2
ᑆᓪ ᑳ ᓂᒋᔥᑭᐙᑦ ᒌᓴᔅᐦ ᐅᒋᔅᒋᓂᐦᐊᒧᐙᑭᓂᔨᐤᐦ
ᓈᐅᔖᑉ ᑎᐦᑐ ᐱᐳᓐ ᐹᑎᒫ ᐋᒄ ᒦᓐ ᒋᕉᓯᓕᒥᐦᒡ ᑳ ᐄᑐᐦᑖᔮᓐ᙮ ᐹᕐᓂᐱᔅ ᑭᔮᐦ ᑖᐃᑎᔅ ᓂᒌ ᐐᒑᐅᑯᒡ᙮ ᒋᔖᒥᓂᑑ ᓂᒌᐙᐱᐦᑎᔨᒄ ᐋ ᓂᑎᐙᔨᒥᑦ ᐊᓂᑖᐦ ᒑ ᒌ ᐄᑐᐦᑖᐅᒡ᙮ ᑳ ᑎᑯᔑᓂᔮᓐ ᒫᒃ ᐊᓂᑖᐦ ᓃᔨ ᑭᔮᐦ ᐊᓂᒌ ᑳ ᓃᑳᓂᐦᐋᑭᓂᐎᒡ ᑳ ᑖᑆᐦᑎᐦᒡ ᑎᐹᓐ ᓂᒌ ᓂᔥᑐᐐᓈᓐ᙮ ᓂᒌ ᐐᐦᑎᒧᐙᐅᒡ ᑖᓐ ᓂᐦᐋᐤ ᑳᐦ ᐃᔨᐅᒡ ᑳ ᑭᒑᔅᒋᒥᒡ ᒥᔻᒋᒧᐎᓂᔨᐤ ᐊᓂᔮᔨᐤ ᐋᑳ ᒎᐤ ᐄᑎᔅᑳᓈᓰᔨᒡ᙮ ᐙᔥ ᓂᒌᑯᔅᑖᒋᓐ ᒑ ᒌ ᑎᑯᔨᓂᑯᐱᓈ ᒑᒀᔨᐤ ᐋᐦᐋᑳ ᓃᔅᑳᑯᒡ, ᒑᔅᑳᐦ ᓂᑎᐐ ᒋᐱᐦ ᐃᓯᓈᑯᓐ ᑖᓐ ᑳ ᐄᔑ ᐹᒋ ᑳ ᒑᔅᒀᔮᓐ ᐊᓂᑖᐦ ᐅᑖᐦᒡ ᑭᔮᐦ ᐊᓅᐦᒡ᙮ ᒋᓂᔅᑰᒨᒡ ᐊᓂᒌ ᑳ ᓃᑳᓂᔒᒡ ᐊᓂᔮᔨᐤ ᑳ ᐄᔑ ᒋᔅᑯᑎᒫᒥᒡ ᐊᓂᔮᔨᐤ ᐋᐦᐋᑳ ᒎᐤ ᐄᑎᔅᑭᓈᓰᔨᒡ᙮ ᑖᐃᑎᔅ ᑭᔮᐦ ᐋᐦᐋᑳ ᒎᐤ ᐄᔨᔨᐅᑦ, ᑰᕇᒃ ᐋ ᐄᑎᔅᑳᓈᓯᑦ, ᐊᓐ ᑳ ᐹᒋ ᐐᒑᐅᑦ, ᓂᒧᐃ ᐅᐦᒋ ᐐᐦ ᐋᔨᐦᑭᒥᐦᐄᑯᒡ ᒑ ᒌ ᒋᔅᒋᓄᐙᒋᔣᒫᑭᓂᐎᒡ᙮ ᒥᒄ ᒫᒃ ᒌᐦ ᑖᐅᒡ ᓈᐹᐅᒡ ᐋ ᒌ ᐹᒋ ᐲᐦᑖᐱᔨᐦᐅᒡ ᐊᓂᑎᐦ ᐋᐦᑖᐎᒋᐦᑦ ᒧᔮᒻ ᐋ ᑖᑆᔮᔨᒫᒡ ᑭᔮᐦ ᐐᔨᐙᐤ ᒌᓴᔅᐦ ᐋ ᒌᐦ ᑎᒡ᙮ ᒋᐐᐦ ᓈᓂᑐ ᒋᔅᒑᔨᒥᑯᓈᓂᒡ ᑖᓐ ᑳ ᐃᓯᓈᑯᓃᔨᒡ ᑳ ᐱᑯᐅᐦᒋᐦᒡ ᙭ ᒌᓴᔅᐦ ᐄᔑ, ᐙᔥ ᓂᒌ ᐐᓰᐦᒋᒥᑯᓈᓂᒡ ᔮᔨᑖᐃ ᒑ ᒌ ᑐᑖᒥᒋᐦᒡ ᒥᓯᐙ ᐊᐙᔨᐤᐦ ᑭᔮᐦ ᐊᓂᔮᔨᐤ ᐋᑖᑳ ᒎᐤ ᐄᑎᔅᑳᓈᓰᔨᒡ ᒑ ᑐᑎᒥᔨᒡ ᐅᔮᔨᐤ ᒦᓐ ᒫᒃ ᒑ ᒌ ᒫᐦᒋᒀᐱᐦᑳᑎᑯᒋᐦᒡ ᐊᓂᔮᔨᐤ ᒥᓯᐙ ᒎᐤ ᐆ ᐐᔓᐙᐎᓂᔨᐤ᙮ ᓂᒧᐃ ᒫᒃ ᒥᑐᓐ ᓅᐦᒋ ᓂᔅᑯᒧᐙᓈᓐ ᒑ ᒌ ᑑᐎᒋᐦᑦ ᐊᓂᔮᔨᐤ ᑳ ᐄᔑ ᓂᑎᐙᔨᒥᔨᒥᐦᒡ ᒑ ᒌ ᑑᐎᒋᐦᑦ ᐙᔥ ᓂᐐᐦ ᒥᔪ ᑭᓂᐙᔨᐦᑖᓈᓐ ᑖᓐ ᐋ ᐄᔑ ᑖᑆᒥᑭᐦᒡ ᒥᔻᒋᒧᐎᓐ ᒌᔨᐙᐤ ᒑ ᒌ ᒋᔅᒑᔨᐦᑎᒫᒄ᙮
ᒨᔮᒻ ᑳᐦ ᐄᔮᓐ ᐊᓂᒌ ᑳ ᓃᑳᓂᔥᑳᒑᒡ, ᒋᔅᑖᔨᐦᑖᑯᓯᐎᒡ ᒌ ᐄᑖᔨᒫᑭᓂᐎᒡ᙮ ᓂᒧᐃ ᒫᒃ ᒑᒀᓐ ᓂᑎᐄᑖᔨᐦᑎᒸᓐ ᑖᓐ ᐋ ᐄᑖᔨᒫᑭᓂᐎᒡ ᓃᔨ ᐐ᙮ ᐙᔥ ᒥᓯᐙ ᐊᐙᔨᐤᐦ ᐹᔨᑯᓂᐦᒡ ᐄᑖᔨᒫᐤ ᐐᔨ ᒋᔖᒥᓂᑑ᙮ ᒌ ᓂᐦᐋᔨᐦᑎᒧᒡ ᐋ ᐙᐐᐦᑎᒧᒡ ᒥᔻᒋᒧᐎᓂᔨᐤ, ᓂᒧᐃ ᐅᐦᒋ ᑎᑯᓂᔨᐤ ᐊᑎᑎᐤ ᒑ ᒌᐦ ᐄᔨᒡ ᒑᒀᔨᐤ ᐊᓂᔮᔨᐤ ᑳ ᐄᔑ ᑳᒑᔅᒀᐆᒡ ᒥᔻᒋᒧᐎᓂᔨᐤ᙮ ᑭᔮᐦ ᒌ ᓂᔅᑐᐦᑎᒧᒡ ᒋᔖᒥᓂᑑ ᐋ ᒌ ᒥᔨᒡ ᒑ ᒌ ᐋᐱᑎᔒᔥᑎᒧᒡ ᒥᔻᒋᒧᐎᓂᔨᐤ ᐋ ᐙᐐᐦᑎᒫᒥᒡ ᐊᓂᔮᔨᐤ ᐋᑳ ᑳ ᒎᐤ ᐄᑎᔅᑳᓈᓰᔨᒡ, ᒧᔮᒻ ᑖᓐ ᑳ ᐄᔑ ᒥᔮᔨᒡ ᐲᑎᕐ ᐋᐱᑎᓰᐎᓂᔨᐤ ᐊᓂᔮᔨᐤ ᒎᐤ ᑳᐦ ᐄᑎᔅᑳᓈᓰᔨᒡ ᒑ ᒌ ᐙᐐᐦᑎᒧᐙᔨᒡ ᒥᔻᒋᒧᐎᓂᔨᐤ᙮ ᒋᔖᒥᓂᑑ ᒌ ᒥᔮᐤ ᐲᑎᕐ ᑭᔅᒋᐦᐅᐎᓂᔨᐤ ᐊᑆᔅᑎᓪ ᒑ ᒌ ᐄᑖᐱᑎᓰᔨᒡ, ᐊᓂᔮᔨᐤ ᒎᐤ ᑳᐦ ᐄᑎᔅᑳᓈᓰᔨᒡ ᒑ ᐙᐐᐦᑎᒧᐙᔨᒡ ᒥᔻᒋᒧᐎᓂᔨᐤ, ᒧᔮᒻ ᑳ ᐄᔑ ᒥᔨᑦ ᐊᑆᔅᑎᓪ ᒑ ᒌ ᐄᑖᐱᑎᓰᔨᒡ ᐊᓂᑖᐦ ᐊᓂᔮᔨᐤ ᐋᑳ ᒎᐤ ᐄᑎᔅᑳᓈᓰᔨᒡ᙮ ᒉᒥᔅ, ᐲᑎᕐ ᑭᔮᐦ ᒞᓐ, ᐊᓂᒌ ᑳ ᓃᑳᓂᐦᐋᑭᓂᐎᒡ ᑭᔮᐦ ᒫᐅᒡ ᑳ ᒋᔥᑖᔨᒫᑭᓂᐎᒡ, ᒌ ᒋᔅᒑᔨᐦᑎᒧᒡ ᒋᔖᒥᓂᑑ ᐋ ᒌ ᒥᔨᒡ ᐅᔮᔨᐤ ᒑ ᒌ ᐄᑖᐱᑎᓯᐎᒡ᙮ ᐋᒄ ᒫᒃ ᐹᕐᓂᐱᔅ ᐋ ᓃᔑᔮᐦᒡ ᑳ ᐅᑎᓂᔅᒑᓃᔨᒥᐦᒡ ᐅᒌ ᐋ ᓂᔥᑎᒡ᙮ ᐋ ᓅᑯᐦᑖᔮᐦᒡ ᐹᔨᑯᓂᐦᒡ ᐋ ᐄᔑᑳᐴᔮᐦᒡ᙮ ᒫᐤ ᒫᒃ ᑳ ᐄᔑ ᓂᔅᑯᒧᔮᐦᒡ᙮ ᐹᕐᓂᐱᔅ ᐋ ᓃᔑᔮᐦᒡ ᐊᓂᒌ ᐋᑳ ᑳ ᒎᐤ ᐄᑎᔅᑳᓈᓯᒡ ᒑ ᐙᐐᐦᑎᒧᐎᒋᐦᒡ ᒥᔻᒋᒧᐎᓂᔨᐤ ᐋᒄ ᒫᒃ ᐐᔨᐙᐤ ᐊᓂᔮᔨᐤ ᒎᐤ ᑳᐦ ᐄᑎᔅᑳᓈᓰᔨᒡ ᒑ ᐙᐐᐦᑎᒧᐙᒡ᙮ 10 ᒥᒄ ᐹᔨᒄ ᒑᒀᔨᐤ ᓂᒌ ᐱᑯᓵᔨᒥᑯᓈᓂᒡ᙮ ᓂᒌ ᓂᑎᐙᔨᒥᑯᓈᓂᒡ ᒑ ᒌ ᐙᐐᒋᐦᐄᒥᒋᐦᒡ ᐊᓂᔮᔨᐤ ᑳ ᒋᔅᑎᒫᑎᓰᔨᒡ ᐊᓂᑎᐦ ᒋᕉᓯᓕᒥᐦᒡ ᑳᐦ ᑖᔨᒡ᙮ ᐋᐅᒄ ᒫᒃ ᐆ ᓈᔥᒡ ᑳ ᐄᑖᔨᐦᑎᒥᐦᐄᑯᔮᓐ ᔮᔨᑖ ᒑ ᒌᐦ ᑎᔮᓐ᙮
ᑆᓪ ᑳᐦ ᐋᓍᔨᒫᑦ ᐲᑎᕐ ᐊᓂᑖᐦ ᐋᓐᑎᔻᑭᐦᒡ
11 ᐋᓐᑎᔻᑭᐦᒡ ᒫᒃ ᑳ ᑎᑯᔑᐦᒃ ᐲᑎᕐ ᒌᐦ ᑎᑯᓂᔨᐤ ᑳ ᐄᔑ ᐋᑳ ᓂᐦᐋᔨᐦᑖᒥᐦᐄᑦ ᑭᔮᐦ ᐊᓐ ᒌᐦ ᐄᑖᐤ᙮ ᐙᔥ ᒌᐦ ᑎᑯᓂᔨᐤ ᑖᑆᐦ ᑖᓐ ᑳ ᐄᔑ ᐎᓂᐱᔨᑦ᙮ 12 ᓂᒧᐃ ᐎᔮᔥ ᐅᐦᒋ ᐄᑖᔨᐦᑎᒻ ᐋ ᐐᒋᒦᒋᓲᒫᑦ ᒫᓐ ᐊᓂᔮᔨᐤ ᐋᑳ ᑳ ᒎᐤ ᐄᑎᔅᑳᓈᓰᔨᒡ ᑳ ᑖᑆᐦᑎᒥᔨᒡ᙮ ᒑᒃ ᒉᒥᔅ ᒌ ᐹᒋ ᐄᑎᔑᐦᐙᐤ ᐱᔅᒡ ᐊᓂᔮᔨᐤ ᒎᐄᔨᔨᐤ ᑳ ᑖᑆᐦᑎᒥᔨᒡ᙮ ᒌ ᐄᑖᔨᐤ ᒥᓯᐙ ᐊᐙᔨᐤᐦ ᑳ ᑖᑆᐦᑎᒥᔨᒡ ᐋᐦᐋᑳ ᒎᐤ ᐄᑎᔅᑳᓈᓰᔨᒡ ᐊᔮᐱᒡ ᒑ ᒌ ᒋᔅᒋᓄᐙᒋᔓᒫᑭᓂᐎᔨᒡ᙮ ᐲᑎᕐ ᒌ ᑯᔥᑖᐤ ᐅᔮᔨᐤ ᒎᐤ ᐋᒄ ᓂᒧᐃ ᒦᓐ ᐅᐦᒋ ᐐᒋᒦᒋᓲᒫᐤ ᐊᓂᔮᔨᐤ ᐋᑳ ᑳ ᒎᐤ ᐄᑎᔅᑳᓈᓰᔨᒡ᙮ 13 ᐋᒄ ᒫᒃ ᐊᓂᒌ ᑯᑎᑭᒡ ᒎᐤ ᑳ ᐄᑎᔅᑳᓈᓯᒡ ᐊᓂᑎᐦ ᑳᐦ ᑖᒡ ᐋᔪᐎᒄ ᒧᔮᒻ ᑳᐦ ᑎᒡ, ᐋ ᒋᔅᒋᓄᐙᐱᒫᒡ ᐲᑎᕐ ᑖᓐ ᐋ ᐃᔨᐦᑎᔨᒡ᙮ ᐋ ᒌ ᒋᔅᒑᔨᐦᑎᒡ ᒫᒃ ᐋᑳ ᑯᐃᔅᒄ ᐃᓯᓈᑯᓃᔨᒡ ᐅᔮᔨᐤ ᒑ ᑎᐙᑯᐱᓈ᙮ ᐙᐙᒡ ᐹᕐᓂᐱᔅ ᒌ ᐋᑎ ᐊᔅᒋᐱᑖᑭᓂᐤ ᑭᔮᐦ ᐐᔨ ᐅᔮᔨᐤ ᒑ ᒌᐦ ᑎᒃ᙮ 14 ᐎᔮᐱᒥᒀᐤ ᒫᒃ ᐋᐦᐋᑳ ᑯᐃᔅᒄ ᑎᒡ ᑖᓐ ᐋᔥ ᒋᔅᒑᔨᐦᑖᑰᓃᒡ ᒋᔖᒥᓂᑑ ᐅᒥᔻᒋᒧᐎᓂᔨᐤ ᑳ ᑖᑆᒥᑭᓃᔨᒡ ᓂᒌᐦ ᐋᓍᔨᒫᐤ ᐲᑎᕐ ᒥᓯᐙ ᐊᓂᔮᔨᐤ ᑳ ᑖᑆᐦᑎᒥᔨᒡ ᐋ ᓂᑑᐦᑎᒥᔨᒡ᙮ ᓂᒌᐦ ᐄᑖᐤ, “ᒎᐤ ᒋᑎᐄᑎᔅᑳᓈᓯᓐ᙮ ᒥᒄ ᒫᒃ ᓂᒧᐃ ᒥᓯᐙ ᒌ ᓂᓂᐦᐄᐦᑖᓐ ᒎᐤ ᐊᔨᒥᐦᐋᐤ ᐐᔓᐙᐎᓐ᙮ ᒑᒀᓐ ᒫᒃ ᐙᐦᒋ ᔒᐦᒋᒥᑣᐤ ᐊᓂᒌ ᐋᑳ ᑳ ᒎᐤ ᐄᑎᔅᑳᓈᓯᒡ ᒎᐤ ᐃᔨᐦᑎᐎᓂᔨᐤ ᒑ ᒌ ᓂᓂᐦᐄᐦᑎᐦᒡ?”
ᑖᐱᔥᑯᓐ ᒎᐤ ᐄᔨᔨᐅᒡ ᑭᔮᐦ ᐊᓂᒌ ᐋᑳ ᑳ ᒎᐤ ᐄᑎᔅᑳᓈᓯᒡ ᐱᒫᒋᐦᐅᒡ ᐋ ᑖᑆᐅᒑᔨᒫᒡ ᒌᓴᔅ ᙭
15 ᒎᐤ ᓂᑎᐄᑎᔅᑳᓈᓯᓈᓐ, ᓂᒥᔮᐅᒡ ᓃᔮᓐ ᐃᔨᐦᒡ ᑳ ᐄᑎᔅᑳᓈᓯᒡ ᐄᔨᔨᐅᒡ ᑳ ᒥᒑᑎᓯᒡ, 16 ᐊᔮᐱᒡ ᒫᒃ ᓂᒋᔅᒑᔨᐦᑖᓈᓐ ᐋ ᑖᑆᔮᔨᒫᑦ ᐊᐙᓐ ᙭ ᒌᓴᔅ ᐋᑯᑖᐦ ᐙᐦᒋ ᐅᑯᐃᔅᑯᑖᑎᓰᐤ ᐄᔑ ᑭᓂᐙᐱᒥᑯᑦ ᒋᔖᒥᓂᑑ, ᓂᒧᐃ ᐐ ᐊᓂᔮᔨᐤ ᐅᐦᒋ ᐋ ᓂᓃᐦᑎᐦᒃ ᐐᔓᐙᐎᓐᐦ᙮ ᐋᒄ ᒫᒃ ᑭᔮᐦ ᓃᔮᓐ ᑎᔮᑆᔮᔨᒥᒋᐦᑦ ᙭ ᒌᓴᔅ, ᐋ ᑖᑆᔮᔨᒥᒋᐦᑦ ᒫᒃ ᙭ ᐋᑯᑖᐦ ᐙᐦᒋ ᐅᑯᐃᔅᑯᑖᑎᓰᐎᒡ ᐄᔑ ᑭᓂᐙᐱᒥᔨᒥᐦᑦ ᒋᔖᒥᓂᑑ᙮ ᓂᒧᐃ ᐐᔨ ᐊᓐ ᐋ ᓂᓂᐦᐄᐦᑎᒫᐦᒡ ᒎᐤ ᐊᔨᒥᐦᐋᐤ ᐐᔓᐙᐎᓐ ᐙᐦᒋ ᐄᔑ ᑭᓂᐙᐱᒥᔨᒥᐦᑦ ᐅᔮᔨᐤ᙮ ᑖᐹ ᐊᐙᓐ ᐅᑯᐃᔅᑯᑖᑎᓰᐤ ᒋᑭ ᐅᐦᒋ ᐄᔑ ᑭᓂᐙᐱᒥᑰ ᒋᔖᒥᓂᑑ ᒥᒄ ᐊᓂᔮᔨᐤ ᐋ ᓂᓃᐦᑎᐦᒃ ᒎᐤ ᐊᔨᒥᐦᐋᐤ ᐐᔓᐙᐎᓐ᙮ 17 ᒫᒀᒡ ᑳ ᓈᓂᑐᐙᔨᐦᑎᒫᐦᒡ ᓃᔮᓐ ᒎᐤ ᐄᔨᔨᐅᒡ ᑖᓂᑖᐦ ᒑ ᒌ ᐅᐦᒋ ᑯᐄᔅᑯᓈᑯᐦᐄᔨᒥᐦᑦ ᒋᔖᒥᓂᑑ, ᐄᔥᐱᐦ ᑎᔮᑆᔮᔨᒥᒋᐦᑦ ᙭, ᐋᑯᑖᐦ ᑳ ᐅᐦᒋ ᒋᔅᒑᔨᐦᑎᒫᐦᒡ ᑭᔮᐦ ᓃᔮᓐ ᐋ ᒥᒑᑎᓯᔮᐦᒡ᙮ ᙭ ᐋ ᒫᒃ ᑐᑎᐙᐤ ᐊᐙᔨᐤᐦ ᒑ ᒌ ᒥᒑᑎᓰᔨᒡ? ᓂᒫ᙮ 18 ᐙᔥ ᐎᔮᔅᑑᑎᒫᓈ ᒑᒀᓐ ᐋ ᒌ ᐲᑯᐱᑎᒫᓐ ᐋᑯᑖᐦ ᒑ ᐅᐦᒋ ᒋᔅᒑᔨᐦᑖᑯᓯᔮᓐ ᐋ ᒌ ᐎᓂᐦᐱᓱᔮᓐ᙮ 19 ᒫᒀᒡ ᓲᐦᒃ ᑳ ᐐᐦ ᓂᓃᐦᑎᒫᓐ ᒎᐤ ᐐᔓᐙᐎᓐ ᒑᒃ ᓂᒌ ᓂᔅᑐᐦᑖᓐ ᐋᐦᐋᑳ ᐊᓐ ᒎᐤ ᐐᔓᐙᐎᓐ ᐋ ᓂᓃᐦᑎᒫᓐ ᒑ ᐅᐦᒋ ᐅᑯᐃᔅᑯᑖᑎᓰᐤ ᐄᔑ ᐹᒋ ᑭᓂᐙᐱᒥᑦ ᒋᔖᒥᓂᑑ᙮ ᐋᒄ ᒫᒃ ᐊᓅᐦᒡ ᒧᔮᒻ ᐋ ᓂᐱᔮᓐ ᑭᔮᐦ ᐋᐦᐋᑳ ᔖᔥ ᒥᒫᒋᑯᔥᑳᑯᔮᓐ ᐊᓂᐦᐄ ᐐᔓᐙᐎᓐ ᓂᑎᐄᔑᓈᑯᓯᓐ᙮ ᐋᒄ ᒫᒃ ᑖᑆᐦ ᒑ ᒌ ᐱᒫᑎᓰᔅᑑᒃ ᒋᔖᒥᓂᑑ᙮ 20 ᐙᔥ ᒧᔮᒻ ᑖᑆᐦ ᐋ ᒌ ᐐᒋᓂᐲᒥᒃ ᙭ ᑳ ᒌᔅᑖᔅᑯᐦᐙᑭᓅᑦ ᐃᓯᓈᑯᓐ᙮ ᐊᓅᐦᒡ ᒫᒃ ᓂᒧᐃ ᔖᔥ ᓃᔨ ᓂᑎᐹᔨᐦᑖᓐ ᓂᐱᒫᑎᓰᐎᓐ᙮ ᐐᔨ ᙭ ᑎᐹᔨᑎᒻ ᓂᐱᒫᑎᓰᐎᓂᔨᐤ ᐙᔥ ᓂᐲᐦᒋᔥᑳᒄ᙮ ᐋᒄ ᒫᒃ ᐆ ᐊᓅᐦᒡ ᐋ ᐄᔑ ᐱᒫᑎᓰᔮᓐ ᓂᐱᒫᑎᓰᓐ ᐋ ᑖᑆᔮᔨᒥᒃ ᐊᓐ ᑳ ᓵᒋᐦᐄᑦ ᑭᔮᐦ ᑳ ᐱᒋᔅᑎᓂᓱᑦ ᒑ ᒌ ᓂᐱᐦᐋᑭᓅᑦ ᓃᔨ ᐅᐦᒋ, ᐋᐅᒄ ᐆ ᒋᔖᒥᓂᑑ ᐅᑯᓯᔅᐦ᙮ 21 ᓂᒧᐃ ᓂᐐ ᐋᑑᐙᔨᐦᑎᒸᓐ ᒋᔖᒥᓂᑑ ᐅᒥᔪᐦᑳᒑᐎᓐ᙮ ᐙᔥ ᒥᔔ ᐊᐙᓐ ᐅᑯᐃᔅᑯᑖᑎᓰᐤ ᐄᔑ ᑭᓂᐙᐱᒥᑯᑦ ᒋᔖᒥᓂᑑ ᒥᒄ ᐊᓂᔮᔨᐤ ᐋ ᓂᓃᐦᑎᐦᒃ ᒎᐤ ᐐᔓᐙᐎᓐ ᐅᐦᒋ, ᐋᒄ ᑭᔨᑆ ᒧᔮᒻ ᒑᔅᑳᐦ ᓂᑎᐐ ᐋ ᒌ ᐄᔑ ᓂᐱᐦᐋᑭᓅᑦ ᙭ ᒋᐱᐦ ᐃᓯᓈᑯᓐ᙮