1 ᒦᓐ ᐹᑎᒫ ᐁᒄ ᒌᓴᔅ ᑳ ᐃᑐᐦᑌᑦ ᐊᓂᑌ ᑲᓕᓖ ᑳ ᐃᔑᓂᐦᑳᑌᔨᒡ ᐊᔅᒌᔫ, ᓇᒧᐃ ᐐ ᐊᓂᑌ ᒎᑎᔭ ᑳ ᐃᔑᓂᐦᑳᑌᔨᒡ ᐊᔅᒌᔫ ᐃᑌᐦᒉ ᐅᐦᒋ ᐐ ᐃᑐᐦᑌᐤ ᐌᔥ ᒌ ᒋᔅᒉᔨᐦᑕᒻ ᐁ ᒌ ᐐ ᓂᐸᐦᐄᑯᑦ ᐊᓂᔫ ᒎᐗ ᐄᓅᐦ ᑳ ᓃᑳᓂᔥᑯᐙᔨᒡ᙮ 2 ᔖᔥ ᒫᒃ ᒌ ᐯᔓᓈᑯᓂᔫ ᑳ ᒌ ᒪᑯᔐᑣᐤ ᒎᐗ ᐄᓅᒡ᙮ ᐁᑯᑦ ᐅᔫ ᒣᒀᒡ ᒌ ᐃᐦᑕᑯᓂᔫ ᑖᓐ ᑳ ᒌ ᐃᐦᑎᑣᐤ ᒫᓐ ᑲᔦ ᒫᐦᑮᐦᒡ ᒌ ᐃᐦᑖᐅᒡ᙮ 3 ᐁᒄ ᒌᓴᔅ ᐐᒋᔖᓐᐦ ᑳ ᐃᑎᑯᑦ, ᒋᔅᑐᐦᑌ ᒫ, ᓀᑌ ᒎᑎᔭᐦᒡ ᒉ ᐃᑐᐦᑌᔨᓐ, ᒉ ᐙᐸᐦᑕᐦᒀᐤ ᐊᓂᒌ ᑳ ᓅᔔᔥᑳᔅᒀᐤ ᑖᓐ ᐁ ᐃᔑ ᒫᒥᔥᑳᒡ ᐃᐦᑑᑦ᙮ 4 ᓇᒧᐃ ᐊᐌᓐ ᑳᑖᐤ ᑖᓐ ᒉᒌ ᐃᔑ ᐃᐦᑑᑕᐦᒃ ᓀᑐᐌᔨᐦᑕᒧᑴ ᒉᒌ ᒥᔪ ᒋᔅᒉᔨᒫᑲᓅᑦ᙮ ᐁ ᐃᐦᑑᑕᒧᐗᓀ ᒫᒃ ᒫᒥᔥᑳᒡ ᐃᐦᑐᐎᓐ, ᐸᒋᔥᑎᓂᓲ ᒉᒌ ᒋᔅᒉᔨᒪᑯᔨᓐ ᑖᓐ ᒉᒌ ᐃᔑ ᐃᐦᑑᑕᒪᓐ᙮ 5 ᐌᔥ ᐗᐙᒡ ᑎᐲᐌ ᐐᒋᔖᓐᐦ ᓇᒧᐃ ᐅᐦᒋ ᑖᐺᔨᒥᑰ ᒌᓴᔅ᙮

6 ᐁᒄ ᒌᓴᔅ ᑳ ᐃᑖᑦ, ᑖᐹ ᐁᔥᒄ ᐅᑎᐦᒋᐸᔫ ᒉᒌ ᒋᔅᑐᐦᑌᔮᓐ, ᒋᔭᐙᐤ ᒫᒃ ᒥᒄ ᐙᐃᔥᐱᔥ ᐃᑐᐦᑌᔦᒄ ᒋᑲ ᒌ ᐃᑐᐦᑌᓈᐙᐤ᙮ 7 ᑖᐹ ᐃᐦᑕᑯᓂᔫ ᒉᒀᔫ ᒉᒌ ᐅᐦᒋ ᐅᐦᑳᑎᑖᑯᒡ ᐊᐌᓂᒡ ᐅᑕᐦ ᐊᔅᒌᐦᒡ ᑳ ᐃᐦᑖᑣᐤ ᐁᑳ ᑳ ᑖᐺᔨᒫᑣᐤ ᒋᔐᒪᓂᑑ, ᒥᒄ ᒫᒃ ᓅᐦᑳᑎᑯᒡ ᓂᔭ ᐌᔥ ᓂᐐᐦᑌᓐ ᑖᓐ ᐁ ᐃᔥᐱᔥ ᒪᒑᑎᓰᓈᓅᐦᒡ᙮ 8 ᒫᒌᒄ ᒋᔭᐙᐤ ᐃᑐᐦᑌᒄ ᓀᑌ ᐁ ᒪᑯᔖᓅᐦᒡ, ᑖᐹ ᐁᔥᒄ ᐅᑎᐦᒋᐸᔫ ᓂᔭ ᒉᒌ ᐃᑐᐦᑌᔮᓐ ᐊᓂᑌ᙮ 9 ᐃᔅᑯᑕᒃ ᒫᒃ ᒌᓴᔅ ᑳ ᐃᑗᑦ ᐅᔫ ᐁᑯᑦ ᔮᐸᒡ ᐊᓂᑦ ᑲᓕᓖᐦᒡ ᑳ ᐃᐦᑖᑦ᙮

10 ᐃᔅᑯᑕᒃ ᒫᒃ ᑳ ᒋᔅᑐᐦᑌᔨᑣᐤ ᐊᓂᔫ ᐐᒋᔖᓐᐦ ᒌᓴᔅ ᐊᓂᑌ ᐊᓂᔫ ᐁ ᒪᑯᔖᓄᔨᒡ ᐁ ᐃᑐᐦᑌᔨᑣᐤᐦ, ᑲᔦ ᐎᔭ ᒌ ᐃᑐᐦᑌᐤ ᐊᓂᑌ ᐁᑳ ᒋᔅᒉᔨᒪᑯᑦ ᐌᔥ ᓇᒧᐃ ᐅᐦᒋ ᓂᑕᐌᔨᒣᐤ ᒉᒌ ᒋᔅᒉᔨᒪᑯᑦ ᐊᐌᔫ ᐊᓂᑌ ᐁ ᐃᐦᑖᑦ᙮ 11 ᐊᓂᔫᐦ ᒫᒃ ᒎᐗ ᐄᓅᐦ ᑳ ᓃᑳᓂᔥᑯᐙᔨᒡ ᒌ ᓈᓂᑐᐌᔨᒥᑰ ᐊᓂᑌ ᐁ ᒪᑯᔖᓄᔨᒡ᙮ ᒌ ᓈᓂᑑ ᑲᑴᒋᔅᒉᔨᒧᔫᐦ ᑖᓂᑌ ᐁ ᐃᐦᑖᑦ᙮

12 ᒥᐦᒉᑐ ᒫᒃ ᐊᐌᔫ ᒌ ᐊᔨᒥᑐᑖᑰ ᐊᓂᑦ ᑳ ᐃᐦᑖᔨᒡ᙮ ᐸᔅᒡ ᐁ ᐃᑗᔨᒡ, ᓈᔥᒡ ᑖᐺ ᒥᔦᔨᐦᑖᑯᓲ ᐆ ᓈᐯᐤ᙮ ᐁᒄ ᑯᑕᒃ ᐁ ᐃᑗᔨᒡ, ᓇᒧᐃ ᒥᔦᔨᐦᑖᑯᓲ, ᐎᔦᔑᒣᐤ ᐊᐌᔫᐦ᙮ 13 ᓇᒧᐃ ᒫᒃ ᐅᐦᒋ ᒋᔐᐌᐅᒡ ᐁ ᐊᔨᒥᑐᑕᐙᑣᐤ ᒌᓴᔅ ᐌᔥ ᒌ ᑯᔥᑌᐅᒡ ᐊᓂᔫ ᒎᐗ ᐄᓅᐦ ᑳ ᓃᑳᓂᔥᑯᐙᔨᒡ᙮

14 ᔖᔥ ᒫᒃ ᐎᔦᔥ ᐋᐱᐦᑑ ᒌ ᐃᔥᐱᔥ ᒌᔑ ᒪᑯᔖᓄᔫ, ᐁᒄ ᒌᓴᔅ ᑳ ᐃᑐᐦᑌᑦ ᐊᓂᑌ ᒋᔐᐊᔨᒥᐦᐁᐅᑲᒥᑯᐦᒡ ᐁᒄ ᑳ ᒋᔅᑯᑕᒫᒉᑦ᙮ 15 ᐊᓂᒌ ᒫᒃ ᒎᐗ ᐄᓅᐦ ᑳ ᓃᑳᓂᔥᑯᐙᑣᐤ ᓈᔥᒡ ᒌ ᒥᔅᑳᑌᔨᐦᑕᒥᐦᐄᑰᒡ ᐁ ᐃᔥᐱᔥ ᒥᔫᐦᑖᑯᓯᔨᒡ ᐁ ᒋᔅᑯᑕᒫᒉᔨᒡ ᐁᒄ ᑳ ᐃᑗᑣᐤ, ᑖᓂᑌ ᐌᐦᒋ ᓈᔥᒡ ᒥᔅᑕᐦᐄ ᒋᔅᒉᔨᐦᑕᐦᒃ ᒪᓯᓇᐦᐄᑲᓂᔫ ᐁᑳ ᒫᒃ ᐐᔅᑳᑦ ᐅᐦᒋ ᒋᔅᑯᑕᒧᐙᑲᓅᑦ᙮

16 ᒌᓴᔅ ᑳ ᓂᔥᑴᐅᔑᐦᐋᑦ ᐁ ᐃᑖᑦ, ᐊᓐ ᑳ ᐃᔑ ᒋᔅᒋᓄᐦᐊᒫᒉᔮᓐ ᓇᒪᔦᐤ ᓂᔭ ᐊᓐ ᓂᒋᔅᒋᓄᐦᐊᒫᒉᐎᓐ, ᒋᔐᒪᓂᑑ ᐊᓂᔫ ᐅᒋᔅᒋᓄᐦᐊᒫᒉᐎᓐ, ᐊᓐ ᑳ ᐯᒋ ᐃᑎᔕᐦᐆᑦ᙮ 17 ᐊᓐ ᒫᒃ ᐊᐌᓐ ᓲᐦᒃ ᐐ ᐃᐦᑑᑕᒧᐙᑌ ᒋᔐᒪᓂᑑ ᐅᑎᑌᔨᐦᑕᒧᐎᓂᔫ, ᐊᓂᔫ ᑖᓐ ᐁ ᐃᔑ ᒋᔅᒋᓄᐦᐊᒫᒉᐅᒡ ᐁᑯᑦ ᒉ ᐅᐦᒋ ᒋᔅᒉᔨᐦᑕᐦᒃ ᒋᔐᒪᓂᑑᐦ ᑳ ᐯᒋ ᐃᑕᔓᒦᑴᓐ ᐊᓂᔫ ᒉᒌ ᐃᔑ ᒋᔅᑯᑕᒫᒉᐅᒡ ᒫᒃ ᒥᒄ ᓂᔭ ᓂᑎᑌᔨᐦᑕᒧᐎᓂᐦᒡ ᐌᐦᒋᐸᔨᔨᑴ᙮ 18 ᐊᓐ ᐊᐌᓐ ᒥᒄ ᐎᔭ ᑖᓐ ᐁ ᐃᑌᔨᐦᑕᐦᒃ ᑳ ᐃᔑ ᐐᐦᑕᐦᒃ ᒉᒀᔫ, ᓂᑐᐌᔨᐦᑕᒻ ᐎᔭ ᒉᒌ ᒋᔅᑌᔨᒫᑲᓅᑦ᙮ ᐁᒄ ᐊᓐ ᐊᐌᓐ ᑳ ᓂᑐᐌᔨᐦᑕᐦᒃ ᒉᒌ ᒋᔅᑌᔨᒫᑲᓄᔨᒡ ᐊᓂᔫ ᑳ ᐯᒋ ᐃᑎᔕᐦᐅᑯᑦ ᑯᐃᔅᒄ ᐃᐦᑑ ᑲᔦ ᓇᒧᐃ ᒥᑐᓐ ᐃᐦᑕᑯᓂᔫ ᐎᔦᔑᐦᐄᐌᐎᓂᔫ ᐊᓂᑦ ᐁ ᐃᐦᑖᑦ᙮ 19 ᓇᒧᐃ ᐋ ᒧᓯᔅ ᑰᐦᒋ ᒦᑯᐙᐤ ᐊᓂᔫ ᐐᔓᐌᐎᓂᔫ ᑳ ᐊᔮᔦᒄ᙮ ᓇᒧᐃ ᒫᒃ ᐙᒋᐯᔭᒄ ᐊᓂᑦ ᐁ ᑕᔑᔦᒄ ᒋᓇᓂᐦᐄᐦᑌᓈᐙᐤ ᐊᓐ ᐐᔓᐌᐎᓐ᙮ ᒉᒀᓐ ᒫᒃ ᐌᐦᒋ ᐐ ᐯᒋ ᓂᐱᐦᐃᔦᒄ᙮

20 ᐁᒄ ᐊᓂᒌ ᐄᓅᒡ ᑳ ᓂᔥᑴᐅᔑᐦᐋᑣᐤ ᒌᓴᔅ ᐁ ᐃᑖᑣᐤ, ᒪᒐᐦᒑᐦᒄ ᒋᐲᐦᒋᔥᑳᒄ᙮ ᐊᐌᓐ ᒫᒃ ᐆ ᐙ ᓂᐸᐦᐄᔅᒃ᙮

21 ᒌᓴᔅ ᑳ ᓂᔥᑴᐅᔑᐦᐋᑦ ᐁ ᐃᑖᑦ, ᐯᔭᒄ ᒫᒥᔥᑳᒡ ᐃᐦᑐᐎᓐ ᓂᒌ ᐃᐦᑑᑌᓐ, ᒋᒌ ᒥᔅᑳᑌᔨᐦᑕᒥᐦᐄᑯᓈᐙᐤ ᒫᒃ ᐁ ᐊᔨᒥᐦᐁᐅᒌᔑᑳᒡ ᐁ ᒌ ᐃᐦᑑᑕᒫᓐ ᐊᓐ᙮ 22 ᒧᓯᔅ ᒌ ᐃᑕᔓᐌᒉ ᒉᒌ ᐃᐦᑑᑖᑲᓄᔨᒡ ᐊᓂᔫ ᐐᔓᐌᐎᓂᔫ ᑳ ᐃᑕᔥᑌᔨᒡ ᒉᒌ ᒋᔅᒋᓄᐙᒋᔣᑲᓄᔨᒡ ᓈᐯᔕ ᒣᒀᒡ ᐁ ᐊᐱᔒᔑᔨᒡ᙮ ᓇᒪᔦᐤ ᒫᒃ ᒧᓯᔅ ᓃᔥᑕᒻ ᑳ ᐸᒋᔥᑎᓇᐦᒃ ᐊᓂᔫ ᐐᔓᐌᐎᓂᔫ, ᔖᔥ ᐊᓂᑌ ᐌᔅᑲᒡ ᒋᐙᐦᑯᒫᑲᓅᒡ ᐁᑯᓐ ᐅᔫ ᐐᔓᐌᐎᓂᔫ ᑳ ᐊᔮᑣᐤ᙮ ᔮᐸᒡ ᒫᒃ ᒋᒋᔅᒋᓄᐙᒋᔣᐙᐅᒡ ᓈᐯᔕᒡ ᐁ ᐅᑎᐦᒋᐸᔨᔨᒡ ᐅᔫ ᒉᒌ ᐃᐦᑑᑐᐙᑲᓅᑣᐤ ᐋᑦ ᒣᒀᒡ ᐁ ᒎᐗ ᐊᔨᒥᐦᐁᐅᒌᔑᑳᔨᒡ᙮ 23 ᐋᑦ ᐁ ᒎᐗ ᐊᔨᒥᐦᐁᐅᒌᔑᑳᒡ ᔮᐸᒡ ᒋᒋᔅᒋᓄᐙᒋᔣᐙᐅᒡ ᓈᐯᔕᒡ ᐁ ᐃᔥᐱᔥ ᐐ ᑲᓄᐌᔨᐦᑕᒧᐌᒄ ᒧᓯᔅ ᐅᐐᔓᐌᐎᓐ, ᒉᒀᓐ ᒫᒃ ᐌᐦᒋ ᒋᔓᐙᓰᔅᑑᔦᒄ ᑌᑲᔥ ᐁ ᒌ ᒦᓄᐙᒋᐦᐄᒃ ᐊᓐ ᓈᐯᐤ ᐁ ᐊᔨᒥᐦᐁᐅᒌᔑᑳᔨᒡ᙮ 24 ᑯᐃᔅᒄ ᒫ ᒫᒥᑐᓀᔨᐦᑕᒧᒄ ᐊᓐ ᑳ ᐃᐦᑑᑕᒫᓐ᙮ ᐁᑳᐐ ᐊᑖᒣᔨᒥᒄ ᒉᒀᓐ ᐁᑳ ᓃᔥᑕᒻ ᑌᑲᔥ ᓂᑑ ᒋᔅᒉᔨᐦᑕᒣᒄ ᒉᒀᓐ ᐌᐦᒌ ᐃᐦᑑᑕᒫᓐ ᐊᓐ ᑳ ᐃᐦᑑᑕᒫᓐ, ᒌ ᐃᑌᐤ ᒌᓴᔅ᙮

25 ᐸᔅᒡ ᐄᓅᒡ ᒉᕉᓴᓚᒥᐦᒡ ᑳ ᐅᐦᒌᑣᐤ ᒌ ᐃᑌᐅᒡ, ᐁᐅᒄ ᐋ ᐅᔫ ᓈᐯᐤ ᑳ ᐐ ᓂᐸᐦᐋᑣᐤ᙮ 26 ᑲᓇᐙᐸᒫᐦᒄ ᒫ᙮ ᓇᒧᐃ ᐎᔦᔥ ᐃᑖᑲᓅ ᐊᓂᑌ ᒣᑴᓰᓅ ᐁ ᒋᔅᒋᓄᐦᐊᒫᒉᑦ᙮ ᓇᒧᐃ ᑳᑲᔦ ᒋᔅᒉᔨᒣᐅᒡ ᐊᓂᒌ ᑳ ᓃᑳᓂᔥᑯᐙᑣᐤ ᒎᐗ ᐄᓅᐦ ᑖᐺ ᐁ ᐋᐎᔨᑴᓐ ᙭, ᐊᓂᔫ ᒋᔐᒪᓂᑑ ᑳ ᐯᒋ ᐃᑎᔕᐦᐙᔨᒡ᙮ 27 ᐄᓈᓅ ᒫᒃ ᐁᑳ ᒉ ᐅᐦᒋ ᒋᔅᒉᔨᒫᑲᓅᑦ ᑖᓂᑌ ᒉ ᐅᐦᒌᑦ ᙭ ᑕᑯᔑᐦᑫ᙮ ᐆ ᒫᒃ ᐐ ᓈᐯᐤ ᒋᒋᔅᒉᔨᒫᓅ ᑖᓂᑌ ᐌᐦᒌᑦ᙮

28 ᒣᒀᒡ ᒌᓴᔅ ᐁ ᒋᔅᑯᑕᒫᒉᑦ ᐊᓂᑌ ᒋᔐᐊᔨᒥᐦᐁᐅᑲᒥᑯᐦᒡ, ᒌ ᒋᔐᐌᐤ ᐁ ᐃᑗᑦ, ᑖᐺ ᐋ ᒋᒋᔅᒉᔨᒥᓈᐙᐤ ᐊᐌᓐ ᓂᔭ᙮ ᑖᐺ ᐋ ᒋᒋᔅᒉᔨᐦᑌᓈᐙᐤ ᑖᓂᑌ ᐌᐦᒋᔮᓐ᙮ ᓇᒧᐃ ᓅᐦᒋ ᑕᑯᔑᓐ ᓂᔭ ᒥᒄ ᐁ ᒌ ᐃᑌᔨᐦᑕᒫᓐ ᒉᒌ ᑕᑯᔑᓂᔮᓐ᙮ ᐊᓐ ᒨᔥ ᑯᐃᔅᒄ ᑳ ᐃᐦᑎᑦ ᐁᐅᑯᓐ ᐊᓐ ᑳ ᐯᒋ ᐃᑎᔕᐦᐆᑦ, ᓇᒧᐃ ᒫᒃ ᒋᒋᔅᒉᔨᒫᐙᐤ ᒋᔭᐙᐤ ᐆ ᐊᐌᓐ᙮ 29 ᒥᒄ ᒫᒃ ᓂᒋᔅᒉᔨᒫᐤ ᓂᔭ ᐌᔥ ᐎᔭ ᐁ ᐃᐦᑖᑦ ᓅᐦᒌᐙᓐ ᑲᔦ ᐎᔭ ᓂᒌ ᐯᒋ ᐃᑎᔕᐦᐆᒄ᙮

30 ᐁᑯᑦ ᑳ ᐐ ᒫᑯᓈᑣᐤ ᒌᓴᔅ ᒥᒄ ᒫᒃ ᓇᒧᐃ ᐅᐦᒋ ᐱᔅᒉᔨᒣᐅᒡ, ᐌᔥ ᐁᔥᒄ ᓇᒧᐃ ᐅᐦᒋ ᐅᑎᐦᒋᐸᔫ ᐊᓂᑦ ᒋᐹ ᒫᑯᓈᑲᓅ᙮ 31 ᒥᐦᒉᑐ ᒫᒃ ᐊᐌᔫ ᒌ ᑖᐺᔨᒥᑰ ᐁ ᐃᑗᔨᒡ, ᒥᔅᑕᐦᐄ ᒌ ᐃᔑ ᒫᒥᔥᑳᒡ ᐃᐦᑑ ᐆ ᓈᐯᐤ᙮ ᐯᒋ ᐃᑎᔕᐦᐙᑌ ᒫᒃ ᒋᔐᒪᓂᑑ ᐊᓂᔫᐦ ᙭, ᐅᔅᑌ ᐋ ᑲᑕ ᐃᔑ ᒫᒥᔥᑳᒡ ᐃᐦᑑᑕᒥᔫᐦ ᑖᓐ ᐁ ᐃᔑ ᐃᐦᑑᑕᒥᔨᒡ ᐅᔫ ᓈᐯᐤ᙮

32 ᐁᒄ ᐊᓂᒌ ᕓᕆᓰᒡ ᑳ ᐯᐦᑕᐙᑣᐤ ᐊᓂᔫᐦ ᐄᓅᐦ ᑖᓐ ᑳ ᐃᔑ ᒌᒨᑦ ᐋᔨᒨᒫᔨᒡ ᒌᓴᔅ᙮ ᐊᓂᒌ ᒫᒃ ᑳ ᓃᑳᓇᐱᑣᐤ ᐊᔨᒥᐦᐁᐅᒋᒫᐅᒡ ᑲᔦ ᐊᓂᒌ ᕓᕆᓰᒡ ᒌ ᐃᑎᔕᐦᐅᐌᐅᒡ ᐊᓂᔫᐦ ᑳ ᒫᑯᓇᐌᓯᔨᒡ ᑳ ᓈᓈᑲᒋᐦᑖᔨᒡ ᒋᔐᐊᔨᒥᐦᐁᐅᑲᒥᑯᔫ ᒉᒌ ᓂᑑ ᒫᑯᓈᔨᒡ ᒌᓴᔅ᙮ 33 ᒌᓴᔅ ᒫᒃ ᒌ ᐃᑌᐤ, ᐁᔥᒄ ᐌᐃᐱᔥᒌᔥ ᓂᑲ ᐃᐦᑖᓐ ᐅᑕᐦ ᐁ ᐃᐦᑖᔦᒄ᙮ ᒥᒄ ᒫᒃ ᔖᔥ ᐐᐸᒡ ᓂᑲ ᐃᑐᐦᑌᓐ ᐊᓂᑌ ᓅᐦᑖᐐ ᐁ ᐃᐦᑖᑦ, ᐊᓐ ᑳ ᐯᒋ ᐃᑎᔕᐦᐆᑦ᙮ 34 ᒋᑲ ᐯᒋ ᓈᓂᑐᐙᐸᒥᓈᐙᐤ ᒫᒃ, ᓇᒧᐃ ᒥᒄ ᒋᑲ ᐅᐦᒋ ᒥᔅᑯᓈᐙᐤ, ᐌᔥ ᐊᓂᑌ ᒉ ᐃᑐᐦᑌᔮᓐ ᓇᒧᐃ ᒋᑲ ᒌ ᐃᑐᐦᑌᓈᐙᐤ ᒋᔭᐙᐤ᙮

35 ᐁᒄ ᐊᓂᒌ ᒎᐗ ᑳ ᓃᑳᓂᔥᑯᐙᑣᐤ ᑳ ᑲᑴᒋᒥᑐᑣᐤ, ᑖᓂᑌ ᒉ ᐃᑐᐦᑌᑦ ᒉ ᐅᐦᒋ ᐁᑳ ᒥᔅᑰᐦᒃ᙮ ᒫᔅᑰᒡ ᑲᑴᑌᔨᐦᑕᒦᒉ ᐊᓂᑌ ᑯᑕᒃ ᒎᐗ ᐁ ᐃᐦᑖᔨᑣᐤᐦ ᒉᒌ ᐃᑐᐦᑌᑦ ᒉᒌ ᒋᔅᑯᑕᒧᐙᑦ ᐊᓂᔫ ᒃᕇᒃ ᑳ ᐃᑎᔅᑳᓀᓰᑣᐤᐦ᙮ 36 ᑖᓐ ᐁ ᐃᔑ ᒌᓱᐌᒪᑲᓂᔨᒡ ᐊᓂᔫ ᑳ ᐃᑗᑦ, ᒋᑲ ᓈᓂᑐᐙᐸᒥᓈᐙᐤ ᒥᒄ ᒫᒃ ᓇᒧᐃ ᒋᑲ ᐅᐦᒋ ᒥᔅᑳᐅᓈᐙᐤ᙮ ᑲᔦ ᑳ ᐃᑗᑦ, ᓇᒧᐃ ᒋᑲ ᒌ ᐃᑐᐦᑌᓈᐙᐤ ᐊᓂᑌ ᒉ ᐃᑐᐦᑌᔮᓐ᙮ ᑖᓐ ᐁ ᐃᔑ ᒌᓱᐌᑦ ᐊᓂᔫ ᑳ ᐃᑗᑦ, ᐁᑯᓐ ᑳ ᐃᔑ ᐊᔨᒥᐦᐄᑐᑣᐤ᙮

37 ᐊᓐ ᒫᐦᒋᔥᑕᐃ ᐁ ᒌᔑᑳᒡ ᐊᓐ ᑳ ᒪᑯᔖᓅᐦᒡ ᐁᐅᒄ ᒫᐅᒡ ᑳ ᒋᔅᑌᔨᐦᑖᑯᐦᒡ᙮ ᐁᐅᒄ ᒫᒃ ᐊᓂᔫ ᐁ ᒌᔑᑳᔨᒡ ᒌᓴᔅ ᑳ ᐱᓯᑰᑦ ᐁ ᒋᔐᐌᑦ ᐁ ᐃᑗᑦ, ᐊᐌᓐ ᐁ ᓅᐦᑌᔮᐹᑴᑴ ᓂᑲ ᐯᒋ ᓂᑐᐙᐸᒧᒄ ᐁᒄ ᒫᒃ ᒉ ᒥᓂᐦᐄᒃ᙮ 38 ᐌᔥ ᐃᑕᔥᑌᐤ ᒋᔐᒪᓂᑑ ᐅᑕᔨᒧᐎᓂᐦᒡ, ᐊᓐ ᐊᐌᓐ ᒉ ᐯᒋ ᑖᐺᔨᒥᑴ, ᐅᑌᐦᐄᐦᒡ ᒋᑲ ᐅᐦᒋᒎᓂᔫ ᐊᓂᔫ ᓂᐲᔫ ᑳ ᐱᒫᒋᐦᐄᐌᒪᑲᓂᔨᒡ᙮ 39 ᐁᐅᒄ ᐅᔫ ᑳ ᐃᑗᑦ ᒌᓴᔅ ᐁ ᐋᔨᒨᒫᑦ ᑳ ᐸᔦᐦᒋᓯᔨᒡ ᐊᐦᒑᐦᑾ, ᐊᓂᔫ ᒥᓯᐌ ᐊᐌᓐ ᑳ ᑖᐺᐦᑕᐦᒃ ᒉ ᐊᔮᐙᑦ᙮ ᐊᓂᒌ ᑳ ᑖᐺᐦᑕᐦᒀᐤ ᐁᔥᒄ ᓇᒧᐃ ᐅᐦᒋ ᒥᔮᑲᓅᒡ ᐊᓂᔫᐦ ᑳ ᐸᔦᐦᒋᓯᔨᒡ ᐊᐦᒑᐦᑾ ᐌᔥ ᐁᔥᒄ ᓇᒧᐃ ᐅᐦᒋ ᓂᑐᐙᐸᒣᐤ ᒌᓴᔅ ᐅᐦᑖᐐᒫᐤᐦ ᒉᒌ ᒋᔅᑌᔨᐦᑖᑯᐦᐋᑲᓅᑦ᙮

40 ᐸᔅᒡ ᒫᒃ ᐊᓂᒌ ᐊᐌᓂᒡ ᑳ ᐯᐦᑕᐙᑣᐤ ᐅᔫ ᐁ ᐃᑗᔨᒡ, ᒌ ᐃᑌᐅᒡ, ᐁᐅᑯᓐ ᐆ ᑖᐺ ᐅᒋᔅᒋᐌᐦᐄᒉᓲ ᑳ ᐯᒋ ᐃᑎᔕᐦᐙᑲᓅᑦ ᐅᑕᐦ ᐁ ᐃᐦᑖᔨᐦᒄ᙮

41 ᑯᑕᑲᒡ ᒫᒃ ᒌ ᐃᑌᐅᒡ, ᐁᐅᒄ ᐆ ᙭᙮ ᑯᑕᑲᒡ ᒌ ᐃᑌᐅᒡ, ᓇᒥᔦᐐᒉ ᐆ ᙭, ᐌᔥ ᓇᒧᐃ ᐊᓂᑌ ᑲᓕᓖᐦᒡ ᒋᐹ ᐅᐦᒋ ᐅᐦᒋᔫ ᐊᓐ ᙭᙮ 42 ᐃᑕᔥᑌᐤ ᒋᔐᒪᓂᑑ ᐅᑕᔨᒧᐎᓂᐦᒡ, ᐊᓂᑌ ᑌᐱᑦ ᐁ ᐃᐦᑖᔨᒡ ᒋᑲ ᐅᐦᒋ ᐋᓂᔅᒉ ᐱᒫᑎᓯᔫ ᐊᓐ ᙭, ᐊᓂᑌ ᒫᒃ ᐯᑦᓖᐦᐁᒥᐦᒡ ᐊᓂᔮᓈ ᑌᐱᑦ ᑳ ᐅᐦᒌᑦ ᐁᑯᑌ ᒋᐹ ᐱᒫᑎᓯᔫ᙮ 43 ᐁᒄ ᑳ ᐸᐦᑳᓂᐸᔨᐦᐅᑣᐤ ᐊᓂᒌ ᐄᓅᒡ ᐊᓂᔫ ᐅᐦᒋ ᐁᑳ ᐯᔭᑯᓂᐦᒡ ᐃᑌᔨᒫᑣᐤ ᒌᓴᔅ᙮ 44 ᐸᔅᒡ ᐊᐌᓂᒌ ᒌ ᐐ ᒫᑯᓀᐅᒡ ᒥᒄ ᓇᒧᐃ ᐊᐌᓐ ᐅᐦᒋ ᐱᔅᒉᔨᒣᐤ᙮

45 ᐊᓂᒌ ᒫᒃ ᑳ ᒫᑯᓇᐌᓲᑣᐤ ᑳᐤ ᒌ ᓂᑐᐙᐸᒣᐅᒡ ᐊᓂᔫ ᑳ ᓃᑳᓇᐱᑣᐤ ᐊᔨᒥᐦᐁᐅᒋᒫᐤᐦ ᑲᔦ ᐊᓂᔫᐦ ᕓᕆᓰᐦ᙮ ᒌ ᐃᑎᑰᒡ ᒫᒃ, ᒉᒀᓐ ᐌᐦᒋ ᐁᑳ ᐅᐦᒋ ᐯᔓᐌᒄ᙮

46 ᐁᒄ ᐊᓂᒌ ᑳ ᒫᑯᓇᐌᓲᑣᐤ ᑳ ᓂᔥᑴᐅᔑᐦᐋᑣᐤ ᐊᓂᔫᐦ ᐁ ᐃᑖᑣᐤ, ᓇᒧᐃ ᓂᐦᑖ ᐊᐌᓐ ᐅᐦᒋ ᐃᔥᐱᔥ ᒥᔪ ᒋᔅᑯᑕᒫᒉᐤ ᐁ ᐃᔥᐱᔥ ᒥᔪ ᒋᔅᑯᑕᒫᒉᑦ ᐆ ᓈᐯᐤ᙮

47 ᐁᒄ ᐊᓂᒌ ᕓᕆᓰᒡ ᑳ ᐃᑗᑣᐤ, ᑲᔦ ᐋ ᒋᔭᐙᐤ ᒋᒌ ᐎᔦᔑᐦᐄᑯᐙᐤ᙮ 48 ᓇᒧᐃ ᐐᔅᑳᑦ ᐊᐌᓐ ᐁ ᓃᑳᓂᔥᑳᒉᑦ ᒫᒃ ᐊᓂᒌ ᕓᕆᓰᒡ ᐅᐦᒋ ᑖᐺᐦᑕᒧᒡ ᒌᓴᔅ ᐁ ᐋᐎᔨᒡ ᙭᙮ ᓇᒧᐃ ᑲᔦ ᓂᔮᓐ ᓂᑖᐺᐦᑌᓈᓐ᙮ 49 ᒥᒄ ᐊᓂᒌ ᐄᓅᒡ ᐁᑳ ᑳ ᒋᔅᒉᔨᐦᑕᐦᒀᐤ ᒧᓯᔅ ᐅᐐᔓᐌᐎᓂᔫ ᐁᐅᒄ ᐅᒌ ᐙ ᑖᐺᔨᒫᑣᐤ ᒌᓴᔅ ᐁ ᐋᐎᔨᒡ ᙭, ᓂᔔᓈᒋᒥᑰᒡ ᒫᒃ ᒋᔐᒪᓂᑑᐦ ᐅᔫ ᐁ ᐃᐦᑎᑣᐤ, ᒌ ᐃᑌᐅᒡ ᐊᓂᒌ ᕓᕆᓰᒡ᙮

50 ᐯᔭᒄ ᐊᓐ ᕓᕆᓰ ᐊᓐ ᐯᔭᒀᐤ ᑳ ᓂᑐᐙᐸᒫᑯᐸᓀ ᒌᓴᔅ, ᓂᑯᑏᒪᔅ ᑳ ᐃᔑᓂᐦᑳᓱᑦ, ᒌ ᐃᑌᐤ ᐊᓂᔫ ᐐᒡ ᕓᕆᓰᐦ, 51 ᐃᑕᔥᑌᐤ ᒋᐐᔓᐌᐎᓅ, ᓇᒧᐃ ᒋᐹ ᐅᐦᒋ ᐎᔮᔅᑯᓈᓅ ᐊᐌᓐ ᐁᔥᒄ ᐁᑳ ᒣᒋᒻ ᐅᐦᒋ ᓂᑐᐦᑑᐦᒄ ᐁ ᐊᔨᒥᑦ ᑲᔦ ᐁᔥᒄ ᐁᑳ ᒋᔅᒉᔨᒪᐦᒄ ᑖᓐ ᑳ ᐃᐦᑎᑦ᙮

52 ᒌ ᓂᔥᑴᐅᔑᐦᐁᐅᒡ ᒫᒃ ᐁ ᐃᑖᑣᐤ, ᑲᔦ ᒋᔭ ᐋ ᑲᓕᓖ ᐊᔅᒌᐦᒡ ᑰᐦᒋᔨᓐ᙮ ᐊᔨᒥᐦᑖᔨᓀ ᒋᔐᒪᓂᑑ ᐅᑕᔨᒧᐎᓐ ᒋᑲ ᒋᔅᒉᔨᐦᑌᓐ ᐁᑳ ᐐᔅᑳᑦ ᐅᐦᒋ ᐅᐦᒌᑦ ᐊᐌᓐ ᐁ ᐅᒋᔅᒋᐌᐦᐄᒉᓲᑦ ᐊᓂᑌ ᑲᓕᓖ ᐊᔅᒌᐦᒡ᙮ 53 ᐁᒄ ᒥᓯᐌ ᑳ ᒌᐌᑣᐤ᙮