1 ᐄᔥᐱᐦ ᒫᒃ ᑳ ᐙᒋᔮᒥᒋᐦᒡ, ᐋᒄ ᒦᓐ ᑳ ᒋᔥᑖᔑᔮᐦᒡ, ᐋᒄ ᐊᓂᑖᐦ ᒀᔅ ᑳ ᐃᔑᓂᐦᑳᑖᒡ ᐃᐦᑖᐎᓐ ᑯᐃᔅᒄ ᑳ ᐄᑖᔑᔮᐦᒡ᙮ ᒦᓐ ᒫᒃ ᐎᔮᐱᐦᒡ ᐋᒄ ᐊᓂᑖᐦ ᕎᑎᓯᐦᒡ ᑳᐦ ᐋᑎᐱᒫᔑᔮᐦᒡ, ᐋᒄ ᐊᓂᑖᐦ ᐅᐦᒋ ᐹᑖᕋ ᑳ ᐄᑖᔥᑎᒥᓱᔮᐦᒡ᙮ 2 ᐊᓂᑎᐦ ᒫᒃ ᐊᓐ ᐹᑖᕋ ᑳ ᐃᔑᓂᐦᑳᑖᒡ ᐃᐦᑖᐎᓐ ᐋᑯᑖᐦ ᑳᐦ ᑎᑯᐦᒡ ᒌᒫᓐ ᐊᓂᑖᐦ ᕛᓃᓰᔮ ᑳ ᐃᔑᓂᐦᑳᑖᒡ ᐊᔅᒌ ᐋ ᒌ ᐐᐦ ᐄᑖᔥᑎᑖᑭᓂᐎᒡ᙮ ᑳ ᐴᓯᔮᐦᒡ ᐊᓐ ᒌᒫᓐ᙮ ᐋᒄ ᒦᓐ ᑳ ᒋᔥᑖᔑᔮᐦᒡ᙮ 3 ᐄᔥᐱᐦ ᒫᒃ ᐎᔮᐱᐦᑎᒫᐦᒡ ᐊᓐ ᒥᓂᔥᑎᒄ ᓵᐃᑉᕋᔅ ᑳ ᐃᔑᓂᐦᑳᑖᒡ ᐲᓯᒸᑖᐦᒡ ᐄᑖᐦᒑ ᓂᒌᐦ ᐄᔑ ᒥᔮᐅᐦᐋᓈᓐ, ᐋᒄ ᑯᐃᔅᒄ ᐊᓂᑖᐦ ᓯᕆᔮ ᐊᔅᒌᐦᒡ ᐋᑯᑖᐦ ᑳ ᐄᑖᔥᑎᒥᓱᔮᐦᒡ᙮ ᐊᓐ ᒫᒃ ᐃᐦᑖᐎᓐ ᑖᐃᕋ ᑳ ᐃᔑᓂᐦᑳᑖᒡ ᐊᓂᑖᐦ ᓯᕆᔮ ᐊᔅᒌᐦᒡ ᑳᐦ ᑎᑯᐦᒡ ᐋᑯᑖᐦ ᑳ ᓈᑎᑳᒫᐦᐋᒫᐦᒡ ᐋᑯᑖᐦ ᑭᔮᐦ ᑳ ᐊᒀᓈᓱᓈᓃᐎᒡ᙮ 4 ᐋᒄ ᑳ ᓂᑎᐙᐱᒥᒋᐦᒡ ᐊᓂᒌ ᑳ ᑖᑆᔮᔨᒫᒡ ᒌᓴᔅᐦ ᐊᓂᑎᐦ ᑳᐦ ᑖᒡ᙮ ᐹᔨᒄ ᑐᔥᑖᐤ ᒫᒃ ᓂᒌ ᑖᐙᓈᓐ ᐊᓂᑎᐦ ᐋᐦ ᑖᒡ᙮ ᐊᓂᒌ ᒫᒃ ᑳ ᑖᑆᐦᑎᐦᒡ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ ᒌ ᑐᑖᑯᒡ ᒑ ᒌ ᐃᔮᒀᒥᒫᒡ ᑆᓪ ᐋᑳ ᒑ ᒌ ᐄᑐᐦᑖᔨᒡ ᐊᓂᑖᐦ ᒋᕉᓯᓕᒥᐦᒡ᙮ 5 ᒥᒄ ᒫᒃ ᐄᔥᐱᐦ ᐙᑎᐦᒋᐱᔨᐦᒡ ᒑ ᒋᔅᑐᐦᑖᔮᐦᒡ, ᒥᒄ ᓂᒌᐦ ᐄᔑ ᒋᔅᑐᐦᑖᓈᓐ᙮ ᒥᓯᐙ ᒫᒃ ᐊᓂᒌ ᑳ ᑖᑆᐦᑎᐦᒡ ᑭᔮᐦ ᐐᔨᐙᐤ ᑭᔮᐦ ᐅᑎᐙᔑᔒᒥᐙᐤᐦ ᓂᒌ ᐐᒑᐅᑯᓈᓂᒡ ᐋ ᓈᓯᐹᐎᒋᐦᑦ᙮ ᐋᒄ ᒥᓯᐙ ᑳ ᓃᐱᔅᑰᐱᔮᐦᒡ ᐊᓂᑎᐦ ᔑᔓᒡ ᐋ ᐊᔨᒥᐦᐋᔮᐦᒡ᙮ 6 ᐄᔥᐱᐦ ᒫᒃ ᑳ ᐙᒋᔮᒥᑐᔮᐦᒡ, ᐋᒄ ᑳ ᐴᓯᔮᐦᒡ ᓃᔮᓐ ᐊᓐ ᒌᒫᓐ, ᐋᒄ ᑳ ᒌᐙᒡ ᐐᔨᐙᐤ᙮

7 ᐊᓂᑎᐦ ᒫᒃ ᐊᓐ ᑖᐃᕋ ᑳ ᐃᔑᓂᐦᑳᑖᒡ ᐅᐦᒋ ᐋᒄ ᐱᑣᓚᒫᐃᔅ ᑳ ᐃᔑᓂᐦᑳᑖᒡ ᐃᐦᑖᐎᓐ ᑳ ᑭᐹᔮᐦᒡ, ᑳᐦ ᐋᑎ ᓂᑎᐙᐱᒥᒋᐦᒡ ᐊᓂᒌ ᐐᒋᔖᓂᒫᐅᒡ᙮ ᐹᔨᒄ ᒌᔑᑳᐤᐦ ᓂᒌ ᑖᐙᓈᓐ ᐊᓂᑎᐦ ᐋᐦ ᑖᒡ᙮ 8 ᐋᒄ ᒫᒃ ᐎᔮᐱᐦᒡ ᐋᒄ ᑳ ᒋᔅᑐᐦᑖᔮᐦᒡ ᐊᓂᑖᐦ ᐊᓐ ᐃᐦᑖᐎᓐ ᓭᓯᕇᔮᐦ ᑳ ᐃᔑᓂᐦᑳᑖᒡ ᑳ ᐄᑐᐦᑖᔮᐦᒡ᙮ ᕕᓕᑉ ᒫᒃ ᐋ ᐃᔑᓂᐦᑳᓱᑦ ᓈᐹᐤ ᐊᓂᑎᐦ ᐋᐦ ᑖᑦ ᐋᐅᒄ ᐆ ᐐᒋᐦᒡ ᑳ ᐃᐦᑖᐎᒋᐦᑦ᙮ ᐋ ᑭᒑᔅᒀᑦ ᒌ ᐄᑖᐱᑎᓰᐤ ᐆ ᕕᓕᑉ ᑭᔮᐦ ᐋᐅᒄ ᐆ ᐹᔨᒄ ᐊᓂᒌ ᓃᔣᔥᒡ ᑳ ᐃᑎᔑᒡ ᑳ ᐅᐙᔮᐱᒫᑭᓂᐎᒡ ᒑ ᒌ ᓈᑎᒫᒑᒡ ᐊᓂᑖᐦ ᐊᔨᒥᐦᐋᐅᑭᒥᑯᐦᒡ ᒋᕉᓯᓕᒥᐦᒡ᙮ 9 ᒌ ᓈᐎᔨᐤ ᐅᑖᓂᔅᐦ ᐋᔥᒄ ᐋᐦᐋᑳ ᐅᐦᒋ ᐅᓈᐹᒥᔨᒡ ᑭᔮᐦ ᒫᒃ ᒌ ᒋᔅᒋᐙᐦᐄᒑᔨᐤᐦ᙮ 10 ᐙᐃᐱᔥᒌᔥ ᒫᒃ ᑳ ᑖᔮᐦᒡ ᐊᓂᑎᐦ, ᐋᒄ ᑳ ᑎᑯᔑᐦᒃ ᓈᐹᐤ ᑳ ᒋᔅᒋᐙᐦᐄᒑᓯᐎᑦ᙮ ᐊᑳᐹᔅ ᒌ ᐃᔑᓂᐦᑳᓲ᙮ ᒎᑏᔮ ᐊᔅᒌᐦᒡ ᒌ ᐅᐦᑐᐦᑖᐤ᙮ 11 ᐋᒄ ᑳ ᐹᒋ ᓂᑎᐙᐱᒥᔨᒥᐦᑦ ᐆ ᓈᐹᐤ, ᑳ ᐅᑎᓂᒫᑦ ᑆᓪ ᐆ ᐱᐦᑯᐦᑖᐦᐅᓂᔨᐤ, ᑳ ᒫᐦᑯᐱᑎᐦᒃ ᐅᓯᑦ ᑭᔮᐦ ᐅᑎᐦᒌ ᐋᒄ ᑳᐦ ᐃᔨᑦ, “ᒫᐤ ᐃᔮᑦ ᑳ ᐱᔮᐦᒋᓰᑦ ᐊᐦᒑᐦᒄ, ᐋᔪᐎᒄ ᐅᔮᔨᐤ ᒑ ᐄᑖᐱᐦᑳᑎᑯᑦ ᐊᓂᔮᔨᐤ ᒎᐄᔨᔨᐤ ᒋᕉᓯᓕᒥᐦᒡ ᑳᐦ ᑖᔨᒡ ᐊᓐ ᐊᐙᓐ ᑎᐱᔨᐙᐅᓯᑦ ᐅᔮᔨᐤ ᐱᐦᑯᐦᑖᐦᐅᓐ᙮ ᒋᑭ ᐄᔑ ᐱᒋᔅᑎᓂᑰ ᑭᔮᐦ ᐅᔮᔨᐤ ᒎᐄᔨᔨᐤ ᐊᓂᑖᐦ ᐋᑳ ᑳ ᒎᐤ ᐄᑎᔅᑳᓈᓰᔨᒡ ᐋᐦ ᑖᔨᒡ᙮” ᐋᔪᐎᒄ ᐅᔮᔨᐤ ᑳ ᐄᔑ ᐐᐦᑎᐦᒃ ᐊᓐ ᐊᑳᐹᔅ᙮

12 ᐄᔥᐱᐦ ᒫᒃ ᐱᔮᐦᑎᒫᐦᒡ ᐅᔮᔨᐤ ᐋᐦ ᐃᔨᑦ, ᓃᔮᓐ ᑭᔮᐦ ᒫᒃ ᐊᓂᒌ ᑯᑎᑭᒡ ᐊᓂᑎᐦ ᑳᐦ ᑖᒡ, ᓂᒌ ᐐᐦ ᒋᔅᑎᐦᐋᒧᐙᓈᓐ ᑆᓪ ᒑ ᒌ ᐄᑐᐦᑖᑦ ᒋᕉᓯᓕᒥᐦᒡ᙮ 13 ᒥᒄ ᒫᒃ ᓂᒌᐦ ᐄᑎᑯᓈᓐ, “ᒑᒀᓐ ᐙᐦᒋ ᒫᑐᔮᒄ, ᓂᑯᔑᑯᑖᐦᐋᓐ ᐋ ᒫᑐᔮᒄ᙮ ᐊᔮᐱᒡ ᐙᔥ ᓂᑭ ᐄᑐᐦᑖᓐ ᐊᓂᑖᐦ ᒋᕉᓯᓕᒥᐦᒡ᙮ ᔖᔥ ᐙᔥ ᓂᑎᔮᔅᑭᐐᓐ, ᓂᒧᐃ ᒥᒄ ᒑ ᒌ ᒋᐱᐦᐅᑭᐎᔮᓐ ᑎᐹᔨᐦᒋᒑᓯᐤ ᒌᓴᔅ ᐅᑎᔑᓂᐦᑳᓱᐎᓐ ᐅᐦᒋ, ᓂᑎᔮᔅᑭᐐᓐ ᑭᔮᐦ ᒑ ᐐᐦ ᓂᐱᐦᐄᑯᐙᓈ ᐐᔨ ᐅᐦᒋ᙮” ᐋᔪᐎᒄ ᐅᔮᔨᐤ ᑳ ᐃᔑᔨᒥᐦᑦ ᑆᓪ᙮

14 ᓂᒧᐃ ᒫᒃ ᓅᐦᒌ ᒋᐦᐱᒋᐦᐋᓈᓐ, ᐋᒄ ᒥᒄ ᑳ ᐄᑎᒋᐦᑦ, “ᐋᑯᑖᐦ ᑭᔨᑆ ᐋᑯᔥ ᒑ ᐃᓯᓈᑯᐦᒡ᙮ ᐙᔥ ᒫᒃ ᑎᐹᔨᐦᒋᒑᓯᐤ ᐅᑎᑖᔨᐦᑎᒧᐎᓐ ᐄᔅᐱᔨᔨᒑ᙮”

15 ᐙᐃᐱᔥᒌᔥ ᒫᒃ ᓂᒌᐦᑖᓈᓐ ᐊᓂᑎᐦ, ᐋᒄ ᑳ ᐃᔮᔅᑭᐎᔮᐦᒡ ᐊᓂᑖᐦ ᒋᕉᓯᓕᒥᐦᒡ ᒑ ᐄᑐᐦᑖᔮᐦᒡ᙮ 16 ᐱᔅᒡ ᒫᒃ ᐊᓂᒌ ᑳ ᑖᑆᔮᔨᒫᒡ ᒌᓴᔅᐦ ᐊᓂᑖᐦ ᓭᓯᕇᔮᐦ ᑳ ᐅᐦᒌᒡ ᓂᒌ ᐐᒑᐅᑯᓈᓂᒡ, ᐋᒄ ᑳ ᐄᑐᐦᑎᐦᐃᔨᒥᐦᒡ ᐊᓂᑖᐦ ᓈᐹᐤ ᒥᓈᓱᓐ ᐋ ᐃᔑᓂᐦᑳᓱᔨᒡ ᐋᐦ ᑖᔨᒡ᙮ ᐋᑯᑖᐦ ᐊᓐ ᐐᒋᐦᒡ ᓂᐱᐦ ᑖᐙᓈᓐ᙮ ᐊᓂᑖᐦ ᓵᐃᑉᕋᔅ ᒌ ᐅᐦᒋᔨᐤ ᐆ ᒥᓈᓱᓐ᙮ ᔖᔥ ᐙᔥᑭᒡ ᒌ ᑖᑆᔮᔨᒫᑖᑯᐱᓐ ᐐᔨ ᒌᓴᔅᐦ᙮

17 ᐄᔥᐱᐦ ᑖᑯᔑᓂᔮᐦᒡ ᐊᓂᑖᐦ ᒋᕉᓯᓕᒥᐦᒡ, ᓈᔥᒡ ᒌ ᒥᔻᔨᐦᑎᒧᒡ ᐊᓂᒌ ᐐᒋᔖᓂᒫᐅᒡ ᐄᔥᐱᐦ ᐎᔮᐱᒥᔨᒥᐦᒡ᙮ 18 ᒦᓐ ᒫᒃ ᐎᔮᐱᐦᒡ ᓂᒌ ᓂᑎᐙᐱᒫᓈᓐ ᒉᒥᔅ ᒥᓯᐙ ᐊᓂᑎᐦ ᐋ ᑎᔑᔮᐦᒡ᙮ ᑆᓪ ᑭᔮᐦ ᓂᒌ ᐐᒑᐅᑯᓈᓐ᙮ ᒥᓯᐙ ᐊᓂᒌ ᑳ ᓃᑳᓂᔥᑭᐙᒡ ᐊᓂᔮᔨᐤ ᑳ ᑖᑆᐦᑎᒥᔨᒡ ᐊᓂᑎᐦ ᒋᕉᓯᓕᒥᐦᒡ ᑳᐦ ᑖᔨᒡ ᒌᐦ ᑖᐅᒡ ᐊᓂᑎᐦ ᒉᒥᔅ ᐋᐦ ᑖᔨᒡ᙮ 19 ᑆᓪ ᒫᒃ ᒌ ᐋᑎ ᐙᒋᔮᒫᐤ ᒥᓯᐙ, ᐋᒄ ᑳᐦ ᐋᑎ ᐙᐐᐦᑎᒧᐙᑦ ᒥᓯᐙ ᐊᓂᔮᔨᐤ ᑖᓐ ᑳ ᐄᔑ ᑐᑎᒫᑯᔨᒡ ᒋᔖᒥᓂᑑ ᐊᓂᔮᔨᐤ ᐋᑳ ᑳ ᒎᐤ ᐄᑎᔅᑳᓈᓰᔨᒡ ᒫᒀᒡ ᑳ ᐙᐐᐦᑎᐦᒃ ᒥᔻᒋᒧᐎᓂᔨᐤ ᐊᓂᑖᐦ ᐋᐦ ᑖᔨᒡ᙮

20 ᐄᔥᐱᐦ ᒫᒃ ᐱᔮᐦᑎᐙᒡ ᐅᒌ ᑖᓐ ᐋᐦ ᐄᑖᒋᒧᔨᒡ ᑆᓪ ᒥᓯᐙ ᒌ ᒫᒥᐦᒋᒫᐅᒡ ᒋᔖᒥᓂᑑ᙮ ᒑᒃ ᒫᒃ ᒌ ᐄᑖᐅᒡ ᐊᓂᔮᔨᐤ ᑆᓪ, “ᓃᒋᔖᓈᓐ, ᒌ ᐙᐱᐦᑖᓐ ᑖᓐ ᐋ ᐃᔥᐱᔥ ᒥᐦᒑᑎᐦᒡ ᐋᒄ ᒎᐤ ᐄᔨᔨᐅᒡ ᐋ ᑖᑆᔮᔨᒫᒡ ᒌᓴᔅᐦ ᐅᑎᐦ ᒋᕉᓯᓕᒥᐦᒡ, ᒥᐦᒑᑣᐤ ᒋᔖᒥᑖᐦᑐᒥᑎᓂᐤ ᐋ ᐃᑎᔑᒡ᙮ ᒥᓯᐙ ᒫᒃ ᐋᔥᒄ ᓈᔥᒡ ᓈᓈᑭᑐᐙᔨᐦᑎᒸᐅᒡ ᒧᓱᔅ ᐅᐐᔓᐙᐎᓂᔨᐤ᙮ 21 ᒌ ᐄᑖᒋᒧᔥᑐᐙᑭᓂᐎᒡ ᒫᒃ ᐋ ᒋᔅᑯᑎᒫᒥᑦ ᐊᓂᔮᔨᐤ ᒎᐤ ᑳ ᐐᒋᔨᒡ ᐊᓂᑖᐦ ᐋᑳ ᑳ ᒎᐤ ᐄᑎᔅᑳᓈᓰᔨᒡ ᐋᐦ ᑖᔨᒡ ᒑᐦ ᐋᑳ ᐃᔮᐱᑖᔨᐦᑎᒥᐦᐄᑯᔨᒡ ᒧᓱᔅ ᐅᐐᔓᐙᐎᓂᔨᐤ, ᐋᐦ ᐄᑎᑎᑣᐤ ᒑᐦ ᐋᑳ ᒋᔅᒋᓄᐙᒋᔣᒡ ᐅᑎᐙᔑᔒᒥᐙᐤᐦ ᑭᔮᐦ ᒑᐦ ᐋᑳ ᐃᔮᐱᑖᔨᐦᑎᐦᒡ ᒎᐤ ᐃᔨᐦᑎᐎᓐ᙮ 22 ᐅᒌ ᒫᒃ ᒎᐤ ᐄᔨᔨᐅᒡ ᓈᔥᒡ ᑳ ᓂᓈᑭᑎᐙᔨᐦᑎᒸᒡ ᒧᓱᔅ ᐅᐐᔓᐙᐎᓂᔨᐤ ᒑᔥᑎᓈᔥ ᑭᑎ ᐹᐦᑎᒧᒡ ᐋ ᒌ ᑎᑯᔑᓅᑦ᙮ ᑖᓐ ᒑ ᑎᔨᐦᒄ ᒫᒃ? 23 ᑐᑎᐦ ᒫᒃ ᐆ ᒑ ᐄᑎᑖᐦᒡ᙮ ᓈᐆᒡ ᓈᐹᐅᒡ ᐅᑎᐦ ᐋᐦ ᑖᒡ ᐋᐦᑎᑯᓃᔨᒡ ᑖᓐ ᐙᐦ ᐄᔑ ᒑᔥᑎᓈᔥ ᑎᐱᑑᑎᐦᒡ ᐹᔨᒄ ᐊᓂᔮᔨᐤ ᒎᐤ ᐊᔨᒥᐦᐋᐎᓐ ᐃᔨᐦᑎᐎᓂᔨᐤ, ᑖᓐ ᐋ ᐄᔑ ᓂᑎᐙᔨᐦᑖᑯᓃᔨᒡ ᐊᓂᑖᐦ ᒧᓱᔅ ᐅᐐᔓᐙᐎᓃᐦᒡ ᒑ ᑐᑖᑭᓂᐎᔨᑯᐱᓈ᙮ 24 ᐐᒑᐅᒡ ᒫᒃ ᐅᒌ ᓈᐹᐅᒡ ᐊᓂᑖᐦ ᒎᐤ ᒋᔖᐊᔨᒥᐦᐋᐅᑭᒥᑯᐦᒡ ᐋ ᓂᑑᐱᔮᐦᒋᐦᐄᓱᔮᒄ, ᒑ ᒌ ᑎᐱᐦᐆᑣᐤ ᐊᓂᔮᔨᐤ ᒑ ᐃᔥᐱᔥ ᑎᐱᐦᐅᓱᐙᑯᐱᓐ, ᐋᒄ ᒫᒃ ᒑ ᒌ ᑳᔅᒋᐹᑖᑭᓅᐎᒡ ᐅᔥᑎᒀᓂᐙᐤ᙮ ᐋᒄ ᒫᒃ ᒑ ᐙᐱᐦᑎᔨᐙᔨᓐ ᐋᔥᒄ ᐋ ᒋᔅᑖᔨᐦᑎᒧᑦ ᒧᓱᔅ ᐅᐐᔓᐙᐎᓐ ᑭᔮᐦ ᒑ ᒋᔅᒑᔨᐦᑖᑯᐦᒡ ᐋ ᒌ ᓂᓂᑎᔮᒋᒧᓈᓂᐎᒡ ᐊᓐ ᑳ ᐄᑖᒋᒥᑭᐎᔨᓐ ᐋᐦᐋᑳ ᐃᔮᐱᑖᔨᐦᑎᒧᑦ ᒧᓱᔅ ᐅᐐᔓᐙᐎᓐ᙮ 25 ᐋᒄ ᐊᓂᒌ ᐋᑳ ᑳ ᒎᐤ ᐄᑎᔅᑳᓈᓯᒡ ᑳ ᑖᑆᐦᑎᐦᒡ, ᓂᒌ ᒥᓯᓂᐦᐋᒧᐙᓈᓂᒡ ᒫᒃ ᐋ ᐐᐦᑎᒧᐎᒋᐦᒡ ᑖᓐ ᑳ ᐄᔑ ᐎᔮᔨᐦᑎᒧᒋᐦᑦ ᒑ ᒌ ᐄᔑ ᓈᓈᑭᒋᐦᑖᒡ, ᐋᔪᐎᒄ ᐊᓂᔮᔨᐤ ᐋᑳ ᒑ ᒌ ᒦᒋᒡ ᒑᒀᔨᐤ ᐋᐦ ᐄᔅᑯᐱᔨᔨᒡ ᐋ ᒌ ᒥᒋᔥᑎᐦᐋᒧᐙᑭᓂᐎᔨᒡ ᒥᓂᑑᐦᑳᓐ, ᑭᔮᐦ ᐋᑳ ᒑ ᒌ ᒦᒋᒡ ᒥᐦᑯᔨᐤ ᑭᔮᐦ ᐋᑳ ᒑ ᒌ ᒧᐙᒡ ᐊᐅᐦᑳᓐ ᐋ ᒌ ᒋᐳᑖᒫᐱᐦᑳᑎᒫᑭᓂᐎᔨᒡ ᑭᔮᐦ ᐋᑳ ᒑ ᒌ ᐱᓯᒀᑎᓰᔨᒡ᙮”

26 ᒦᓐ ᐎᔮᐱᓃᔨᒡ ᒌ ᐐᒑᐙᐤ ᐊᓂᔮᔨᐤ ᓈᐤ ᓈᐹᐤ ᒑ ᒌ ᐱᔮᐦᒋᐦᐄᒫᑭᓂᐎᔨᒡ᙮ ᒌ ᐄᑐᐦᑖᐤ ᑭᔮᐦ ᐐᔨ ᑆᓪ ᐊᓂᑖᐦ ᒎᐤ ᐅᒋᔖᐊᔨᒥᐦᐋᐅᑭᒥᑯᔨᒡ᙮ ᐋᒄ ᑳ ᐐᐦᑎᒧᐙᑦ ᐊᓂᔮᔨᐤ ᐊᓂᑖᐦ ᐊᔨᒥᐦᐋᐅᑭᒥᑯᐦᒡ ᑳᐦ ᐋᐱᑎᓰᔨᒡ ᑖᓐ ᑎᐦᑐ ᒌᔑᑳᐤᐦ ᐃᔮᒄ ᒋᐦᒋᐙ ᒋᐱᐦ ᒌᔑᐱᔨᐤ ᐊᓂᔮᔨᐤ ᑳ ᐐᐦ ᐄᔑ ᓈᓈᑭᑎᐙᔨᐦᑎᒥᐦᐄᑯᒡ ᒑ ᒌ ᑎᒡ᙮ ᑭᔮᐦ ᒫᒃ ᐋᑯᑖᐦ ᐊᓂᑎᐦ ᒋᐱᐦ ᑎᑯᓂᔨᐤ ᑖᔨᔅᐱ ᓂᐦᐋᐤ ᒑᒥᒋᔅᑎᐦᐋᒫᐙᐙᑯᐱᓈ ᒑᒀᔨᐤ ᒥᓯᐙ ᐊᓂᑎᐦ ᐋ ᐃᑎᔑᒡ᙮

27 ᔖᔥ ᒑᑳᑦ ᒌ ᒋᓯᐦᑖᐅᒡ ᐋ ᐲᔮᐦᒋᐦᐄᓯᐎᒡ, ᓃᔣᔥᒡ ᑎᐦᑐ ᒌᔑᑳᐤᐦ ᒫᒃ ᐹᑎᒫ ᒎᐤ ᑳ ᐄᑎᔅᑳᓈᓯᒡ ᐊᓂᑖᐦ ᐋᐃᔖ ᐋ ᐅᐦᒌᒡ ᒌ ᐙᐱᒫᐅᒡ ᑆᓪ ᐊᓂᑖᐦ ᒎᐤ ᒋᔖᐊᔨᒥᐦᐋᐅᑭᒥᑯᐦᒡ᙮ ᐋᒄ ᑳᐦ ᑑᑎᐎᒡ ᐊᓂᔮᔨᐤ ᐄᔨᔨᐤᐦ ᒑ ᒌ ᒋᔑᐙᓰᔅᑐᐙᔨᒡ ᐊᓂᔮᔨᐤ ᑆᓪ, ᐋᒄ ᑳ ᐅᑎᓈᔨᒡ᙮ 28 ᒌ ᑖᑆᐅᒡ ᒫᒃ, ᐅᔮᔨᐤ ᐋᐦ ᐃᔨᒡ, “ᒌᔨᐙᐤ ᓈᐹᑐᒄ ᐃᔅᕋᐃᓚᐦᒡ ᑳ ᐅᐦᒋᔮᒄ, ᐹᒋ ᐐᒋᐦᐄᓈᓐ, ᐋᐅᒄ ᐆ ᓈᐹᐤ ᒥᓯᐙ ᑳ ᐊᐄᑐᐦᑖᑦ ᐋ ᒋᔅᑯᑎᒧᐙᑦ ᒥᓯᐙ ᐊᐙᔨᐤᐦ ᒑᐦ ᐋᑳ ᐃᔮᐱᑖᔨᒫᔨᒡ ᐃᔅᕋᐄᓪ ᐄᔨᔨᐤ, ᑭᔮᐦ ᒧᓱᔅ ᐅᐐᔓᐙᐎᓂᔨᐤ ᑭᔮᐦ ᒫᒃ ᐅᔮᔨᐤ ᒋᔖᐊᔨᒥᐦᐋᐅᑭᒥᑯᔨᐤ ᓂᒧᐃ ᐃᔮᐱᑖᔨᐦᑎᒻ᙮ ᐙᐙᒡ ᑭᔮᐦ ᒌ ᐹᒋ ᐲᐦᑎᑭᐦᐋᐤ ᒫᓂᑖᐤ ᐋᐦᐋᑳ ᒎᐤ ᐄᑎᔅᑳᓈᓰᔨᒡ ᐅᑎᐦ ᒋᔖᐊᔨᒥᐦᐋᐅᑭᒥᑯᐦᒡ ᐊᓂᔮᔨᐤ ᐋᑳ ᒑ ᐲᐦᒑᔨᑯᐱᓈᓂᐦᐄ ᐅᑎᐦ᙮ ᐅᔮᔨᐤ ᒫᒃ ᑳᐦ ᑎᒃ ᓈᔥᒡ ᒫᔮᔨᐦᑎᒻ ᐊᓂᔮᔨᐤ ᐊᓂᑎᐦ ᒫᐅᒡ ᑳ ᐱᔮᐦᑭᓃᔨᒡ᙮” 29 ᐋᔪᐎᒄ ᐙᐦᒋ ᐃᔨᒡ ᐅᔮᔨᐤ ᐙᔥ ᒌ ᐙᐱᒫᐅᒡ ᒫᓂᑖᐤ ᐋᐦᐋᑳ ᒎᐤ ᐄᑎᔅᑳᓈᓰᔨᒡ ᑦᕎᕕᒥᔅ ᐋ ᐃᔑᓂᐦᑳᓱᔨᒡ ᐊᓂᑖᐦ ᐁᕕᓱᓯᐦᒡ ᐋ ᐅᐦᒌᔨᒡ ᐋ ᐐᒑᐙᔨᒡ ᐊᓂᔮᔨᐤ ᑆᓪ ᐊᓂᑖᐦ ᐃᐦᑖᐎᓂᐦᒡ, ᓂᑎᐐ ᐋ ᒌ ᐄᑖᔨᒫᒡ ᑆᓪ ᐋ ᒌ ᐲᐦᑎᑭᐦᐋᔨᒡ ᐊᓂᔮᔨᐤ ᒫᓂᑖᐤ ᐊᓂᑖᐦ ᒋᔖᐊᔨᒥᐦᐋᐅᑭᒥᑯᐦᒡ᙮

30 ᒧᔮᒻ ᒫᒃ ᒥᓯᐙ ᐊᐙᓐ ᐊᓂᑎᐦ ᒋᕉᓯᓕᒥᐦᒡ ᐋ ᐙᐙᓈᔨᐦᑎᐦᒃ ᒌ ᐄᑖᔨᐦᑖᑯᓐ᙮ ᓂᓈᐦᑭᐤ ᒌ ᐅᐦᒋᐱᐦᐄᑑᒡ ᐄᔨᔨᐅᒡ᙮ ᐋᒄ ᑳ ᐅᑎᓈᑭᓅᑦ ᑆᓪ, ᑳ ᐎᔨᐐᑖᐹᑖᑭᓅᑦ ᐊᓂᑎᐦ ᐊᔨᒥᐦᐋᐅᑭᒥᑯᐦᒡ᙮ ᑏᐙᐦᒡ ᒫᒃ ᒌ ᐋᑎ ᒋᐳᐦᐙᑭᓂᐎᒡ ᐊᓂᒌ ᒋᔖᐊᔨᒥᐦᐋᐅᑭᒥᑯᒡ ᒋᔥᑐᐦᑭᓂᒡ᙮ 31 ᐊᓂᒌ ᒫᒃ ᐄᔨᔨᐅᒡ ᑳ ᐅᑎᓈᒡᐦ ᑆᓪ ᐋᑯᑖᐦ ᑳ ᐐᐦ ᐋᑎ ᓂᐱᐦᐋᒡ᙮ ᒫᒀᒡ ᒫᒃ ᐋ ᐃᔥᐱᔒᐦᑯᐙᒡ ᐊᓂᔮᔨᐤ ᐋ ᐐ ᓂᐱᐦᐋᒡ, ᐊᓐ ᕎᒻ ᓂᑐᐱᔫᒋᒫᐤ ᒌ ᐹᐦᑎᒻ ᑖᓐ ᐋ ᐄᔑ ᒥᒋᐱᔨᓈᓂᐎᔨᒡ ᐊᓂᑖᐦ ᒋᕉᓯᓕᒥᐦᒡ᙮ 32 ᑏᐙᐦᒡ ᒫᒃ ᒌ ᐄᔥᐱᐦᐄᑑᒡ ᐋ ᐐᒋᐱᐦᑖᒫᑦ ᐊᓂᔮᔨᐤ ᐋᓂᑐᐱᔪᒋᒫᐤ ᑭᔮᐦ ᓂᑐᐱᔨᐤ ᐊᓂᑎᐦ ᐊᓂᔮᔨᐤ ᐋᐦᑖᓂᐎᔨᒡ ᐋᒥᐦᒑᑎᓈᓃᐎᔨᒡ᙮ ᐄᔥᐱᐦ ᒫᒃ ᐎᔮᐱᒥᑯᒡ ᐊᓂᔮᔨᐤ ᐄᔨᔨᐤᐦ ᒌ ᐴᓂᔨᐤ ᐋ ᑯᓰᐦᑯᐙᔨᒡ ᐊᓂᔮᔨᐤ ᑆᓪ᙮ 33 ᐋᒄ ᐊᓐ ᓂᑐᐱᔫᒋᒫᐤ ᑳ ᓂᑎᐙᐱᒫᑦ ᐊᓂᔮᔨᐤ ᑆᓪ ᐋᒄ ᑳ ᐅᑎᓈᑦ᙮ ᑳᐦ ᐄᑎᔓᐙᑦ ᒑ ᒌ ᒥᒫᐦᒋᒀᐱᐦᑳᑖᑭᓂᐎᔨᒡ, ᓃᔓ ᐴᓂᓯᓈᓱᓈᔮᐲ ᐋᐦ ᐋᐱᑎᓃᔨᒡ᙮ ᐋᒄ ᑳᐦ ᐃᔨᑦ, “ᒑᒄ ᓈᐹᐤ ᐆ, ᑖᓐ ᑳᐦ ᑎᒃ?”

34 ᐊᓂᒌ ᒫᒃ ᐄᔨᔨᐅᒡ ᐊᓂᑎᐦ ᑳᐦ ᑖᒡ ᒌ ᓂᔥᑰᔑᐦᐋᐅᒡ ᐋ ᑖᑆᒡ᙮ ᐋᒄ ᒥᒄ ᓂᒧᐃ ᐹᔨᑯᓂᐦᒡ ᐅᐦᒋ ᐃᔨᐅᒡ, ᑯᑎᑭᒡ ᐃᔨᐦᒡ ᐋᐦ ᐃᔨᒡ ᑖᓐ ᐃᔮᔨᒡ ᐊᓂᔮᔨᐤ ᑯᑎᒃ᙮ ᐋᒄ ᑭᔨᑆ ᓂᒥ ᓂᐦᐋᐤ ᐅᐦᒌ ᓂᔅᑐᐦᑎᒻ ᐊᓐ ᓂᑐᐱᔫᒋᒫᐤ ᑖᓐ ᓂᐦᐋᐤ ᑳ ᐊᔨᑎᓈᓂᐎᔨᒡ, ᐋᒄ ᒥᒄ ᑳᐦ ᐄᑎᔓᐙᑦ ᒑ ᒌ ᐲᐦᑎᑭᐦᐄᒫᑭᓂᐎᔨᒡ ᑆᓪ ᐊᓂᑖᐦ ᓂᑐᐱᔪᑭᒥᑯᐦᒡ᙮ 35 ᐊᓂᒌ ᒫᒃ ᓂᑐᐱᔫᒡ ᐄᔥᐱᐦ ᒑ ᐋᑎᐃᔅᒀᐦᑎᐐᒡ ᒑ ᒌ ᐲᐦᑎᑭᐦᐋᒡ ᑆᓪ ᐊᓂᑖᐦ, ᐄᔨᐙ ᒑᒃ ᒌ ᐅᐦᐱᓈᐅᒡ ᑳ ᐃᔥᐱᔥ ᓈᓈᓂᒌᒻ ᒌ ᐊᐦᒀᑖᔨᐦᑖᑯᓰᔨᒡ ᐊᓂᔮᔨᐤ ᐄᔨᔨᐤᐦ᙮ 36 ᐊᓂᑖᐦ ᐅᑖᐦᒡ ᒌ ᐹᒋ ᐱᒨᐦᑖᐅᒡ ᐊᓂᒌ ᐄᔨᔨᐅᒡ ᐋ ᑖᑆᒡ ᐋᐦ ᐃᔨᒡ, “ᓂᐱᐦᐋᐦᒄ ᐊᓐ ᓈᐹᐤ᙮ ᓂᐱᐦᐋᒄ᙮”

37 ᒫᒀᒡ ᒫᒃ ᐊᓂᔮᔨᐤ ᐋ ᐐᐦ ᐲᐦᑎᑭᐦᐋᑭᓅᑦ ᑆᓪ ᐊᓂᑖᐦ ᓂᑐᐱᔪᑭᒥᑯᐦᒡ ᒌᐦ ᐄᑖᐤ ᐊᓂᔮᔨᐤ ᓂᑐᐱᔫᒋᒫᐤ, “ᒋᑭ ᒌ ᐄᑎᓈ ᒑᒀᓐ?” ᐋᒄ ᑳᐦ ᐄᑎᑯᑦ, “ᒃᕇᒃ ᐋ ᒋᑎ ᐄᔑ ᐋᔨᒥᓐ? 38 ᓂᒥᔮᐤ ᐋ ᒌᔨ ᐊᓐ ᓈᐹᐤ ᐄᒋᑉᑦ ᑳᐦ ᐄᑎᔅᑳᓈᓯᑦ ᐅᑖᐦ ᐄᔑ ᐅᑖᐦᒡ, ᑳ ᒋᐦᒋᐱᔨᐦᑖᑦ ᐋ ᓂᔅᑯᑖᒫᑭᓂᐎᔨᒡ ᒋᐦᒋᐅᒋᒫᐤ ᑭᔮᐦ ᑳ ᓃᑳᓂᔥᑭᐙᑦ ᓈᐙᐤ ᒋᔖᒥᑖᐦᑐᒥᑎᓂᐤ ᒥᒋᓂᑐᐱᔨᐤ, ᐊᓂᑖᐦ ᒫᒃ ᐱᑯᑎᔅᑭᒥᑳᐦᒡ ᑳ ᐄᑐᐦᑎᐦᐋᑦ?”

39 ᐋᒄ ᑆᓪ ᑳᐦ ᐄᑖᑦ, “ᓂᒥᔮᐤ ᓃᔨ᙮ ᒎᐤ ᓂᑎ ᐄᑎᔅᑳᓈᓯᓐ ᓃᔨ ᐐᐦ, ᓯᓕᓯᔮ ᑳ ᐃᔑᓂᐦᑳᑖᒡ ᐊᔅᒌ ᓅᐦᒌᓐ ᐊᓂᑖᐦ ᑖᕐᓯᔅ ᑳ ᐃᔑᓂᐦᑳᑖᒡ ᐃᐦᑖᐎᓐ ᐋᑯᑖᐦ ᒫᓯᓈᓱᔮᓐ ᐙᒋᐦᒡ ᐋ ᐅᐦᒋᔮᓐ᙮ ᒋᐦᒋᐙ ᐋ ᒋᔅᑖᔨᐦᑖᑯᒡ ᐃᐦᑖᐎᓐ ᐄᔑ ᑭᓂᐙᐱᐦᑖᑭᓂᐤ ᑖᕐᓯᔅ᙮ ᐹᒋ ᒥᔨ ᒫᐦ ᒑ ᒌ ᐊᔨᒥᐦᐄᒀᐤ ᐅᒌ ᐄᔨᔨᐅᒡ᙮”

40 ᐋᒄ ᑳ ᐱᒋᔅᑎᓂᑯᑦ ᐊᓂᔮᔨᐤ ᓂᑐᐱᔫᒋᒫᐤ ᒑ ᒌ ᐊᔨᒥᑦ᙮ ᐋᒄ ᑆᓪ ᑳ ᑎᐦᑯᐦᒋᑳᐳᐎᑦ ᐊᓂᑎᐦ ᐋ ᐅᐦᒋ ᓵᑭᒋᐙᓂᐎᔨᒡ᙮ ᑳ ᐅᐦᐱᓂᔅᒑᔨᑦ ᐋ ᓂᑎᐙᔨᒫᑦ ᐊᓂᔮᔨᐤ ᐄᔨᔨᐤᐦ ᒑᐦ ᐋᑳ ᒋᔅᑑᔨᒡ᙮ ᐄᔥᐱᐦ ᒫᒃ ᐋᑳ ᒑᔅᑐᔨᒡ, ᐋᒄ ᑳ ᐊᔨᒥᐦᐋᑦ ᐦᐄᑉᕉ ᐋ ᐄᔑ ᐊᔨᒥᑦ᙮