1 ᓃᒋᔖᓂᑎᒄ, ᐆ ᒑ ᐄᔑ ᐋᔨᒨᑎᒫᓐ, ᒋᓂᑎᐙᔨᒥᑎᓈᐙᐤ ᑯᐃᔅᒄ ᒑ ᒌ ᓂᔅᑐᐦᑎᒫᒄ ᐊᓂᐦᐄ ᓂᓈᐦᑭᐤ ᒥᔨᐙᐎᓐᐦ ᐱᔮᐦᒋ ᐊᐦᒑᐦᒄ ᑳ ᒥᔨᐙᑦ᙮ 2 ᒋᒋᔅᒑᔨᐦᑖᓈᐙᐤ ᐋᔥᒄ ᐋᐦᐋᑳ ᐅᐦᒋ ᑖᑆᔮᔨᒫᒄ ᒋᔖᒥᓂᑑ, ᒋᒌ ᐱᔅᒑᐦᑎᐦᐄᑯᐙᐅᒡ ᐊᓂᒌ ᒥᓂᑑᐦᑳᓂᒡ ᐋᑳ ᑳ ᒌ ᐊᔨᒥᒡ᙮ 3 ᒋᓂᑎᐙᔨᒥᑎᓈᐙᐤ ᒫᒃ ᒑ ᒌ ᓂᔅᑐᐦᑎᒫᒄ ᐊᓐ ᐊᐙᓐ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ ᑳ ᑎᐹᔨᒥᑯᑦ, ᓂᒧᐃ ᓂᐦᑖ ᒋᑭ ᐅᐦᒋ ᒥᒋᐄᔥᒌᔂᑖᐤ ᒌᓴᔅᐦ᙮ ᐃᔨᒑ ᒫᒃ ᐊᐙᓐ, “ᒌᓴᔅ ᐋᐅᒄ ᑎᐹᔨᐦᒋᒑᓯᐤ,” ᐱᔮᐦᒋ ᐊᐦᒑᐦᒄ ᑐᑖᑰ ᐊᓂᔮᔨᐤ ᒑ ᒌ ᐃᔨᑦ᙮ 4 ᓂᓈᐦᑭᐤ ᒥᔨᐙᐎᓐᐦ ᒋᒌ ᒥᔨᑯᓈᓂᐤ, ᐹᔨᑯᓯᐤ ᒫᒃ ᐊᓐ ᑳ ᐱᔮᐦᒋᓰᑦ ᐊᐦᒑᐦᒄ ᑳ ᒥᔨᑎᐦᒄ ᐅᔮᔨᐤ ᒥᔨᐙᐎᓐ᙮ 5 ᓂᓈᐦᑭᐤ ᑎᑯᓐ ᑖᓐ ᒑ ᒌ ᐄᔑ ᐙᐐᒋᐦᐋᑭᓂᐎᒡ ᐄᔨᔨᐅᒡ ᒥᒄ ᒫᒃ ᐹᔨᑯᓯᐤ ᐊᓐ ᑎᐹᔨᐦᒋᒑᓯᐤ ᑳᐦ ᐋᐱᑎᔒᔥᑑᐙᑭᓅᑦ᙮ 6 ᓂᓈᐦᑭᐤ ᑭᔅᒋᐦᐅᐎᓐ ᑎᑯᓐ ᒑ ᒌ ᐙᐐᒋᐦᐋᑭᓂᐎᒡ ᐄᔨᔨᐅᒡ, ᒥᒄ ᒫᒃ ᐹᔨᑯᓯᐤ ᐊᓐ ᒋᔖᒥᓂᑑ ᐙᒌᐦᐄᑖᒄ ᒥᓯᐙ ᒌᔮᓂᐤ ᒑ ᒌ ᑐᑖᑭᓂᐎᔨᒡ ᐅᔮᔨᐤᐦ ᒑᒀᔨᐤᐦ᙮ 7 ᒥᓯᐙ ᐊᐙᓐ ᑳ ᑖᑆᔮᔨᐦᑎᐦᒃ ᑎᑯᓂᔨᐤ ᐋ ᐄᔑ ᒋᔅᒑᔨᐦᑖᑯᐦᐄᓱᔨᒡ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ ᐋᐦ ᑖᔨᒡ ᐊᓂᑎᐦ ᐋᐦ ᑖᑦ᙮ ᒌᐦ ᑐᑎᒫᑯᓂᐤ ᐅᔮᔨᐤ ᒥᓯᐙ ᐹᐦᐹᔨᒄ ᐋᐦᑎᔒᐦᒄ ᒑ ᒌ ᐙᐐᒋᐦᐄᑐᔨᐦᒄ᙮ 8 ᑳ ᐱᔮᐦᒋᓰᑦ ᐊᐦᒑᐦᒄ ᒫᔮᑦ ᐱᔅᒡ ᐊᐙᔨᐤᐦ ᒑ ᒌ ᐙᐐᐦᑎᒥᔨᒡ ᒋᔖᒥᓂᑑ ᐅᑭᒑᐦᑖᐙᔨᐦᑎᒧᐎᓂᔨᐤ, ᐋᒄ ᑯᑎᒃ ᒫᔮᑦ ᒑ ᒌ ᐐᐦᑎᒫᒑᔨᒡ ᑖᓐ ᐙᐦ ᐄᔑ ᒋᔅᒑᔨᐦᑎᒥᐦᐋᔨᒡ ᒋᔖᒥᓂᑑ ᐊᐙᔨᐤᐦ᙮ 9 ᐋᐅᒄ ᐊᓐ ᐊᔮᐱᒡ ᑳ ᐱᔮᐦᒋᓰᑦ ᐊᐦᒑᐦᒄ ᑯᑎᒃ ᒫᔮᑦ ᒥᑐᓐ ᒑ ᒌ ᑖᑆᔮᔨᒫᔨᒡ ᒋᔖᒥᓂᑑ᙮ ᒦᓐ ᑯᑎᒃ ᒥᔮᐤ ᒥᔅᑭᐎᓰᐎᓂᔨᐤ ᒑ ᒌ ᒦᓂᐙᒋᐦᐄᐙᔨᒡ᙮ 10 ᑯᑎᒃ ᐊᐙᔨᐤᐦ ᓲᐦᑳᑎᓰᐎᓂᔨᐤ ᒥᔮᐤ ᒑ ᒌ ᒫᒥᔥᑳᒡ ᐋᐦ ᑎᔨᒡ᙮ ᒦᓐ ᑯᑎᒃ ᐊᐙᔨᐤᐦ ᒥᔮᐤ ᒑ ᒋᔅᒋᐙᐦᐄᒑᔨᒡ, ᐋᐦ ᐋᔨᒦᔥᑎᒧᐙᔨᒡ ᒋᔖᒥᓂᑑ᙮ ᐋᒄ ᒦᓐ ᑯᑎᒃ ᒫᔮᑦ ᒑ ᒌ ᒑᔥᑎᓈᐦᐅᔨᒡ ᒋᔖᒥᓂᑑ ᐅᐱᔮᐦᒋ ᐊᐦᒑᐦᑯᔨᐤ ᐃᔮᐱᑎᓰᒀᓂᐦᐄ ᑭᔮᐦ ᒫᒃ ᒥᒋᐊᐦᒑᐦᒄ ᐃᔮᐱᑎᓰᒀᓂᐦᐄ᙮ ᐋᒄ ᒦᓐ ᑯᑎᒃ ᒫᔮᑦ ᒑ ᒌ ᒀᔅᒡ ᐋᔮᒥᔨᒡ᙮ ᐋᒄ ᑯᑎᒃ ᐊᐙᔨᐤᐦ ᒫᔮᑦ ᒑ ᒌ ᐄᑣᔥᑎᒫᑎᒥᔨᒡ ᑖᓐ ᑳ ᐄᔨᔨᒡ ᐊᓂᔮᔨᐤ ᑳ ᒀᔅᒡ ᐊᔨᒥᔨᒡ᙮ 11 ᐋᐅᒄ ᐊᓐ ᐊᔮᐱᒡ ᑳ ᐹᔨᑯᓰᑦ ᑳ ᐱᔮᐦᒋᓰᑦ ᐊᐦᒑᐦᒄ ᐅᔮᔨᐤ ᒥᓯᐙ ᐊᑐᐦᑎᐦᒃ, ᒥᓯᐙ ᒫᒃ ᐹᐦᐹᔨᒄ ᐊᐙᔨᐤᐦ ᒥᔮᐤ ᓂᓈᐦᑭᐤ ᐊᐦᒑᐦᒄ ᒥᔨᐙᐎᓐᐦ᙮ ᐐᔨ ᒫᒃ ᐎᔮᔨᐦᑎᒻ ᒑᒄ ᒥᔨᐙᐎᓐᐦ ᒑ ᒥᔮᑦ ᐊᐙᔨᐤᐦ᙮

12 ᐊᓂᒌ ᑳ ᑖᑆᔮᔨᒫᒡ ᙭ ᒧᔮᒻ ᐹᔨᒄ ᒥᔨᐤ ᐃᓯᓈᑯᓯᐎᒡ᙮ ᐋᑎ ᓂᓈᐦᑭᐤ ᐋ ᐄᔑ ᐱᔅᒑᓰᐎᒥᑭᐦᒡ ᐊᔮᐱᒡ ᐹᔨᑯᓐ ᒥᔨᐤ᙮ 13 ᐹᔨᑯᓯᐤ ᐊᓐ ᐊᐦᒑᐦᒄ ᑳ ᐄᔑ ᓰᑭᐦᐋᐦᑖᑭᐎᔨᐦᒄ ᐹᔨᒄ ᒥᔨᐤ ᒑ ᒌ ᐄᔑᐦᐄᑭᐎᔨᐦᒄ᙮ ᐱᔅᒡ ᒌᔮᓂᐤ ᒎᐤ ᒋᑎᐄᑎᔅᑳᓈᓯᓈᓂᐤ ᑭᔮᐦ ᒫᒃ ᐱᔅᒡ ᓂᒧᐃ ᒎᐤ ᒋᑎᐄᑎᔅᑳᓈᓯᓈᓂᐤ, ᑭᔮᐦ ᒫᒃ ᐱᔅᒡ ᒌᔮᓂᐤ ᑳ ᑖᐱ ᑎᐹᔨᒫᑭᓂᐎᒡ ᐋᐱᒋᐦᐋᑭᓂᒡ ᑭᔮᐦ ᒫᒃ ᐱᔅᒡ ᐋᑳ ᑖᐱ ᑎᐹᔨᒫᑭᓂᐎᒡ ᐋᐱᒋᐦᐋᑭᓂᒡ᙮ ᒥᓯᐙ ᐹᐦᐹᔨᒄ ᐋᐦᑎᔒᐦᒄ ᐹᔨᒄ ᐊᐦᒑᐦᒄ ᒌ ᐲᐦᒋᔥᑳᑯᓂᐤ᙮

14 ᓂᒧᐃ ᒥᒄ ᐹᔨᑯᓐ ᐋ ᐄᔑ ᐱᔅᒑᓰᐎᒥᑭᐦᒡ ᒥᔫ᙮ ᓂᓈᐦᑭᐤ ᐄᔑ ᐱᔅᒑᓰᐎᒥᑭᓐ᙮ 15 ᐃᔨᒥᒥᑭᐦᒡ ᒫᒃ ᒥᓯᑦ, “ᓂᒥᔮᐤ ᒥᑎᐦᒌ ᓃᔨ, ᓂᒧᐃ ᓅᐦᑎᒧᓐ ᐅᑎᐦ ᒦᔮᐦᒡ᙮” ᐊᓐ ᒫᒃ ᒥᓯᑦ ᓂᒧᐃ ᑭᑎ ᐅᐦᒋ ᐴᓃᒥᑭᓐ ᐊᓂᑎᐦ ᒦᔮᐦᒡ ᐋ ᐅᐦᒌᒥᑭᐦᒡ ᐋᑦ ᐊᓐ ᐃᔨᒥᒥᑭᐦᒑ᙮ 16 ᑭᔮᐦ ᒫᒃ ᒥᐦᑎᐎᑮ ᐃᔨᒥᒥᑭᐦᒡ, “ᓂᒥᔮᐤ ᒥᔅᒌᔑᒄ ᓃᔨ, ᓂᒧᐃ ᓅᐦᑎᒧᓐ ᐅᑎᐦ ᒦᔮᐦᒡ᙮” ᐊᓐ ᒥᐦᑎᐎᑮ ᓂᒧᐃ ᐊᔮᐱᒡ ᑭᑎ ᐅᐦᒋ ᐴᓃᒥᑭᓐ ᐊᓂᑎᐦ ᒦᔮᐦᒡ ᐋ ᐅᐦᒌᒥᑭᐦᒡ ᒥᒄ ᐊᓐ ᐃᔨᒥᒥᑭᐦᒑ᙮ 17 ᐙᔥ ᒥᔫ ᒥᓯᐙ ᒥᒄ ᒥᔅᒌᔑᒄ ᒌ ᐃᓯᓈᑯᓂᑯᐱᓈ, ᓂᒧᐃ ᒋᐱᐦ ᐅᐦᒌ ᐹᐦᑎᒻ ᐊᐙᓐ᙮ ᑭᔮᐦ ᒫᒃ ᒥᔫ ᒥᓯᐙ ᒥᒄ ᒥᐦᑎᐅᑳᐅᐦᒡ ᓂᒧᐃ ᒋᐱᐦ ᒌ ᒥᔮᐦᒑᐤ ᐊᐙᓐ᙮ 18 ᓂᒧᐃ ᒫᒃ ᐊᓂᑖᐦ ᐃᓯᓈᑯᓐ᙮ ᒋᔖᒥᓂᑑ ᒥᓯᐙ ᒌ ᐅᔑᐦᑖᐤ ᑖᓐ ᓂᓈᐦᑭᐤ ᐋ ᐄᔑ ᐱᔅᒑᓰᐎᒥᑭᓃᔨᒡ ᒥᔮᔨᐤ᙮ ᑭᔮᐦ ᒫᒃ ᐐᔨ ᒥᓯᐙ ᒌ ᐎᔮᔨᐦᑎᒻ ᑖᓐ ᒑ ᐄᔑ ᐱᔅᒑᓰᐎᒥᑭᓃᔨᒡ ᒥᔮᔨᐤ ᑭᔮᐦ ᑖᓂᑖᐦ ᒑ ᐋᑦ ᒋᑭᒧᔨᒡ ᐱᔅᒑᓯᐎᓐ᙮ 19 ᓂᒧᐃ ᒥᔫ ᒋᐱᐦ ᐅᐦᒋ ᐃᓯᓈᑯᓐ ᒥᒄ ᐹᔨᒄ ᒑᒀᓐ ᑎᑯᐦᒡ ᒦᔮᐦᒡ᙮ 20 ᓂᓈᐦᑭᐤ ᒑᒀᓐ ᐄᔑ ᑎᑯᓐ ᒦᔮᐦᒡ ᒑ ᒌ ᐅᐦᒋ ᒦᔮᐎᒡ᙮

21 ᐋᒄ ᒫᒃ ᓂᒧᐃ ᒋᑭ ᒌ ᐄᑎᒻ ᒥᔅᒌᔑᒄ ᐊᓂᔮᔨᐤ ᒥᑎᐦᒋᔨᐤ, “ᓂᒧᐃ ᒌ ᓂᑎᐙᔨᒥᑎᓐ᙮” ᑭᔮᐦ ᒫᒃ ᒥᔅᑎᒀᓐ ᓂᒧᐃ ᒋᑭ ᒌ ᐄᑎᒻ ᐊᓂᔮᔨᐤ ᒥᓯᑎᔨᐤ, “ᓂᒧᐃ ᒋᓂᑎᐙᔨᒥᑎᓐ᙮” 22 ᑎᑯᓐ ᑭᔨᑆ ᑖᑆᐦ ᐱᔅᒡ ᒑᒀᓂᐦᐄ ᐊᓂᑎᐦ ᒦᔮᐦᒡ ᐋᐦᐋᑳ ᓵᐱᓰᒥᑭᐦᒡ ᐋ ᐃᓯᓈᑯᐦᒡ᙮ ᒥᒄ ᒫᒃ ᐊᔮᐱᒡ ᓂᑎᐙᔨᐦᑖᑯᓐ ᐅᐦᐄ᙮ 23 ᑭᔮᐦ ᑎᑯᓐ ᒋᔮᓈᐦᒡ ᐊᓂᐦᐄ ᒑᒀᓂᐦᐄ ᐋᐦᐋᑳ ᓈᔥᒡ ᒋᔅᑖᔨᐦᑖᑯᐦᒡ ᐋ ᐄᑖᔨᐦᑎᒧᒄ᙮ ᐋᔪᐎᒄ ᐋᓐ ᒫᒃ ᐅᐦᐄ ᓈᔥᒡ ᔮᒀᐦ ᐋᐦ ᑐᑎᒥᐦᒄ᙮ ᑭᔮᐦ ᒫᒃ ᑎᑯᓐ ᐊᓂᐦᐄ ᒑᒀᓂᐦᐄ ᒋᔮᓈᐦᒡ ᐋᐦᐋᑳ ᐐᐦ ᓅᑯᐦᑖᔨᐦᒄ, ᔮᒀᐦ ᒫᒃ ᒌ ᓂᐦᒋᓈᑰᓈᓈᓂᐤ ᐅᐦᐄ᙮ 24 ᑎᑯᓐ ᑯᑎᒃ ᒑᒀᓂᐦᐄ ᒦᔮᐦᒡ ᐋᐦᐋᑳ ᐎᔮᔥ ᐄᑖᔨᐦᑎᒧᒄ ᐋ ᓅᐦᑯᐦᒡ᙮ ᐋᔪᐎᒄ ᐋᓐ ᒫᒃ ᐅᐦᐄ ᓂᒧᐃ ᓂᑎᐙᔨᐦᑖᑯᓐ ᔮᐦᒀ ᒑ ᒌ ᐄᔑ ᓂᐦᒋᓈᑯᓂᒥᐦᒄ᙮ ᒋᔖᒥᓂᑑ ᒌ ᐄᔑᐦᑖᐤ ᒥᔮᔨᐤ ᐱᔅᒡ ᐊᓂᔮᔨᐤ ᐹᔅᒑᓯᐎᓐ ᐋᐦ ᐋᑦ ᐋᑳ ᓈᔥᒡ ᒋᔅᑎᒫᐙᔮᔨᐦᑖᑯᓃᔨᒡ ᐊᔮᐱᒡ ᔮᒀᐦ ᒑ ᒌ ᑐᑖᑭᓂᐎᔨᒡ, ᐙᔥ ᒥᓯᐙ ᐊᓂᔮᔨᐤ ᐱᔅᒑᓯᐎᓐ ᒥᓯᐙ ᓂᑎᐙᔨᐦᑖᑯᓐ ᒑ ᒌ ᒥᔪᐱᔨᐦᒡ ᒥᔨᐤ᙮ 25 ᐋᔪᐎᒄ ᐅᔮᔨᐤ ᑳ ᐄᔑᐦᑖᑦ ᐋᑳ ᒑ ᒌ ᑎᑯᐦᒡ ᐱᐦᑳᓂᐦᐄᓱᐎᓐ ᒦᔮᐦᒡ, ᒋᔖᒥᓂᑑ ᒌ ᓂᑎᐙᔨᐦᑎᒻ ᐊᓂᔮᔨᐤ ᐱᔅᒑᓯᐎᓐ ᐊᓂᑎᐦ ᒦᔮᐦᒡ ᑳᐦ ᑎᑯᓃᔨᒡ ᒥᓯᐙ ᐹᔨᑯᓂᐦᒡ ᒑ ᒌ ᐙᐐᒋᐦᐄᑑᒥᑭᓃᔨᔨᒡ, ᓂᒧᐃ ᐐᐦ ᒑ ᒌ ᐱᐱᐦᑳᓂᐱᔨᐦᐄᓱᒥᑭᓃᔨᔨᒡ᙮ 26 ᑎᑯᐦᒑ ᐋ ᐄᔑ ᐋᐦᑯᓰᒥᑭᐦᒡ ᐊᓐ ᒥᔨᐤ, ᒥᓯᐙ ᐋ ᐃᔥᐱᔖᒡ ᒥᔨᐤ ᒋᑭ ᒨᔑᐦᑖᒑᒥᑭᓐ᙮ ᑭᔮᐦ ᐹᔨᒄ ᐱᔅᒑᓯᐎᓐ ᐊᓂᑎᐦ ᒦᔮᐦᒡ ᒋᔥᑖᔨᐦᑖᑰᐦᑖᑭᓅᒑ, ᒥᓯᐙ ᐋ ᐃᔥᐱᔖᒡ ᐊᓐ ᒥᔨᐤ ᒋᑭ ᒨᒌᒑᔨᐦᑎᒨᒥᑭᓐ᙮ 27 ᒌᔨᐙᐤ ᒫᒃ ᐋᐅᒄ ᙭ ᐅᔨᐤ᙮ ᒥᓯᐙ ᐹᐦᐹᔨᒄ ᒋᐐᒋᐦᐄᐙᓈᐙᐤ ᐊᓂᑖᐦ ᐄᔑ᙮ 28 ᑖᔨᐤ ᒫᒃ ᐅᒫᒨᐊᔨᒥᐦᐋᐤ ᒋᔖᒥᓂᑑ ᐋ ᒌ ᐅᐙᔮᐱᒫᑦ ᑖᓐ ᒑ ᐄᑖᐱᑎᓰᔨᒡ᙮ ᐊᓂᔮᔨᐤ ᓃᔥᑎᒻ ᑳ ᐅᐙᔮᐱᒫᑦ ᐋᔨᐅᑯᓐ ᐅᔮᔨᐤ ᐋᑆᔅᑎᓪᐦ ᐋᒄ ᒦᓐ ᐅᒋᔅᒋᐙᐦᐄᒑᓯᐤᐦ ᑳ ᐊᔨᒦᔥᑎᒧᐙᔨᒡ ᒋᔖᒥᓂᑑ, ᐋᒄ ᒦᓐ ᒋᔅᑯᑎᒫᒑᓱᐦ, ᑭᔮᐦ ᐊᐙᔨᐤᐦ ᒫᒥᔥᑳᒡ ᒑᒀᔨᐤ ᒑ ᑐᑎᒥᔨᒡ᙮ ᒌ ᐅᐙᔮᐱᒫᐤ ᑭᔮᐦ ᐊᐙᔨᐤᐦ ᒑ ᒦᓂᐙᒋᐦᐄᐙᔨᒡ, ᑭᔮᐦ ᐊᓂᔮᔨᐤᐦ ᓂᓈᐦᑭᐤ ᒑ ᐄᔑ ᐐᒋᐦᐋᔨᒡ ᐊᐙᔨᐤᐦ᙮ ᒌ ᐅᐙᔮᐱᒫᐤ ᑭᔮᐦ ᐊᐙᔨᐤᐦ ᐋ ᐅᐙᔨᐱᔨᐦᑖᔨᒡ ᒑᒀᔨᐤ ᒑ ᐄᑖᐱᑎᓰᔨᒡ, ᑭᔮᐦ ᐊᐙᔨᐤᐦ ᒑ ᒀᔅᒡ ᐊᔨᒥᔨᒡ᙮ 29 ᒥᓯᐙ ᐋ ᐊᐙᓐ ᐋᑆᔅᑎᓪ ᒋᑭ ᒌ ᐄᑖᐱᑎᓰᐤ? ᒥᓯᐙ ᐋ ᐊᐙᓐ ᒋᑭ ᒌ ᒋᔅᒋᐙᐦᐄᒑᐤ ᑳ ᐊᔨᒦᔥᑎᒧᐙᑦ ᒋᔖᒥᓂᑑᐦ? ᒥᓯᐙ ᐋ ᐊᐙᓐ ᒋᑭ ᒌ ᒋᔅᑯᑎᒫᒑᐤ? ᒥᓯᐙ ᐋ ᐊᐙᓐ ᒫᒥᔥᑳᒡ ᐄᔨᐦᑑ? 30 ᒥᓯᐙ ᐋ ᐊᐙᓐ ᒦᓂᐙᒋᐦᐋᐤ ᐊᐙᔨᐤᐦ? ᒥᓯᐙ ᐋ ᐊᐙᓐ ᒀᔅᒡ ᐋᔨᔨᒨ? ᒥᓯᐙ ᐋ ᐊᐙᓐ ᐄᑣᔥᑎᒫᑎᒸᐤ ᑖᓐ ᐋ ᐄᔑ ᒀᔅᒡ ᐊᔨᒥᔨᒡ ᐊᐙᔨᐤᐦ? 31 ᐋᐦᐋᑳ ᒫᒃ ᐃᓯᓈᑯᐦᒡ ᒑ ᒌ ᐄᔮᔨᐦᒄ ᐋᐦᐋᑦ ᐹᐦᐹᔨᑯᓯᔨᐦᒄ ᒥᓯᐙ ᐊᓂᔮᔨᐤ ᑭᔅᒋᐦᐆᐎᓐ ᒋᔖᒥᓂᑑ ᒫᔨᐙᑦ, ᐃᓯᓈᑯᓐ ᒫᒃ ᒑ ᒌ ᐱᑯᓵᔨᐦᑎᒫᒄ ᐊᓐ ᒫᐅᒡ ᒑᔅᑖᒫᐙᔮᔨᐦᑖᑰᐦᒡ ᑭᔅᒋᐦᐆᐎᓐ ᒑ ᒌ ᒥᔨᑰᔨᐦᒄ᙮ ᒋᑭ ᐙᐱᐦᑏᑎᓈᐙᐤ ᒫᒃ ᐊᓅᐦᒡ ᐊᓐ ᒑᒀᓐ ᒫᐅᒡ ᒑᔅᑖᔨᐦᑖᑯᐦᒡ᙮