1 ᐋᒄ ᒫᒃ ᐙᐦ ᒋᔅᒋᓲᒥᑎᑯᒡ, ᓃᒋᔖᓂᑎᒄ, ᐊᓐ ᒥᔻᒋᒧᐎᓐ ᑳ ᑭᒑᔅᒋᒥᑎᑯᒡ, ᒋᒋᑖᑆᐦᑖᓈᐙᐤ ᑭᔮᐦ ᒋᒌ ᐅᑎᓈᓈᐙᐤ ᑭᔮᐦ ᐋ ᔮᐃᔨᒋᑳᐳᐦᐄᑯᔮᒄ ᐅᐦᒋ᙮ 2 ᐋᐅᒄ ᐆ ᐅᐦᒋ ᒥᔻᒋᒧᐎᓐ ᐱᒫᒋᐦᐄᑯᔮᒄ ᓲᐦᒃ ᒥᒋᒥᓂᒫᒀ᙮ ᐋᑳ ᒫᒃ ᐆ ᑎᔮᒀ ᐋᒄ ᑭᔨᑆ ᒑᔅᑳᐦ ᐋ ᒌ ᑖᑆᐦᑎᒫᒄ ᒑ ᐃᓯᓈᑯᐦᒡ᙮

3 ᐙᔥ ᒋᒌ ᐋᔔ ᐐᐦᑎᒫᑎᓈᐙᐤ ᐊᓐ ᑳ ᒥᔨᑭᐎᔮᓐ ᒑ ᒌ ᒋᔅᒑᔨᐦᑎᒫᓐ ᓈᔥᑖᑆᐦ ᒋᔅᑎᒫᐙᔨᑖᑯᓐ᙮ ᙭ ᒋᒌ ᓂᐳᔅᑎᒫᑯᓂᐤ ᒑ ᒌ ᐙᐹᔨᐦᑎᒫᑭᐎᔨᐦᒄ ᒋᒥᒋᐦᑣᐎᓂᓂᐤ ᒑ ᒌ ᑎᐱᐱᔨᒡ ᑖᓐ ᐋ ᐄᔑ ᒥᓯᓈᑖᒡ ᐊᓂᑖᐦ ᒋᐦᒋᒥᓯᓂᐦᐄᑭᓂᐦᒡ, 4 ᐋ ᒌ ᓂᐦᐄᑳᑭᓂᐎᔨᒡ ᙭ ᐅᔨᐤ᙮ ᐄᔥᐱᐦ ᒫᒃ ᑳ ᓂᔥᑐᒌᔒᑳᔨᒡ ᐋᒄ ᑳ ᐎᓂᔥᑳᓈᑭᓅᑦ ᒦᓐ ᑳᐤ ᒑ ᒌ ᐱᒫᑎᓰᑦ᙮ ᐋᐅᒄ ᐆ ᑳ ᐄᔅᐱᔨᒡ ᒑ ᒌ ᑎᐱᐱᔨᒡ ᑖᓐ ᐋ ᐄᔑ ᒥᓯᓈᑖᒡ ᒋᐦᒋᒥᓯᓂᐦᐄᑭᓂᐦᒡ, 5 ᒌ ᓅᑯᓰᔥᑎᐙᐤ ᐲᑎᕐ, ᒑᒃ ᒦᓐ ᐊᓂᔮᔨᐤ ᑳ ᓃᔓᔖᐳᔨᒡ ᐅᒋᔅᒋᓂᐦᐊᒧᐙᑭᓐᐦ ᑳ ᓅᑯᓰᔥᑎᐙᑦ᙮ 6 ᒑᒃ ᒫᒨ ᑳ ᓅᑯᓰᔥᑎᐙᑦ ᐊᐅᔅᑖ ᓂᔮᔻᐤ ᒥᑖᐦᑐᒥᑎᓂᐤ ᐋ ᑎᔑᔨᒡ ᐊᓂᔮᔨᐤ ᑳ ᑖᑆᔮᔨᒥᑯᑦ᙮ ᐋᔥᒄ ᒥᐦᒑᑐ ᐱᒫᑎᓰᔨᐤ ᐅᔮᔨᐤ ᑳ ᓅᑯᓰᔥᑎᐙᑦ᙮ ᐱᔅᒡ ᔖᔥ ᒌ ᐴᓂᐱᒫᑎᓰᔨᐤ᙮ 7 ᒉᒥᔅ ᒦᓐ ᒌ ᓅᑯᓰᔥᑎᐙᐤ᙮ ᒦᓐ ᒫᒃ ᐊᓂᔮᔨᐤ ᒥᓯᐙ ᐋᐳᔅᑎᓚ ᒌ ᓅᑯᓰᔥᑎᐙᐤ᙮

8 ᒫᐦᒑᔨ ᒫᒃ ᑭᔮᐦ ᓃᔨ ᓂᒌ ᓅᑯᓰᔥᑖᒄ ᐋᐦ ᐋᑎ ᒌ ᐃᓯᓈᑯᐦᒡ ᐋᐦᐋᑳ ᒨᔮᒻ ᐅᐦᒋ ᐃᔥᐱᔥ ᐄᔨᔨᐆᔮᓐ᙮ 9 ᐙᔥ ᓃᔨ ᒫᐅᒡ ᓂᒧᐃ ᒑᒀᓐ ᓂᑎᐄᑖᔨᐦᑖᑯᓯᓐ ᐋ ᐃᑎᔑᒡ ᒥᓯᐙ ᐊᓂᒌ ᑳ ᐅᐙᔮᐱᒫᑭᓅᐎᒡ ᐋᑆᔅᑎᓕᒡ᙮ ᓂᒧᐃ ᐙᐙᒡ ᓂᑖᐱᒑᔨᐦᑖᑯᓯᓐ ᐋᑆᔅᑎᓪ ᒑ ᒌ ᐃᔑᓂᐦᑳᑎᑯᐎᔮᓐ ᐙᔥ ᓂᒌ ᓂᓈᐦᑳᒋᐦᐄᒫᔨᐤ ᒋᔖᒥᓂᑑ ᐅᑎᔨᔨᒻᐦ᙮ 10 ᒥᒄ ᒫᒃ ᒋᔖᒥᓂᑑ ᓵᐦᒑᐄ ᐋ ᒥᔪᑐᑎᐎᑦ ᐋᑯᑖᐦ ᐙᐦᒋ ᐄᑖᔨᐦᑖᑯᓯᔮᓐ ᑖᓐ ᐋᑖᔨᐦᑖᑯᓯᔮᓐ ᐊᓅᐦᒡ᙮ ᓂᒧᐃ ᒫᒃ ᓂᑎᐐ ᒥᒄ ᓅᐦᒋ ᐄᔑ ᒥᔪᑐᑖᒄ᙮ ᐊᑎᑎᐤ ᓲᐦᒃ ᓂᒌᐦ ᐋᐱᑎᓰᓐ ᐃᔥᐱᔥ ᐐ ᒥᓯᐙ ᐋᑎᔑᒡ ᐊᓂᒌ ᑯᑎᑭᒡ ᐋᐳᔅᑎᓚᒡ᙮ ᓂᒥᔮᐤ ᒫᒃ ᓃᔨ ᑎᐱᔨᐙ ᑳᑎᔮᓐ᙮ ᒋᔖᒥᓂᑑ ᐐᔨ ᓵᐦᒑᐄ ᐋ ᒌ ᒥᔪᑐᑎᐎᑦ᙮ 11 ᐋᐅᒄ ᐆ ᒥᔻᒋᒧᐎᓐ ᒥᓯᐙ ᐋ ᑎᔑᔮᐦᒡ ᐋ ᐄᔑ ᑭᒑᔅᒋᒧᐙᔮᐦᒡ ᑭᔮᐦ ᐋᐅᒄ ᒫᒃ ᐆ ᑎᔮᑆᐦᑎᒫᒄ, ᒥᒄ ᐊᓐ ᐊᐙᓐ ᒑ ᑭᒑᔅᒋᒧᐙᒀᐤ, ᓃᔨ ᑭᔮᐦ ᒫᒃ ᑯᑎᑭᒡ᙮

12 ᐆ ᒫᒃ ᐋ ᐄᔑ ᑭᒑᔅᒀᔮᐦᒡ ᙭ ᐋ ᒌ ᐎᓂᔥᑳᓈᑭᓅᑦ ᓂᐱᐎᓂᐦᒡ ᐅᐦᒋ, ᑖᓂᑖᐦ ᐱᔅᒡ ᐊᓂᑎᐦ ᐋ ᑎᔑᔮᒄ ᐙᐦᒋ ᐃᔮᒄ ᒑᐦ ᐋᑳ ᒦᓐ ᑳᐤ ᐎᓂᔥᑳᓈᑭᓂᐎᒡ ᐊᓂᒌ ᑳ ᐴᓂᐱᒫᑎᓰᔨᒡ᙮ 13 ᐋᑳ ᒦᓐ ᑳᐤ ᐎᓂᔥᑳᓈᑭᓅᐙᒀᐤ ᐊᓂᒌ ᑳ ᐴᓂᐱᒫᑎᓰᔨᒡ, ᓂᒧᐃ ᑭᔮᐦ ᐐᔨ ᙭ ᐅᐦᒋ ᐎᓂᔥᑳᓈᑭᓂᐎᒑ᙮ 14 ᐋᒄ ᒫᒃ ᐋᑳ ᒦᓐ ᑳᐤ ᐙᐦᒋ ᐎᓂᔥᑳᓈᑭᓅᒀ ᙭, ᐋᒄ ᑭᔨᑆ ᓂᒧᐃ ᐎᔮᔅ ᐄᑖᐱᑎᓐ ᐊᓐ ᑳ ᐄᔑ ᑭᒑᔅᒀᔮᐦᒡ᙮ ᑭᔮᐦ ᒫᒃ ᓂᒧᐃ ᐎᔮᔅ ᐄᑖᐱᑎᓐ ᑖᓐ ᐋ ᐄᔑ ᑖᑆᐦᑎᒫᒄ᙮ 15 ᐙᐙᒡ ᑭᔮᐦ ᒋᐱᐦ ᓅᑯᓐ ᐋ ᓂᓂᑐᔮᒋᒥᒋᐦᑦ ᒋᔖᒥᓂᑑ ᐙᔥ ᓂᒌᐦ ᐄᑖᒋᒫᓈᓐ ᑳᐤ ᐋ ᒌ ᐙᓂᔥᑳᓈᑦ ᙭ ᑳ ᐴᓂᐱᒫᑎᓰᔨᒡ᙮ ᑎᔮᑆᒥᑭᓂᒀ ᒫᒃ ᐋᐦᐋᑳ ᑳᐤ ᐎᓂᔥᑳᓈᑭᓂᐎᒡ ᑳ ᐴᓂᐱᒫᑎᓰᔨᒡ ᐋᒄ ᑭᔨᑆ ᓂᒧᐃ ᐅᐦᒋ ᐎᓂᔥᑳᓈᒑ ᒋᔖᒥᓂᑑ ᙭᙮ 16 ᐙᔥ ᑖᑆᐦ ᐋᑳ ᑳᐤ ᐎᓂᔥᑳᓈᑭᓅᐙᒀ ᑳ ᐴᓂᐱᒫᑎᓰᔨᒡ ᐋᒄ ᑭᔨᑆ ᑭᔮᐦ ᐐᔨ ᙭ ᓂᒧᐃ ᑳᐤ ᐅᐦᒋ ᐎᓂᔥᑳᓈᑭᓄᐎᔨᒑ᙮ 17 ᐋᑳ ᒫᒃ ᐙᒋ ᐎᓂᔥᑳᓈᑭᓅᒀ ᙭ ᑭᔨᑆ ᓂᑎᐐ ᑳ ᐄᔑ ᑖᑆᔮᔨᒫᒄ, ᑭᔮᐦ ᒫᒃ ᐋᔥᒄ ᒋᐎᓂᔑᓈᐙᐤ ᒋᒥᒋᐦᑣᐎᓂᐙᐦᒡ᙮ 18 ᑎᔮᑆᒥᑭᓂᒀ ᐋᐦᐋᑳ ᒦᓐ ᑳᐤ ᐎᓂᔥᑳᓈᑭᓂᐎᒡ ᐊᓂᒌ ᑳ ᐴᓂᐱᒫᑎᓰᔨᒡ ᑭᔨᑆ ᐎᓂᓯᐦᒡ ᑭᔮᐦ ᐊᓂᒌ ᔖᔥ ᑳ ᐴᓂᐱᒫᑎᓰᔨᒡ ᑳ ᑖᑆᔮᔨᒫᒡ ᙭᙮ 19 ᒥᔔ ᒫᒃ ᒥᒄ ᐅᑎᐦ ᐊᔅᒌᐦᒡ ᐋ ᐱᒫᑎᓰᔨᐦᒄ ᐙᒋᐦᐄᑯᒀ ᐋ ᑖᑆᔮᔨᒥᒄ ᙭, ᒌᔮᓂᐤ ᒫᐅᒡ ᒌ ᒋᔅᑎᒫᒑᔨᐦᑖᑯᓯᓈᓂᐤ ᐋ ᑎᔑᑦ ᐊᐙᓐ ᐅᑎᐦ ᐊᔅᒌᐦᒡ᙮

20 ᒥᒄ ᑖᑆᐦ ᒌ ᐎᓂᔥᑳᐤ ᙭ ᐊᓂᑖᐦ ᐅᓂᐱᐙᐤ ᐅᐦᒋ᙮ ᐋᐅᒄ ᐐᔨ ᓃᔥᑎᒻ ᑳ ᐎᓂᔥᑳᓈᑭᓅᑦ ᐊᓂᑎᐦ ᐅᐦᒋ ᒥᐦᒑᑐ ᐊᓂᒌ ᑳ ᐳᓂᐱᒫᑎᓰᔨᒡ ᑭᔮᐦ ᒦᓐ ᒑ ᐎᓂᔥᑳᓈᑭᓂᐎᒡ᙮ ᐋᑯᑖᐦ ᒫᒃ ᐙᐦᒋ ᒑᔥᑎᓈᑖᔮᔨᐦᑖᑯᐦᒡ ᑭᔮᐦ ᐐᔨᐙᐤ ᒑ ᐎᓂᔥᑳᓈᑭᓂᐎᒡ ᐊᓂᒌ ᑳ ᐴᓂᐱᒫᑎᓰᔨᒡ ᐋ ᒌ ᑖᑆᔨᒫᒡ ᙭᙮ 21 ᐙᔥ ᒌᐦ ᑎᑯᓂᔨᐤ ᐹᔨᒄ ᓈᐹᐤ ᒑᒀᔨᐤ ᐋᐦᒌ ᑎᒃ ᐙᐦᒋ ᑎᑯᐦᒡ ᓂᐱᐎᓐ, ᑭᔮᐦ ᒫᒃ ᑖᐤ ᑯᑎᒃ ᓈᐹᐤ ᐊᓂᔮᔨᐤ ᑖᓐ ᑳᐦ ᑎᒃ ᐊᓂᑖᐦ ᐙᐦᒋ ᑎᑯᓃᔨᒡ ᑳᐤ ᒑ ᒌ ᐎᓂᔥᑳᓈᑭᓂᐎᒡ ᑳ ᐴᓂᐱᒫᑎᓰᔨᒡ᙮ 22 ᓂᐱᐎᓂᔨᐤ ᒥᓯᐙ ᒋᒌ ᐹᑣᑯᓂᐤ ᐋᑕᒻ, ᐐᔨ ᒫᒃ ᙭ ᐱᒫᑎᓰᐎᓂᔨᐤ ᒥᓯᐙ ᒋᒌ ᐹᑣᑯᓂᐤ᙮ 23 ᒥᓯᐙ ᒫᒃ ᐊᐙᓐ ᑎᑯᓂᔨᐤ ᑖᔨᔥᐱᔥ ᒑ ᐎᓂᔥᑳᓈᑭᓅᑦ᙮ ᙭ ᓃᔥᑎᒻ ᒌ ᐎᓂᔥᑳᓈᑭᓂᐤ᙮ ᐋᒄ ᒫᒃ ᒑ ᐎᓂᔥᑳᓂᒫᑭᓂᐎᔨᒡ ᐊᓂᔮᔨᐤᐦ ᐊᐙᔨᐤᐦ ᑳ ᑎᐱᔨᐙᐎᓰᑦ ᐄᔥᐱᐦ ᒦᓐ ᑎᑯᔑᐦᑳ᙮ 24 ᐋᒄ ᒫᒃ ᒑ ᐃᔅᒀᐱᔨᒡ ᐊᔅᒌ᙮ ᙭ ᒑ ᐃᔥᐱᔑᐦᑖᐤ ᒥᓯᐙ ᐅᒋᒫᐎᓂᔨᐤ, ᒥᓯᐙ ᑎᐹᔨᐦᒋᒑᐎᓂᔨᐤ ᑭᔮᐦ ᓲᐦᑳᑎᓰᐎᓂᔨᐤ ᑳ ᓂᔥᑯᔥᑖᑯᑦ᙮ ᐄᔥᐱᐦ ᒫᒃ ᐆ ᒌ ᐄᔅᐱᔨᐦᒑ ᐋᒄ ᙭ ᒑ ᒥᔮᑦ ᒋᔖᒥᓂᑑ ᐅᐦᑖᐐᒫᐤ ᒋᐦᒋᐅᒋᒫᐎᓂᔨᐤ᙮ 25 ᐙᔥ ᐐᔨ ᔮᔨᑖᐃ ᑭᑎ ᐅᒋᒫᐤ ᙭ ᐹᑎᔥ ᒌ ᐃᔥᐱᔑᐦᐋᒑ ᒥᓯᐙ ᐊᓂᔮᔨᐤ ᑳ ᐅᐦᑳᑖᔮᔨᒥᑯᑦ᙮ 26 ᐊᓐ ᒫᐦᒑᔨ ᒑᒀᔨᐤ ᑳ ᓂᔅᑰᔅᑖᑰ ᒑ ᓂᔑᐎᓈᒋᐦᑖᑭᓂᐎᒡ ᐋᔪᐎᒄ ᓂᐱᐎᓂᔨᐤ᙮ 27 ᐙᔥ ᐊᒀᒋᔥᑖᒡ ᒋᐦᒋᒥᓯᓂᐦᐄᑭᓂᐦᒡ, “ᒋᔖᒥᓂᑑ ᒥᓯᐙ ᒑᒀᔨᐤ ᒌ ᒥᔮᐤ ᒑ ᒌ ᑎᐹᔨᐦᑎᒥᔨᒡ᙮” ᐆ ᒫᒃ ᑳᐦ ᐄᑎᔥᑖᒡ ᒥᓯᐙ ᒑᒀᔨᐤ ᒌ ᒥᔮᑭᓂᐤ ᐐᔨ ᒑ ᒌ ᑎᐹᔨᐦᑎᐦᒃ ᓂᔅᑐᐦᑖᑯᓐ ᐋᐦᐋᑳ ᐊᔅᑎᒋᒫᑭᓅᑦ ᒋᔖᒥᓂᑑ ᐊᓂᑎᐦ ᐊᓂᔮᔨᐤ ᑳᐦ ᐄᑎᔥᑖᔨᒡ᙮ ᐙᔥ ᒋᔖᒥᓂᑑ ᒥᔮᐤ ᙭ ᒥᓯᐙ ᒑᒀᔨᐤ ᒑ ᒌ ᑎᐹᔨᐦᑎᒥᔨᒡ᙮ 28 ᐄᔥᐱᐦ ᒥᓯᐙ ᒑᒀᔨᐤ ᒌ ᒥᔮᑭᓅᒑ ᙭ ᒑ ᒌ ᑎᐹᔨᐦᑎᐦᒃ ᐋᒄ ᐐᔨ ᙭ ᒑ ᐱᒋᔥᑖᔨᒥᓲᔅᑎᐙᑦ ᒋᔖᒥᓂᑑ, ᐊᓂᔮᔨᐤ ᑳ ᒥᔨᑯᑦ ᒥᓯᐙ ᒑᒀᔨᐤ ᒑ ᒌ ᑎᐹᔨᐦᑎᐦᒃ᙮ ᐋᒄ ᒫᒃ ᒋᔖᒥᓂᑑ ᒥᑐᓐ ᒥᓯᐙ ᒑᒀᔨᐤ ᒑ ᑎᐹᔨᑎᒃ ᑭᔮᐦ ᒥᓯᐙ ᐊᐙᔨᐤᐦ ᒑ ᑎᐹᔨᒫᑦ᙮

29 ᑖᐅᒡ ᐊᓂᒌ ᐋ ᒌ ᓰᑭᐦᐋᐦᑖᑯᓰᔨᒡ ᐊᓂᔮᔨᐤ ᐅᐦᒋ ᐊᐙᔨᐤᐦ ᔖᔥ ᐋ ᒌ ᐴᓂᐱᒫᑎᓰᔨᒡ᙮ ᑖᓐ ᒫᒃ ᐙᐦ ᑎᒡ ᐊᓂᔮᔨᐤ ᑳᐦ ᑎᒡ᙮ ᐙᔥ ᑖᑆᐦ ᐋᑳ ᒦᓐ ᐎᓂᔥᑳᓈᑭᓅᐙᒀ ᐊᓂᒌ ᔖᔥ ᑳ ᐴᓂᐱᒫᑎᓰᔨᒡ ᒑᒀᔨᐤ ᐙᐦᒋ ᓰᑭᐦᐋᐦᑖᑯᓰᔨᒡ ᐊᓂᔮᔨᐤ ᐅᐦᒋ ᐊᐙᔨᐤᐦ ᔖᔥ ᐋ ᒌ ᐴᓂᐱᒫᑎᓰᔨᒡ? 30 ᐋᒄ ᒫᒃ ᓃᔮᓐ, ᒑᒀᓐ ᐋᔑᑯᒻ ᐋᐦᒋᓂᒀᓂᐦᑖᑦ ᐲᓯᒧᐦᑳᓐ ᐙᐦᒋ ᐱᒋᔅᑎᓃᓱᔮᐦᒡ ᑖᓂᑖᐦ ᒀᔅᑖᑎᑯᐦᒡ ᐋᑳ ᐋᐦᑎᑯᓃᒀ ᐎᓂᔥᑳᐅᓐ᙮ 31 ᓃᒋᔖᓂᑎᒄ, ᐋᔑᑯᒻ ᒌᔑᑳᐤᐦ ᓂᐹᔣᐱᐦᑖᓐ ᓂᐱᐎᓐ᙮ ᐋ ᒫᒥᐦᒋᐦᐄᔮᒄ ᐋ ᐐᒑᐙᐦᒄ ᙭ ᒌᓴᔅ ᒋᑎᐹᔨᐦᒋᒑᓰᒥᓅᐤ, ᐋᑯᑖᐦ ᐙᐦᒋᐱᔨᒡ ᐆ ᒑ ᒌ ᐃᔮᓐ᙮ 32 ᒥᔔ ᒫᒃ ᓈᐦᐄᔨᐤ ᑳ ᒫᓯᐦᐋᐅᒑᓂᒋ ᓈᐹᐅᒡ ᒧᔮᒻ ᐊᐅᐦᑳᓂᒡ ᑳ ᑯᔥᑖᑎᑯᓰᔨᒡ ᑳ ᐄᑖᔨᐦᑖᑯᓯᒡ ᐁᕕᓱᓯᐦᒡ ᑳᐦ ᑖᒡ ᒑᒀᓐ ᑳ ᐱᑯᐦᑎᒫᓱᔮᓐ? ᒥᔔ ᑖᑆᐦ ᐋᑳ ᐎᓂᔥᑳᓈᑭᓅᐙᒀ ᐊᓂᒌ ᔖᔥ ᑳ ᐴᓂᐱᒫᑎᓰᔨᒡ ᐋᑯᔥ ᑭᔨᑆ ᒋᐱᐦ ᑐᑖᓈᓂᐤ ᐊᓐ ᑳ ᐄᓈᓅᒡ ᒑ ᑐᑖᑭᓂᐎᒡ, “ᒦᒋᓱᑖᐤ ᑭᔮᐦ ᒥᓂᐦᒀᑖᐤ, ᐙᔥ ᐙᐱᐦᒑ ᒋᑭ ᓂᐱᓈᓂᐤ᙮” 33 ᐊᑳᐐ ᑳᒌᔑᐦᐄᓱᒄ᙮ ᑖᑆᒥᑭᓐ ᐊᓐ ᑳ ᐄᓈᓅᒡ,

35 ᑭᔮᐦ ᒫᒃ ᒋᑭ ᒌ ᑯᒀᒋᐦᒑᔨᒨ ᐊᐙᓐ, “ᑖᓐᑖᐦ ᐙᐦᒋ ᒌ ᐎᓂᔥᑳᓈᑳᓅᑦ ᐊᐙᓐ ᐋ ᒌ ᐴᓂᐱᒫᑎᓰᑦ? ᑖᓐ ᒑ ᐃᓯᓈᑯᓃᔨᒡ ᐅᔨᐤ ᐎᓂᔥᑳᓈᑭᓅᒑ?” 36 ᓄᐎᒡ ᓂᑎᐐ ᒋᑎᐄᑖᔨᐦᑎᓈᐙᐤ ᐊᓐ ᑳ ᐄᔑ ᑭᒀᒋᐦᒑᔨᒧᔮᒄ᙮ ᐹᑎᔥ ᑳ ᐱᒋᔅᑎᓂᑭᓂᐎᒡ ᐊᓐ ᔒᒥᓐ ᐄᑖᒥᐦᒡ ᐊᔅᒌᐦᒡ, ᒥᒄ ᐱᑦ ᓈᐲᒥᐦᑭᐦᒡ ᐋᒄ ᐃᔮᒄᐦ ᐹᒫᑎᓯᒥᑭᐦᒡ ᑭᔮᐦ ᓈᐦᑖᐆᒋᐦᒡ᙮ 37 ᐊᓐ ᒫᒃ ᔒᒥᓐ ᐋᐅᒄ ᐱᒋᔅᑎᓂᑭᓄᐎᒡ ᐊᓂᑖᐦ ᐊᔅᒌᐦᒡ ᓂᒧᐃ ᐋᓐ ᔖᔥ ᐋ ᒌ ᒌᓯᓂᐦᑖᐆᒋᐦᒡ ᐱᒋᔅᑎᓈᑭᓂᐤ᙮ 38 ᒋᔖᒥᓂᑑ ᒫᒃ ᐐᔨ ᐎᔮᔨᐦᑎᒻ ᑖᓐ ᒑ ᐄᔑ ᓂᐦᑖᐅᒋᐦᒑᔨᒡ ᒥᓯᐙ ᓂᓈᐦᑭᐤ ᐋ ᐃᓯᓈᑯᓰᔨᒡ ᔒᒥ ᒌᔑᓂᐦᑖᐅᒋᓃᒀᐙ᙮ 39 ᑭᔮᐦ ᒫᒃ ᒫᒥᑐᓈᔨᒫᑯᒡ ᐄᔨᔨᐅᒡ, ᐊᐅᐦᑳᓂᒡ, ᐱᔮᔒᔑᒡ ᑭᔮᐦ ᒫᒃ ᓂᒫᓯᒡ, ᒥᓯᐙ ᐃᔨᐦᒡ ᐃᓯᓈᑯᓂᔨᐤ ᐎᔮᓲᐙᐤ᙮ 40 ᑎᑯᓐ ᑭᔮᐦ ᒋᐦᒋᒌᔑᒄ ᒥᔨᐤᐦ ᑭᔮᐦ ᑎᑯᓐ ᐊᔅᒌᔨᐤ ᒥᔨᐤᐦ᙮ ᐃᔨᐦᒡ ᒫᒃ ᐄᔑ ᒋᔅᑖᔨᐦᑖᑯᓐ ᒋᐦᒋᒌᔑᒄ ᒥᔨᐤᐦ ᑖᓐ ᐋ ᐄᔑ ᒋᔅᑖᔨᐦᑖᑯᐦᒡ ᐊᔅᒌᔨᐤ ᒥᔨᐤᐦ᙮ 41 ᑎᑯᓂᔨᐤ ᐋ ᐄᔑ ᒥᔻᔥᑎᐙᑦ ᐲᓯᒻ᙮ ᑎᐱᔅᒋᐲᓯᒻ ᑭᔮᐦ ᑎᑯᓂᔨᐤ ᐊᔨᐦᒡ ᐋ ᐄᔑ ᒥᔻᔥᑎᐙᑦ᙮ ᑭᔮᐦ ᐊᒋᐦᑯᔑᒡ ᑎᑯᓂᔨᐤ ᐊᔨᐦᒡ ᐋ ᐄᔑ ᒥᔻᔥᑎᐙᒡ᙮ ᐊᓂᒌ ᐊᒋᐦᑯᔑᒡ ᓂᓈᐦᑭᐤ ᐃᓯᓈᑯᓂᔨᐤ ᐋ ᐄᔑ ᒥᔻᔥᑎᐙᒡ ᐋᐦ ᐋᑎ ᐹᐦᐹᔨᑯᒡ᙮

42 ᐋᐅᒄ ᒫᒃ ᒧᔮᒻ ᐋ ᐃᓯᓈᑯᐦᒡ ᐎᓂᔥᑳᓅᒡ ᓂᐱᐎᓂᐦᒡ ᐅᐦᒋ᙮ ᐄᔥᐱᐦ ᑳ ᓂᐦᐄᐦᑳᑭᓅᐦᒡ ᒥᔨᐤ ᐋᑎ ᐐᓂᐱᔨᐤ᙮ ᐄᔥᐱᐦ ᒫᒃ ᐎᓂᔥᑳᓈᑭᓅᒑ ᓂᐱᐎᓂᐦᒡ ᐅᐦᒋ, ᐊᓐ ᒥᔨᐤ ᑳᒋᒡ ᒋᑭ ᐱᒫᑎᓰᒥᑭᓐ᙮ 43 ᐊᓐ ᑳ ᓂᐦᐄᐦᑳᑭᓅᐦᒡ ᒥᔨᐤ ᓂᒧᐃ ᐱᒫᑎᓰᒥᑭᓐ ᑭᔮᐦ ᐐᓈᑯᓐ᙮ ᐄᔥᐱᐦ ᒫᒃ ᐎᓂᔥᑳᓂᑭᓅᐦᒑ ᓂᐱᐎᓂᐦᒡ ᐅᐦᒋ ᓄᐎᒡ ᒋᑭ ᓲᐦᒋᓰᒥᑭᓐ ᑭᔮᐦ ᒋᑭ ᒥᔪᔑᔔ᙮ 44 ᐊᐙᓐ ᐋ ᓂᐦᐄᐦᑭᐙᑭᓅᑦ, ᐊᓂᔮᔨᐤ ᐅᔨᐤ ᐄᔨᔨᐤ ᒥᔨᐤ ᐃᓯᓈᑯᓂᔨᐤ᙮ ᐄᔥᐱᐦ ᐎᓂᔥᑳᓈᑭᓅᒑ ᐊᓐ ᑳ ᓂᐦᐄᐦᑭᐙᑭᓅᑦ, ᐊᓂᔮᔨᐤ ᐅᔨᐤ ᐊᐦᒑᐦᒄ ᒥᔨᐤ ᒋᑭ ᐃᓯᓈᑯᓂᔨᐤ᙮ ᑎᑯᓐ ᐄᔨᔨᐤ ᒥᔨᐤ᙮ ᑎᑯᓐ ᑭᔮᐦ ᐊᐦᒑᐦᒄ ᒥᔨᐤ᙮ 45 ᒥᓯᓈᑖᐤ ᐊᓂᑖᐦ ᒋᐦᒋᒥᓯᓂᐦᐄᑭᓂᐦᒡ ᐋᐦ ᐄᑎᔥᑖᒡ, “ᐊᓐ ᓃᔥᑎᒻ ᓈᐹᐤ, ᐋᑕᒻ, ᒌ ᐄᔑᐦᐋᑭᓂᐤ ᒑ ᒌ ᐱᒫᑎᓰᑦ᙮” ᐊᓐ ᒫᒃ ᒫᐦᒋᒡ ᐋᑕᒻ ᐋᐅᒄ ᙭, ᐊᐦᒑᐦᑰ ᐐᔨ, ᐐᔨ ᒥᔨᐙᐤ ᐱᒫᑎᓰᐎᓂᔨᐤ᙮ 46 ᓃᔥᑎᒻ ᒥᔨᐤ ᒌ ᒥᔨᑯᓈᓂᐤ ᐅᑎᐦ ᐊᔅᒌᐦᒡ᙮ ᐋᒄ ᒫᒃ ᐹᑎᒫ ᒑ ᒥᔨᑯᐎᔨᐦᒄ ᐊᐦᒑᐦᒄ ᒥᔨᐤ᙮ 47 ᐊᓐ ᓃᔥᑎᒻ ᓈᐹᐤ ᐋᑕᒻ, ᐄᔥᐱᐦ ᑳ ᐅᔑᐦᐄᑯᑦ ᒋᔖᒥᓂᑑᐦ ᓯᔅᒋᐎᐦᒡ ᐊᔅᒌᐦᒡ ᐅᐦᒋ ᒌ ᐅᐦᒋ ᐅᔑᐦᐄᑰ᙮ ᙭ ᐊᓐ ᒫᒃ ᒦᓐ ᓈᐹᐤ, ᒋᐦᒋᒌᔑᑯᐦᒡ ᒌ ᐅᐦᑐᐦᑖᐤ ᐐᔨ᙮ 48 ᒥᓯᐙ ᐄᔨᔨᐅᒡ ᐅᑎᐦ ᐊᔅᒌᐦᒡ ᑳ ᐱᒫᑎᓰᔨᒡ ᒧᔮᒻ ᐋᑕᒻ ᑳ ᐃᓯᓈᑯᓰᔨᒡ ᐃᓯᓈᑯᓯᐎᒡ᙮ ᐋᒄ ᒫᒃ ᐊᓂᒌ ᐄᔨᔨᐅᒡ ᐊᓂᑖᐦ ᒋᐦᒋᒌᔑᑯᐦᒡ ᒑ ᑖᒡ ᒧᔮᒻ ᙭ ᑳ ᐃᓯᓈᑯᓰᔨᒡ ᒋᑭ ᐃᓯᓈᑯᓯᐎᒡ᙮ 49 ᒧᔮᒻ ᒫᒃ ᐋ ᐄᔑ ᓂᔅᐱᑑᐦᒄ ᐊᓐ ᓯᔅᒋᐎᐦᒡ ᑳ ᐅᐦᒋ ᐅᔑᐦᐋᑭᓅᑦ ᒑᔥᑎᓈᔥ ᑭᔮᐦ ᒋᑭ ᓂᔅᐱᑐᐙᓂᐤ ᐊᓐ ᒋᐦᒋᒌᔑᑯᐦᒡ ᑳ ᐅᐦᑐᐦᑖᑦ᙮

50 ᒫᐤ ᐙᐦ ᐄᔑ ᐐᐦᑎᒫᑎᑯᒡ ᓃᒋᔖᓂᑎᒄ᙮ ᐅᐦᐄ ᒌᔮᓅᐦ ᑳ ᐎᔮᓲᐦᒡ ᑭᔮᐦ ᑳ ᒥᐦᑰᐎᒡ ᓂᒧᐃ ᑭᑎ ᒌ ᑎᑯᓐ ᐊᓂᑖᐦ ᒋᔖᒥᓂᑑ ᐅᒋᐦᒋᐅᒋᒫᐎᓂᐦᒡ, ᑭᔮᐦ ᒫᒃ ᐊᓐ ᒑᒀᓐ ᒑ ᓂᐲᒥᑭᐦᒡ ᑳ ᐄᔑᐦᑖᑭᓂᐎᒡ ᓂᒧᐃ ᑳᒋᒡ ᑭᑎ ᒌ ᐱᒫᑎᓰᒥᑭᓐ᙮ 51 ᒋᐐᐦᑎᒫᑎᓈᐙᐤ ᒑᒀᓐ ᐋᐦᐋᑳ ᒋᔅᒑᔨᐦᑖᑯᓂᐎᒡ᙮ ᓂᒧᐃ ᒥᓯᐙ ᒋᑭ ᐅᐦᒋ ᓂᐱᓈᓂᐤ᙮ ᒥᒄ ᒫᒃ ᒥᓯᐙ ᐋᐦᑎᔒᐦᒄ ᔑᔥᒋᑯᒡ ᒋᑭ ᒀᔅᒋᓈᑯᐦᐄᑯᓈᓂᐤ᙮ 52 ᐄᔥᐱᐦ ᐹᐦᑖᑯᐦᒑ ᐴᑖᒋᑭᓐ ᒫᐦᒋᒡ ᒌᓯᑳᒑ, ᐹᔨᒀᐤ ᐋ ᐱᓯᐦᑳᐱᓈᓂᐎᒡ ᐋᐅᒄ ᒑ ᐃᔥᐱᔥ ᒋᔑᐱᔨᐦᒡ ᐋ ᒀᔅᒋᓈᑯᐦᐄᑭᐎᔨᐦᒄ᙮ ᑭᔮᐦ ᒫᒃ ᐹᐦᑖᑯᐦᒑ ᐊᓐ ᐴᑖᒋᑭᓐ, ᐋᒄ ᒫᒃ ᐊᓂᒌ ᑳ ᐴᓂᐱᒫᑎᓰᔨᒡ ᒑ ᐎᓂᔥᑳᓈᑭᓂᐎᒡ ᑳᒋᒡ ᒑ ᒌ ᐱᒫᑎᓰᔨᒡ᙮ ᐋᒄ ᒫᒃ ᒥᓯᐙ ᒌᔮᓂᐤ ᐋᔥᒄ ᒑ ᐱᒫᑎᓰᔨᐦᒄ ᒑ ᒀᔅᒋᓈᑯᐦᐄᑭᐎᔨᐦᒄ᙮ 53 ᐙᔥ ᐆ ᒋᔮᓅᐦ ᐙᐦᑎᓐ ᒑ ᒌ ᓂᐱᒥᑭᐦᒡ ᑭᔮᐦ ᒑ ᒌ ᐐᓂᐱᔨᐦᒡ, ᔮᔨᑖᐃ ᒋᑭ ᐋᐦᒋᑖᑭᓂᐤ ᒥᔨᐤ ᒑᐦ ᐋᑳ ᓂᐦᑖ ᓂᐲᒥᑭᐦᒡ ᑭᔮᐦ ᒑ ᐋᐦᐋᑳ ᓂᐦᑖ ᐐᓂᐹᔨᒡ᙮ 54 ᐊᓐ ᒫᒃ ᐋ ᐐᓂᐱᔨᔨᒡ ᒀᔅᒋᓈᑰᐦᑖᑭᓅᒑ ᒑᐦ ᐋᑳ ᒦᓐ ᓂᐦᑖ ᐐᓂᐱᔨᔨᒡ ᑭᔮᐦ ᐊᓐ ᐋ ᓂᐲᒥᑭᐦᒡ ᓂᒧᐃ ᒦᓐ ᓂᐦᑖ ᒋᑭ ᐅᐦᒋ ᓂᐲᒥᑭᓐ, ᐋᒄ ᒑ ᑖᑆᒥᑭᐦᒡ ᐊᓐ ᑳᐦ ᐄᑎᔥᑖᒡ ᒋᐦᒌᒥᓯᓂᐦᐄᑭᓂᐦᒡ,