Kayëte mba Pol nte kerëhnëka Filemon
Wade yehëhna kayëte Pol
Afaƴik Pol herëhnëka Filemon iŋi kayëte mpëd wati nte nkeho hnë kaso mbë Sesare (yëbëlan bëhn wafëhw imbëɗ gë warar gë bëhn wafëhw imbëɗ g'imbëɗ gë warar (53 gë 58) ga ndëcëk hnagi Yesu ỹa) ma hnë kaso mbë Rom (yëbëlan bëhn wafëhw imbëɗ gë ryaw̃ gë bëhn wafëhw imbëɗ gë ryaw̃ gë wahi (60 gë 62) ga ndëcëk hnagi Yesu ỹa). Filemon ahnë afërën yeho Kolos hna, do vële hwëtahnëk va mbarëpëlëɗëniho ỹalu hna (yëb 2). Kwëhnakëhniwo vëramp, had gante nkeho vankeya vantëw̃ hni koɓëri ka, do aryampo ỹa Onesim maciko.
Onesim nkaryëkawo ale hwëhnëkawo ỹa (do mpëɗ ntenëhnëkawo fëna, ƴëkëryin yëb 8) do ga mbiỹëk pankëlëni gë Pol kaso hna. Kwëtahnëlehn Wanës Wakasëk do ndokuŋëhnënda Pol. Pol ŋahnëkawo ɗus ɓare caŋahnëlahna kwëtahna, kaɓi gante nke sarya ka, Filemon hwëhnëka.
Atac umë mbokënanëka Filemon g'iŋi kayëte, gë Tisik fëna ale yiryëryëɗ kayëte ŋi gë Kolos, do atëƴëka Filemon teɓahna haɗ aỹëntaw̃ hnë Këris hna. Age gena umë kokënd njëɗahna uhorot sankaf kaɓi nkaryëka ale hwëhnëka ỹa. Pol wajira fo nësëhnëɗëha Filemon, hara porosiŋëlahna ñoñ, ɓare akamënaỹehnëɗëha Filemon maw̃a Onesim g'iŋahn, umë ntehnëka kwët w̃ac lëw̃u hna age Onesim nkonëhnahnëka iñë cosëɗëha, tac ndënkwëtehnata Filemon nkonëhnahnëka Pol uwám lëw̃u w̃a, umë ale yëɗaka W̃anës Wëkasëk ŋa.
Wëlin wanës wakwëhn nafa hn'iŋi kayëte: Këris, Onesim, aỹënta, Ahwëhn, wanës, iŋahn.
Wëlin gante nke kayëte ka:
Simpaỹi 1-3
Pol kerëhnëka Filemon 4-7
Uryëƴ Pol soŋe Onesim 8-21
Simpaỹi rëkwa 22-25.
1
Pol kerëhnëka Filemon
1 Ami Pol herëhnëɗëhi wëjë Filemon. Cëɗiɓu kaɓi ɗoku Yesu Këris liɗëfu. Gë aỹënta fu Timote nkeɓun. Nkaỹëɗeru wëjë, lawo fu aỹahnik do aryokëŋëntal fu, 2 gë aỹënta fu, asëval ale w̃acik Apiya, gë Arësip arëfëlënta fu w̃ët hna, do gë cery sali nte varëpëlëɗ hnë tere hu hna. 3 Araɓi W̃ënu ŋa, Rëm fu ỹa g'Ahwëhn a Yesu Këris ndëwanihu do njëɗënihu ƴam ỹa!
4 Age nahami, Filemon, wayëfa mën hna, camehnëɗëfuha kwëlëkwël W̃ën mën ŋa, 5 kaɓi nkwëryëɗëfu ga nësëɗe soŋe iŋahn hu ŋa do soŋe ikwëtahn nte hwëhnaru paɓ gë Ahwëhn Yesu do paɓ gë fop vëfacah. 6 Njëfaɗëfuha W̃ënu ŋa nti ikwëtahn hu, nte vankëntiru gë fuhnë ŋa, kwëhna vantëwel vapërën ɗanko ayëtëntahni viỹë vifërën vile hwëhnayinëk hnë uwám fu hna gë Këris. 7 Aỹënta mën, iŋahn hu ŋa njëɗako uhnatah yaɓah do kamënaỹehn, kaɓi mbosëvosehnëru wasakahn vëfacah.
Uryëƴ Pol soŋe Onesim
8-9 Soŋe iŋahn tac, mama kwëhnahnëɓu, hnë Këris, fop afaya lehni ile rëfëka ali, pecehnëko rëƴi rac g'untënah. Had gante nkeɓu ki, ami Pol, acër, do kas gaki fëna asëɗik kaɓi ɗoku Yesu Këris liɗëfu, 10 muntaɗëmi soŋe ajë mën, ale hnagëɓu hnë kaso hna, Onesim*1.10 Onesim fëhnëtanëk «ayohah».. 11 Umë ale woko ƴohëna koɓëri ŋa, njohalëkëfu gaki, wëjë g'ami.
12 Mbokaryëryiɗëfuha, umë ale ye had ntaw̃ary mën dënk. 13 Ami, ñakëndëɓu hwëtaw̃a ɗarël mën, soŋe ndemando gë w̃ac hu hnë kaso hn'ile nkeɓu soŋe Wanës Wakasëk. 14 Ɓare ñoñ ñala liwu hara maw̃ëlihna, ɗanko ufërën hu w̃a paɓ g'ami antë mëntël g'ile forosiŋik, ɓare nke afaya fo. 15 Mpëd Onesim fëna gontilohna gë wëjë soŋe wati ryampo ɗanko avësahnihna soŋe kantëm, 16 ɓokëɗeliya avësayihna had aramp, ɓare pecehna aramp, had aỹënta aỹahnik. Aŋahnëɓuha ɗus, ɓare wëjë, tëfëka aỹahna ntëbi: aỹahna had ahnë do aỹahna had ale hwëtahnëka Këris!
17 Awa, age pëlaruho had aỹënta hu hn'ikwëtahn hna, kacaryehna had ami ye. 18 Do ge ntëntahnëki ma ge nkonëhnahnëki iñë, kwëtëry w̃ac mën. 19 Ami, Pol, akerëɓu gë vák mën dënk: ambësaɗëmi ami dënk; ñaɗa ryënkwëntehni wëjë fëna nkonëhnahnëruho iñë do wëjë dënk ye iñë rac! 20 Ha, aỹënta mën, dinëhnërye iỹin hnë Ahwëhn hna; ɓosëvosehnëry ntaw̃ary mën hnë iɓëmënkël fu gë Këris! 21 Apacahnëko ntiɗu ile rëƴëmi ỹa hnë iŋi kayëte, anjëtëɓu ntiɗu ntëbi rac.
22 Gë waŋi, pëhwëtanëhnërye ỹëw̃a, kaɓi tamaɓu, soŋe wayëfa hun w̃a, mbësahnëɗeɓu. 23 Epafëras, ale sëɗëlahniɓun soŋe ɗoku Yesu Këris ỹa, nkaỹëki. 24 Marëk, Arisëtarëk, Demas do Lik, vëryokuŋëntal mën fëna, nkaỹënihi.
25 Araɓi Ahwëhn fu ỹa Yesu Këris ndëwaw̃u.