1 ᒌᔨ, ᓂᑯᓯᐦᑳᐎᓐ ᑎᒧᕢ, ᓲᐦᒃ ᐐᐦ ᓲᐦᒋᓰᐦ ᙭ ᒌᓴᔅ ᐅᒋᔖᐙᑎᓰᐎᓂᐦᒡ ᐅᐦᒋ᙮ 2 ᒋᒌ ᐹᐦᑑᐎᓐ ᑖᓐ ᑳ ᐄᔑ ᒋᔅᑯᑎᒫᒑᔮᓐ ᐊᓂᑖᐦ ᐋ ᒥᐦᒑᑎᓈᓂᐎᔨᒡ᙮ ᐆ ᒫᒃ ᑳ ᐄᔑ ᒋᔅᑯᑎᒫᒑᔮᓐ ᒑ ᐱᒋᔅᑎᓂᒀᐤ ᐊᓂᒌ ᑳ ᑖᑆᐅᒑᔨᐦᑖᑯᓯᒡ ᒑ ᒌ ᐋᔔ ᒋᔅᑯᑎᒧᐙᒡ ᑯᑎᒃ ᐊᐙᔨᐤᐦ᙮ 3 ᓲᐦᒃ ᐐᐦ ᓰᐱᔨᐙᓰᐦ ᐋᐦ ᐋᔨᒧᐦᐅᔨᓐᐦ ᒧᔮᒻ ᙭ ᒌᓴᔅ ᐅᑖᑆᐎᓯᐤ ᒫᓯᐦᒑᐤ ᐄᔨᔨᒻ ᑳᐦ ᑎᔨᒡ᙮ 4 ᐙᔥ ᒫᓯᐦᒑᐤ ᐄᔨᔨᐤ ᓲᐦᒃ ᑯᒋᐦᑖᐤ ᒑ ᒌ ᓂᐦᐄᐙᐦᐋᑦ ᐊᓂᔮᔨᐤ ᑳ ᓃᑳᓂᔥᑳᑯᑦ, ᓂᒧᐃ ᒥᑐᓐ ᐃᔮᐱᑖᔨᐦᑎᒥᐦᐄᑰ ᑯᑎᒋᔨᐤ ᒑᒀᔨᐤ᙮ 5 ᐄᔑ ᐱᒫᑎᓰᐦ ᑖᓐ ᐋ ᐄᔑ ᓂᑎᐙᔨᒥᔅᒃ ᒋᔖᒥᓂᑑ ᒑ ᒌ ᐄᔑ ᐱᒫᑎᓰᐎᑦ᙮ ᒧᔮᒻ ᐊᓯᓈᑯᓯᑦ ᐊᓐ ᐊᐙᓐ ᑳ ᐐᒋᐦᐄᐙᑦ ᐋ ᒋᐦᒋᐱᐦᐄᑐᓈᓂᐎᔨᒡ ᓂᒧᐃ ᒋᑭ ᒌ ᑭᔅᒋᐦᐆ ᐹᑎᔥ ᓈᑭᑎᐙᔨᐦᑎᐦᑳ ᐊᓂᔮᔨᐤ ᐐᔓᐙᐎᓐ ᑳ ᐎᔨᔅᑖᔨᒡ ᒑ ᐋᐱᑎᓃᔨᒡ ᐋ ᒋᐦᒋᐱᐦᐄᑐᓈᓂᐎᔨᒡ᙮ 6 ᑭᔮᐦ ᒫᒃ ᒧᔮᒻ ᓂᐦᑖᐅᒋᐦᒑᓯᐤ ᓲᐦᒃ ᑳᐦ ᐋᐱᑎᓰᑦ ᐄᑖᔨᐦᑖᑯᓂᔨᐤ ᐐᔨ ᓃᔥᑎᒻ ᒑ ᒌ ᐱᐦᒀᓂᒫᓱᑦ ᐊᓂᔮᔨᐤ ᑳ ᐄᔑ ᓂᐦᑖᐅᒋᐦᑖᑦ᙮ 7 ᒫᒥᑐᓈᔨᐦᑎᐦ ᐆ ᑖᓐ ᑳ ᐄᔑ ᐙᐐᐦᑎᒫᑖᓐ, ᐙᔥ ᑎᐹᔨᐦᒋᒑᓯᐤ ᒋᑭ ᑐᑖᒄ ᒑ ᒌ ᓂᔅᑐᐦᑎᒥᓐ ᒥᓯᐙ ᒑᒀᓐ᙮

8 ᒨᔥ ᒑ ᒋᔅᒋᔨᓐ ᒌᓴᔅ ᙭, ᐊᓐ ᑳ ᐎᓂᔥᑳᓈᑭᓅᑦ ᓂᐱᐎᓂᐦᒡ ᐅᐦᒋ ᑭᔮᐦ ᒫᒃ ᑌᕕᑦ ᐋᐦ ᑖᔨᒡ ᐋ ᒌ ᐅᐦᒋ ᐋᓂᔅᒑ ᐱᒫᑎᓰᑦ ᐊᓐ ᐋ ᐄᔑ ᐋᔨᒨᑖᒡ ᐊᓂᑎᐦ ᒥᔻᒋᒧᐎᓂᒡ ᐎᔮᐐᐦᑎᒫᓐ᙮ 9 ᐙᔥ ᐋ ᐙᐐᐦᑎᒫᓐ ᐆ ᒥᔻᒋᒧᐎᓐ ᐋᐅᒄ ᐙᐦᒋ ᓂᓈᐦᑳᑖᔨᒧᔮᓐ, ᑭᔮᐦ ᒧᔮᒻ ᐊᐙᓐ ᐋ ᒌ ᐎᓂᐦᐱᓱᑦ ᑳ ᒌ ᒫᒫᐦᒋᒀᐱᔅᑭᐦᐙᑭᓅᑦ ᐋᐅᒄ ᐋᐦ ᑐᑖᑭᐎᔮᓐ᙮ ᒥᒄ ᒫᒃ ᓂᒧᐃ ᒋᑭ ᒌ ᒫᒫᐦᒋᒀᐱᔅᑭᐦᐄᑭᓅᔨᐤ ᒋᔖᒥᓂᑑ ᐅᑎᔨᒧᐎᓐᐦ᙮ 10 ᐋᒄ ᒫᒃ ᓲᐦᒋᐱᔨᐦᒡ ᒥᓯᐙ ᒑᒀᓐ ᒑ ᒌ ᔖᐳᔅᑭᒫᓐ, ᒑ ᒌ ᐅᐦᒋ ᐃᔮᔨᒡ ᐱᒫᒋᐦᐄᑯᓰᐎᓂᔨᐤ ᑭᔮᐦ ᑳᒋᒡ ᒋᔅᑖᔨᐦᑖᑯᓯᐎᓂᔨᐤ ᐊᓂᔮᔨᐤ ᒋᔖᒥᓂᑑ ᑳ ᐅᐙᔮᐱᒫᑦ ᒑ ᐅᑏᔨᔨᒥᑦ, ᐋ ᑖᑆᔮᔨᒫᒡ ᙭ ᒌᓴᔅᐦ᙮ 11 ᐙᔥ ᑖᑆᒥᑭᓐ ᐆ ᑳ ᐄᓈᓅᒡ, “ᑳ ᐐᒋᓂᐲᒫᐅᐦᒀ, ᒋᑭ ᐐᒋᐱᒫᑎᓰᒫᓂᐤ ᑭᔮᐦ᙮ 12 ᒨᔥ ᒫᒃ ᔖᐳᔅᑭᒧᒀ ᓂᓈᐦᑳᑖᔨᒧᐎᓐ, ᒋᑭ ᐐᒋᑎᐹᔨᐦᒋᒑᒫᓂᐤ᙮ ᑭᔮᐦ ᒫᒃ ᐄᔨᔨᐦᒀ ᐋᐦᐋᑳ ᒋᔅᒑᔨᒫᒄ, ᑭᔮᐦ ᐐᔨ ᑭᑎ ᐃᔨᐤ ᐋᐦᐋᑳ ᒋᔅᒑᔨᒥᑎᐦᒄ᙮ 13 ᐋᑳ ᒫᒃ ᑖᑆᐅᒑᔨᐦᑖᑯᓯᔨᐦᒀ, ᐊᔮᐱᒡ ᑖᑆᐅᒑᔨᐦᑖᑯᓲᐤ ᐐᔨ ᙭, ᐙᔥ ᓂᒧᐃ ᐃᔨᐦᒡ ᒋᑭ ᒌ ᐄᑖᔨᐦᑖᑯᓯᐤ ᑖᓐ ᐋ ᐄᑖᔨᐦᑖᑯᓯᑦ᙮”

14 ᒨᔥ ᒫᒃ ᒋᔅᒋᓲᒥᒡ ᒋᑎᐄᔨᔨᒥᒡ ᐅᔮᔨᐤ ᑭᔮᐦ ᐅᐦᑎᔅᑰ ᒋᔖᒥᓂᑑ ᐋᐦ ᑖᔨᒡ ᐃᔮᒀᒥᒥᒡ ᐋᑳ ᒑ ᒌ ᒨᐦᒌᑳᑑᒡ ᐊᔨᒧᐎᓂᔨᐤ ᐅᐦᒋ, ᐙᔥ ᓂᒧᐃ ᒥᑐᓐ ᒥᔪ ᐐᒋᐦᐄᐙᒥᑭᓐ ᐆ ᐋ ᐄᔑ ᐊᔨᒥᓈᓅᒡ᙮ ᑎᑯᓂᔨᐤ ᑖᓐ ᐋ ᐄᔑ ᒥᒌᐦᑐᑖᑯᒡ ᐊᓂᒌ ᑳ ᓂᑐᐦᑎᐦᒡ᙮ 15 ᒥᒄ ᐋ ᐃᔥᐱᔥ ᑭᔅᒋᐦᑖᔨᓐ ᒑᒀᓐ ᒑ ᑐᑎᒥᓐ ᐊᓂᔮᔨᐤ ᒑ ᓂᐦᐋᔨᐦᑎᒥᐦᐄᑯᑦ ᒋᔖᒥᓂᑑ, ᓲᐦᒃ ᐋᐱᑎᓰᐦ ᐋᐦᐋᑳ ᑎᑯᐦᒡ ᑖᓐ ᒑ ᐄᔑ ᐱᒫᒥᐦᐄᑯᔨᓐ ᒋᑖᐱᑎᓰᐎᓐ, ᑯᐃᔅᒄ ᐄᔑ ᒋᔅᑯᑎᒫᒑᐦ ᑖᓐ ᐋ ᐄᔑ ᑖᑆᒥᑭᓃᔨᒡ ᒋᔖᒥᓂᑑ ᐅᑎᔨᒧᐎᓐᐦ᙮ 16 ᐊᑳᐐ ᐃᔮᐱᑖᔨᐦᑎᒥᐦᐄᒄ ᓂᑎᐐ ᒥᒄ ᐊᔨᒧᐎᓐ, ᑭᔮᐦ ᐋᐦᐋᑳ ᑭᒋᐦᑳᐙᓯᑖᑯᐦᒡ ᒑᒀᓐ ᐋᐦ ᐋᔨᒸᐅᐦᐄᐙᒡ ᐙᔥ ᓂᒧᐃ ᐐᒋᐦᐄᑰ ᐊᐙᓐ ᐅᔮᔨᐤ ᐋ ᐄᔑ ᐋᔨᒥᓈᓂᐎᔨᒡ᙮ ᑐᑖᑰ ᒥᒄ ᐊᑎᑎᐤ ᒑ ᒌ ᐋᑎ ᔮᐙᐱᒫᑦ ᒋᔖᒥᓂᑑ᙮ 17 ᐆ ᐋ ᐄᔑ ᐊᔨᒥᓈᓂᐎᒡ ᒧᔮᒻ ᑳ ᒧᐙᒡ ᐊᐦᑯᓱᐎᓐ ᐋᐅᒄ ᒧᔮᒻ ᐋ ᐄᑖᔨᐦᑖᑯᐦᒡ᙮ ᐊᓂᒌ ᒫᒃ ᐦᐄᒥᓀᔭᔅ ᑭᔮᐦ ᒫᒃ ᕚᐃᓖᑎᔅ ᐋᔪᐎᒄ ᐋᐦ ᑎᒡ ᐋ ᒋᔅᑯᑎᒫᒑᒡ᙮ 18 ᒌ ᓂᑭᑎᒧᒡ ᑖᑆᐎᓂᔨᐤ, ᐋᒄ ᑳᐦ ᑐᑎᐙᒡ ᐱᔅᒡ ᐊᓂᔮᔨᐤ ᑳ ᑖᑆᔮᔨᐦᑎᒥᔨᒡ ᐋᑳ ᒑ ᒌ ᐋᑎᓵᐹᔨᐦᑎᒥᔨᒡ ᐋ ᑖᑆᐦᑎᒥᔨᒡ, ᐙᔥ ᒌ ᒋᔅᑯᑎᒫᒑᐅᒡ ᐋᐦ ᐃᔨᒡ ᔖᔥ ᐋ ᒌ ᐅᑎᐦᒋᐱᔨᒡ ᐋ ᒌ ᐎᓂᔥᑳᓂᐐᒡ ᓂᐱᐎᓂᐦᒡ ᐅᐦᒋ᙮ 19 ᒥᒄ ᒫᒃ ᐊᓂᔮᔨᐤ ᒋᔖᒥᓂᑑ ᐅᒋᔅᑯᑎᒫᒑᐎᓐ, ᓂᒧᐃ ᒋᑭ ᒌ ᐋᐦᑎᓂᑭᓅᔨᐤ ᐋ ᐃᔥᐱᔥ ᔮᐃᑎᓃᔨᒡ, ᒧᔮᒻ ᐊᓐ ᑳᐦ ᐄᑎᔥᑖᒡ, “ᑎᐹᔨᐦᒋᒑᓯᐤ ᒋᔅᒑᔨᒫᐤ ᐊᓂᔮᔨᐤᐦ ᐊᐙᔨᐤᐦ ᐐᔨ ᑎᐱᔨᐙᐅᓯᑦ” ᑭᔮᐦ “ᒥᓯᐙ ᐊᐙᓐ ᑎᐹᔨᐦᒋᒑᓯᐤ ᐋᐦ ᑖᔨᒡ ᑳ ᐄᔑ ᑎᐹᔨᐦᑖᑯᓯᑦ ᒋᐱᐦ ᓂᑭᑎᒻ ᒥᒑᑎᓰᐎᓂᔨᐤ᙮”

20 ᐱᑯᓂᒑ ᒀᓯᓈᑰᐦᒡ, ᐊᓂᑖᐦ ᐋ ᒥᓵᒡ ᐙᔅᑳᐦᐄᑭᓐ ᑎᑯᓐ ᓂᓈᐦᑭᐤ ᐋ ᐃᓯᓈᑯᐦᒡ ᐎᔮᑭᓐ᙮ ᐱᔅᒡ ᐊᓂᐦᐄ ᐎᔮᑭᓐ ᐅᔖᐅᔔᐎᔮᓈᐱᔅᑰ ᐋᒄ ᑯᑎᒃ ᐙᓵᔮᐱᔅᑳᐤᐦ᙮ ᐱᔅᒡ ᒥᔅᑎᑯᐦᒡ ᒌ ᐅᐦᒋ ᐅᔑᐦᑖᑭᓄᐤ ᐋᒄ ᑯᑎᒃ ᓯᔅᒋᐎᐦᒡ᙮ ᐊᓂᐦᐄ ᑳ ᔔᔮᓂᐎᒡ ᓂᒧᐃ ᓈᔥᒡ ᐋᐱᑎᓐ ᐋᒄ ᐊᓂᐦᐄ ᐋᑳ ᑳ ᔔᔮᓂᐎᒡ ᐋᐅᒄ ᐋᓐ ᐊᓂᐦᐄ ᐋᔑᑯᒻ ᒌᔑᑳᐤᐦ ᐃᔮᐱᑎᐦᒡ᙮ 21 ᐋᔪᐎᒄ ᒫᒃ ᐊᓯᓈᑯᓯᑦ ᐊᐙᓐ, ᐱᔮᐦᒋᐦᐄᓱᒑ ᑭᔮᐦ ᐴᓃᒑ ᐋ ᒥᒑᐱᒫᑎᓰᑦ, ᑭᑎ ᑎᑯᓂᔨᐤ ᓈᔥᒡ ᐋ ᒋᔅᑖᔨᐦᑖᑯᓃᔨᒡ ᒑ ᐄᔑ ᐋᐱᒋᐦᐋᑭᓅᑦ, ᒥᑐᓐ ᑭᑎ ᐱᒋᔅᑎᓃᓲ ᒑ ᒌ ᒥᔻᐱᒋᐦᐄᑯᑦ ᐊᓂᔮᔨᐤ ᐅᒋᒫᒻ ᑏᐙᒡ ᒑ ᒌᐦ ᑐᑎᐦᒃ ᒥᔪᑐᑎᒫᒑᐅᓂᔨᐤ᙮ 22 ᒑ ᐄᒑᐦᑖᔨᓐ ᐋᑳ ᐃᔮᐱᑖᔨᑎᒥᐦᐄᑰ ᑖᓂᔮᔨᐤ ᐋ ᐄᔑ ᒧᔥᑖᓈᔮᔨᐦᑎᐦᒃ ᒑ ᒌ ᐄᑖᑎᓰᑦ ᐅᔅᒋᓃᒎ᙮ ᐊᐅᔅᑖ ᐄᑖᔨᐦᑎᒥᐦᐄᑯᐦ ᑯᐃᔅᑯᑖᑎᓰᐎᓐ, ᑖᑆᔮᔨᐦᑎᒧᐎᓐ, ᓵᒋᐦᐄᐙᐎᓐ ᑭᔮᐦ ᒫᒃ ᒋᔮᒫᔨᐦᑎᒧᐎᓐ, ᐋ ᐐᒑᐅᑣᐤ ᐊᓂᒌ ᑳ ᑖᑆᑖᒡ ᑎᐹᔨᐦᒋᒑᓯᐤ ᑳ ᐱᔮᐦᑭᓃᔨᔨᒡ ᐅᑖᐦᐄᐙᐤ᙮ 23 ᐊᑳᐐ ᓂᓂᑐᐦᑎᐦ ᓂᑎᐐ ᒥᒄ ᐊᔨᒧᐎᓐ ᑭᔮᐦ ᐋ ᒌᔥᒀᑖᑯᒡ ᐊᔨᒧᐎᓐ, ᐙᔥ ᐋᑯᑖᐦ ᐙᐦᒋᐱᔨᒡ ᒑ ᒌ ᐅᐦᒋ ᐋᔮᔅᑖᒥᑐᓈᓂᐎᒡ᙮ 24 ᐙᔥ ᐊᓐ ᑳᐦ ᐋᐱᒋᐦᐄᑯᑦ ᑎᐹᔨᐦᒋᒑᓯᐤ ᓂᒧᐃ ᒋᐱᐦ ᐅᐦᒋ ᐃᔮᔥᑖᒧᐙᐤ᙮ ᒋᐱᐦ ᒋᔅᑎᒫᒑᔨᒫᐤ ᒥᓯᐙ ᐊᐙᔨᐤᐦ ᑭᔮᐦ ᒫᒃ ᐊᓂᔮᔨᐤ ᐋ ᒥᔪ ᒋᔅᑯᑎᒫᒑᓲᑦ ᒋᐱᐦ ᓰᐱᔨᐙᓰᔅᑎᐙᐤ ᐊᐙᔨᐤᐦ᙮ 25 ᑭᔮᐦ ᒋᔮᒻ ᒋᐱᐦ ᑐᑎᐙᐤ ᐋ ᐐᐦ ᑯᐃᔅᑯᓈᑦ ᐊᓂᔮᔨᐤ ᑳ ᓂᔥᑯᔥᑖᑯᑦ ᐊᐙᔨᐤᐦ᙮ ᒑᒃ ᒫᒃ ᒀᔂᓐ ᒋᐱᐦ ᒌ ᑐᑖᑯᔨᐤᐦ ᒋᔖᒥᓂᑑᐦ ᒑ ᒌ ᒀᔅᑳᑎᓰᔨᒡ ᑭᔮᐦ ᒑ ᒌ ᒋᔅᒑᔨᐦᑎᒥᔨᒡ ᑖᑆᐎᓂᔨᐤ᙮ 26 ᑭᔮᐦ ᒑ ᒌ ᒋᔅᒑᔨᐦᑎᒥᔨᒡ ᑖᓂᑖᐦ ᒑ ᒌ ᐅᐦᒋ ᐱᑯᐦᐅᔨᒡ ᐋ ᒌ ᓈᒀᑎᑯᔨᒡ ᒥᒋᒥᓂᑑ ᐋ ᒌ ᑐᑖᑯᔨᒡ ᒥᒄ ᒑ ᒌ ᐄᔑ ᓂᓂᐦᐄᐦᑐᐙᔨᒡ ᑖᓐ ᐋᐦ ᐄᑎᔓᒥᑯᔨᒡ᙮