16
ᒌᓴᔅ ᑳ ᐗᓂᔥᑳᓈᑲᓅᑦ ᓂᐳᐎᓂᐦᒡ ᐅᐦᒋ
ᒫᑎᔫ 28:1-8; ᓘᒃ 24:1-12; ᒞᓐ 20:1-10
1 ᐃᔅᑯᑕᒃ ᒣᔮᐅᐸᔨᓂᔨᒡ ᒎᐗ ᐄᓅᒡ ᐅᑕᔨᒥᐦᐁᐅᒌᔑᑳᒧᐙᐤ ᐊᓂᒌ ᐃᔅᑴᐅᒡ ᒣᕇ ᒪᒃᑕᓕᓐ, ᑲᔦ ᒣᕇ ᒉᒥᔅ ᐅᑳᐐ ᐁᒄ ᒫᒃ ᓴᓨᒦ ᒌ ᓂᑑ ᐅᑎᓇᒧᒡ ᓇᓈᐦᑰ ᐁ ᐃᔑᓈᑯᓂᔨᒀᐤᐦ ᐁ ᐐᐦᒋᒫᑯᓯᔨᒀᐤ ᑑᒥᓂᑲᓐᐦ ᒉᒌ ᑑᒥᓇᒧᐙᑣᐤ ᒌᓴᔅ ᐐᔫᔫ᙮ 2 ᐐᐸᒡ ᒫᒃ ᒋᔦᒋᔐᐹᔮᔨᒡ ᓃᔥᑕᒻ ᐊᓂᔫ ᐁ ᒌᔑᑳᔨᒡ ᐊᓂᔫ ᒦᓐ ᒉ ᐊᑎ ᑑᔥᑌᔨᒡ, ᐃᔅᑯᑕᒃ ᐱᔦᒋ ᓅᑯᓯᔨᒡ ᐲᓯᒻ, ᐊᓂᑌ ᑳ ᐙᑕᒀᐱᔅᑲᐦᐄᑲᓄᔨᒡ ᒌ ᐃᑐᐦᑌᐅᒡ᙮ 3 ᐊᓂᔫ ᒫᒃ ᐁ ᐊᑎ ᐱᒧᐦᑌᑣᐤ ᒌ ᐃᑎᑑᒡ, ᐊᐌᓐ ᒉ ᐄᒉ ᑎᐦᑎᐱᓇᒫᑕᐦᒄ ᐊᓂᔫ ᐊᓯᓃ ᑳ ᒋᐱᔑᒫᑲᓄᔨᒡ ᐊᓂᑦ ᐁ ᐸᑯᓀᔮᔨᒡ᙮ 4 ᐌᔥ ᓈᔥᒡ ᒌ ᑎᔫ ᐊᓂᔫ ᐊᓯᓃ᙮ ᐁ ᐄᑖᐱᑣᐤ ᒫᒃ ᐊᓂᑌ ᒉᒀᔫ ᔖᔥ ᑳ ᐄᒉ ᑎᐦᑎᐱᓈᑲᓄᔨᑯᐸᓀᓐ ᐊᓂᔫ ᐊᓯᓃ᙮ 5 ᐁᒄ ᑳ ᐲᐦᒉᑣᐤ ᐊᓂᔫ ᑳ ᐙᑕᒀᐱᔅᑲᐦᐄᑲᓄᔨᒡ᙮ ᐊᓂᑌ ᒫᒃ ᓂᐦᐄᐎᓂᐦᒡ ᐃᑌᐦᒉ ᒌ ᐙᐸᒣᐅᒡ ᐅᔅᒋᓃᒎ ᐁ ᓃᐳᔨᒡ ᐁ ᐙᐹᔅᐱᓱᔨᒡ᙮ ᓄᐗᒡ ᒫᒃ ᒌ ᑯᔥᑯᐸᔫᒡ ᐎᔮᐸᒫᑣᐤ᙮ 6 ᒌ ᐃᑎᑰᒡ ᒫᒃ, ᐁᑳᐐ ᓭᒋᓯᒄ᙮ ᒌᓴᔅ ᓈᓴᕆᑦ ᑳ ᐅᐦᒌᑦ ᒋᐯᒋ ᓈᓂᑐᐌᔨᒫᐙᐤ, ᐊᓐ ᑳ ᒌᔅᑖᔅᑯᐦᐙᑲᓅᑦ ᐋᔑᑌᔮᐦᑎᑯᐦᒡ᙮ ᒌ ᐗᓂᔥᑳᐤ ᐌᓯᓐ, ᓇᒧᐃ ᐃᐦᑖᐤ ᐅᑕᐦ᙮ ᑲᓇᐙᐸᐦᑕᒧᐙᐦᒄ ᒫ ᐊᓂᑦ ᑳ ᐱᒥᔑᒫᑲᓅᑦ᙮ 7 ᒫᒌᒄ ᒫᒃ ᓂᑑ ᐐᐦᑕᒨᒫᐦᒄ ᐅᒋᔅᒋᓄᐦᐊᒧᐙᑲᓐᐦ ᑲᔦ ᐲᑕᕐ ᐐᐦᑕᒧᐙᐦᒄ, ᐁ ᓃᑳᓂᐦᑌᔨᒡ ᒌᓴᔅ ᑲᓕᓖᐦᒡ ᐁ ᐃᑐᐦᑌᔨᒡ᙮ ᐁᑯᑌ ᐊᓂᑌ ᒉ ᐙᐸᒣᒄ, ᒬᐦᒡ ᐊᓂᔫ ᑖᓐ ᑳ ᐃᑎᑖᒄ᙮ 8 ᐁᒄ ᑳ ᐐᐐᐸᐦᐄᑐᑣᐤ ᐊᓂᒌ ᐃᔅᑴᐅᒡ ᐊᓂᔫ ᑳ ᐙᑕᒀᐱᔅᑲᐦᐄᑲᓄᔨᒡ ᐁ ᓇᓇᒥᐸᔨᑣᐤ ᑲᔦ ᐁ ᓭᒋᓯᑣᐤ᙮ ᓇᒧᐃ ᐊᐌᔫ ᐅᐦᒋ ᐊᔨᒥᐦᐁᐅᒡ ᑳ ᐃᔥᐱᔥ ᒌ ᑯᔥᑖᒋᑣᐤ᙮
ᒌᓴᔅ ᑳ ᓅᑯᔒᔥᑕᐙᑦ ᒣᕇ ᒪᒃᑕᓕᓐ
ᒫᑎᔫ 28:9-10; ᒞᓐ 20:11-18
9 ᐃᔅᑯᑕᒃ ᒌᓴᔅ ᑳ ᐗᓂᔥᑳᑦ ᓂᐳᐎᓂᐦᒡ ᐅᐦᒋ ᐐᐸᒡ ᐁ ᒉᒋᔐᐹᔮᔨᒡ ᐊᓂᔫ ᓃᔥᑕᒻ ᐁ ᒌᔑᑳᔨᒡ ᒦᓐ ᒉ ᐱᒥᑕᐅᔥᑌᔨᒡ ᒣᕇ ᒪᒃᑕᓕᓐ ᓃᔥᑕᒻ ᒌ ᓅᑯᔒᔥᑕᐌᐤ᙮ ᐁᐅᑯᔫ ᐃᔅᑴᐤ ᑳ ᐐᐐᑎᔑᐦᐆᒫᑦ ᓃᔣᔥᒡ ᒪᒋᐊᐦᒑᐦᑾ ᐁ ᒌ ᐲᐦᒋᔥᑳᑯᔨᒡ᙮ 10 ᒣᕇ ᒪᒃᑕᓕᓐ ᒫᒃ ᒌ ᓂᑑ ᐐᐦᑕᒧᐌᐤ ᐊᓂᔫ ᐊᐌᔫ ᑳ ᒌ ᐙᐐᒉᐙᔨᒡ ᒌᓴᔅ᙮ ᒌ ᒫᒫᑌᐅᒧᔫ ᑲᔦ ᒌ ᑯᔑᑯᑌᐦᐁᔫ ᑳ ᐅᑎᐦᑖᑦ᙮ 11 ᐃᔅᑯᑕᒃ ᒫᒃ ᐱᔦᐦᑕᐙᑣᐤ ᐅᔫ ᐃᔅᑴᐤ ᐁ ᐃᑗᔨᒡ ᐁ ᐱᒫᑎᓯᔨᒡ ᒌᓴᔅ ᑲᔦ ᐁ ᒌ ᐙᐸᒫᔨᒡ ᓇᒧᐃ ᐅᐦᒋ ᐐ ᑖᐺᐦᑕᐌᐅᒡ᙮
ᒌᓴᔅ ᑳ ᓅᑯᔒᔥᑕᐙᑦ ᓃᔓ ᐅᒋᔅᒋᓄᐦᐊᒧᐙᑲᓐᐦ
ᓘᒃ 24:13-35
12 ᐹᑎᒫ ᒫᒃ ᒌᓴᔅ ᒌ ᓅᑯᔒᔥᑕᐌᐤ ᓃᔓ ᐅᒋᔅᒋᓄᐦᐊᒧᐙᑲᓐᐦ ᒣᒀᒡ ᐁ ᐱᒧᐦᑌᔨᒡ ᐐᐐᑕᒥᐦᒡ ᐊᓂᔫ ᒉᕉᓴᓚᒥᔫ᙮ ᐋᐦᒌᐤᐦ ᒌ ᐃᔑᓈᑯᓲ ᐊᓂᔫ ᑳ ᓅᑯᔒᔥᑕᐙᑦ᙮ 13 ᐃᔅᑯᑕᒃ ᑳ ᒌᐌᑣᐤ ᐁᒄ ᑳ ᐐᐦᑕᒧᐙᑣᐤ ᐊᓂᔫ ᑯᑕᒃ ᒋᔅᒋᓄᐦᐊᒧᐙᑲᓐᐦ ᒥᒄ ᒫᒃ ᓇᒧᐃ ᐅᐦᒋ ᐐ ᑖᐺᐦᑖᑰᒡ᙮
ᒌᓴᔅ ᑳ ᓅᑯᔒᔥᑕᐙᑦ ᐊᓂᔫᐦ ᐯᔭᑯᔖᑉ ᐅᒋᔅᒋᓄᐦᐊᒧᐙᑲᓐᐦ
ᒫᑎᔫ 28:16-20; ᓘᒃ 24:36-49; ᒞᓐ 20:19-23; ᐊᐸᔅᑕᓚᒡ 1:6-8
14 ᐹᑎᒫ ᒫᒃ, ᒌᓴᔅ ᒌ ᓅᑯᔒᔥᑕᐌᐤ ᐊᓂᔫ ᐯᔭᑯᔖᑉ ᒣᒀᒡ ᐁ ᒫᒨᒦᒋᓱᔨᒡ ᒦᒋᓲᓈᐦᑎᑯᐦᒡ᙮ ᒌ ᐋᓄᐌᔨᒣᐤ ᒫᒃ ᐊᓂᔫ ᐁ ᐋᓄᐌᐦᑕᒥᔨᒡ ᑲᔦ ᐁ ᒥᔅᑲᐅᑌᐦᐁᔨᒡ, ᐁᑳ ᐅᐦᒋ ᐐ ᑖᐺᐦᑕᐙᔨᒡ ᐊᓂᔫ ᒋᔅᒋᓄᐦᐊᒧᐙᑲᓐᐦ ᐊᓂᔫᐦ ᑳ ᐙᐸᒥᑯᔨᒡ ᐹᑎᒫ ᑳ ᐗᓂᔥᑳᓈᑲᓅᑦ᙮ 15 ᐁᒄ ᑳ ᐃᑖᑦ, ᒫᒌᒄ ᒥᓯᐌ ᐁ ᐃᔅᐱᒋᔅᑲᒥᑳᒡ ᐆ ᐊᔅᒌ ᒉ ᑲᒉᔅᑴᔦᒄ ᐁ ᐙᐐᐦᑕᒣᒄ ᐆ ᒥᔻᒋᒧᐎᓐ ᒥᓯᐌ ᐊᐌᓐ ᒉᒌ ᐯᐦᑕᐦᒃ᙮ 16 ᐊᓐ ᐊᐌᓐ ᒉ ᑖᐺᐦᑕᒧᑴ ᓀᔥᑕ ᓰᑲᐦᐋᐦᑐᐙᑲᓅᑌ ᑲᑕ ᐱᒫᒋᐦᐋᑲᓅ, ᐁᒄ ᐊᓐ ᐊᐌᓐ ᐁᑳ ᒉ ᑖᐺᐦᑕᒧᑴ ᑲᑕ ᓂᔔᓈᒋᒫᑲᓅ᙮ 17 ᑳ ᑖᐺᐦᑕᐦᒀᐤᐦ ᑲᑕ ᒥᔮᑲᓅᒡ ᓲᐦᑳᑎᓰᐎᓂᔫ ᒉᒌ ᐃᐦᑑᑕᐦᒀᐤ ᓇᓈᐦᑰ ᒫᒥᔥᑳᒡ ᐙᐸᐦᑏᐌᐎᓐᐦ᙮ ᒪᒋᐊᐦᒑᐦᑾ ᑲᑕ ᐐᐐᑎᔑᐦᐌᐅᒡ ᓂᑎᔑᓂᐦᑳᓱᐎᓂᔫ ᐁ ᐋᐸᒋᐦᑖᑣᐤ ᑲᔦ ᓇᓈᐦᑰ ᐊᔨᒧᐎᓐᐦ ᑲᑕ ᐃᔑ ᐊᔨᒨᒡ᙮ 18 ᐅᑎᓈᑣᐌᓂᒡ ᒋᓀᐳᒄ, ᒫᒃ ᒥᓂᐦᑴᑣᐌᓂᒡ ᒉᒀᔫ ᐁ ᐱᐦᒋᐳᐌᔨᒡ ᓇᒧᐃ ᑲᑕ ᐅᐦᒋ ᐎᔦᔥ ᐃᐦᑑᑖᑰᒡ᙮ ᑳ ᐋᐦᑯᓰᑣᐤ ᐊᐌᔫ ᑲᑕ ᓵᒥᓀᐅᒡ ᐁᒄ ᒫᒃ ᒉ ᒦᓄᐙᑎᓯᔨᒡ᙮
ᒌᓴᔅ ᑳ ᐅᐦᐱᔅᑳᑦ
ᓘᒃ 24:50-53; ᐊᐸᔅᑕᓚᒡ 1:9-11
19 ᐹᑎᒫ ᒫᒃ ᒌᓴᔅ ᑳ ᒌᔑ ᐊᔨᒥᐦᐋᑦ ᐅᒋᔅᒋᓄᐦᐊᒧᐙᑲᓐᐦ ᑭᐦᒋᑮᔑᑯᐦᒡ ᒌ ᐃᔑ ᐅᐦᐱᔅᑳᐤ᙮ ᐊᓂᑌ ᒋᔐᒪᓂᑑ ᐅᓂᐦᐄᐎᓃᐦᒡ ᐃᑌᐦᒉ ᐁᑯᑌ ᑳ ᐃᔑ ᐗᐌᔭᐱᑦ᙮ 20 ᐁᒄ ᒫᒃ ᒋᔅᒋᓄᐦᐊᒧᐙᑲᓂᒡ ᒥᓯᐌ ᒌ ᐊᐃᑐᐦᑌᐅᒡ ᐁ ᑲᒉᔅᑴᑣᐤ᙮ ᐅᑎᐯᔨᐦᒋᑫᐤᐦ ᒌ ᐐᒋᐦᐄᑰᒡ ᑲᔦ ᒌ ᐙᐸᐦᑏᐌᔫ ᐁ ᑖᐺᒪᑲᓂᔨᒡ ᑖᓐ ᐁ ᐃᔑ ᑲᒉᔅᑴᑣᐤ ᐊᓂᔫ ᐅᐦᒋ ᓇᓈᐦᑰ ᒫᒥᔥᑳᒡ ᐙᐸᐦᑏᐌᐎᓐᐦ ᐁ ᒌ ᐃᐦᑑᑕᐦᒀᐤ᙮ ᐊᒣᓐ᙮