëhn a ntehnëɓu:
«Wafac w̃a nkejëk hn'ile ntiɗëfu kwëtëla kasëk
gë ɓulunda Isërayel ỹa
do gë ɓulunda Yuɗa ỹa.
9 Geɗina had kwëtëla
nte liɓuho ŋa gë warëm hni
fac le hnufiɓuhëhniwo ỹa
yiryeryëw̃ëhni ŋaw̃ët nkal mbë Esipët ŋa.
Kaɓi vëlënëna
kwëtëla mën ŋa,
ami fëna tavëɓuhëhni.»
10 Ahwëhn a nkwënëk:
«Wëlin kwëtëla nte hwëtëlahnëɗëfun
gë ɓulunda Isërayel ỹa
ga ndëcëk wafac warac;
kwëtëɗëfu sariya mën ỹa
hnë vinahan vidëw̃ hni hna
do kerëɗëfu hnë vintaw̃ary vidëw̃ hni hna.
Nkeɗëfu W̃ën hudëw̃ hni,
do nkeɗëni ɓulunda mën.
11 Ahnë ɓokëɗina karaŋ a avë yalëntaw̃
ma aỹëntaw̃u, ntehn: “Ƴëtëryehna Ahwëhn a!”
kaɓi fop njëtëɗëniho,
pëgw vutoƴ hafo vëhnaỹah.
12 Tavëhnëɗëfuhëhni ile ntiɗëni wok catëna ỹa
do ɓokëɗa ryënkwëtaw̃ wameh wadëw̃ hni ŋa.»✡8.12: Seremi 31.31-34
13 Ante macëɗ W̃ënu ŋa iŋi kwëtëla «kasëk», ntik ndënkwëryënkw ŋa goryeryëna nafa. Do ile sërëk ỹa do wok goryeryëna nafa ỹa, goɗina.