5
Kayëte ŋa gë Fape fa
1 Tac më hnuɓu hnë vák rëhw ale lañako hnë tinki ahnaw̃ hna kayëte nte fëỹik, keri ɓambery gë ipër per do ñamëndëlehni gë wuya wahwënta mbëɗ gë wahi. 2 Tac më hnuɓuha mëleka hwëhn fanka le rëƴ gë kopa sankaf: «Mo tëfahnëk nke aỹamët ile ỹamëndëlehnik ỹi do pëỹët kayëte ŋi?» 3 Wëla aryampo gelohna mbin hna, nkal li ma kwëyët nkal li janáma hna, ale holëko pëỹët kayëte ŋa, njëk ile herik ɓambery ỹa. 4 Do rac koyehnëɗëho ɗus kaɓi ahnë gena ale rëfëkawo nke afëỹët kayëte ŋa, njëk ɓambery. 5 Awa aryampo hnë vicër hna më ntehnëko: «Ɓoka ho! Ƴëkëryehna, ivësëhn vë hnënk Yuɗa ỹa,✡5.5: Wapëgwala 49.9 ale hnagik hnë hnënk Ahnaw̃ a David, umë ale w̃ëkëk a lihëtëɗ ile ỹamëndëlehnahnik kayëte ŋa do fëỹëtëɗ.»
6 Tac më hnuɓuha Fape ga kahnëk fagant tinki ahnaw̃, kwëratëniha wulaw̃ wahnah do gë vicër. Mëntëko had kácik. Wamiry imbëɗ gë waki kwëhnako gë vinkër mbëɗ gë viki, vinte ye wayir mbëɗ gë vaki W̃ën vinte sañëtik hnë nkal hna fop. 7 Fape fa pëŋako soŋe teɓahn kayëte hnë vák rëhw ale lañako hnë tinki ahnaw̃ hna. 8 Ante teɓak kayëte ŋa, wulaw̃ wahnah w̃a gë vicër wafëhw wahi gë vëhnah va (24) njoniho nkal hna haryënkw lëw̃u. Ale-wo-le hnë vëhni itëmp mënkwëko do gë vañërya sanu tëmpah iɗuɗ, inte yeho wayëfa vëfacah wale haƴëndaɗëho g'ambin. 9 Hnëw̃ hasëk njëw̃ëɗëniho:
«Tëfëki ahnuỹa kayëte ŋi,
ayamët ile ỹamëndëlehnik ỹa,
kaɓi káciruho,
do ntaw̃ëtëruhëhni soŋe W̃ënu ŋa,
vahnë hnë wahnënk hna fop
gë vanësa hna fop gë waɓulunda hna fop
do gë wayal hna fop;
gë sat hu ỹa,
10 ntiruhëhni inaw̃ vësëna wasaɗëha W̃ën fu ŋa,
do naw̃ëɗëni nkal li.»
11 Tac më yëkëɓu do wëryëɓu kopa wamëleka waƴaɓah, wawuli wawuli, koɗelohna ndëkwini. Caharaɓ tinki ahnaw̃ hna, wulaw̃ w̃uhnah hna do gë vicër hna kahnëniho. 12 Njëw̃ëɗëniho gë kopa sankaf:
«Fape fante haciko fa,
umë ye ale rëfëka nuỹa fanka fa, gë hnapul ỹa, g'uyët w̃a, g'imëk iŋa,
g'untënah ŋa, gë icëmb ŋa do gë cëkwary ŋa.»
13 Do nkwëryëɗëfuhëhniwo fëna fop vile ntik W̃ën va ambin hna, gë nkal hna, gë kwëyët nkal li janáma hna, gë wov hna do gë fop le yehëhna hnam ỹa, ga ntehnëɗëni:
«Ale lañak tinki ahnaw̃ ỹa gë Fape fa nke icëkwary, g'idënën, g'icëmb
do gë fanka, kwëlëkwël!»
14 Do wulaw̃ wahnah w̃a ntehnëɗëniho: «Amina!» Do vicër va njoniho nkal li soŋe cëmbahnënihëhni Ale lañak tinki ahnaw̃ ỹa gë Fape fa.