1 ᐅᐦᐄ ᒋᔪᓅᐤᐦ ᒧᔮᒻ ᒫᐦᑮᐦ ᐃᓯᓈᑯᓐ᙮ ᐹᔨᒀᐤ ᐋ ᒌᔑᑳᒡ ᑭᑎ ᓃᐦᑎᓂᑭᓂᐤᐦ ᒑ ᐋᐦᐋᑳ ᒌ ᐋᐱᑎᐦᒡ ᒦᓐ ᓂᐦᑖ᙮ ᐙᔥ ᒋᒋᔅᒑᔨᐦᑖᓈᓂᐤ ᐊᓂᑖᐦ ᒫᒃ ᒋᐦᒋᒌᔑᑯᐦᒡ ᒋᑭ ᒥᔨᑯᓈᓂᐤ ᒥᔫ ᑳᒋᒡ ᒑ ᐱᒫᑎᓰᒥᑭᐦᒡ, ᒧᔮᒻ ᐙᔅᑳᐦᐄᑭᓐ ᐋ ᐄᑖᔨᐦᑖᑯᐦᒡ ᑳᒋᒡ ᒑ ᑎᑯᐦᒡ᙮ ᓂᒥᔮᐤ ᐐᔨ ᓰᑎᐤ ᓈᐹᐤ ᐋ ᒌ ᐅᔑᐦᑖᑦ ᑭᑎ ᐄᑖᔨᐦᑖᑯᓐ᙮ ᒋᔖᒥᓂᑑ ᒫᒃ ᒋᑖᔮᔅᑰᔥᑎᒫᑯᓂᐤ ᐅᔮᔨᐤ᙮ 2 ᐊᓅᐦᒡ ᐐ ᒋᒥᒫᑣᔨᐦᑯᓈᓂᐤ ᐋ ᐃᔥᐱᔥ ᐱᒀᔨᐦᑎᒥᐦᒄ ᒑ ᒌ ᐳᔅᑭᒥᐦᒄ ᐊᓂᐦᐄ ᒌᔮᓂᐤ ᒋᐦᒋᒌᔑᑯᐦᒡ ᒑ ᒌ ᐋᐦᒋᑖᑭᓂᐎᒡ ᐅᐦᐄ ᒫᒀᒡ ᒑ ᒋᔅᑭᒥᐦᒄ ᐊᔅᒌᐦᒡ ᒌᔮᓂᐤ, 3 ᐋᒄ ᒫᒃ ᑖᑆᐦ ᒑ ᒌ ᑎᑯᐦᒡ ᒑᒀᓐ ᑏᐙᐦᒡ ᒑ ᒌ ᐳᔅᑭᒥᐦᒄ ᒑ ᐋᐦᐋᑳ ᒫᐦ ᐃᓯᓈᑯᓯᔨᐦᒄ ᐋᐦᐋᑳ ᒋᒋᔅᑭᒥᐦᒄ ᒑᒀᓐ᙮ 4 ᐙᔥ ᒫᒀᒡ ᐅᑎᐦ ᒋᔮᓈᐦᒡ ᐋᐦ ᑖᔨᐦᒄ ᒌ ᒥᒫᑣᓈᓂᐤ ᑭᔮᐦ ᒋᒥᔑᒦᑯᓈᓂᐤ᙮ ᓂᒥᔮᐤ ᐐ ᓈᔥᒡ ᐋ ᐐᐦ ᓂᑭᑎᒥᐦᒄ ᐅᐦᐄ ᒌᔮᓅᐦ, ᐅᐦᐄ ᒑ ᓂᐲᒥᑭᐦᒡ, ᓈᔥᑖᑆᐦ ᒫᒃ ᒌ ᐱᒀᔨᐦᑖᓈᓂᐤ ᐊᓂᐦᐄ ᒥᔫ ᒑ ᒥᔨᑯᐎᔨᐦᒄ ᐊᓂᑖᐦ ᒋᐦᒋᒌᔑᑯᒡ, ᐊᓂᐦᐄ ᒑᐦ ᐋᑳ ᓂᐦᑖ ᓂᐲᒥᑭᐦᒡ᙮ 5 ᐋᔪᐎᒄ ᐅᔮᔨᐤ ᐙᐦᒋ ᐅᔑᐦᐄᑎᐦᒄ ᒋᔖᒥᓂᑑ, ᒑ ᒌ ᐅᑎᐦᑎᒥᐦᒄ ᐊᓂᑖᐦ ᒑ ᒥᔨᑎᐦᒄ ᐅᔮᔨᐤ ᐱᒫᑎᓰᐎᓂᔨᐤ᙮ ᒌ ᒑᔥᑎᓈᐦᐅᐙᓈᓂᐤ ᒫᒃ ᒑᔥᑎᓈᔥ ᒑ ᑐᑎᒫᑎᐦᒄ ᐅᔮᔨᐤ ᐙᔥ ᒋᒌ ᒥᔨᑯᓂᐤ ᐅᐱᔮᐦᒡ ᐊᐦᒑᐦᒄ ᒑ ᒌ ᐐᒑᐅᑎᔨᑎᐦᒄ᙮

6 ᐋᐅᒄ ᒫᒃ ᐙᐦᒋ ᒨᔥ ᓲᐦᒋᑖᐦᐋᔨᐦᒄ᙮ ᒋᒋᔅᒑᔨᐦᑖᓈᓂᐤ ᒥᒄ ᒑ ᐃᔥᐱᔥ ᑖᐅᐦᒀ ᐅᑎᐦ ᒋᔮᓈᐦᒡ ᓂᒧᐃ ᒋᑎᑖᓈᓂᐤ ᐊᓂᑖᐦ ᐋᐦ ᑖᑦ ᑎᐹᔨᐦᒋᒑᓯᐤ᙮ 7 ᐙᔥ ᐅᑎᐦ ᐋ ᐱᒫᑎᓰᔨᐦᒄ ᒋᑎᔅᐹᔨᒧᑐᑖᓈᓂᐤ ᐊᓐ ᐋ ᐄᔑ ᑖᑆᐦᑎᒧᒄ ᐋᐦ ᐋᑎ ᐋᔥᒄ ᐋᒸᔮ ᐙᐱᐦᑎᒥᐦᒄ ᑖᓐ ᒑ ᐄᔑ ᒥᔨᑎᐦᒄ ᒋᔖᒥᓂᑑ᙮ 8 ᑖᑆᐦ ᒫᒃ ᒋᐱᐦ ᓲᐦᒋᑖᐦᐋᓈᓂᐤ ᐙᔥ ᐊᐅᔅᑖ ᒋᐱᐦ ᒥᔻᔨᐦᑖᓈᓂᐤ ᓂᑭᑎᒥᐦᒄ ᐅᐦᐄ ᒌᔮᓅᐦ ᐋᒄ ᒫᒃ ᒋᐱᐦ ᑖᓈᓂᐤ ᐊᓂᑖᐦ ᐋᐦ ᑖᑦ ᑎᐹᔨᐦᒋᒑᓯᐤ᙮ 9 ᐋᒄ ᒫᒃ ᒥᒄ ᐋᑦ ᐃᔨᐦᑎᔨᐦᒄ ᒋᑎᐦᑎᓈᓂᐤ ᒑ ᒌ ᓂᐦᐋᔨᐦᑎᒥᐦᐄᒄ ᑎᐹᔨᐦᒋᒑᓯᐤ ᒫᒀᒡ ᐅᑎᐦ ᐋ ᐱᒫᑎᓰᔨᐦᒄ ᑭᔮᐦ ᒫᒃ ᐊᓂᑖᐦ ᐋᐦ ᑖᑦ ᑖᐅᐦᒀ᙮ 10 ᐙᔥ ᒥᓯᐙ ᐹᐦᐹᔨᒄ ᐋᐦᑎᔒᐦᒄ ᒋᑭ ᐎᑎᔅᑭᐎᑳᐳᔥᑎᐙᓂᐤ ᙭ ᐊᓂᑖᐦ ᐋᐦ ᐊᐱᑦ ᒑ ᒌ ᑎᐹᔅᑯᓂᑎᐦᒄ᙮ ᐋᒄ ᒫᒃ ᒥᓯᐙ ᐹᐦᐹᔨᒄ ᒑ ᒥᔨᑎᐦᒄ ᑖᓐ ᐊᓐ ᐋ ᐄᑖᔨᐦᑖᑯᐦᒡ ᒑ ᒌ ᒥᔨᑰᐦᑯᐱᓈ ᒥᒄ ᑖᓐ ᑳᐦ ᑐᐦᒀ ᒫᒀᒡ ᐅᑎᐦ ᐊᔅᒌᐦᒡ ᑳ ᐱᒫᑎᓰᔨᐦᒄ, ᑳ ᒥᔪ ᑐᐦᒀ ᑭᔮᐦ ᒫᒃ ᐋᑳ ᐙᐦᒋ ᒥᔪ ᑐᐦᒀ᙮

11 ᐋ ᒋᔅᒑᔨᐦᑎᒫᐦᒡ ᒫᒃ ᐊᐦᑎᑯᓃᔨᒡ ᒑᒀᔨᐤ ᒑ ᒌ ᐅᐦᒋ ᓈᔥᒡ ᒋᔅᑖᔨᒫᐦᒄ ᑎᐹᔨᐦᒋᒑᓯᐤ ᐊᓐ ᒑ ᑎᐹᔅᑯᓂᑎᐦᒄ ᐋᔪᐎᒄ ᐙᐦᒋ ᐐᐦ ᔑᐦᑯᒋᒥᐦᒋᒡ ᐄᔨᔨᐅᒡ ᒑ ᒌ ᑖᑆᐦᑎᐦᒡ ᐋ ᑖᑆᒥᑭᓃᔨᒡ ᐋ ᐄᔑ ᐋᔨᒨᑎᒧᒋᐦᒡ ᑎᐹᔨᐦᒋᒑᓯᐤ᙮ ᐙᔥ ᒥᑐᓐ ᓂᒋᔅᒑᔨᒥᑯᓈᓐ ᒋᔖᒥᓂᑑ ᑖᓐ ᐋᔨᑖᔨᐦᑖᑯᓱᐎᒋᐦᑦ᙮ ᓂᐱᑯᓵᔨᐦᑖᓈᓐ ᒫᒃ ᑭᔮᐦ ᒌᔨᐙᐤ ᒑ ᒌ ᒋᔅᒑᔨᒥᔮᐦᒡ ᑖᓐ ᓂᐦᐋᐤ ᐋᑖᔨᐦᑖᑯᓯᔮᐦᒡ᙮ 12 ᐆ ᒫᒃ ᐋ ᐄᔑ ᐊᔨᒥᔮᐦᒡ ᓂᒥᔮᐤ ᐐ ᒦᓐ ᐋ ᐐᐦ ᒥᔻᒋᒥᓱᔮᐦᒡ᙮ ᒥᒄ ᒋᐐᐦ ᒫᒥᐦᒋᐦᐄᑎᓈᓐ᙮ ᐋᒄ ᒫᒃ ᒑ ᒋᔅᒑᔨᐦᑎᒫᒄ ᑖᓐ ᒑ ᐄᔑ ᓂᔥᒀᐅᔑᐦᐋᑯᒡ ᐊᓂᒌ ᓈᔥᒡ ᑳ ᒋᔅᑖᔨᐦᑎᒡ ᒥᒄ ᐎᔥᒡ ᑳ ᑭᓂᐙᐱᒫᐦᒡ ᐋᐙᔨᐤᐦ, ᐋᐦᐋᑳ ᑭᓂᐙᐱᐦᑎᒸᒡ ᑖᓐ ᐙᒋᐦᒡ ᐋᑖᔨᐦᑖᑯᓯᒡ ᐅᑖᐦᐄᔨᐦᒡ᙮ 13 ᐋᑦ ᒧᔮᒻ ᐋ ᒌᔥᒀᔮᐦᒡ ᐋᑖᔨᐦᑖᑯᓯᐙᐦᒑ ᑖᓐ ᐋᔨᑎᔮᐦᒡ ᐐᔨ ᒋᔖᒥᓂᑑ ᓂᑎᐦᑐᑎᒧᐙᓈᓐ ᒥᓯᐙ ᒑᒀᔨᐤ᙮ ᐋᒄ ᒫᒃ ᔮᑆᐦᑳᐅᑖᑯᓯᐙᐦᒑ ᐙᔥ ᒋᐐᐦ ᐐᒋᐦᐄᑎᓈᓐ ᐙᐦᒋ ᐊᓐ ᐄᑖᔨᐦᑖᑯᓯᔮᐦᒡ᙮ 14 ᐋ ᒋᔅᒑᔨᐦᑎᒫᐦᒡ ᑖᓐ ᐋ ᐃᔥᐱᔥ ᓵᒋᐦᐄᔨᒥᐦᑦ ᙭ ᐋᐅᒄ ᐆ ᔖᐦᑯᒋᒥᑯᔮᐦᒡ ᐆ ᒑ ᒌ ᐄᑖᐱᑎᓰᔮᐦᒡ᙮ ᐙᔥ ᒌ ᒋᔅᒑᔨᒫᓂᐤ ᐐᔨ ᐋ ᒌ ᓂᐴᔥᑎᒧᐙᑦ ᒥᓯᐙ ᐊᐙᔨᐤᐦ ᐋᒄ ᒫᒃ ᒑ ᒌ ᐄᔑ ᑭᓂᐙᐱᐦᑖᑭᓂᐎᒡ ᒥᓯᐙ ᐊᐙᓐ ᐋ ᒌ ᐴᓂᐱᒫᑎᓰᑦ᙮ 15 ᒥᓯᐙ ᐊᐙᔨᐤᐦ ᒌ ᓂᐴᔥᑎᒧᐙᐤ ᙭᙮ ᐋᑯᑖᐦ ᒫᒃ ᐙᐦᒋ ᐱᑯᓵᔨᐦᑖᑯᐦᒡ ᐊᓂᒌ ᑳ ᐱᒫᑎᓰᔨᒡ ᐋᑳ ᔖᔥ ᒥᒄ ᐐᔨᐙᐤ ᐋ ᐄᔑ ᓂᐦᐋᔨᐦᑎᐦᒡ ᒑ ᒌ ᐄᔑ ᐱᒫᑎᓰᔨᒡ, ᐊᐅᔅᑖ ᐋᑯᔥ ᒑ ᐄᔑ ᐱᒫᑎᓰᔨᒡ ᒑ ᒌ ᓂᐦᐋᔨᐦᑎᒥᐦᐋᒡ ᐊᓂᔮᔨᐤ ᑳ ᓂᐱᐦᐄᒫᑭᓂᐎᔨᒡ ᐐᔨᐙᐤ ᐅᐦᒋ ᑭᔮᐦ ᑳ ᐎᓂᔥᑳᓂᒫᑭᓂᐎᔨᒡ ᓂᐱᐎᓂᐦᒡ ᐅᐦᒋ᙮

16 ᓂᒧᐃ ᒫᒃ ᐋᒄ ᔖᔥ ᐎᔥᒡ ᐋᔑᓂᐙᑭᓅᑦ ᐊᐙᓐ ᓂᑎ ᐄᔑ ᑭᓂᐙᐱᒫᓈᓐ, ᑖᓐ ᐋ ᐄᔑ ᐙᐱᒥᑯᑦ ᒥᓯᐙ ᐄᔨᔨᐤᐦ᙮ ᐋᔪᐎᒄ ᑳ ᐄᔑ ᑭᓂᐙᐱᒥᒋᐦᑦ ᙭ ᐹᔨᒀᐤ᙮ ᓂᒧᐃ ᐋᒄ ᐊᓂᑖᐦ ᓂᑎ ᐄᔑ ᑭᓂᐙᐱᒫᓈᓐ᙮ 17 ᐄᔥᐱᐦ ᙭ ᐋᐦ ᑖᔨᒡ ᐋ ᐄᔑ ᑎᐹᔨᐦᑖᑯᓯᑦ ᐊᐙᓐ ᒥᑐᓐ ᐅᔥᒋᐦᑖᑭᓂᐎᔨᐤ ᐅᐱᒫᑎᓰᐎᓐ᙮ ᑖᓐ ᑳ ᐄᑖᔨᐦᑖᑯᓯᑦ ᐙᔥᑭᒡ ᔖᔥ ᒥᔮᐅᐱᔨᔨᐤ᙮ ᒥᓯᐙ ᒌ ᐄᔑ ᐅᔅᒋᐦᐋᑭᓂᐤ ᐅᐱᒫᑎᓰᐎᓂᐦᒡ᙮ 18 ᐐᔨ ᒋᔖᒥᓂᑑ ᒥᓯᐙ ᐅᔮᔨᐤ ᑳᐦ ᑐᑎᐦᒃ᙮ ᐋᐦᐋᑦ ᒌ ᐋᑎᐙᔨᒥᐦᒄ, ᒋᒌ ᑐᑖᑭᓂᐤ ᐐᔨ ᒑ ᒌ ᒥᔪᐐᒑᐅᐦᒄ ᙭ ᐅᐦᒋ᙮ ᑭᔮᐦ ᑳ ᒥᔨᒥᐦᑦ ᐊᓂᔮᔨᐤ ᐋᐱᑎᓰᐎᓂᔨᐤ ᒑ ᒌ ᐐᐦᑎᒫᒥᒋᐦᒡ ᐊᐙᔨᐤᐦ ᒑ ᒌ ᐅᐦᒋ ᒥᔪᐐᒑᐙᔨᒡ ᒋᔖᒥᓂᑑ ᐊᓂᔮᔨᐤ ᑳᐦ ᐋᑎᐙᔨᒫᔨᒡ᙮ 19 ᐋᐅᒄ ᒫᒃ ᐆ ᐙᐦ ᐄᔑ ᐐᐦᑎᒫᐦᒡ, ᒋᔖᒥᓂᑑ ᓂᑎᐙᔨᒫᐤ ᒥᓯᐙ ᐊᐙᔨᐤᐦ ᒑ ᒌ ᒥᔪᐐᒑᐅᑯᑦ ᙭ ᐅᐦᒋ᙮ ᐙᐹᔨᐦᑎᒫᒑᐤ ᒥᒋᐦᑣᐎᓐ, ᓂᒧᐃ ᑭᓂᐙᐱᐦᑎᒨᐙᐤ ᑭᔮᐦ ᒫᒃ ᓂᒧᐃ ᓂᑎᐙᔨᒫᐤ ᐋᐙᔨᐤᐦ ᒑ ᒌ ᑎᐱᐦᐄᒑᔨᒡ ᐆ ᒥᒋᐦᑣᐎᓂᔨᐤ ᐅᐦᒋ᙮ ᓂᒌ ᒥᔨᑯᓈᓐ ᒑ ᒌ ᐄᔑ ᐙᐐᐦᑎᒧᒋᐦᑦ ᒑ ᒌ ᒥᔪᐐᒑᐙᑦ ᐊᐙᓐ ᒋᔖᒥᓂᑑᐦ᙮

20 ᐋᒄ ᒫᒃ ᑳ ᐹᒋ ᐄᑎᔑᐦᐅᔨᒥᐦᑦ ᒑ ᒌ ᐋᔨᒦᔥᑎᒧᐎᒋᐦᑦ ᙭, ᒋᔖᒥᓂᑑ ᓂᑖᐱᒋᐦᐄᑯᓈᓐ ᐋ ᓂᑑᒥᑖᒄ᙮ ᒌ ᐱᑯᓵᔨᒥᑎᓈᓐ ᐋᐦ ᐋᔨᒦᔥᑎᒧᐎᒋᐦᑦ ᙭ ᒑ ᒌ ᐅᑎᓂᒸᐦᒄ ᐊᓂᔮᔨᐤ ᒋᔖᒥᓂᑑ ᒫᔨᑖᒄ ᒑ ᒌ ᒥᔪᐐᒑᐙᒄ᙮ 21 ᐋᑦ ᒫᒃ ᐋᐦᐋᑳ ᓂᐦᑖ ᐅᐦᒋ ᒥᒋᐦᑐᑎᐦᒃ ᙭, ᒋᔖᒥᓂᑑ ᒌ ᑐᑖᑰ ᒧᔮᒻ ᐅᒥᒋᐦᑣᐤ ᒑ ᒌ ᐃᓯᓈᑯᓯᑦ ᒌᔮᓂᐤ ᐅᐦᒋ ᐊᓂᑎᐦ ᒑ ᐅᐦᒋ ᐐᒌᐦᐄᑯᔨᐦᒄ᙮ ᐋᒄ ᒫᒃ ᙭ ᐐᒑᐅᐦᒀ, ᐅᑯᐃᔅᑯᑖᑎᓰᐎᒡ ᒋᑭ ᐄᔑ ᑭᓂᐙᐱᒥᑯᓂᐤ ᒋᔖᒥᓂᑑ᙮