1 ᐋᐅᒄ ᓂᔥᑣᐤ ᒑ ᒧᐎᑎᐦᑎᑎᑯᒡ᙮ ᒑ ᐐᐦ ᒋᔥᒋᓯᔮᒄ ᒥᔔ ᐋ ᑖᒀ ᐊᐙᓐ ᐋᐦᑎᑯᓃᔨᒡ ᑖᓐ ᐙᐦ ᐄᔑ ᒫᒥᔑᒫᑦ ᐊᐙᔨᐤᐦ ᒑᒀᔨᐤ ᔮᔨᑖ ᓃᔓ ᒫᒃ ᓂᔥᑐ ᐄᔨᔨᐅᒡ ᐋ ᒌ ᑖᒡ ᐊᓂᑎᐦ ᐊᓂᔮᔨᐤ ᐙᐦᒋᐱᔨᔨᒡ ᐋ ᒫᒥᔑᒧᐙᓂᐎᔨᒡ ᒋᑭ ᑖᐅᒡ ᒑ ᒌ ᑎᐹᒋᒧᒡ᙮ 2 ᓃᔂ ᑳ ᓂᑎ ᐙᐱᒥᑎᑯᒡ ᔖᔥ ᓂᒌᐦ ᐃᔮᒀᒥᒫᐅᒡ ᐊᓂᒌ ᑳ ᒥᒋᐦᑑᑎᐦᒡ᙮ ᒦᓐ ᒫᒃ ᐊᓅᐦᒡ ᐋᐦ ᐋᑦ ᐋᑳ ᑖᐅᒡ ᐊᓂᑎᐦ ᐊᔮᐱᒡ ᓂᑎᔮᒀᒥᒫᐅᒡ ᑭᔮᐦ ᒫᒃ ᐊᓂᒌ ᑯᑎᑭᒡ᙮ ᐆ ᐊᓅᐦᒡ ᒑ ᑎᑯᔑᓂᔮᓐ ᒋᐦᒋᐙ ᓂᔑᓐ ᓂᒧᐃ ᓂᑭ ᐅᐦᒋ ᒥᓈᒋᒫᐅᒡ ᐅᒌ ᑳ ᒥᒋᐦᑑᑎᐦᒡ᙮ 3 ᒋᔑᓈᐙᐤ ᐋ ᐐᐦ ᐙᐱᐦᑎᒫᒄ ᑖᑆᐦ ᙭ ᐋᐦ ᐊᔨᒥᔥᑎᒨᒃ᙮ ᓂᒧᐃ ᓄᐦᑖᓯᐤ ᙭ ᐄᔥᐱᐦ ᐹᒦᐦᑭᐦᒃ ᒋᐱᒫᑎᓰᐎᓂᐙᐤ᙮ ᒋᐙᐱᐦᑎᒸᓈᐙᐤ ᐅᓲᐦᑳᑎᓰᐎᓐ ᐊᓂᑎᐦ ᐋᐦᑖᐙᒄ᙮ 4 ᐋᐦ ᐋᑦ ᐋᑳ ᐅᐦᒋ ᓵᐱᓰᑦ ᑳ ᒌᔅᑖᔅᑯᐦᐙᑭᓅᑦ ᐋᔑᑖᔮᐦᑎᑯᐦᒡ ᒋᔖᒥᓂᑑ ᐅᓱᐦᑳᑎᓰᐎᓃᔨᒡ ᐅᐦᒋ ᐱᒫᑎᓰᐤ ᐊᓅᐦᒡ᙮ ᐋᐅᒄ ᒫᒃ ᐋ ᐃᓯᓈᑯᓯᔮᐦᒡ ᑭᔮᐦ ᓃᔮᓐ ᐋ ᐐᒑᐅᒋᐦᑦ ᙭, ᓂᒧᐃ ᓂᓵᐱᓰᓈᓐ᙮ ᒥᒄ ᒫᒃ ᙭ ᓂᑭ ᐱᒫᑎᓰᔅᑎᐙᓈᓐ ᒋᔖᒥᓂᑑ ᐅᓱᐦᑳᑎᓰᐎᓃᔨᒡ ᐅᐦᒋ ᒌᔨᐙᐤ ᒑ ᒌ ᐋᐱᑎᔒᔥᑖᑖᐦᒡ ᒑ ᒌ ᐐᒌᐦᐄᑖᐦᒡ᙮

5 ᔮᒀᐦ ᓂᑑᒋᔅᒑᔨᒦᓱᒄ ᐋᔥᒄ ᑖᑆᐦ ᑎᔮᑆᐦᑎᒧᐙᒀ᙮ ᒋᓂᔅᑐᐦᑖᓈᐙᐤ ᐋ ᒌᓴᔅ ᙭ ᐋ ᐲᐦᒋᔥᑳᑖᒄ? ᐋᑳ ᑎᔮᑆᐦᑎᒧᐙᒀ ᓂᒧᐃ ᑭᔨᑆ ᑖᑆᐦ ᒌ ᐲᐦᒋᔥᑳᑯᐙᐤ᙮ 6 ᓂᒑᔥᑎᓈᐦᐅᓐ ᐄᔥᐱᐦ ᒋᓂᑑᒋᔅᒑᔨᒥᔮᐦᒑ ᒑ ᒋᔅᒑᔨᐦᑎᒫᒄ ᑖᑆᐦ ᓃᔮᓐ ᐋᐦ ᐋᐆᔮᐦᒡ ᒋᐦᒋᐙ ᐊᑆᔅᑎᓕᒡ᙮ 7 ᓂᓂᑐᑎᒧᐙᓈᓐ ᒋᔖᒥᓂᑑ ᑯᐃᔅᒄ ᒑ ᒌ ᐄᔑ ᐱᒫᑎᓰᔮᒄ᙮ ᓂᒥᔮᐤ ᐐ ᐋ ᐐᐦ ᒥᒥᐦᒋᒥᑯᓰᔮᐦᒡ ᒑ ᒌ ᓅᑯᐦᑖᔮᐦᒡ ᑖᑆᐦ ᑯᐃᔅᒄ ᐋᐦ ᑎᔮᐦᒡ᙮ ᒌ ᓂᑎᐙᔨᒥᑎᓈᓐ ᑯᐃᔅᒄ ᒑ ᒌ ᐄᔑ ᐱᒫᑎᓰᔮᒄ ᐋᑦ ᐋᑖᔨᒥᑭᐙᐦᒑ ᐋ ᒌ ᐎᓂᐱᔮᐦᒡ᙮ 8 ᓂᒧᐃ ᒋᑭ ᒌ ᑐᑖᓈᓂᐤ ᒑ ᒌ ᓂᔥᑰᔥᑎᒥᐦᒄ ᑖᑆᐎᓐ, ᒥᒄ ᒋᑭ ᓂᓂᐦᐄᐦᑖᓈᓂᐤ᙮ 9 ᓂᒥᔻᔨᐦᑖᓈᓐ ᐊᓂᑎᐦ ᒫᒀᒡ ᐋᐦᐋᑳ ᓯᔮᐱᓯᔮᐦᒡ ᓃᔮᓐ ᐋᑯᑖᐦ ᒌᔨᐙᐤ ᒥᔥᑭᐎᑳᐳᔮᒄ ᑎᐹᔨᐦᒋᒑᓯᐤ ᐋᐦ ᑖᑦ᙮ ᓂᓂᑐᑎᒧᐙᓈᓐ ᒋᔖᒥᓂᑑ ᒥᑐᓐ ᒑ ᒌ ᐄᔑ ᒥᔪᐱᒫᑎᓰᔮᒄ᙮ 10 ᐆ ᒋᑎᐄᑎᔑᓂᐦᐊᒫᑎᓈᐙᐤ ᐋᔥᒄ ᒫᒀᒡ ᐅᑖᐦ ᐋᐦ ᑖᔮᓐ ᐋᒄ ᒫᒃ ᐄᔥᐱᐦ ᒦᓐ ᐙᐱᒥᑎᑯᒑ ᓂᒧᐃ ᒋᑭ ᐅᐦᒋ ᑎᑯᓐ ᒑᒀᓐ ᒑ ᐅᐦᒋ ᒥᔥᑎᐦ ᐋᓍᔨᒥᑎᑯᒡ ᒑ ᒌ ᓅᑯᐦᑖᔮᓐ ᑖᓐ ᑳ ᐄᔑ ᒥᔨᑭᐎᔮᓐ ᑎᐹᔨᐦᒋᒑᐎᓐ᙮ ᑎᐹᔨᐦᒋᒑᓯᐤ ᓂᒌ ᒥᔨᒄ ᐅᔮᔨᐤ ᑎᐹᔨᐦᒋᒑᐎᓂᔨᐤ ᒑ ᒌ ᐐᒋᐦᐄᑎᑯᒡ ᓂᒧᐃ ᐐ ᒑ ᒌ ᓃᐦᑎᐦᐆᑎᑯᒡ᙮

11 ᐋᒄ ᒫᒃ ᓃᒋᔖᓂᑎᒄ, ᐙᒋᔮ ᒋᐐᐦᑎᒫᑎᓈᐙᐤ᙮ ᓲᐦᒃ ᑯᒋᐦᑖᒄ ᓂᐦᐋᐤ ᒑ ᒌ ᐄᑖᔨᐦᑖᑯᓯᔮᒄ ᐋ ᐄᔑ ᓂᑎᐙᔨᒥᑖᒄ ᒋᔖᒥᓂᑑ ᒑ ᒌ ᐄᑖᔨᐦᑖᑯᓱᐙᒄ᙮ ᔮᒀᐦ ᓂᑐᐦᑎᒧᒄ ᑖᓐ ᐋ ᐄᔑ ᐋᔮᒥᐦᐄᑎᑯᒡ᙮ ᓲᐦᒃ ᐹᔨᑯᓂᐦᒡ ᐐᐦ ᐄᔑ ᐱᒫᑎᓰᒄ, ᐹᔨᒄ ᒥᑐᓈᔨᐦᒋᑭᓂᒡ᙮ ᓲᐦᒃ ᒥᔪ ᐐᒑᐅᑐᒄ᙮ ᒋᔖᒥᓂᑑ ᐊᓐ ᑳ ᓵᒋᐦᐄᐙᑦ ᑭᔮᐦ ᑳ ᐃᔮᑦ ᒋᔮᒫᔨᐦᑎᒧᐎᓂᔨᐤ ᒋᑭ ᐐᒑᐅᑯᐙᐤ᙮

12 ᒌᔨᐙᐤ ᑳ ᐐᒋᔖᓂᐦᑐᔮᒄ ᐅᒑᒥᑐᒄ ᒋᔅᑖᔨᒥᑐᐎᓂᒡ ᐋ ᐙᒋᔮᒥᑐᔮᒄ᙮ 13 ᒥᓯᐙ ᐅᒌ ᑳ ᑖᑆᐦᑎᐦᒡ ᐅᑖᐦ ᑳᐦ ᑖᒡ ᒋᐙᒋᔮᒥᑯᐙᐅᒡ᙮ 14 ᓂᓂᑐᑎᒫᓈᓐ ᒑ ᒌ ᐃᔮᔮᒄ ᐆ ᒋᔅᑎᒫᒑᔨᐦᒋᒑᐎᓐ ᒋᑎᐹᔨᐦᒋᒑᓰᒥᓂᐤ ᒌᓴᔅ ᙭ ᒑ ᒌ ᑎᑯᓃᔨᒡ ᐊᓂᑎᐦ ᐋᐦᑖᐙᒄ ᑭᔮᐦ ᒫᒃ ᐆ ᓵᒋᐦᐄᐙᐎᓐ ᒋᔖᒥᓂᑑ ᑭᔮᐦ ᒫᒃ ᑳ ᐱᔮᐦᒋᓰᑦ ᐊᐦᒑᐦᒄ ᒑ ᒌ ᑐᑖᑖᒄ ᒨᔥ ᒫᐦ ᒌ ᒥᔪᐐᒑᐅᑑᔮᐦᒄ᙮