1 ᒌᔨᐙᐤ ᐋᐱᒋᐦᐋᑭᓂᑐᒄ ᑳ ᑎᐹᔨᒫᑰᔮᒄ ᑳ ᒋᔅᑖᔨᒫᐦᑯᒡ ᑰᒋᒫᒨᐙᐅᒡ ᐋᑳ ᓂᑎᐐ ᒑ ᒌ ᐄᔑ ᐋᔨᒨᑖᔨᒡ ᒋᔖᒥᓂᑑ ᐅᑎᔑᓂᐦᑳᓱᐎᓐ ᑭᔮᐦ ᐆ ᐋ ᐄᔑ ᒋᔅᑯᑎᒫᒑᔮᐦᒡ᙮ 2 ᐋᒄ ᒫᒃ ᑰᒋᒫᒨᐙᐅᒡ ᑎᔮᑆᐦᑎᒧᐙᒀ ᐊᑳᐐ ᒋᑭ ᐅᐦᒋ ᑐᑎᐙᐙᐅᒡ ᐋᑳ ᒑ ᒌ ᒋᔅᑖᔨᒫᑯᒡ ᒥᒄ ᐊᓂᔮᔨᐤ ᐋ ᒋᔅᒑᔨᒫᑯᒡ ᐋ ᐐᒋᔖᓂᑐᑎᐙᑯᒡ ᑖᑆᔮᔨᐦᑎᒧᐎᓂᒡ ᐄᔑ᙮ ᑎᔨᑯᒡ ᐊᑎᑎᐤ ᒋᐱᐦ ᒥᔪ ᐋᐱᑎᔒᔥᑑᐙᐙᐅᒡ ᒑ ᒌ ᐄᒋᐦᐋᑯᒡ ᐅᒌ ᒌᒋᔖᓂᐙᐅᒡ ᑳ ᓵᒋᐦᐋᑭᓂᐎᒡ᙮ ᐋᐅᒄ ᒫᒃ ᐆ ᒋᐱᐦ ᐄᔑ ᒋᔅᑯᑎᒫᒑᓈᐙᐤ ᑭᔮᐦ ᒋᐱᐦ ᐄᔑ ᑭᒑᔥᒀᓈᐙᐤ᙮

3 ᐋᒄ ᒫᒃ ᐊᐙᓐ ᐃᔨᐦᒡ ᐋ ᐄᔑ ᒋᔅᑯᑎᒫᒑᑦ ᑭᔮᐦ ᐋᐦ ᐋᓍᑎᒸᑦ ᑎᐹᔨᐦᒋᒑᓯᐤ ᒌᓴᔅ ᙭ ᐅᑎᔨᒧᐎᓂᔨᐤᐦ ᑳ ᑖᑆᒥᑭᓃᔨᒡ ᑭᔮᐦ ᐊᓂᔮᔨᐤ ᐋ ᐄᔑ ᒋᔅᑯᑎᒫᒑᓂᐎᔨᒡ ᒑ ᒌ ᒋᔖᒥᓂᑑᐙᑎᓰᓈᓂᐎᔨᒡ 4 ᓈᔥᑖᑆᐦ ᒋᔅᑖᔨᒧ, ᑭᔮᐦ ᓂᒧᐃ ᓂᔅᑐᐦᑎᒻ ᐊᓂᔮᔨᐤ ᒑᒀᔨᐤ ᐙᐦ ᐄᔑ ᐋᔨᒨᑎᐦᒃ᙮ ᐙᔥ ᐊᐅᔅᑖ ᐄᑖᔨᐦᑎᒻ ᒑ ᒌ ᐋᔨᒨᑎᐦᒃ ᒑᒀᔨᐤ ᐊᓂᑎᐦ ᒑ ᒌ ᐅᐦᒋ ᐋᑳ ᓂᓂᐦᐋᔨᒥᑐᓈᓂᐎᔨᒡ᙮ ᐋᑯᑖᐦ ᒫᒃ ᐅᑎᐦ ᐙᐦᒋᐱᔨᒡ ᐅᐦᑖᔨᐦᑎᒧᐎᓐ ᑭᔮᐦ ᐋᐦ ᐋᔮᔅᑖᒥᑑᓈᓅᒡ ᐅᐦᒋ ᑭᔮᐦ ᒫᔮᔨᐦᒑᐎᓐ ᑭᔮᐦ ᓂᑎᐐ ᐋᐦ ᐄᑖᑭᓅᑦ ᐊᐙᓐ᙮ 5 ᐅᒌ ᒫᒃ ᒨᔥ ᑳ ᒫᒥᒋᐱᔨᐦᐄᐙᒡ ᓂᒧᐃ ᒋᔅᒑᔨᐦᑎᒧᒡ ᑖᑆᐎᓂᔨᐤ ᑭᔮᐦ ᓂᒧᐃ ᑯᐃᔅᒄ ᒌ ᐄᔑ ᓂᔅᑐᐦᑎᒧᒡ ᑖᑆᐎᓂᔨᐤ᙮ ᐋᔨᐤᐦ ᒫᒃ ᐄᑖᔨᐦᑎᒧᒡ ᐋ ᒋᔖᒥᓂᑑᐙᑎᓰᓈᓂᐎᔨᒡ ᐋᑎ ᒑ ᒌ ᐅᐦᒋ ᐙᔪᑎᓰᔨᒡ᙮

6 ᑖᑆᐦ ᑭᔨᑆ ᒋᐦᒋᐙ ᐙᔪᑎᓰᐤ ᐋ ᒋᔖᒥᓂᑑᐙᑎᓰᑦ ᐊᐙᓐ ᐋ ᐄᔑᐱᐦᐄᑖᔨᐦᑎᐦᒃ ᐊᓂᔮᔨᐤ ᐋ ᐃᔥᐱᔥ ᐃᔮᑦ᙮ 7 ᑳ ᐱᒫᑎᓰᔨᐦᒄ ᐅᑎᐦ ᐊᔅᒌᐦᒡ ᓂᒧᐃ ᒑᒀᓐ ᑰᐦᒋ ᐹᑖᓈᓂᐤ᙮ ᐴᓂᐱᒫᑎᓰᐦᒀ ᒫᒃ ᓂᒧᐃ ᒑᒀᓐ ᒋᑭ ᐅᐦᒋ ᒋᔅᑐᐦᑖᓈᓂᐤ᙮ 8 ᐋᔨᐙᐦᒡ ᒫᒃ ᐋ ᐃᔮᔨᐦᒄ ᒦᒋᒻ ᑭᔮᐦ ᒑᒀᓂᐦᐄ ᐋ ᒋᒋᔥᑭᒥᐦᒄ ᐋᐅᒄ ᒋᐱᐦ ᐄᔑ ᑖᐱᒑᔨᑖᓈᓂᐤ᙮ 9 ᐋᒄ ᒫᒃ ᐊᓂᒌ ᑳ ᐐᐦ ᒦᔑᒋᓰᔨᒡ ᑭᑎ ᓂᒋᔥᑭᒧᒡ ᐋ ᐄᔑ ᑯᒀᒋᐦᐄᑯᒡ ᓂᑎᐙᔨᐦᑎᒧᒡ ᒑ ᒌᐦ ᑐᑎᒡ ᒑᒀᔨᐤ ᒑ ᐅᔒᑰᓈᐙᒋᐦᐄᑯᒡ ᑭᔮᐦ ᒫᒃ ᐋ ᒌᔅᒀᔮᔨᐦᑖᑯᓃᔨᒡ ᒧᔮᒻ ᐋ ᒋᓲᓲᐎᒡ ᑭᑎ ᐃᓯᓈᑯᓂᔨᐤ᙮ ᐙᐙᒡ ᒥᑐᓐ ᒋᑭ ᒌ ᓂᔑᐎᓈᒋᐦᐄᑯᒡ ᐅᔮᔨᐤ᙮ 10 ᐙᔥ ᔓᐎᔮᓐ ᐋ ᓵᒋᐦᐋᑳᓅᑦ ᐋᑯᑖᐦ ᐙᐦᒋᐱᔨᔨᒡ ᓂᓈᐦᑭᐤ ᒥᒋᐦᑣᐎᓐ᙮ ᐙᐙᒡ ᐋᑯᑖᐦ ᑳ ᐅᐦᒋ ᐴᓃᒡ ᑯᑎᑭᒡ ᐋ ᑖᑆᐦᑎᐦᒡ ᑭᔮᐦ ᒫᒃ ᐋᑯᑖᐦ ᓈᔥᒡ ᐙᐦᒋ ᒫᒥᔑᒫᔨᐦᑎᒥᐦᐄᓱᒡ᙮

11 ᒌᔨ ᒫᒃ ᑎᒧᕢ, ᒋᔖᒥᓂᑑ ᑳᐦ ᐋᐱᑎᔒᔥᑑᑦ, ᐊᑳᐐ ᐃᔮᐱᑖᔨᐦᑎ ᐅᐦᐄ ᒥᒋᒑᒀᓂᐦᐄ᙮ ᐊᐅᔅᑖ ᐄᑖᔨᐦᑎᒥᐦᐄᒄ ᑯᐃᔅᑯᑖᑎᓰᐎᓐ, ᒋᔖᒥᓂᑑᐙᑎᓰᐎᓐ, ᑖᑆᔮᔨᐦᑎᒧᐎᓐ, ᓵᒋᐦᐄᐙᐎᓐ, ᓲᐦᒋᐋᔨᐦᑖᑯᓯᐎᓐ, ᑭᔮᐦ ᔫᔅᐱᓰᐎᓐ᙮ 12 ᒫᓯᐦᒑ ᐊᓐ ᒥᔪ ᒫᓯᐦᒑᐎᓐ ᒑ ᒌ ᒥᒫᐦᒋᑯᓂᑭᓂᐎᒡ ᑖᑆᔮᔨᐦᑖᒨᐎᓐ ᐊᓂᑎᐦ ᒑ ᒌ ᐅᐦᒋ ᐅᐦᑎᓰᔨᓐ ᑳᒋᒡ ᐱᒫᑎᓰᐎᓐ᙮ ᐋᐅᒄ ᐙᔥ ᑭᔨᑆ ᐊᓐ ᑳ ᐄᔑ ᐅᐙᔮᐱᒥᑭᐎᔨᓐ ᒑ ᒌ ᐄᔑ ᐃᔮᔨᓐ ᐄᔥᐱᐦ ᑳ ᐐᐦᑎᒥᓐ ᑖᑆᐦ ᐋ ᑖᑆᐦᑎᒥᓐ ᐅᐦᑎᔅᑰ ᒥᐦᒑᑐ ᐄᔨᔨᐅᒡ ᐋᐦ ᑖᒡ᙮ 13 ᒋᔖᒥᓂᑑ ᒌ ᐱᒋᔅᑎᓂᒻ ᒥᓯᐙ ᒑᒀᔨᐤ ᑳ ᐱᒫᑎᓰᒥᑭᓃᔨᒡ᙮ ᙭ ᒌᓴᔅ ᒥᑐᓐ ᒌ ᒋᔅᒑᔨᐦᑖᑯᐦᐆ ᐊᐙᓐ ᐐᔨ ᐃᔮᐅᑦ ᐊᓂᑎᐦ ᑳ ᐎᑎᔅᑭᐎᑳᐳᔥᑎᐙᑦ ᑆᓐᑎᔭᔅ ᐹᔨᓕᑦ᙮ ᑖᐱᔥᑯᓐ ᒋᔖᒥᓂᑑ ᑭᔮᐦ ᒫᒃ ᙭ ᒌᓴᔅ ᐋ ᐹᐦᑑᐎᒡ, ᐆ ᒌ ᐐᔑ ᔒᐦᒋᒥᑎᓐ, 14 ᔮᒀᐦ ᐄᔑ ᓂᓃᐦᑎ ᑖᓐ ᑳᐦ ᐄᑎᔓᒥᔅᒃ ᒋᔖᒥᓂᑑ, ᑯᐃᔅᒄ ᐐᐦ ᑐᑎᐦ ᐋᑳ ᒫᒃ ᒥᒄ ᓂᑎᐐ ᒑ ᒌ ᐄᔑ ᐊᑖᒫᔨᐦᑖᑯᓯᓐ ᒑ ᐃᔥᐱᔥ ᐋᑳ ᒦᓐ ᑎᑯᔑᐦᒃ ᒋᑎᐹᔨᐦᒋᒑᓰᒥᓂᐤ ᒌᓴᔅ ᙭᙮ 15 ᐐᔨ ᒫᒃ ᒋᔖᒥᓂᑑ ᒋᑭ ᐎᔮᔨᐦᑎᒻ ᒑ ᐃᔥᐱᔥ ᐅᑎᐦᒋᐱᔨᐦᑖᑦ ᐅᔮᔨᐤ ᒑ ᑎᑯᔑᓃᔨᒡ ᒌᓴᔅᐦ᙮ ᐐᔨ ᒋᔖᒥᓂᑑ ᑖᑆᐦ ᐄᑖᔨᐦᑖᑯᓂᔨᐤ ᒑ ᒌ ᒫᒥᐦᒋᒫᑭᓅᑦ ᑭᔮᐦ ᐐᔨ ᐙᒋᐦᒡ ᐱᒥᐱᔨᐦᑖᐤ ᒥᓯᐙ ᒑᒀᔨᐤ᙮ ᐋᔨᐅᑭᓐ ᐅᔮᔨᐤ ᒥᓯᐙ ᒋᐦᒋᐅᒋᒫᐅᒡ ᐅᒋᐦᒋᐅᒋᒫᒧᐙᐤ ᑭᔮᐦ ᒥᓯᐙ ᑳ ᑎᐹᔨᐦᒋᒑᒡ ᐅᑎᐹᔨᐦᒋᒑᓯᒧᐙᐤ᙮ 16 ᐐᔨ ᒥᒄ ᑳᒋᒡ ᐱᒫᑎᓰᐤ, ᐊᓂᑖᐦ ᒫᒃ ᐋᐦᐋᑳ ᓂᐦᑖ ᒧᔖ ᒑ ᒌ ᓈᑖᑭᓂᐎᔨᒡ ᐙᔥᑖᐎᓂᔨᐤ ᐋᑯᑖᐦ ᐋᐦ ᑖᑦ, ᐊᓂᑖᐦ ᐋᑳ ᐊᐙᔨᐤᐦ ᒑ ᒌ ᓈᑎᑯᑦ᙮ ᓂᒧᐃ ᓂᐦᑖ ᓈᐦᐄᔨᐤ ᐅᐦᒋ ᐙᐱᒥᑰ ᐊᐙᔨᐤᐦ ᑭᔮᐦ ᓂᒧᐃ ᓂᐦᑖ ᒋᑭ ᒌ ᐙᐱᒥᑰ᙮ ᐃᓯᓈᑯᓐ ᐐᔨ ᒑ ᒌ ᒋᔅᑖᔨᐦᑖᑯᐦᐋᑭᓂᑦ ᑭᔮᐦ ᐐᔨ ᒑ ᒌ ᐃᔮᑦ ᓲᐦᑳᑎᓰᐎᓂᔨᐤ ᒨᔥ ᑳᒋᒡ᙮ ᐋᒥᓐ᙮

17 ᒌ ᓂᑎᐙᔨᒥᑎᓐ ᒫᒃ ᑎᒧᕢ, ᒑ ᒌ ᐐᐦᑎᒧᑣᐤ ᐊᓂᒌ ᑳ ᒥᓯᒋᓰᔨᒡ ᒑᐦ ᐋᑳ ᒥᒫᑖᑯᓯᐦᒡ ᐊᓂᔮᔨᐤ ᐋ ᒥᓯᒋᓰᔨᒡ ᑭᔮᐦ ᐋᑳ ᒑ ᒌ ᐊᔅᐹᔨᒧᑐᑎᐦᒡ ᐊᓂᔮᔨᐤ ᐋᑳ ᑳ ᒑᔥᑎᓈᑖᔮᔨᐦᑖᑯᓃᔨᒡ ᒦᓯᒋᓰᐎᓂᔨᐤ ᐅᑎᐦ ᐊᔅᒌᐦᒡ᙮ ᒋᔅᒋᓲᒥᒡ ᐊᐅᔅᑖ ᒋᔖᒥᓂᑑ ᒑ ᒌ ᐊᔅᐹᔨᒧᑎᐙᒡ ᐊᓐ ᑳ ᒥᔪ ᒥᔨᑎᐦᒄ ᒥᓯᐙ ᒑᒀᔨᐤ ᒑ ᒌ ᒥᔻᔨᐦᑎᒥᐦᐄᑯᐦᒄ᙮ 18 ᐐᐦᑎᒨᒡ ᐊᓂᒌ ᑳ ᒥᓯᒋᓰᔨᒡ ᒑ ᒌ ᒥᔪᑐᑎᒫᒑᒡ, ᒥᔪᑐᑎᒫᒑᐎᓂᐦᒡ ᒑ ᒌ ᐄᔑ ᒥᓯᒋᓰᔨᒡ, ᒑ ᒌ ᐃᓯᓈᑯᓯᒡ ᓈᔥᒡ ᐋ ᒥᔻᔨᐦᑎᐦᒡ ᐋ ᒥᔨᐙᒡ ᑭᔮᐦ ᓈᔥᒡ ᐋ ᐙᐦᒋᐱᔨᔨᒡ ᒑ ᒌ ᐱᐱᐦᒀᓂᒧᐙᒡ ᐊᐙᔨᐤᐦ ᑖᓐ ᐋ ᐄᔑ ᐃᔮᒡ᙮ 19 ᐅᔮᔨᐤ ᒫᒃ ᑐᑎᐦᒀᐙ ᐋᑯᑖᐦ ᒑ ᒌ ᐅᐦᒋ ᐃᔮᒡ ᒋᐦᒋᐙ ᒦᓯᒋᓰᐎᓂᔨᐤ ᐊᓂᑖᐦ ᐄᔑ ᓃᔥᑖᒥᐦᒡ, ᐋᑯᑖᐦ ᑭᔮᐦ ᒋᐦᒋᐙ ᒑ ᒌ ᐅᐦᒋ ᒋᔅᒑᔨᐦᑎᐦᒡ ᐱᒫᑎᓰᐎᓂᔨᐤ᙮

20 ᒌᔨ ᑎᒧᕢ ᓈᓈᑭᒋᐦᑖ ᑖᓐ ᑳ ᐄᔑ ᒥᔨᔅᒃ ᒋᔖᒥᓂᑑ ᒑ ᒌ ᐄᑖᐱᑎᓰᐎᑦ᙮ ᐊᑳᐐ ᐃᔮᐱᓯᐦᑐᒡ ᐊᓂᒌ ᑳᐦ ᐋᔨᒸᐦᐄᑯᒡ ᒑᒀᔨᐤ ᐋᐦᐋᑳ ᐊᓂᑖᐦ ᐄᔑ ᐐᒋᐦᐄᐙᒥᑭᓃᔨᒡ ᐋ ᒋᔖᒥᓂᑑᐙᑎᓰᓈᓂᐎᔨᒡ, ᐊᓂᒌ ᑳ ᐄᑎᐦᑖᑯᓯᒡ ᒧᔮᒻ ᓈᔥᒡ ᒥᔥᑏᐦ ᐋ ᒋᔅᒑᔨᐦᑎᐦᒡ ᒑᒀᔨᐤ ᐋᐦᐋᑳ ᒫᒃ ᓂᐦᐋᐤ ᒧᔮᒻ ᐄᔑ ᑭᒑᔅᒑᔨᐦᑎᐦᒡ᙮ 21 ᐙᔥ ᐱᔅᒡ ᐅᒌ ᐅᔮᔨᐤ ᑳ ᐄᑖᔨᐦᑖᑯᓯᒡ ᓂᑭᑎᒧᒡ ᐊᓂᔮᔨᐤ ᑳ ᐄᔑ ᒋᔅᑯᑎᒧᐙᑭᓂᐎᒡ ᒑ ᒌ ᑖᑆᐦᑎᐦᒡ᙮

ᓂᑐᑎᒧᐙᐤ ᒋᔖᒥᓂᑑ ᒥᓯᐙ ᒑ ᒌ ᒥᔪᑐᑖᑖᒄ᙮