Itëfëta nte kerëk Matiye paŋare Yesu
Wade yehëhna hnë iŋi kayëte
Ale herëk iŋi kayëte ŋa tufëhnana ɓare namu vacërakëlo vële hwëtahnëka Yesu va lehnëk Matiye herëk. Matiye arëfal aryampo yeho hnë pëhw̃ gë vëhi hna. Sëwif yeho do ndokuŋëɗëho had arëf ỹatëtanke wati nte macëkawo Yesu tëfa ŋa. Levi macëɗeho fëna, aju alfe (Marëk 2.14, Lik 5.27). Ante nkeho arëf ỹatëtanke vahnë vëvë Rom ŋa, ɓulunda wasëwif w̃a aỹew̃ ntinihaw̃o. Ante macëkawo Yesu arëf alëw̃u apëmpëhnahnëkëhniwo vahnë vëyaɓah.
Aŋi kayëte kerik yëbëlan wabëhn wafëhw mbëɗ gë wahi (70) gë wabëhn keme g'ipëhw (110) ga ndëcëk hnagi Yesu ỹa. Iŋi kayëte kwëhnak w̃ëntëlah yaɓah gë mba Marëk ŋa. Hnagi Yesu ỹa nësëɗ, yaryi lëw̃u ỹa, vantiyehn vantëw̃u va do vakarëŋa vantëw̃u va, ipëla ntëw̃u ŋa, icëm ntëw̃u ƴaŋ kërëwa hna, iɓëhn dëw̃u ŋa do vakarëŋa vatëkwa vante njëɗakëhni vërëfal vëlëw̃u va. Ɓare nësëɗ ɗus soŋe Inaw̃ ambin do soŋe ile nke Yesu ahnaw̃.
Wëlin wanës wakwëhn nafa hn'iŋi kayëte: Yesu, W̃ën, arëfal, Ahwëhn, ajë ahnë, wanës, fac, ambin/nkal, Inaw̃/ahnaw̃, sariya, toña, wafarise, wahnës waɗindaryindan.
Wëlin gante nke kayëte ka:
Vacërakëlo Yesu gë hnagi lëw̃u (1–2)
Yesu gë San Ayary a, tac Yesu gë Sintani (3.1–4.11)
Ipëgw ɗoku Yesu (4.12–12.50)
Wahnës waɗindaryindan (13.1-58)
Yesu nkok karaŋëndëhni do njërënëndëhni vëres va (14.1–20.34)
Yesu tënkëɗ Yerusalem hna (21.1–25.46)
Ipëhwëta soŋe iɗaw̃ Yesu (26.75–27.66)
Iɓëhn Yesu (28.1-20)
1
Vacërakëlo Yesu
1 Wëlin wamac vacërakëlo Yesu Këris ale hnagiko hnënk ahnaw̃ ale w̃aciko David, do David, umë dënk, hnë hnënk acërakëlo fu Abëraham hna nagiko.
2 Abëraham yeho rëm Isak ỹa. Isak yeho rëm Sakob ỹa. Sakob yeho rëm Yuɗa gë vëheryu* 1.2 Yuɗa gë vëheryu: vëhni yeho vankaf hnënk pëhw gë wahi Isërayel ỹa.. 3 Yuɗa yeho rëm vëhni Peres gë Sera, hnëm hni ỹa Tamar yeho.✡ 1.3: Wapëgwala 38.27-30 Peres yeho rëm Hesëron ỹa. Hesëron yeho rëm Ram ỹa. 4 Ram yeho rëm Aminadab ỹa. Aminadab yeho rëm Nason. Nason yeho rëm Salëma. 5 Salëma yeho rëm Bos, hnëmu ỹa Rahab yeho.✡ 1.5: Yosuwe 2.1-24 Bos yeho rëm Obed, hnëmu ỹa Rit yeho.✡ 1.5: Rit 1.1–4.22 Obed yeho rëm Yese 6 ale yeho rëm ahnaw̃ ale w̃aciko David ỹa.✡ 1.6: 2 Samiyel 12
David yeho rëm Salomo ỹa, hnëmu ỹa Uri ryënkwëkawo ñëla. 7 Salomo yeho rëm Robowam ỹa. Robowam yeho rëm Abiya ỹa. Abiya yeho rëm Asa. 8 Asa yeho rëm Yosafat ỹa. Yosafat yeho rëm Yoram ỹa. Yoram yeho rëm Osiyas ỹa. 9 Osiyas yeho rëm Yotam ỹa. Yotam yeho rëm Akas ỹa. Akas yeho rëm Esekiyas ỹa. 10 Esekiyas yeho rëm Manase ỹa. Manase yeho rëm Amon ỹa. Amon yeho rëm Yosiyas ỹa. 11 Yosiyas yeho rëm Yekoniya gë vëheryu va wati nte pëlayiniho njoyini vëvë Isërayel Babilon hna.
12 Ante ndëcëk watac ŋa, Yekoniya yeho rëm Salatiyel. Salatiyel yeho rëm Sorobabel ỹa. 13 Sorobabel yeho rëm Abihud ỹa. Abihud yeho rëm Eliyakim. Eliyakim yeho rëm Asor. 14 Asor yeho rëm Sadok. Sadok yeho rëm Akim. Akim yeho rëm Eliwud. 15 Eliwud yeho rëm Eliyasar. Eliyasar yeho rëm Matan. Matan yeho rëm Sakob. 16 Sakob yeho rëm Yosef, asanu Mari, hnëm Yesu ale w̃acëɗe Këris, Arëhnayik a.
17 Umë fop kore vacërakëlo pëhw gë wahnah yeho pëgw hnë mba Abëraham hna hafo David, pëhw gë wahnah mba David hna hafo nte njoyiniho vëvë Isërayel Babilon hna, do pëhw gë wahnah hnë iƴo tac hafo mba Arëhnayik hna.
Hnagi Yesu Këris Arëhnayik a
18 Wëlin itëfëta soŋe hnagi Yesu Këris. Hnëmu ỹa, Mari, Yosef hwëhnëkawo; ɓare ñëlahnënda ỹa, gë fanka Iƴir Ipacah ŋa ndonkëko. 19 Yosef ale hwëhnëkawo ỹa, asan asatah yeho ɓare ñaɗilohna cëfëhnaỹehna ɓulunda hna; awa më pëhnak tava hara ƴëtayina. 20 Wati nte nahaɗëho watac ŋa, mëleka Ahwëhn a më karyëtahnëka hnë huɗakery do ntehna: «Yosef, fatah fante hnagik hnë hnënk David, ntë ntaki aỹëla Mari, ƴëtëry gë fanka Iƴir Ipacah fa ndonkëk. 21 Facan nagëɗ. Yesu† 1.21 Yesu fëhnëtanëk ale fehëtëɗ. w̃acëɗuha, kaɓi umë fehëtëɗëhëhni ɓulunda lëw̃u ỹa hnë wameh wadëw̃ hni hna.»
22 Ỹinë fop nkeɗ ntiyahn wanës Ahwëhn wante nësehnëkawo kila Esayi ŋa:
23 «Fandag fante wok ƴëtëna vësan va ndonkëɗ do facan nagëɗ. Emaniyel macëɗe, umë fëhnëtanëɗ: W̃ënu ŋa gë fuhnë nkentik.»✡ 1.23: Esayi 7.14
24 Yosef, ga nëgak, më ntik ile ntehnëkawo mëleka Ahwëhn ỹa: ñëlëka asëvalu Mari. 25 Ɓare vëvankëlohna ipad g'umë afo naga aju do Yosef, Yesu macëkawo.