ᒋᔅᒉᔨᐦᑖᑯᐦᑖᒉᐎᓐ
ᑖᓐ ᑳ ᐃᔑ ᒋᔅᒉᔨᐦᑕᒥᐦᐋᑲᓅᑦ ᒞᓐ
ᑖᓐ ᐁ ᐃᔑ ᐋᔨᒨᑌᒡ ᐅᑕᐦ ᐆ ᒪᓯᓇᐦᐄᑲᓐ
ᐆ ᒪᓯᓇᐦᐄᑲᓐ ᐁᐅᑯᓐ ᐆ ᒥᒄ ᐁ ᐃᐦᑕᑯᐦᒡ ᐁ ᐃᑌᔨᐦᑖᑯᐦᒡ ᐅᑕᐦ ᐁ ᐅᔅᑳᒡ ᑌᔅᑕᒥᓐᑦ᙮ ᐆ ᒪᓯᓇᐦᐄᑲᓐ ᐁᑯᑦ ᐁ ᐋᔨᒨᑌᒡ ᑖᓐ ᒉ ᐃᑌᔨᐦᑖᑯᐦᒡ ᐁ ᐊᑎ ᐃᔅᒀᔮᒡ ᐆ ᐊᔅᒌ ᓀᔥᑕ ᒉ ᒋᐦᒋᐸᔨᐦᒡ ᐁᒄ ᐊᓐ ᑳ ᐅᔅᑳᒡ ᑭᐦᒋᑮᔑᒄ ᓀᔥᑕ ᐊᔅᒌ ᑳ ᐋᔨᒨᑌᒡ᙮ ᒞᓐ, ᐊᓐ ᐊᐸᔅᑕᓪ ᑳ ᐃᑖᐸᑎᓯᑦ ᐁᑯᓐ ᑳ ᒪᓯᓇᐦᐊᐦᒃ ᐅᔫ ᒪᓯᓇᐦᐄᑲᓂᔫ ᒣᒀᒡ ᐊᓂᑌ ᐸᑦᒧᔅ ᑳ ᐃᔑᓂᐦᑳᑌᔨᒡ ᒥᓂᔅᑎᑯᔫ ᑳ ᐃᐦᑖᑦ᙮ ᒣᒀᒡ ᐊᓂᑌ ᑳ ᐃᐦᑖᑦ ᒞᓐ ᒌ ᐙᐸᐦᑏᑰ ᒌᓴᔅ ᐙᐸᐦᑏᐌᐎᓂᔫ ᑖᓐ ᒉ ᐃᔅᐸᔨᐦᒡ ᐊᓂᑌ ᐃᔑ ᓃᔥᑖᒥᐦᒡ᙮ ᐁᐅᒄ ᐅᔫ ᑳ ᐃᑕᓯᓇᐦᐄᒉᑦ ᒞᓐ ᒉᒌ ᐅᐦᒋ ᑖᐺᐦᑕᒥᔨᒡ ᐊᓂᔫ ᑳ ᑖᐺᐦᑕᒦᑣᐤ ᑖᐺ ᐎᔭ ᒋᔐᒪᓂᑑ ᐁ ᐱᒥᐸᔨᐦᑖᑦ ᑖᓐ ᐁ ᐃᔅᐸᔨᒡ ᐅᑕᐦ ᐊᔅᒌᐦᒡ᙮ ᐊᓂᔫ ᑖᓐ ᑳ ᐃᔑ ᐙᐸᐦᑎᔮᑲᓅᑦ ᒞᓐ ᐁᑯᑦ ᐁ ᓅᑯᓂᔨᒡ ᑖᐺ ᐎᔭ ᒌᓴᔅ ᐁ ᑎᐯᔨᐦᒋᒉᑦ ᒥᓯᐌ ᐊᐌᔫᐦ ᐁ ᐃᐦᑖᔨᒡ ᓀᔥᑕ ᐊᓂᑌ ᒥᓯᐌ ᒉᒀᔫ ᐁ ᐃᔑ ᐃᐦᑕᑯᓂᔨᒡ, ᐃᔥᐱᔥ ᐐ ᐊᓂᔫ ᒫᐅᒡ ᑳ ᓲᐦᒉᔨᐦᑖᑯᓯᔨᒡ ᑎᐯᔨᐦᒋᒉᓲ, ᓀᔥᑕ ᒥᓯᐌ ᒋᑲ ᐎᔮᔅᑯᓇᒻ ᑲᔦ ᒋᑲ ᓂᔔᓈᒋᐦᑖᐤ ᒪᒑᑎᓰᐎᓂᔫ᙮ ᑲᔦ ᐁᑯᑦ ᐌᐦᒋ ᐙᐸᐦᑎᔮᑲᓅᑣᐤ ᐊᓂᒌ ᑳ ᑖᐺᐦᑕᐦᒀᐤ ᑖᓐ ᒉ ᐃᑌᔨᐦᑖᑯᓂᔨᒡ ᐊᓂᑌ ᑭᐦᒋᑮᔑᑯᐦᒡ ᐊᓂᑌ ᒉ ᐃᐦᑖᔨᐦᒄ ᒌᓴᔅ ᐁ ᐃᐦᑖᑦ᙮
1
ᒞᓐ ᑳ ᐐᐦᑕᐦᒃ ᑖᓐ ᑳ ᐃᔑ ᒋᔅᒉᔨᐦᑕᒥᐦᐋᑲᓅᑦ
ᐁᐅᒄ ᐅᔫ ᑳ ᐃᔑ ᐙᐸᐦᑏᐌᑦ ᒌᓴᔅ, ᒋᔐᒪᓂᑑ ᒌ ᒦᑰ ᒉᒌ ᒋᔅᒉᔨᐦᑕᒥᐦᐋᑦ ᐊᓂᔫ ᑳ ᐊᑐᔥᑯᐙᔨᒡ ᒋᔐᒪᓂᑑ ᑖᓐ ᒉ ᐃᔅᐸᔨᔨᒡ ᐐᐸᒡ᙮ ᓂᔭ, ᒞᓐ, ᒋᔐᒪᓂᑑ ᑳ ᐊᑐᔥᑯᐙᑦ, ᓂᒌ ᐃᑎᔕᐦᐊᒫᒄ ᙭ ᐁᓐᒋᓪ ᒉᒌ ᐯᒋ ᐐᐦᑕᒧᔨᒡ ᑖᓐ ᐊᓂᔫᐦ ᔖᔥ ᐐᐸᒡ ᒉ ᐃᔅᐸᔨᔨᒡ᙮ ᒥᓯᐌ ᒫᒃ ᓂᒌ ᒪᓯᓇᐦᐁᓐ ᑖᓐ ᑳ ᐃᔑ ᐙᐸᐦᑏᑯᔮᓐ᙮ ᐊᓐ ᒫᒃ ᑳ ᐃᔑ ᒪᓯᓇᐦᐊᒫᓐ ᑖᐺ ᒋᔐᒪᓂᑑ ᐅᑕᔨᒧᐎᓐ ᐊᓂᔫ᙮ ᒌᓴᔅ ᒌ ᓅᑯᐦᑖᐤ ᑖᐺ ᐁ ᑖᐺᒪᑲᓂᔨᒡ᙮ ᒋᑲ ᔕᐌᔨᐦᑖᑯᓲ ᐊᓐ ᐊᐌᓐ ᒉ ᐊᔨᒥᐦᑖᑦ ᐅᔫ ᑖᓐ ᐁ ᐃᑕᔥᑌᔨᒡ ᐅᑕᐦ ᐊᓂᑦ ᒉᒌ ᐅᐦᒋ ᐯᐦᑕᒥᔨᒡ ᑯᑕᒃ ᐊᐌᔫᐦ᙮ ᐊᓂᒌ ᑳ ᐯᐦᑕᐦᒀᐤ ᑲᔦ ᑳ ᓇᓂᐦᐄᐦᑕᐦᒀᐤ ᑖᓐ ᐁ ᐃᑕᔥᑌᔨᒡ ᐊᓂᑦ ᑲᔦ ᐎᔭᐙᐤ ᒋᑲ ᔕᐌᔨᐦᑖᑯᓲᒡ᙮ ᐌᔥ ᔖᔥ ᐯᔓᓈᑯᓐ ᒉ ᐅᐦᑎᐦᒋᐸᔨᐦᒡ ᒥᓯᐌ ᒉᒌ ᐃᔅᐸᔨᐦᒡ ᑖᓐ ᑳ ᐃᔑ ᐙᐸᐦᑏᑯᔮᓐ᙮
ᒞᓐ ᑳ ᐙᒋᔦᒫᑦ ᐊᓂᔫ ᐅᒫᒨ ᐊᔨᒥᐦᐋᐤᐦ
ᐊᓂᑌ ᑳ ᐃᐦᑖᔨᒡ ᓃᔣᔥᒡ ᐊᔨᒥᐦᐁᐅᑲᒥᑯᐦ
ᓂᔭ ᒞᓐ᙮ ᒋᔭᐙᐤ ᐅᒫᒨᐊᔨᒥᐦᐋᐅᒡ ᒋᒪᓯᓇᐦᐊᒫᑎᓈᐙᐤ ᐊᓂᑌ ᑳ ᐃᐦᑖᔦᒄ ᐊᓂᔫᐦ ᓃᔣᔥᒡ ᐊᔨᒥᐦᐁᐅᑲᒥᑯᐦ ᐁᐃᔖ ᑳ ᐃᔑᓂᐦᑳᑌᒡ ᐊᔅᒌ᙮ ᒋᔐᒪᓂᑑ, ᐊᓐ ᐊᓄᐦᒌᔥ ᑳ ᐃᐦᑖᑦ ᑲᔦ ᒨᔥ ᑳ ᐯᒋ ᐃᐦᑖᑦ, ᑲᔦ ᐊᓐ ᒉ ᑕᑯᔑᐦᒃ ᒋᑲ ᔕᐌᔨᒥᑯᐙᐤ ᑲᔦ ᒋᑲ ᒦᑯᐙᐤ ᒋᔮᒣᔨᐦᑕᒧᐎᓂᔫ᙮ ᑲᔦ ᐊᓂᒌ ᓃᔣᔥᒡ ᐊᐦᒑᐦᑯᒡ ᐅᐦᒋᔥᑰ ᒋᔐᒪᓂᑑ ᐅᒋᔐᐅᒋᒫᐤ ᑌᐦᑕᐳᐎᓃᐦᒡ ᑳ ᐃᐦᑖᑣᐤ ᒋᑲ ᔕᐌᔨᒥᑯᐙᐅᒡ ᑲᔦ ᒋᑲ ᒦᑯᐙᐅᒡ ᒋᔮᒣᔨᐦᑕᒧᐎᓂᔫ᙮ ᒌᓴᔅ ᙭ ᑲᔦ, ᐊᓐ ᒨᔥ ᑯᐃᔅᒄ ᑳ ᐐᐦᑕᐦᒃ ᐁ ᑎᐹᒋᒫᑦ ᒋᔐᒪᓂᑑᐦ, ᓂᐳᑯᓭᔨᒫᐤ ᒉᒌ ᔕᐌᔨᒥᑖᒄ ᑲᔦ ᒉᒌ ᒦᑖᒄ ᒋᔮᒣᔨᐦᑕᒧᐎᓂᔫ᙮ ᐎᔭ ᒌᓴᔅ ᙭ ᒫᐅᒡ ᓃᔥᑕᒻ ᒌ ᐗᓂᔥᑳᓈᑲᓅ ᓂᐳᐎᓐᐦᒡ ᐅᐦᒋ ᑳᒋᒉ ᒉᒌ ᐱᒫᑎᓰᑦ᙮ ᐎᔭ ᒋᔐᐅᒋᒫᐅᑐᑕᐌᐤ ᒥᓯᐌ ᒋᔐᐅᒋᒫᐤᐦ ᐅᑕᐦ ᐊᔅᒌᐦᒡ᙮ ᒋᓵᒋᐦᐄᑯᓅ ᑲᔦ ᒌ ᐸᒋᔥᑎᓂᓲ ᒉᒌ ᓂᐸᐦᐋᑲᓅᑦ ᒋᔮᓅ ᐅᐦᒋ ᐁᑳ ᒉᒌ ᑎᐯᔨᒥᑯᔨᐦᒄ ᒋᒪᒋᐦᑣᐎᓅᐦ᙮ ᒌ ᐃᐦᑑᑕᒻ ᒉᒌ ᒪᓯᓈᓲᐦᒄ ᐊᓂᑌ ᐅᒋᔐᐅᒋᒫᐎᓂᐦᒡ ᐁ ᐊᑐᔥᑳᒪᐦᒄ ᒋᔐᒪᓂᑑᐦ ᐅᐦᑖᐐ ᐁ ᐊᔨᒥᐦᐁᐅᒋᒫᐤ ᐋᐸᑎᓲᐦᒄ᙮ ᐎᔭ ᒋᑲ ᒋᔅᑌᔨᐦᑖᑯᐦᐋᑲᓅ ᑲᔦ ᒋᑲ ᑎᐯᔨᒋᒉᐤ ᑳᒋᒉ ᑲᔦ ᑳᒋᒉ᙮ ᐊᒣᓐ᙮
ᐄᑖᐱᒄ ᒫ᙮ ᐯᒋ ᑕᑯᔑᓅ ᑲᔅᑲᐗᓂᔥᑯᐦᒡ ᐁ ᐯᒋ ᐋᓰᑦ᙮ ᒥᓯᐌ ᐊᐌᔫᐦ ᒋᑲ ᐙᐸᒥᑰ, ᒣᒋᒻ ᐊᓂᔫᐦ ᑳ ᑕᐦᑲᒥᑯᑦ᙮ ᒥᓯᐌ ᐁ ᐃᑎᔅᑳᓀᓯᔨᒡ ᐊᐌᔫᐦ ᒋᑲ ᒥᔅᑕ ᒫᑑᔫᐦ ᐙᐸᒥᑯᑌ᙮ ᒉᔥᑎᓈᔥ ᒋᑲ ᐃᔅᐸᔫ ᐆ᙮ ᐊᒣᓐ᙮
ᐁᐅᒄ ᓂᔭ ᒥᓯᐌ ᒉᒀᓐ ᑳ ᒋᐦᒋᐸᔨᐦᑖᔮᓐ ᑲᔦ ᒥᓯᐌ ᒉᒀᓐ ᒉ ᒌᔑᐦᑖᔮᓐ᙮ ᐁᐅᒄ ᐁ ᐃᑗᑦ ᒋᔐᒪᓂᑑ ᐅᑎᐯᔨᐦᒋᑫᐤ, ᐊᓐ ᒫᐅᒡ ᑳ ᓲᐦᑳᑎᓰᑦ, ᐊᓐ ᑳ ᐃᐦᑖᑦ ᐊᓄᐦᒌᔥ, ᐊᓐ ᒨᔥ ᑳ ᐯᒋ ᐃᐦᑖᑦ ᑲᔦ ᐊᓐ ᒉ ᑕᑯᔑᐦᒃ᙮
ᒞᓐ ᐙᐸᐦᑏᐌᐎᓂᐦᒡ ᑳ ᐙᐸᒫᑦ ᒌᓴᔅ
ᐁᐅᒄ ᓂᔭ ᒌᒋᔖᓇᐙᐤ ᒞᓐ᙮ ᒥᓯᐌ ᒋᐐᒋᔖᓂᐦᑐᓈᓅ ᒌᓴᔅ ᐁ ᐃᐦᑖᑦ ᐃᔑ᙮ ᒋᓇᓀᐦᑳᑌᔨᒧᐦᐄᑯᔨᐦᒄ ᐊᓐ ᐅᐦᒋ ᐁ ᓅᔔᔥᑰᐦᒄ ᒌᓴᔅ ᒥᒄ ᒫᒃ ᒫᒨ ᒋᐐ ᓰᐲᐌᓯᓈᓅ ᑖᓂᑦ ᐊᓂᑦ ᓀᒋᔥᑲᒧᐦᒄ ᒫᓐ ᐁ ᐋᔨᒥᐦᒡ ᒉᒀᓐ᙮ ᓂᒌ ᒫᑯᓂᑰᓐ ᐁᒄ ᐊᓂᑌ ᐊᓐ ᒥᓂᔅᑎᒄ ᐸᑦᒧᔅ ᑳ ᐃᔑᓂᐦᑳᑌᒡ ᑳ ᑕᔨᑯᔮᓐ ᐊᓐ ᐅᐦᒋ ᐁ ᒌ ᐙᐐᐦᑕᒫᓐ ᒋᔐᒪᓂᑑ ᐅᑕᔨᒧᐎᓐ ᑲᔦ ᐁ ᒌ ᑎᐹᒋᒪᒃ ᒌᓴᔅ ᑖᓐ ᑳ ᐊᐃᐦᑎᑦ᙮ 10 ᐯᔭᒀᐤ ᒫᒃ ᐁ ᐊᔨᒥᐦᐁᐅᒌᔑᑳᒡ, ᑳ ᐸᔦᐦᒋᓰᑦ ᐊᐦᒑᐦᒄ ᓂᒌ ᓵᑲᔅᒋᓀᔥᑳᒄ᙮ ᐊᓂᑌ ᒫᒃ ᓂᔅᐱᔅᑯᓂᐦᒡ ᓂᒌ ᐅᐦᒋ ᐯᐦᑌᓐ ᐯᐦᑖᑯᓱᐎᓐ ᐁ ᒋᔐᐌᑦ ᐊᐌᓐ ᐁ ᐊᔨᒥᑦ᙮ ᒧᔮᒻ ᐴᑖᒋᑲᓐ ᐁ ᐃᔥᐱᔥ ᒋᔐᐌᒪᑲᐦᒡ ᐁᑯᓐ ᑳ ᐃᔥᐱᔥ ᒋᔐᐌᑦ ᐁ ᐊᔨᒥᑦ᙮ 11 ᐁᐅᒄ ᒫᒃ ᐅᔫ ᑳ ᐃᑗᑦ, ᒪᓯᓇᐦᐊ ᑖᓐ ᒉ ᐃᔑ ᐙᐸᐦᑕᒪᓐ ᐊᓄᐦᒌᔥ ᐁᒄ ᒉ ᐃᑎᔕᐦᐊᒨᑣᐤ ᐊᓂᒌ ᐅᒫᒨᐊᔨᒥᐦᐋᐅᒡ ᐊᓂᑌ ᐊᓂᔫ ᓃᔣᔥᒡ ᐊᔨᒥᐦᐁᐅᑲᒥᑯᐦ ᐁᕕᓴᔅ, ᓯᒥᕐᓇ, ᐯᕐᑲᒪᒻ, ᑕᔭᑕᐃᕋ, ᓴᕐᑎᔅ, ᕕᓚᑌᓪᕕᔭ ᐁᒄ ᒫᒃ ᓓᐅᑎᓰᔭ ᑳ ᐃᐦᑖᑣᐤ᙮ ᐁᐅᒄ ᐅᔫ ᑳ ᐯᒋ ᐄᔑᑦ᙮
12 ᓂᒌ ᑴᔅᒋᑳᐴᓐ ᒫᒃ ᐁ ᓈᓂᑑᐙᐸᒪᒃ ᐊᓐ ᐊᐌᓐ ᑳ ᐯᒋ ᐊᔨᒥᐦᐄᑦ᙮ ᐁᒄ ᑳ ᐙᐸᐦᑕᒫᓐ ᓃᔣᔥᒡ ᐙᔥᑌᓇᒫᑲᓈᐦᑎᒄ ᐁ ᐅᔖᐅᔔᓕᔮᐅᓈᐱᔅᑰᐦᒀᐤ᙮ 13 ᒣᑴᓰᓅ ᒫᒃ ᐊᓂᔫᐦ ᐙᔥᑌᓇᒫᑲᓈᐦᑎᒄ ᐁ ᐃᐦᑕᑯᐦᒀᐤᐦ ᐁᑯᑦ ᑳ ᐙᐸᒪᒃ ᐊᐌᓐ ᒬᐦᒡ ᐄᓅ ᐅᑯᓯᓴ ᐁ ᐃᔑᓈᑯᓯᑦ᙮ ᐊᓐ ᒫᒃ ᐊᐌᓐ ᒌ ᒋᒋᔥᑲᒻ ᐊᑯᐦᐱᔫ ᐊᓂᑌ ᐃᔑ ᐅᓯᑎᐦᒡ ᐁ ᐃᔅᑴᑲᓂᔨᒡ᙮ ᑲᔦ ᒌ ᐸᐦᑯᐦᑌᐦᐆ ᐅᔅᑳᔅᒋᑲᓂᐦᒡ ᐁ ᐅᓵᐅᔔᓕᔮᐙᐯᑎᓯᔨᒡ ᐸᐦᑯᐦᑌᐦᐅᓐ᙮ 14 ᐅᔅᑎᒀᓐ ᑲᔦ ᐅᔅᑎᒀᓂᔮᐲᐦ ᒌ ᐙᐹᔫᐦ ᒧᔮᒻ ᒫᓂᔥᒑᓂᔥ ᐅᐲᐐᐦ ᐁ ᐃᔥᐱᔥ ᐙᐹᔨᒡ ᒫᒃ ᒧᔮᒻ ᑰᓐ ᐁ ᐃᔥᐱᔥ ᐙᐱᓯᑦ᙮ ᐅᔅᒌᔑᑯᐦ ᒧᔮᒻ ᐁ ᐃᔥᑯᑌᐅᓂᔨᒀᐤᐦ ᒌ ᐃᔑᓈᑯᓂᔫ᙮ 15 ᐅᓯᑦᐦ ᒧᔮᒻ ᑳ ᐐᐹᐱᔅᒋᓯᑦ ᔔᓕᔮᐙᐱᔅᑯᔥ ᐁᑯᓐ ᑳ ᐃᔑᓈᑯᓂᔨᒀᐤᐦ᙮ ᒧᔮᒻ ᓈᔥᒡ ᐁ ᐙᔅᑯᔥᑌᔨᒀᐤ ᑲᔦ ᐁ ᓲᓱᐙᓯᔨᒀᐤ ᒌ ᐃᔑᓈᑯᓂᔫ᙮ ᐅᐯᐦᑖᑯᓱᐎᓐ ᒧᔮᒻ ᐊᓂᑌ ᓂᐲ ᐁ ᒋᔐᐌᔮᒎᐦᒡ ᐁᑯᓐ ᑳ ᐃᑎᐦᑖᑯᓂᔨᒡ᙮ 16 ᓃᔣᔥᒡ ᐊᒐᐦᑯᔕ ᒌ ᑕᐦᑯᓀᐤ ᐅᓂᐦᐄᐎᓂᑎᐦᒌᐦᒡ᙮ ᐄᑑ ᐁ ᐃᔑ ᑳᓵᔨᒡ ᔑᒫᑲᓂᔔ ᓂᑐᐸᔫᐦᑯᒫᓂᔫ ᒌ ᐅᐦᒋᐸᔫ ᐊᓂᑌ ᐅᑑᓂᐦᒡ᙮ ᐅᑖᔥᑕᒧᐦᒄ ᓈᔥᒡ ᒌ ᐙᔥᑌᔫ ᒧᔮᒻ ᐲᓯᒻ ᑳ ᐃᑖᔥᑐᐌᑦ᙮ 17 ᐃᔅᑯᑕᒃ ᒫᒃ ᐎᔮᐸᒪᒃ ᐊᓂᑌ ᐅᓯᑎᐦᒡ ᓂᒌᔑ ᐸᐦᒋᔑᓄᐙᓐ ᒧᔮᒻ ᐁ ᓂᐴᒡ᙮ ᐅᓂᐦᐄᐎᓂᑎᐦᒌ ᐁ ᐋᐸᒋᐦᑖᑦ ᓂᒌ ᐯᒋ ᑖᐦᑎᓂᒄ ᐁᒄ ᑳ ᐄᔑᑦ, ᐁᑳᐐ ᑯᔥᑖᒡ᙮ ᐁᐅᒄ ᓂᔭ ᓃᔥᑕᒻ ᑳ ᐃᐦᑖᑦ ᑲᔦ ᒫᐦᒋᔥᑕᐃ ᒉ ᐃᐦᑖᑦ᙮ 18 ᐁᐅᒄ ᓂᔭ ᑳ ᐱᒫᑎᓰᑦ᙮ ᓂᒌ ᓂᐱᓐ ᒥᒄ ᒫᒃ ᐊᓄᐦᒌᔥ ᑳᒋᒉ ᓂᐱᒫᑎᓰᓐ᙮ ᓂᔭ ᓅᒋᒫᐦᑲᐦᑌᓐ ᓂᐳᐎᓐ ᑲᔦ ᓂᔭ ᓅᒋᒫᐎᓐ ᐊᓂᑌ ᐁ ᐃᐦᑖᑣᐤ ᐊᓂᒌ ᑳ ᓂᐱᑣᐤ᙮ 19 ᒪᓯᓇᐦᐊ ᒥᓯᐌ ᑖᓐ ᒉ ᐃᔑ ᐙᐸᐦᑕᒪᓐ᙮ ᒪᓯᓇᐦᐊ ᑖᓐ ᐁ ᐃᔅᐸᔨᐦᒡ ᐊᓄᐦᒌᔥ ᑲᔦ ᑖᓐ ᒉ ᐃᔅᐸᔨᐦᒡ ᐊᓂᑌ ᓃᔥᑕᒥᐦᒡ᙮ 20 ᐊᓂᒌ ᒫᒃ ᓃᔣᔥᒡ ᐊᒐᐦᑯᔕᒡ ᑳ ᐙᐸᒦᓐ ᓂᐦᐄᐎᓂᑎᐦᒌᐦᒡ ᐁ ᑕᐦᑯᓂᐦᒀᐤ ᑲᔦ ᐊᓂᔫᐦ ᓃᔣᔥᒡ ᑳ ᐅᔖᐅᔔᓕᔮᐙᐱᔅᑰᐦᒀᐤ ᐙᔥᑌᓇᒫᑲᓈᐦᑎᒄ ᐁᐅᒄ ᐆ ᐁ ᐃᔑ ᐐᐦᑕᒫᒉᒪᑲᐦᒀᐤᐦ᙮ ᐊᓂᒌ ᓃᔣᔥᒡ ᐊᒐᐦᑯᔕᒡ ᐁᐅᒄ ᐊᓂᒌ ᐁᓐᒋᓕᒡ ᑳ ᓃᑳᓂᔥᑯᐙᑣᐤ ᐅᒫᒨᐊᔨᒥᐦᐋᐤᐦ ᐊᓂᑌ ᐊᓂᔫ ᓃᔣᔥᒡ ᐊᔨᒥᐦᐁᐅᑲᒥᑯᐦ ᑳ ᐃᐦᑖᑣᐤ᙮ ᐁᒄ ᐊᓂᔫᐦ ᓃᔣᔥᒡ ᑳ ᐅᔖᐅᔔᓕᔮᐅᐙᐱᔅᑰᐦᒀᐤᐦ ᐙᔥᑌᓇᒫᑲᓈᐦᑎᒄ ᐁᐅᒄ ᐊᓂᔫᐦ ᓃᔣᔥᒡ ᐊᔨᒥᐦᐁᐅᑲᒥᑯᐦ ᑳ ᐋᔨᒨᑌᒀᐤᐦ᙮