2
ᑆᓪ ᑳᐦ ᐃᔨᑦ ᒥᒄ ᙭ ᑳ ᒌᔅᑖᔅᑯᐦᐅᒫᑭᓂᐎᔨᒡ ᒑ ᐋᔨᒨᑎᐦᒃ
ᓃᒋᔖᓂᑎᒄ, ᐅᔅᑭᒡ ᑳ ᑎᑯᔑᓂᔮᓐ ᐊᓂᑎᐦ ᐋᐦ ᑖᔮᒄ, ᑳ ᐐᐦᑎᒫᑎᑯᒡ ᒫᒃ ᒋᔖᒥᓂᑑ ᐅᑎᔨᒧᐎᓐᐦ ᓂᒧᐃ ᓅᐦᒋ ᐄᔑ ᐊᔨᒥᓐ ᓈᔥᒡ ᒑ ᒌ ᔨᑆᐦᑳᐅᑖᑯᓯᔮᓐ ᑭᔮᐦ ᒫᒃ ᒑ ᒌ ᐄᑎᐦᑖᑯᓯᔮᓐ ᒧᔮᒻ ᓈᔥᒡ ᐋ ᑭᒑᐦᑖᐙᔨᐦᑎᒫᓐ᙮ ᓂᒌ ᐎᔮᔨᐦᑖᓐ ᒥᒄ ᐹᔨᒄ ᒑᒀᓐ ᒑ ᐋᔨᒨᑎᒫᓐ ᐋᐅᒄ ᒌᓴᔅ ᙭ ᑭᔮᐦ ᐊᓂᔮᔨᐤ ᐋ ᒌ ᒌᔅᑖᔅᑯᐦᐙᑭᓅᑦ᙮ ᓈᑖᐦ ᐋᐦ ᑖᔮᒄ ᑳᐦ ᑖᔮᓐ ᓂᒧᐃ ᓈᔥᒡ ᓅᐦᒋ ᑖᑆᐅᒑᔨᒦᓱᓐ᙮ ᓈᔥᒡ ᔮᒀᐦ ᓂᒌ ᐐᐦ ᑎᓐ ᑭᔮᐦ ᓂᒌ ᐙᐎᐱᔨᓐ ᐋ ᐃᔥᐱᔥ ᓵᒋᓯᔮᓐ᙮ ᒫᒀᒡ ᑳ ᒌ ᐊᔨᒥᐦᐄᑎᑯᒡ ᑭᔮᐦ ᑳ ᒌ ᑭᒑᔅᒋᒥᑎᑯᒡ ᓂᒧᐃ ᓅᐦᒋ ᐐᐦ ᐄᑎᐦᑖᑯᐦᐄᓱᓐ ᓈᔥᒡ ᒑ ᒌ ᔨᑆᐦᑳᐅᑖᑯᓯᔮᓐ ᐋᑎ ᒑ ᒌ ᐅᐦᒋ ᑖᑆᐦᑎᒫᒄ᙮ ᒋᔖᒥᓂᑑ ᐅᑎᐦᒑᐦᒄ ᐊᓅᑯᐦᑖᔨᒡ ᐅᓲᐦᑳᑎᓰᐎᓂᔨᐤ ᐋᐅᒄ ᑳᐦᑐᑖᑖᒄ ᒑ ᒌ ᑖᑆᐦᑎᒫᒄ ᑖᓐ ᑳ ᐄᔑ ᐙᐐᐦᑎᒫᒡ᙮ ᒋᔖᒥᓂᑑ ᐅᓲᐦᑳᑎᓰᐎᓐ ᐅᐦᒋ ᒑ ᒌ ᐃᔮᔮᒄ ᑖᑆᔮᔨᐦᑎᒧᐎᓐ ᓂᒧᐃ ᐐᔨ ᐊᓐ ᐋ ᑖᑆᐦᑎᒫᒄ ᑖᓐ ᐋᐦ ᐃᔨᒡ ᐊᓂᒌ ᑳ ᑭᒑᐦᑖᐙᔨᐦᑎᐦᒡ᙮
ᒋᔖᒥᓂᑑ ᐅᑭᒑᐦᑖᐙᔨᐦᑎᒧᐎᓐ
ᐊᓂᒌ ᐄᔨᔨᐅᒡ ᑳ ᒥᔪ ᓂᐦᑖᐅᒋᒡ ᑖᑆᔮᔨᐦᑎᒧᐎᓂᐦᒡ ᓂᓂᔅᑐᐦᑖᑯᓈᓂᒡ ᑭᒑᐦᑖᐙᔨᐦᑎᒧᐎᓂᐦᒡ ᐋ ᐄᔑ ᐊᔨᒥᐦᐄᒋᐦᒡ᙮ ᐊᓐ ᒫᒃ ᑭᒑᐦᑖᐙᔨᐦᑎᒧᐎᓐ ᑳᐦ ᐋᔨᒨᑎᒫᐦᒡ ᓂᒥᔮᐤ ᐊᓐ ᐄᔨᔨᐅᒡ ᐅᑎᐦ ᐊᔅᒌᐦᒡ ᓈᔥᒡ ᑳ ᒋᔅᑖᔨᑎᒥᐦᐄᑯᒡ᙮ ᓂᒥᔮᐤ ᑭᔮᐦ ᐊᓐ ᑭᒑᐦᑖᐙᔨᐦᑎᒧᐎᓐ ᒋᔅᑎᒫᐅᓐ ᑳ ᐄᑖᔨᐦᑎᐦᒡ ᐊᓂᒌ ᐄᔨᔨᐅᒡ ᑳ ᐅᒋᒫᐅᒡ᙮ ᐙᔥ ᐊᓂᔮᔨᐤ ᐐᔨᐙᐤ ᐅᑭᒑᐦᑖᐙᔨᐦᑎᒧᐎᓂᐙᐤ ᒋᑭ ᐃᔅᒀᐱᔨᐤ᙮ ᒋᔖᒥᓂᑑ ᐅᑭᒑᐦᑖᐙᔨᐦᑎᒧᐎᓐ ᐋᔪᐎᒄ ᑳᐦ ᐋᔨᒨᑎᒫᑖᐦᒡ ᐊᓐ ᐋᑳ ᐙᐦᒋ ᒋᔅᒑᔨᐦᑖᑯᐦᑖᑯᓂᐎᒡ ᐅᑖᐦ ᐹᒋ ᐅᑖᐦᒡ᙮ ᐋᔥᒄ ᐋᒸᔮ ᐅᐦᒋ ᐅᔑᐦᑖᑦ ᒋᔖᒥᓂᑑ ᐅᔮᔨᐤ ᐊᔅᒌᔨᐤ, ᔖᔥ ᒌ ᐎᔮᔨᐦᑎᒻ ᑖᓐ ᒑ ᑎᒃ ᐊᓂᑖᐦ ᓃᔥᑖᒥᐦᒡ ᐋᑎ ᒑ ᒌ ᐅᐦᒋ ᒋᔅᑖᔨᐦᑖᑯᐦᐄᑎᐦᒄ᙮ ᓂᒧᐃ ᒫᒃ ᐙᐙᒡ ᐹᔨᒄ ᐊᓂᒌ ᑳ ᐅᒋᒫᐅᒡ ᐅᑎᐦ ᐊᔅᒌᐦᒡ ᐅᐦᒋ ᓂᔅᑐᐦᑎᒧᒡ ᐅᔮᔨᐤ ᑭᒑᐦᑖᐙᔨᐦᑎᒧᐎᓂᔨᐤ, ᐙᔥ ᑖᐹ ᒋᐱᐦ ᐅᐦᒋ ᒌᔅᑖᔅᑯᐦᐙᐅᒡ ᐊᓂᔮᔨᐤ ᑎᐹᔨᐦᒋᒑᓯᐤ ᑳ ᒋᔅᑖᔨᐦᑖᑯᓰᔨᒡ ᒌ ᒋᔅᒑᔨᐦᑎᒧᐙᑯᐱᓈ᙮ ᐙᔥ ᐊᒀᒋᔥᑖᒡ ᒋᐦᒋᒥᓯᓂᐦᐄᑭᓂᐦᒡ,
ᓂᒧᐃ ᐊᐙᓐ ᐅᐦᒋ ᐙᐱᐦᑎᒻ ᑭᔮᐦ ᓂᒧᐃ ᐊᐙᓐ ᐅᐦᒋ ᐹᐦᑎᒻ ᑭᔮᐦ ᓂᒧᐃ ᐊᐙᓐ ᐅᐦᒋ ᒋᔅᒑᔨᐦᑎᒻ ᑖᓐ ᑳ ᐄᔑ ᐃᔮᔅᑰᔥᑎᒧᐙᑦ ᒋᔖᒥᓂᑑ ᐊᓂᔮᔨᐤ ᑳ ᓵᒋᐦᐄᑯᑦ᙮
10 ᒋᔖᒥᓂᑑ ᒫᒃ ᒋᒌ ᒋᔅᒑᔨᐦᑎᒥᐦᐄᑯᓂᐤ ᐅᔮᔨᐤ ᐅᑎᐦᒑᐦᒄ ᐅᐦᒋ᙮ ᐙᔥ ᐅᑎᐦᒑᐦᒄ ᒥᓯᐙ ᒑᒀᔨᐤ ᓈᓂᑐ ᒋᔅᒑᔨᐦᑎᒥᔨᐤ, ᐙᐙᒡ ᐊᓂᔮᔨᐤ ᑖᓐ ᓂᐦᐋᐤ ᐋ ᐄᑖᔨᐦᑖᑯᓰᔨᒡ ᒋᔖᒥᓂᑑ᙮ 11 ᒧᔮᒻ ᐊᐙᓐ ᑖᓐ ᓂᐦᐋᐤ ᐋ ᐄᑖᔨᐦᑎᐦᒃ ᒥᒄ ᐐᔨ ᑎᐱᔨᐙ ᐅᑎᐦᒑᐦᑯᐦᒡ ᒋᔅᒑᔨᐦᑎᒻ᙮ ᐋᔪᐎᒄ ᒫᒃ ᒧᔮᒻ ᐋ ᐃᓯᓈᑯᓰᔨᒡ ᒋᔖᒥᓂᑑ ᐅᑎᐦᒑᐦᒄ, ᒥᒄ ᐐᔨ ᒋᔖᒥᓂᑑ ᐅᑎᐦᒑᐦᒄ ᒋᔅᒑᔨᐦᑎᒥᔨᐤ ᑖᓐ ᓂᐦᐋᐤ ᐋ ᐄᑖᔨᐦᑎᒥᔨᒡ ᒋᔖᒥᓂᑑ᙮ 12 ᐊᓅᐦᒡ ᒫᒃ, ᓂᒧᐃ ᐅᑎᐦ ᐊᔅᒌᐦᒡ ᑳᐦ ᑖᑦ ᐊᐦᒑᐦᒄ ᑰᐦᒋ ᒥᔨᑯᓈᓂᐤ, ᐋᐅᒄ ᐙᐦᒋ ᐊᔨᐦᒡ ᐄᑖᔨᐦᑎᒫᒄ ᐊᓂᒌ ᐋ ᐄᑖᔨᐦᑖᒡ ᐄᔨᔨᐅᒡ ᐅᑎᐦ ᐊᔅᒌᐦᒡ᙮ ᒥᒄ ᒫᒃ ᐊᓐ ᐊᐦᒑᐦᒄ ᒋᔖᒥᓂᑑ ᐋᐦ ᑖᑦ ᑳ ᐅᐦᒌᑦ ᐋᐅᒄ ᐊᓐ ᑳ ᒥᔨᑯᐎᔨᐦᒄ᙮ ᐋᐅᒄ ᒫᒃ ᐆ ᐋᐦ ᑐᑖᑎᐦᒄ ᒑ ᒌ ᒋᔅᒑᔨᐦᑎᒥᐦᒄ ᐊᓂᔮᔨᐤ ᒥᔨᐙᐎᓐᐦ ᑳ ᒥᔨᑎᐦᒄ ᒋᔖᒥᓂᑑ᙮
13 ᐋᐦ ᐋᔨᒨᑎᒫᐦᒡ ᒫᒃ ᐅᐦᐄ ᒑᒀᓂᐦᐄ ᓂᒧᐃ ᓂᒥᑐᓈᔨᐦᒋᑭᓈᐦᒡ ᐋ ᐄᔑ ᓂᔅᑐᐦᑎᒫᐦᒡ ᓂᑎ ᐄᔑ ᐋᔨᒨᑖᓈᓐ᙮ ᒋᑎ ᐋᔔ ᐐᐦᑎᒫᑎᓈᓐ ᑖᓐ ᑳ ᐄᔑ ᒋᔅᑯᑎᒨᔨᒥᐦᑦ ᒋᔖᒥᓂᑑ ᐅᑎᐦᒑᐦᒄ᙮ ᐋᔪᐎᒄ ᐙᒋᐦᐄᔨᒥᐦᑦ ᐋ ᐐᐦ ᒋᔅᒑᔨᐦᑎᒥᐦᐄᒋᐦᒡ ᐅᔮᔨᐤ ᑖᑆᐎᓂᔨᐤ ᐊᓂᒌ ᑳ ᐲᐦᒋᔥᑳᑯᐙᒡ ᒋᔖᒥᓂᑑ ᐅᑎᐦᒑᐦᑯᔨᐤ᙮ 14 ᐊᓐ ᐊᐙᓐ ᐋᑳ ᐲᐦᒋᔥᑳᑰᑦ ᒋᔖᒥᓂᑑ ᐅᑎᐦᒑᐦᑯᔨᐤ, ᓂᒧᐃ ᑭᑎ ᒌ ᐅᑎᓂᒻ ᐊᓂᔮᔨᐤ ᒥᔨᐙᐎᓐᐦ ᑖᓐ ᐋ ᐄᔑ ᒥᔨᐙᔨᒡ ᒋᔖᒥᓂᑑ ᐅᑎᐦᒑᐦᑯᔨᐤ᙮ ᐆ ᐊᐙᓐ ᓂᒧᐃ ᑖᑆᐦ ᓂᔅᑐᐦᑎᒻ ᒑᒀᔨᐤ ᐅᔮᔨᐤ, ᓂᒧᐃ ᐎᔮᔥ ᐄᑖᐱᑎᓐ ᐄᑖᔨᐦᑎᒻ᙮ ᐙᔥ ᒥᒄ ᐊᓂᒌ ᐱᔮᐦᒋ ᐊᐦᒑᐦᒄ ᑳ ᐲᐦᒋᔥᑳᑯᒡ ᑭᑎ ᒌ ᓂᔅᑐᐦᑎᒧᒡ ᑖᓐ ᐋ ᐄᔑ ᒋᔅᑖᔨᑖᑯᓃᔨᔨᒡ ᐅᔮᔨᐤ ᒥᔨᐙᐎᓐᐦ᙮ 15 ᐊᓐ ᒫᒃ ᐊᐙᓐ ᑳ ᐲᐦᒋᔥᑳᑰᑦ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ ᒥᓯᐙ ᒥᑐᓐ ᓂᑑᒋᔅᒑᔨᐦᑎᒻ ᑖᓐ ᒑ ᐄᔑ ᑎᐹᔅᑯᓂᐦᒃ ᒑᒀᔨᐤ᙮ ᒥᒄ ᒫᒃ ᓂᒧᐃ ᑭᑎ ᒌ ᑎᐹᔅᑯᓂᑰ ᐐᔨ ᐊᐙᔨᐤᐦ᙮ 16 ᐊᒀᒋᔥᑖᒡ ᒋᐦᒋᒥᓯᓂᐦᐄᑭᓂᐦᒡ,
ᑖᐤ ᐋ ᐊᐙᓐ ᐋ ᒋᔅᒑᔨᐦᑎᐦᒃ ᑖᓐ ᐋᔨᑖᔨᐦᑎᒥᔨᒡ ᒋᔖᒥᓂᑑ ᒑ ᒌ ᐅᐦᒋ ᒋᔅᒋᓂᐦᐊᒧᐙᑦ?
ᒌᔮᓂᐤ ᒫᒃ ᙭ ᐅᒥᑐᓈᔨᐦᒋᑭᓐ ᒋᓂᔅᑐᐦᑎᒸᓈᓂᐤ᙮