1 ᓃᒋᔖᓂᑎᒄ, ᒨᔥ ᑲᓇᐗᒡ ᓵᒋᐦᐄᑐᒄ᙮ 2 ᒋᔅᒋᓯᒄ, ᒨᔥ ᒉᒌ ᐊᔦᔅᑯᐎᔦᒄ ᒉᒌ ᐲᐦᑕᑲᐦᐁᑯᒡ ᒫᓂᑌᐅᒡ ᒌᒋᐙᐙᐦᒡ᙮ ᐸᔅᒡ ᐊᐌᓂᒌ ᔖᔥ ᒌ ᐲᐦᑕᑲᐦᐁᐅᒡ ᒫᓂᑌᐤᐦ ᐊᓂᑌ ᐁ ᐃᐦᑖᑣᐤ, ᓇᒧᐃ ᒫᒃ ᐅᐦᒋ ᒋᔅᒉᔨᒣᐅᒡ ᐸᔅᒡ ᐊᓂᔫ ᒫᓂᑌᐤᐦ ᑳ ᐲᐦᑕᑲᐦᐋᑣᐤ ᐁ ᒌ ᐁᓐᒋᓘᐐᑯᐸᓀᓐ᙮ 3 ᒫᒥᑐᓀᔨᒫᐦᑯᒡ ᐊᓂᒌ ᐊᐌᓂᒌ ᒋᐸᐦᐅᑑᑲᒥᑯᐦᒡ ᑳ ᐃᐦᑖᑣᐤ᙮ ᒧᔮᒻ ᑲᔦ ᒋᔭᐙᐤ ᐁ ᐃᐦᑖᔦᒄ ᐊᓂᑌ ᐊᓂᔫ ᑳ ᐃᐦᑖᑣᐤ ᒉᒌ ᐃᔑ ᒫᒥᑐᓀᔨᐦᑕᒣᒄ᙮ ᒫᒥᑐᓀᔨᒫᐦᑯᒡ ᑲᔦ ᐊᓂᒌ ᑳ ᓇᓀᐦᑳᒋᐦᐋᑲᓅᑣᐤ ᒧᔮᒻ ᑲᔦ ᒋᔭᐙᐤ ᐁ ᓇᓀᐦᑳᒌᐦᐄᑯᔦᒄ ᒬᐦᒡ ᐎᔭᐙᐤ ᐁ ᐃᔑ ᓇᓀᐦᑳᒋᐦᐋᑲᓅᑣᐤ ᒉᒌ ᐃᑌᔨᐦᑕᒣᒄ᙮

4 ᑲᔦ ᒦᓐ ᑯᑕᒡ ᒉᒀᓐ ᒉ ᐃᑎᑕᑯᒡ, ᒥᓯᐌ ᐊᐌᓐ ᒋᐹ ᒋᔅᑌᔨᐦᑕᒥᐦᐄᑰ ᐐᒋᐦᑑᐎᓂᔫ᙮ ᐊᓐ ᓈᐯᐤ ᑲᔦ ᐐᒋᔅᑴᐤ ᒥᒄ ᐎᔭᐙᐤ ᒋᐹ ᐐᐦᐯᒥᑑᒡ᙮ ᓇᒧᐃ ᒋᐹ ᐅᐦᒋ ᐱᓯᒀᑎᓯᔪᒡ᙮ ᐌᔥ ᒋᔐᒪᓂᑑ ᒉᔥᑎᓈᔥ ᑲᑕ ᐎᔮᔅᑯᓀᐤ ᐊᓂᔫ ᑳ ᐐᓂᓲᐙᑎᓯᔨᒡ ᑲᔦ ᐊᓂᔫ ᑳ ᐱᓯᒀᑎᓯᔨᒡ᙮

5 ᐁᑳ ᐐ ᒋᑲ ᐅᐦᒋ ᐃᔑᓈᑯᓯᓈᐙᐤ ᒉᒌ ᓵᒋᐦᑖᔦᒄ ᔔᓕᔮᐤ᙮ ᒋᐹ ᒥᔦᔨᐦᑌᓈᐙᐤ ᑖᓐ ᐁ ᐃᔑ ᐊᔮᔦᒄ᙮ ᐌᔥ ᒋᔐᒪᓂᑑ ᒌ ᐃᑗᐤ,

7 ᒦᓐ ᑯᑕᒡ ᒉᒀᓐ, ᒫᒥᑐᓀᔨᒫᐦᑯᒡ ᒫ ᐊᓂᒌ ᒫᐅᒡ ᓃᔥᑕᒻ ᑳ ᐗᐐᐦᑕᒫᑖᑯᒡ ᒋᔐᒪᓂᑑ ᐅᑕᔨᒧᐎᓂᔫ, ᐊᓂᒌ ᑳ ᓃᑳᓂᔥᑲᐦᒀᐤ ᐊᔨᒥᐦᐁᐅᑲᒥᑯᔫ᙮ ᒫᒥᑐᓀᔨᒫᐦᑯᒡ ᑖᓐ ᑳ ᐃᑖᑎᓰᑣᐤ ᑲᔦ ᑳ ᐃᔑ ᐴᓂᐱᒫᑎᓰᑣᐤ ᐁᔥᒄ ᐁ ᑖᐺᔨᒫᑣᐤ ᒌᓴᔅ᙮ ᐁᑯᓐ ᐊᓐ ᒉ ᐐ ᐐᒋᐦᐄᑯᔦᒄ ᒉᒌ ᑖᐺᐦᑕᒣᒄ ᑖᓐ ᑳ ᐃᔑ ᑖᐺᐦᑕᐦᒀᐤ᙮ 8 ᒌᓴᔅ ᙭ ᓇᒧᐃ ᓂᐦᑖ ᐋᐦᒌᐤᐦ ᒋᑲ ᐅᐦᒋ ᐃᑌᔨᐦᑖᑯᓲ᙮ ᑖᓐ ᑳ ᐃᑌᔨᐦᑖᑯᓯᔨᑦ ᐅᑖᑯᔒᐦᒡ, ᐁᑯᓐ ᐁ ᐃᑌᔨᐦᑖᑯᓯᑦ ᐊᓄᐦᒌᔥ ᑲᔦ ᒫᒃ ᐁᑯᓐ ᒉ ᐃᑌᔨᐦᑖᑯᓯᑦ ᑳᒋᒉ᙮ 9 ᔮᒀᒦᒄ ᐁᑳ ᒉᒌ ᐎᔦᔑᐦᐄᑯᔦᒄ ᒉᒌ ᐊᑎ ᑖᐺᐦᑕᒣᒄ ᓇᓈᐦᑰ ᓂᑕᒧᒄ ᒋᔅᑯᑕᒫᒉᐎᓐᐦ᙮ ᐌᔥ ᒥᔻᔔ ᒥᑌᐦᐄ ᒉᒌ ᔮᐃᒋᑳᐴᐦᒡ ᔕᐌᔨᐦᒋᒉᐎᓂᐦᒡ, ᓇᒧᐃ ᐐ ᒦᒋᒥᐦᒡ᙮ ᐌᔥ ᓇᒧᐃ ᐐᒋᐦᐄᑰ ᐊᐌᓐ ᒦᒋᒥᔫ ᒉᒌ ᔮᐃᒋᑳᐴᑦ ᑖᐺᐦᑕᒧᐎᓂᐦᒡ ᐃᔑ᙮

10 ᐊᓂᒌ ᒎᐗ ᐊᔨᒥᐦᐁᐅᒋᒫᐅᒡ ᐁᔥᒄ ᑳ ᒪᒋᔥᑕᐌᐦᐊᒫᑣᐤ ᓇᒧᐃ ᐃᔑᓈᑯᓂᔫ ᒉᒌ ᒦᒋᑣᐤ ᐎᔭᐙᐤ ᐊᓂᔫ ᒦᒋᒥᔫ ᒋᔮᓅ ᒋᐸᒋᔅᑎᓂᒉᐅᓈᐱᔅᑯᓈᐦᒡ ᑳ ᐃᐦᑕᑯᓂᔨᒡ᙮ 11 ᐃᔅᑯᑕᒃ ᑳ ᓂᐸᐦᐋᑲᓅᑣᐤᐦ ᐊᓂᒌ ᐊᐌᓰᓴᒡ, ᐊᓐ ᐎᔮᔅ ᐐᐐᑕᒥᐦᒡ ᐊᓂᑦ ᐙᒋᑣᐤ ᐊᓂᒌ ᐄᓅᒡ ᐃᔥᒀᓯᑲᓅ᙮ ᐁᒄ ᐊᓐ ᒋᔐᐊᔨᒥᐦᐁᐅᒋᒫᐤ ᐊᓂᑌ ᒫᐅᒡ ᐁ ᐸᔦᐦᒋᓰᒪᑲᓂᔨᒡ ᑳ ᐃᔑᓂᐦᑳᑌᔨᒡ ᑳ ᐱᔅᒋᓵᓯᔨᒡ ᐃᑐᐦᑕᑖᐤ ᐊᓂᔫ ᒥᐦᑯᔫ᙮ ᐁᒄ ᐊᓂᑌ ᐯᒋᔥᑎᓇᐦᒃ ᐊᓂᔫᐦ ᒥᐦᑯᔫᐦ ᒋᔐᒪᓂᑑ ᐁ ᐃᐦᑖᔨᒡ ᐊᓂᑦ ᒉᒌ ᐅᐦᒋ ᐌᐯᔨᐦᑕᒧᐙᑲᓄᔨᒡ ᐊᐌᔫ ᐅᒪᒋᐦᑣᐎᓂᔫᐦ᙮ 12 ᒌᓴᔅ ᑲᔦ ᐎᔭ ᐊᓂᑌ ᐐᐐᑕᒥᐦᒡ ᐊᓂᔫ ᐃᐦᑖᐎᓂᔫ ᒌ ᓇᓀᐦᑳᒋᐦᐋᑲᓅ ᑲᔦ ᐁᑯᑌ ᑳ ᓂᐸᐦᐋᑲᓅᑦ᙮ ᐁᒄ ᐊᓂᔫ ᐅᒥᐦᒄ ᐁᑯᑦ ᑳ ᐅᐦᒋ ᐸᔦᐦᒋᐦᐋᑲᓅᑣᐤ ᐊᐌᓂᒌ ᒋᔐᒪᓂᑑ ᐅᑏᓃᒻ ᒉᒌ ᐃᔑ ᑲᓇᐙᐸᒫᑲᓅᑣᐤ᙮ 13 ᐁᒄ ᒫᒃ ᐐᐐᑖᐤ ᐊᓂᑕ ᐃᐦᑖᐎᓂᐦᒡ ᒉ ᓂᑐᐙᐸᒧᐦᒄ ᒌᓴᔅ ᑲᔦ ᒋᔮᓅ ᒉᒌ ᒨᔑᐦᑖᐅᐦᒄ ᑖᓐ ᑳ ᐃᔑ ᒫᔦᔨᒫᑲᓅᑦ᙮ 14 ᐅᑕᐦ ᐊᔅᒌᐦᒡ ᓇᒧᐃ ᐃᐦᑕᑯᓐ ᐃᐦᑖᐎᓐ ᑖᓂᑌ ᑳᒋᒉ ᒉᒌ ᐃᐦᑖᔨᐦᒄ᙮ ᒧᔮᒻ ᒥᒄ ᐁ ᔖᐳᐦᑕᐌᐦᑌᔨᐦᒄ ᒋᑎᔑᓈᑯᓯᓈᓅ ᐁ ᐐ ᐃᑐᐦᑌᔨᐦᒄ ᐊᓂᑌ ᐊᓐ ᐃᐦᑖᐎᓐ ᑳᒋᒉ ᒉ ᐃᐦᑕᑯᐦᒡ᙮ 15 ᒨᔥ ᐸᒋᔥᑌᔨᒥᓱᑖᐤ ᒉᒌ ᒫᒥᐦᒋᒥᐦᒄ ᒋᔐᒪᓂᑑ ᐊᓂᔫ ᐅᐦᒋ ᑖᓐ ᑳ ᐃᔑ ᐃᐦᑑᑕᒫᑕᐦᒄ ᒌᓴᔅ, ᒋᑑᓈᐦᒡ ᐁ ᐅᐦᒋ ᐙᐐᐦᑕᒨᐦᒀᐤ ᐊᐌᓂᒌ ᐁ ᑖᐺᔨᒪᐦᒄ ᒌᓴᔅ᙮ 16 ᐁᑳᐐ ᐴᓃᒄ ᐁ ᒥᔪᑑᑕᒫᒉᔦᒄ ᑲᔦ ᐁ ᒫᑎᓄᐌᐸᔨᐦᑖᑐᔦᒄ ᑖᓐ ᐁ ᐃᔑ ᐊᔮᔦᒄ᙮ ᐌᔥ ᑌᑲᔥ ᐁ ᐸᒋᔥᑌᔨᒥᓱᑦ ᐊᐌᓐ ᐅᔫ ᒉᒌ ᐃᐦᑎᑦ ᓇᐦᐁᔨᐦᑕᒥᐦᐁᐤ ᒋᔐᒪᓂᑑᐦ᙮ 17 ᓇᓂᐦᐄᐦᑐᐙᐦᑯᒡ ᐊᓂᒌ ᑳ ᓃᑳᓂᔥᑳᑖᑯᒡ ᐊᔨᒥᐦᐁᐅᑲᒥᑯᐦᒡ᙮ ᐌᔥ ᒋᐙᐐᒋᐦᐄᑯᐙᐅᒡ ᒋᑖᐺᐦᑕᒧᐎᓂᐙᐦᒡ᙮ ᐁᐅᒄ ᐅᔫ ᐅᑖᐸᑎᓱᐎᓇᐙᐤ᙮ ᐌᔥ ᒋᑲ ᓂᑕᐌᔨᐦᑖᑯᓲᒡ ᒉᒌ ᐐᐦᑕᒧᐙᑣᐤ ᒋᔐᒪᓂᑑ ᑖᓐ ᑳ ᐃᐦᑐᐌᒄ᙮ ᒋᑲ ᒥᔦᔨᐦᑕᒧᒡ ᒫᒃ ᒉᒌ ᐃᐦᑑᑕᐦᒀᐤ ᐅᔫ ᐅᑖᐸᑎᓱᐎᓇᐙᐤ ᒌᔥᐱᓐ ᒋᔭᐙᐤ ᓇᓂᐦᐄᐦᑐᐌᑴᓂᒡ ᑲᔦ ᒋᔅᑌᔨᐦᑕᒧᐌᑴ ᑖᓐ ᑳ ᐃᔑ ᒥᔮᑲᓅᑣᐤ ᒉᒌ ᓃᑳᓂᔥᑳᑖᑯᒡ᙮ ᐁᑳ ᒫᒃ ᐆ ᐃᐦᑎᔦᑴ ᒋᑲ ᒪᒉᔨᐦᑕᒧᒡ ᐁᒄ ᒫᒃ ᓇᒧᐃ ᒋᑲ ᒌ ᒥᔪ ᐐᒋᐦᐄᑯᐙᐅᒡ᙮ 18 ᒋᐳᑯᓭᔨᒥᑎᓈᓐ ᒉᒌ ᐯᒋ ᐊᔨᒥᐦᐁᔥᑕᒨᔮᐦᒡ᙮ ᒨᔥ ᓂᐐ ᐃᐦᑑᑕᒧᐙᓈᓐ ᐊᓂᔫ ᐁ ᐃᑌᔨᐦᑕᒥᐦᐄᑯᑦ ᒋᔐᒪᓂᑑ ᐁ ᑯᐃᔅᑯᓈᑯᓂᔨᒡ᙮ ᐌᔥ ᐁᑯᑦ ᒉ ᐅᐦᒋ ᒋᔅᒉᔨᐦᑕᒫᐦᒡ ᐁᑳ ᒉᒀᓐ ᐃᐦᑕᑯᐦᒡ ᒉᒌ ᒪᒉᔨᐦᑕᒥᐦᐄᑯᔮᐦᒡ᙮ 19 ᒋᓂᑐᑕᒫᑎᓈᐙᐤ ᒉᒌ ᐯᒋ ᐊᔨᒥᐦᐁᔥᑕᒨᔦᒄ ᐁᒄ ᒫᒃ ᒦᓐ ᐐᐸᒡ ᒉᒌ ᓂᑐᐙᐸᒥᑕᑯᒡ᙮

20 ᐁᒄ ᒫᒃ ᓂᑕᔨᒥᐦᐋᐤ ᒋᔐᒪᓂᑑ, ᐊᓐ ᑳ ᐃᐦᑑᑖᑖᒄ ᒉᒌ ᐊᔮᐌᒄ ᒋᔮᒣᔨᐦᑕᒧᐎᓂᔫ᙮ ᐎᔭ ᒌ ᐗᓂᔥᑳᓀᐤ ᐊᓂᔫᐦ ᒫᓂᔥᒑᓂᔓᐄᓅ ᑳ ᒋᔅᑌᔨᐦᑖᑯᓯᔨᒡ ᓂᐳᐎᓂᐦᒡ ᐅᐦᒋ, ᐁᐅᒄ ᐅᔫ ᒌᓴᔅ᙮ ᒌ ᐃᐦᑑᑕᐌᐤ ᒉᒌ ᒥᔪ ᑲᓄᐌᔨᒫᔨᒡ ᐅᑏᓃᒥᔫᐦ ᒬᐦᒡ ᐁ ᐃᐦᑎᔨᒡ ᒪᓂᔅᒑᓂᔓᐄᓅ ᐁ ᒥᔪ ᑲᓄᐌᔨᒫᔨᒡ ᒫᓂᔥᒑᓂᔕ᙮ ᒋᔐᒪᓂᑑ ᒌ ᐃᐦᑑᑕᒻ ᒉᒌ ᐋᐸᑕᓂᔨᒡ ᐊᓂᔫ ᑳ ᐅᔥᑳᔨᒡ ᓂᔅᑯᒧᐎᓂᔫ ᑳᒋᒉ ᒉ ᐃᐦᑕᑯᓂᔨᒡ ᒌᓴᔅ ᐅᒥᐦᑯᐦᒡ ᐅᐦᒋ᙮ 21 ᒥᔅᑕᐦᐄ ᒋᒌ ᐃᐦᑑᑕᒫᑯᐙᐤ ᒋᔐᒪᓂᑑ ᒌᓴᔅ ᐅᐦᒋ ᐁᒄ ᒫᒃ ᓀᑐᑕᒨᒃ ᒉᒌ ᒦᑖᒄ ᒥᓯᐌ ᐊᓂᔫ ᑳ ᒥᔻᔨᒀᐤ ᒉᒀᔫ ᐁ ᐃᔑ ᓂᑐᐌᔨᐦᑕᒣᒄ ᒉᒌ ᐃᐦᑑᑕᒧᐌᒄ ᐅᑎᑌᔨᐦᑕᒧᐎᓐ᙮ ᓂᑕᔨᒥᐦᐋᐤ ᑲᔦ ᒉᒌ ᐋᐸᑎᓯᑦ ᐊᓂᑌ ᒋᐱᒫᑎᓰᐎᓂᐙᐦᒡ ᐁᒄ ᒫᒃ ᒉᒌ ᓇᓂᐦᐁᔨᐦᑕᒥᐦᐄᑯᑦ ᐊᓂᔫ ᐁ ᐃᑖᑎᓰᐌᒄ᙮ ᒨᔥ ᒫᒃ ᒫᒥᐦᒋᒫᑖᐤ ᒌᓴᔅ ᙭ ᑳᒋᒉ ᑲᔦ ᑳᒋᒉ᙮ ᐊᒣᓐ᙮

22 ᓃᒋᔖᓂᑎᒄ, ᒋᒌ ᒪᓯᓇᐦᐊᒫᑎᓈᐙᐤ ᐆ᙮ ᓇᒧᐃ ᒥᒄ ᓈᔥᒡ ᒋᓍᐤ᙮ ᒋᒌ ᒪᓯᓇᐦᐊᒫᑎᓈᐙᐤ ᒉᒌ ᑳᒌᒋᐦᐄᑕᑯᒡ ᑖᐺᐦᑕᒧᐎᓂᐦᒡ ᐃᔑ᙮ ᐁᒄ ᒫᒃ ᒋᓰᐦᒋᒥᑎᓈᐙᐤ ᓲᐦᒃ ᒉᒌ ᓇᓂᐦᐄᐦᑕᒣᒄ ᑖᓐ ᑳ ᐃᑎᑕᑯᒡ᙮ 23 ᒫᔅᑰᒡ ᒋᒌ ᐯᐦᑌᓈᐙᐙᒉ ᒌᒋᔖᓅ ᑎᒧᑏ ᔖᔥ ᐁ ᒌ ᐐᐐᑦ ᒋᐸᐦᐅᑑᑲᒥᑯᐦᒡ ᐅᐦᒋ᙮ ᐐᐸᒡ ᑕᑯᔑᐦᑫ ᐅᑌ ᐁ ᐃᐦᑖᐅᒡ ᐁᒄ ᒉ ᐯᔓᐗᒃ ᐊᓂᑌ ᐁ ᐃᐦᑖᔦᒄ ᐃᔅᑯᑕᒃ ᓂᑐᐙᐸᒥᑕᑯᒉ᙮ 24 ᐙᒋᔦᒫᐦᑯᒡ ᐊᓂᒌ ᑳ ᓃᑳᓂᔥᑳᑖᑯᒡ ᑲᔦ ᒥᓯᐌ ᐊᓂᒌ ᑳ ᑖᐺᐦᑕᐦᒀᐤ ᐊᓂᑌ ᐁ ᐃᐦᑖᔦᒄ ᑳ ᐃᐦᑖᑣᐤ᙮ ᐊᓂᒌ ᑳ ᑖᐺᐦᑕᐦᒀᐤ ᐊᓂᑌ ᐃᑕᓖ ᐊᔅᒌᐦᒡ ᑳ ᐃᐦᑖᑣᐤ ᑲᔦ ᐎᔭᐙᐤ ᒋᐙᒋᔦᒥᑯᐙᐅᒡ᙮ 25 ᓂᑕᔨᒥᐦᐋᓈᓐ ᒋᔐᒪᓂᑑ ᒥᓯᐌ ᒉᒌ ᒥᔪᑑᑖᑖᒄ᙮ ᐊᒣᓐ᙮