8
Iriira Jesús kantakowentantaatsiri owakeratantaari aapatziyawakagaantsi
1 Jiroka otzinkamiperotari ikantaitakeri: Iriira Cristo Imperatasorentsiwentairi, iri saikaatsiri rakoperoki Pinkatharipero, itsipataari ipinkathariwentantai inkiteki. 2 Oshiyawaitakawo ari rantawaiteme tasorentsithaanteki, temaita rantawaite tasorentsithaanteki riwetsikakeri pairani atziripaini, inkiteki rantawaitzi, riwetsikakaantairi Pawa. 3 Tema ikaatzi Imperatasorentsitaintsiri pairani, eenitatsi rashitakaariri Pawa, ritayiniri. Ari ikantakari Jesucristo irirori, tzimatsi rashitakaariri Pawa. 4 Tera ishinetaantsite rowaiteri Jesucristo rimperatasorentsitantyaari, risaikantawetapaintari kipatsiki. Te ishinetakaantziro Inintakaantaitanewo, tema kaari isheninkapaini Leví-ni. 5 Tema jirikapaini Imperatasorentsitaarewo oshiyakaawontsi rinamatsitake, eenitatsi inewiyataitari jimpe onkantaiya inkiteki. Irootake ikantaitakeriri pairani Moisés, riwetsikero tasorentsithaante, ikantaitakeri:
Piwetsikero poshiyakayero, tsika okanta piñaawyaatakawo otzishiki.
6 Ari ikantaari Jesús Imperatasorentsitaarewo rinatzi, ranagairi rimperatasorentsitaitari atziri. Tema rowakeratai Pawa otsipa aapatziyawakagaantsi, iri ikashaakaakairi Cristo inkantakowentayetai, irootake anagairori okaatzi ikashaakaawetakariri pairani, anagairo etakawori aapatziyawakagaantsi. 7 Eenitatsi koityagainchari etakawori aapatziyawakagaantsi kaari rimonkaataite, irootake okowantakari ontzimai otsipa owakerari, poyaataiyaawone. 8 Jiroka koityagainchari, tema ikantaitake pairani:
Ikantzi Awinkatharite:
Paminero onkaate awisatsine paata,
Ari napiitairo naapatziyaiyaari icharinepaini Israel-ni, icharinepaini Judá-ni.
9 Arika nowakeratairo aapatziyawakagaantsi, eero oshiyaawo naapatziyawetakarira icharinepaini.
Tema pairani noshiyakaakeri nakathataatyeerime,
Naakame amairine nomishitowantaariri Egipto-ki.
Te rimonkaatzimaitawo iriroripaini aapatziyawakagaantsi,
Iroowa nipakaantaawori nokempoyaawentziri.
Ari ikantake ikenkithawaitzi Pinkathari.
10 Rapiitakero ikenkithawaitzi, ikantzi:
Jiroka owakerari aapatziyawakagaantsi iñagairi paata isheninkapaini Israel:
Ari niyoshiretakaayetairi kameethari rantayetairi.
Oshiyawaityaawo nosankenashiretantaatyaarime Nonintakaantanewo,
Naakatake Iwawanetaiya,
Iriiyetake nashitaiyaari Naaka.
11 Te onkowaiya riyotaawakagaiya,
Apatziro inkantairi isheninka: “Piyotairi Awinkatharite.”
Maawoini riyoyetaina.
Ari riyoyetaina iriiperoripaini eejatzi ashironkainkaripaini, maawoini.
12 Osheki noneshironkatairi ikaariperoshiretakera,
Arira nompeyakotainiri.
13 Tema iitaitakero “owakerari aapatziyawakagaantsi”, ari riyoitzirori jiroka etawetakawori, paisato inatzi. Tema okaatzi paisatotaintsiri, rookaitziro.