5
ᑳ ᓃᑳᓂᔥᑭᐦᒡ ᐊᔨᒥᐦᐋᐅᑭᒥᒄᐦ ᑭᔮᐦ ᒫᒃ ᐅᔅᒋᓃᒎᒡ
1 ᒫᐅᔮᔨᐤ ᐙᐦ ᐄᑎᒀᐤ ᐊᓂᒌ ᑳ ᓃᑳᓂᔒᒡ ᐊᓂᑎᐦ ᐋᐦᑎᓯᔮᒄ, ᓃᔨ ᑭᔮᐦ ᐊᓐ ᐋ ᐄᔑ ᓃᑳᓂᓰᔮᓐ᙮ ᓂᒌᐙᐱᒫᐤ ᑭᔮᐦ ᙭ ᐋ ᐐᓯᒑᔨᐦᑎᒥᐦᐋᑭᓅᑦ ᓃᔨ ᑭᔮᐦ ᓂᑭ ᐐᒋᐦᐄᐙᓐ ᐊᓂᔮᔨᐤ ᒑ ᒌᓯᑳᔨᒡ ᓅᑰᐦᑖᑭᓂᐎᔨᒑ ᐆ ᒋᔅᑖᔨᐦᑖᑯᓲᐎᓐ᙮ 2 ᒥᔪ ᑭᓂᐙᔨᒫᐦᒄ ᐊᓂᔮᔨᐤᐦ ᐄᔨᔨᐤᐦ ᒋᔖᒥᓂᑑ ᑳ ᒥᔨᑖᒄ ᒑ ᒌ ᓃᑳᓂᔥᑯᒫᒄ ᒧᔮᒻ ᑳ ᒌ ᐄᔑ ᒥᔪ ᑭᓂᐙᔨᒫᑦ ᐅᒫᓂᔥᒑᓂᔒᒻ ᐊᓐ ᑳ ᑭᓄᒫᓂᔥᒑᓂᔑᐙᓯᐎᑦ᙮ ᒋᐱᐦ ᒥᔻᔨᐦᑖᓈᐙᐤ ᒑ ᒌ ᒥᔪ ᑭᓂᐙᔨᒫᑯᒡ ᐊᓂᔮᔨᐤᐦ ᐄᔨᔨᐤᐦ ᒋᔖᒥᓂᑑ ᐋ ᐄᔑ ᓂᑎᐙᔨᒥᑖᒄ, ᓂᒥᔮᐤ ᒥᒄ ᐋ ᑭᓂᐙᐱᐦᑎᒫᒄ ᑖᓐ ᒑ ᐄᔑ ᐅᐦᑎᓰᔮᒄ, ᒥᒄ ᒫᒃ ᒥᑐᓐ ᐋ ᐄᑖᔨᐦᑎᒥᐦᐄᑯᔮᒄ ᑖᓐ ᒑ ᒌ ᐄᔑ ᐄᒋᐦᐋᑯᒡ ᐊᓂᒌ ᑳ ᒥᔨᑯᐎᔮᒄ ᒑ ᒌ ᓈᓈᑭᒋᐦᐋᑯᒡ᙮
3 ᐊᑳᐐ ᓈᔥᒡ ᐐᐦ ᑖᐱ ᐅᒋᒫᐦᑭᐦᑎᐙᑯᒡ ᐊᓂᒌ ᑳ ᒥᔨᑯᐎᔮᒄ ᒑ ᒌ ᓃᑳᓂᔥᑯᐙᑯᒡ ᑭᔮᐦ ᒫᒃ ᐋᑯᔥ ᐊᐅᔅᑖ ᐐᐦ ᒥᔪᑐᑎᐙᐦᑯᒡ ᒑ ᑎᑯᓃᔨᒡ ᒫᒃ ᐊᓂᑎᐦ ᒑ ᒌ ᐅᐦᒋ ᒋᔅᒋᓄᐙᐱᒥᑖᑯᒡ᙮ 4 ᐋᒄ ᒫᒃ ᐄᔥᐱᐦ ᙭ ᐹᒋ ᓅᑯᓯᒑ ᐊᓐ ᒫᐅᒡ ᑳ ᓃᑳᓈᔨᐦᑖᑯᔑᑦ ᒫᓂᔥᒑᓂᔓᐐᔨᔨᐤ, ᒋᑭ ᒥᔨᑯᐙᐤ ᐊᓂᔮᔨᐤ ᒫᐅᒡ ᑳ ᒋᔅᑖᔨᐦᑖᑯᓃᔨᒡ ᑎᐱᐦᐋᒫᑰᓯᐎᓂᔨᐤ ᑳᒋᒡ ᒑ ᑎᑯᓃᔨᒡ᙮ 5 ᐋᒄ ᒫᒃ ᒌᔨᐙᐤ ᑳ ᐅᔅᒋᐱᒫᑎᓰᔮᒄ ᒋᐱᐦ ᓂᓂᐦᐄᐦᑐᐙᐅᒡ ᐊᓂᒌ ᑳ ᓃᑳᓂᔒᒡ ᐋ ᐱᒥᐱᔨᐦᑖᑭᓂᐎᔨᒡ ᐊᔨᒥᐦᐋᐅᑭᒥᑯᔨᐤ᙮ ᒥᓯᐙ ᒫᒃ ᐋ ᑎᔑᔮᒄ ᒋᐱᐦ ᑎᐱᐦᑖᔨᒧᓱᔅᑖᑐᓈᐙᐤ ᐙᔥ ᐊᒀᒋᔥᑖᒡ ᒋᐦᒋᒥᓯᓂᐦᐄᑭᓂᐦᒡ,
ᒋᔖᒥᓂᑑ ᓂᔥᑯᔥᑎᐙᐤ ᐊᓂᔮᔨᐤᐦ ᑳ ᒋᔅᑖᔨᒧᔨᒡ, ᐋᒄ ᐊᓂᔮᐦ ᑳ ᑎᐱᐦᑖᔨᒦᓱᔨᒡ ᒋᔖᐙᑐᑎᐙᐤ᙮
6 ᑎᐱᐦᑖᔨᐦᑖᑯᐦᐄᓱᒃ ᐅᐦᑎᔅᑰ ᒋᔖᒥᓂᑑ ᐊᓐ ᑳ ᓲᐦᑳᑎᓰᑦ, ᐙᔥ ᒋᑭ ᐅᐦᐱᓂᑯᐙᐤ ᑖᔨᔅᑉᐦ ᐐᐦ ᐋᑖᔨᐦᑎᒃᐦ᙮ 7 ᐐᔨ ᐱᒋᔅᑎᓂᒨ ᒥᓯᐙ ᐋ ᐄᔑ ᒥᑯᔥᑳᑖᔨᐦᑎᒥᐦᐄᑯᐎᑦ ᒑᒀᔨᐤ ᐙᔥ ᐐᔨ ᒨᔥ ᒌ ᓂᓈᑭᑐᐙᔨᒥᒄ᙮ 8 ᒨᔥ ᐐᐦ ᐄᑆᐦᑳᒄ ᑭᔮᐦ ᐃᔮᒀᒦᔥᑎᐙᐦᑯᒡ᙮ ᐊᓐ ᑳ ᒥᒑᔨᒥᑖᒄ, ᒥᒋᒥᓂᑑ ᒨᔥ ᐲᑆᒨᐦᑖᐤ ᐋ ᐱᐹᓈᒧᑦ ᒨᔮᒻ ᒥᓯᐱᓲᐤ, ᐋ ᓈᓂᑐᐙᐱᒫᑦ ᐋᐙᔨᐤᐦ ᒑ ᒌ ᒨᐙᑦ᙮ 9 ᓂᔥᑰᔥᑐᐙᐦᒄ ᒫᒃ ᒥᒋᒥᓂᑑ᙮ ᐋᔨᒋᑳᐳᒄ ᒋᑖᑆᐦᑎᒧᐎᓂᐙᒡ, ᐙᔥ ᒋᒋᔅᒑᔨᐦᑖᓈᐙᐤ ᐊᓂᒌ ᒌᒋᔖᓂᐙᐅᒡ ᑳ ᑖᑆᐦᑎᐦᒡ ᒥᒄ ᐊᓂᑎᐦ ᐋᐦᑖᐙᒀᐤ ᐅᑎᐦ ᐊᔅᒌᐦᒡ, ᐋᔪᐎᒄ ᑭᔮᐦ ᐐᔨᐙᐤ ᐋ ᐄᔑ ᓂᒋᔥᑭᐦᒡ ᓂᓈᐦᑳᒋᐦᐄᐙᐎᓂᔨᐤ ᒧᔮᒻ ᑭᔮᐦ ᒌᔨᐙᐤ ᐋ ᐄᔑ ᓂᒋᔥᑭᒫᒄ᙮ 10 ᐄᔥᐱᐦ ᒫᒃ ᒌᔥ ᓂᓈᐦᑳᑖᔨᒧᔮᒀ ᐙᐃᐱᔥᒌᔥ ᒋᑭ ᑐᑖᑯᐙᐤ ᒋᔖᒥᓂᑑ ᒦᓐ ᒑ ᒌ ᐎᔨᑳᐳᐙᒄ, ᒋᑭ ᒥᔨᑯᐙᐤ ᒥᔅᑭᐎᓰᐎᓂᔨᐤ, ᒋᑭ ᐋᔨᒋᑳᐳᐦᐄᑯᐙᐤ, ᑭᔮᐦ ᒋᑭ ᓯᑭᔅᒑᔨᒧᐦᐄᑯᐙᐤ᙮ ᒋᔖᒥᓂᑑ ᐊᓐ ᑳ ᐃᔮᑦ ᒥᓯᐙ ᒥᔪᐦᑳᒑᐎᓂᔨᐤ ᒌ ᓂᑑᒥᑯᓂᐤ ᐊᓂᑖᐦ ᑳᒋᒡ ᐅᒋᔅᑖᔨᐦᑖᑯᓯᐎᓂᐦᒡ ᙭ ᐋᐦ ᑖᔨᒡ ᐅᐦᒋ᙮ 11 ᐐᔨ ᒫᒃ ᒋᔖᒥᓂᑑ ᐃᔮᐤ ᒥᓯᐙ ᓲᐦᑳᑎᓰᐎᓂᔨᐤ, ᒨᔥ ᑳᒋᒡ᙮ ᐋᒥᓐ᙮
ᑆᓪ ᒫᐦᒑᔨ ᑳ ᐄᔑ ᐙᒋᔮᒫᑦ ᐅᔮᔨᐤᐦ ᐐᒋᔕᓂᒫᐤᐦ
12 ᑖᐤ ᓃᒋᔖᓐ ᐋ ᑖᑆᐅᒑᔨᐦᑖᑯᓯᑦ ᐋᑖᔨᒥᒃ᙮ ᓵᐃᓚᔅ ᐃᔑᓂᐦᑳᓲ᙮ ᐋᐅᒄ ᐆ ᑳ ᐐᒋᐦᐄᑦ ᐅᔮᔨᐤ ᐊᐱᔒᔥ ᐋ ᒥᓯᓂᐦᐋᒫᑎᑯᒡ᙮ ᐆ ᒫᒃ ᑳ ᒥᓯᓂᐦᐋᒫᑎᑯᒡ ᒋᐐᐦ ᔒᐦᒋᒥᑎᓈᐙᐤ ᒑ ᒌ ᐋᔨᒋᑳᐳᔮᒄ ᑭᔮᐦ ᒋᐐᐦ ᒑᔥᑎᓈᑖᔨᐦᑎᒥᐦᐄᑎᓈᐙᐤ ᑖᑆᐦ ᐋᐦ ᐋᐅᓃᔨᒡ ᐅᔮᔨᐤ ᒋᔖᒥᓂᑑ ᐅᒥᔪᐦᑳᒑᐎᓐ ᑳᐦ ᐋᔨᒨᑎᒫᑖᐦᒡ᙮ ᐋᑯᑖᐦ ᒫᒃ ᐊᓂᑎᐦ ᐅᒥᔪᐦᑳᒑᐎᓂᐦᒡ ᐄᔑ ᐋᔨᒋᑳᐳᐙᐦᒄ᙮ 13 ᒋᐙᒋᔮᒥᑯᐙᐅᒡ ᐊᓂᒌ ᑭᔮᐦ ᐐᔨᐙᐤ ᑳ ᐅᐙᔮᐱᒥᑯᒡ ᒋᔖᒥᓂᑑ ᐊᓂᑖᐦ ᐹᐱᓨᓐ ᑳ ᑖᒡ᙮ ᑭᔮᐦ ᒫᕐᒃ ᓂᑯᔅ ᑳ ᐄᑖᔨᒥᒃ ᒋᐙᒋᔮᒥᑯᐙᐤ᙮ 14 ᐙᒋᔮᒥᑐᒄ ᐋ ᐱᔮᐦᒡ ᐅᒑᒥᑐᔮᐦᒄ, ᐋ ᓅᑯᐦᑣᑐᔮᒄ ᐋ ᓵᒋᐦᐄᑐᔮᒄ᙮ ᒋᓂᑐᑎᒫᔅᑎᒫᑎᓈᐙᐤ ᒋᔮᒫᔨᐦᑎᒧᐎᓐ ᒑ ᒌ ᐃᔮᔮᒄ ᒥᓯᐙ ᒌᔨᐙᐤ ᙭ ᑳ ᑎᐹᔨᒥᑖᒄ᙮