ᐦᐄᑉᕉ
ᑳ ᒥᓯᓂᐦᐋᒧᐙᑭᓂᐎᒡ ᐦᐄᑉᕉ ᑳ ᐄᑎᔅᑳᓈᓯᒡ ᐄᔨᔨᐅᒡ
ᑖᓐ ᐋ ᐄᔑ ᐋᔨᒨᑖᒡ ᐅᑎᐦ ᐆ ᒥᓯᓂᐦᐄᑭᓐ
ᐆ ᒫᒀᒡ ᒥᓯᓂᐦᐋᒫᒑᐎᓐ ᑳ ᒥᓯᓂᐦᐄᑭᓂᐎᒡ, ᐊᓂᒌ ᑳ ᑖᑆᐦᑎᐦᒡ ᒌ ᓂᓈᐦᑭᒋᐦᐋᑭᓂᐎᒡ ᑭᔮᐦ ᒌ ᓂᐱᐦᐋᑭᓂᐎᒡ ᐊᓂᔮᔨᐤ ᐅᐦᒋ ᐋ ᑖᑆᔮᔨᒫᒡ ᒌᓴᔅᐦ᙮ ᐱᔅᒡ ᐊᓂᒌ ᒎᐤ ᐄᔨᔨᐅᒡ ᑳ ᑖᑆᐦᑎᐦᒡ ᒌ ᑯᒀᑖᔨᐦᑎᒧᒡ ᒑ ᒌ ᐴᓃᒡ ᐋ ᑖᑆᔮᔨᒫᒡ ᒌᓴᔅᐦ ᑭᔮᐦ ᒦᓐ ᒑ ᒌ ᒌᐙᓈᑎᐦᒡ ᐊᓂᔮᔨᐤ ᒎᐄᔨᔨᐤ ᐋ ᐄᔑ ᑖᑆᐦᑎᒥᔨᒡ᙮ ᐆ ᒥᓯᓂᐦᐋᒫᒑᐎᓐ ᐦᐄᑉᕉ ᑳ ᐃᔑᓂᐦᑳᑖᒡ ᒋᒥᓯᓂᐦᐄᑭᓂᐤ ᒑ ᒌ ᒋᔅᑯᑎᒧᐙᑭᓂᐎᒡ ᐊᓂᒌ ᒎᐤ ᐄᔨᔨᐅᒡ ᑳ ᑖᑆᐦᑎᐦᒡ ᐊᐅᔅᑖ ᐋ ᐄᑖᔨᐦᑖᑯᓃᔨᒡ ᐋ ᑖᑆᔮᔨᒫᑭᓂᐎᔨᒡ ᒌᓴᔅᐦ ᐃᔥᐱᔥ ᐐ ᐊᓂᔮᔨᐤ ᒎᐄᔨᔨᐤ ᑳ ᐄᔑ ᑖᑆᐦᑎᒥᔨᒡ᙮ ᓅᑯᓂᔨᐤ ᐐᔨ ᒌᓴᔅ ᒥᑐᓐ ᐋ ᒌ ᒌᔑᐦᑖᑦ ᐊᓂᔮᔨᐤ ᒎᐤ ᑖᑆᐦᑎᒧᐎᓂᔨᐤ ᐄᔥᐱᐦ ᑳ ᐱᒋᔅᑎᓂᓱᑦ ᒑ ᒌ ᓂᐱᐦᐋᑭᓅᑦ ᒥᒋᐃᐦᑣᐎᓂᐦᒡ ᐅᐦᒋ᙮ ᐄᔥᐱᐦ ᒫᒃ ᑳ ᐴᓂᐱᒫᑎᓰᑦ, ᓂᒧᐃ ᐅᐦᒋ ᓂᑎᐙᔨᐦᑖᑯᓐ ᔖᔥ ᐊᓂᐦᐄ ᐙᔥᑭᒡ ᑖᔅᑎᒥᓐᑎᐦᒡ ᑳ ᐄᔑ ᐋᔨᒨᑖᒡ ᒧᒋᔥᑖᐙᐦᐊᒫᒑᐎᓐ᙮ ᐹᔨᑯᔖᑉ ᐱᔅᑭᑎᓯᓂᐦᐄᑭᓐ ᐅᑎᐦ ᐆ ᒥᓯᓂᐦᐄᑭᓐ ᐋᑯᑖᐦ ᐃᔮᔨᒨᒫᑭᓂᐎᒡ ᐊᓂᒌ ᐄᔨᔨᐅᒡ ᑳ ᐃᔮᒡ ᑖᑆᐦᑎᒧᐎᓂᔨᐤ ᐊᓂᑖᐦ ᐙᔥᑭᒡ ᑖᔅᑎᒥᓐᑎᐦᒡ᙮ ᐋᑯᑖᐦ ᒫᒃ ᒑ ᒌ ᐅᐦᒋ ᒋᔅᑯᑎᒧᐙᑭᓂᐎᒡ ᑳ ᑖᑆᐦᑎᐦᒡ ᒑ ᐄᔑ ᑖᑆᐦᑎᒧᐙᑯᐱᓈ ᑭᔮᐦ ᒥᑐᓐ ᒑ ᒌ ᑖᑆᔮᔨᒫᒡ ᒋᔖᒥᓂᑑ᙮
1
ᑖᓐ ᑳ ᐄᔑ ᐹᒋ ᐊᔨᒥᐦᐄᑎᐦᒃ ᒋᔖᒥᓂᑑ ᐅᑯᓯᔅᐦ ᐅᐦᒋ
1 ᐊᓂᑖᐦ ᐙᔥᑭᒡ ᒋᔖᒥᓂᑑ ᒥᐦᒑᑣᐤ ᒌ ᐊᔨᒥᐦᐋᐤ ᐊᓂᔮᐦᑳ ᐋᓂᔅᒑ ᑰᐦᑖᐐᓂᐤ᙮ ᒌ ᐋᐱᒋᐦᐋᐤ ᐊᓂᔮᔨᐤ ᐅᒋᔅᒋᐙᐦᐄᒑᓯᐤᐦ ᓂᓈᐦᑭᐤ ᒑ ᒌ ᐄᔑ ᐐᐦᑎᒥᔨᒡ ᑖᓐ ᑳ ᐹᒋ ᐃᔨᑦ᙮ 2 ᐊᓅᐦᒡ ᒫᒃ, ᐅᐦᐄ ᒫᐦᒑᔨ ᐋᑎ ᒌᔑᑳᒑᐦ ᐅᑯᓯᔅᐦ ᐅᐦᒋ ᐋᑯᑖᐦ ᐙᐦᒋ ᐊᔨᒥᐦᐄᑎᐦᒄ᙮ ᐋᔨᐅᑯᓐ ᐅᔮᔨᐤ ᐅᐦᒋ ᐅᑯᓯᔅᐦ ᒋᔖᒥᓂᑑ ᑳᐦ ᐋᐱᒋᐦᐋᑦ ᒥᓯᐙ ᒑᒀᔨᐤ ᐊᐦᑖᑯᓃᔨᒡ ᑳ ᐅᔑᐦᑖᑦ ᑭᔮᐦ ᐋᔨᐅᑯᓐ ᐅᔮᔨᐤ ᑳ ᐅᐙᔮᐱᒫᑦ ᒥᓯᐙ ᒑᒀᔨᐤ ᒑ ᐋᔔ ᒥᔮᑦ᙮ 3 ᐊᓐ ᐅᑯᓯᓯᒫᐤ ᐋᐦ ᑖᑦ ᐋᑯᑖᐦ ᐙᐦᒋ ᒋᔅᒑᔨᐦᑖᑯᓃᔨᒡ ᒋᔖᒥᓂᑑ ᐅᒋᔅᑖᔨᐦᑖᑯᓯᐎᓐ ᑳ ᒌᐦᑳᔮᔥᑖᔨᒡ, ᑭᔮᐦ ᐅᑯᓯᓯᒫᐤ ᒥᑐᓐ ᓂᔅᐱᑎᐙᐤ ᑖᓐ ᐋ ᐄᑖᔨᐦᑖᑯᓰᔨᒡ᙮ ᐐᔨ ᐅᑯᓯᓯᒫᐤ ᐱᐱᒥᐲᐦᑖᐤ ᒥᓯᐙ ᒑᒀᔨᐤ ᐋᐦ ᑎᑯᓃᔨᒡ, ᐅᑎᔨᒧᐎᓐᐦ ᑳ ᓲᐦᒑᔨᐦᑖᑯᓃᔨᒡ ᐅᐦᒋ᙮ ᒌ ᐱᒋᔥᑖᔨᒥᓲ ᒑ ᒌ ᓂᐱᐦᐋᑭᓅᑦ ᒑ ᒌ ᐅᐦᒋ ᐱᔮᐦᒋᐦᐄᒫᑭᓂᐎᔨᒡ ᐊᐙᔨᐤᐦ ᐋ ᐙᐹᔨᐦᑎᒧᐙᑭᓂᐎᔨᒡ ᐅᒥᒋᐦᑣᐎᓂᔨᐤ᙮ ᐄᔥᐱᐦ ᑳ ᒌᔑᐦᑖᑦ, ᐋᒄ ᑳ ᐙᐙᔨᐱᑦ ᐊᓂᑖᐦ ᐅᓂᐦᐄᐎᓃᔨᐦᒡ ᒋᔖᒥᓂᑑ, ᐊᓂᔮᔨᐤ ᒫᐅᒡ ᐊᔅᐹᔨᐦᑖᑯᓰᔨᒡ ᒋᐦᒋᒌᔑᑯᐦᒡ᙮
ᒋᔖᒥᓂᑑ ᐅᑯᓯᔅᐦ ᐊᑎᑎᐤ ᒋᔅᑖᔨᐦᑖᑯᓯᔨᐤ ᐃᔥᐱᔥ ᐐ ᐋᓐᒋᓐᐦ
4 ᐋᔪᐎᒄ ᒫᒃ ᐊᓂᔮᔨᐤ ᐙᐦᒋ ᐊᑎᑎᐤ ᒋᔅᑖᔨᐦᑖᑯᓯᑦ ᐐᔨ ᐅᑯᓯᓯᒫᐤ ᐃᔥᐱᔥ ᐐ ᐋᓐᒋᓐᐦ᙮ ᒋᔖᒥᓂᑑᐦ ᒌ ᒥᔨᑰ ᐅᔮᔨᐤ ᒑ ᒌ ᐃᔥᐱᔥ ᒋᔅᑖᔨᐦᑖᑯᓯᑦ᙮ ᐊᓂᔮᔨᐤ ᒫᒃ ᑳ ᐃᔑᓂᐦᑳᑖᑭᓅᑦ ᐋᑯᑖᐦ ᐙᐦᒋ ᓅᑯᓃᔨᒡ ᑖᑆᐦ ᐊᑎᑎᐤ ᐐᔨ ᐋ ᒋᔅᑖᔨᐦᑖᑯᓃᔨᒡ ᐃᔥᐱᔥ ᐐ ᐋᓐᒋᓐᐦ ᐅᑎᔑᓂᐦᑳᓱᐎᓂᔨᐤᐦ᙮ 5 ᐙᔥ ᒋᔖᒥᓂᑑ ᓂᒧᐃ ᓂᐦᑖ ᐅᐦᒋ ᐄᑖᐤ ᐋᓐᒋᓐ ᐋ ᐊᔨᒥᐦᐋᑦ,
ᒌᔨ ᓂᑯᔅ, ᐊᓅᐦᒡ ᐆ ᑳᔑᑳᒡ ᓃᔨ ᑰᐦᑖᐐᑐᑎᐎᓐ᙮
ᑭᔮᐦ ᓂᒧᐃ ᓂᐦᑖ ᐅᐦᒋ ᐄᑖᐤ ᐋᓐᒋᓐ ᐋᐦ ᐋᔨᒨᒫᑦ,
ᓃᔨ ᓂᑭ ᐅᐦᑖᐐᑐᑖᒄ ᐋᒄ ᒫᒃ ᐐᔨ ᒑ ᐅᑯᓯᔮᓐ᙮
6 ᐄᔥᐱᐦ ᑳ ᐹᒋ ᐄᑎᔑᐦᐙᑦ ᒋᔖᒥᓂᑑ ᐅᓃᔥᑎᒨᔖᓐ ᐅᑎᐦ ᐊᔅᒌᐦᒡ, ᐋᒄ ᑳᐦ ᐃᔨᑦ,
ᒥᓯᐙ ᒋᔖᒥᓂᑑᐦ ᐅᑖᓐᒋᓂᒥᔨᐤᐦ ᒋᑭ ᐊᔨᒥᐦᐋᔅᑖᑰ᙮
7 ᒋᔖᒥᓂᑑ ᑳᐦ ᐋᔨᒨᒫᑦ ᐋᓐᒋᓐᐦ, ᐋᒄ ᑳᐦ ᐃᔨᑦ,
ᓂᑎᐦᑐᑎᐙᐅᒡ ᓂᑖᓐᒋᓂᒥᒡ ᒧᔮᒻ ᐋ ᔫᑎᐦᒡ ᑭᔮᐦ ᒧᔮᒻ ᐃᔥᑯᑖᐦᒡ ᒑ ᒌ ᐄᑖᔨᐦᑖᑯᓯᒡ ᐋᐦ ᐋᐱᑎᔒᔥᑑᐎᒡ᙮
8 ᐅᑯᓯᓯᒫᐤ ᒫᒃ ᐋᐦ ᐋᔨᒨᒫᑦ ᒌ ᐃᔨᐤ,
ᒌᔨ ᐊᐆᒄ ᒋᔖᒥᓂᑑ, ᒋᒋᐦᒋᐅᒋᐎᐎᓐ ᑳᒋᒡ ᒋᑭ ᑎᑯᓐ, ᑯᐃᔅᒄ ᒋᑎᐦᑎᓐ ᐋ ᐅᒋᒫᐅᐎᓐ ᐊᓂᑖᐦ ᑯᒋᒫᐎᓂᐦᒡ᙮ 9 ᒋᒌ ᓵᒋᐦᑖᓐ ᑯᐃᔅᑯᑖᑎᓰᐎᓐ ᐋᒄ ᒥᒑᑎᓰᐎᓐ ᒋᒌ ᐅᐦᑳᑖᓐ᙮ ᐋᔪᐎᒄ ᒫᒃ ᐙᐦᒋ ᐅᐙᔮᐱᒥᑖᓐ ᓃᔨ ᒋᒋᔖᒥᓂᑑᒻ, ᐋ ᑑᒥᔅᑯᓂᑖᓐ ᒑ ᒌ ᐃᔮᔨᓐ ᒨᒋᒑᔨᐦᑎᒧᐎᓐ᙮ ᒌᔨ ᒫᐅᒡ ᒌ ᒋᔅᑖᔨᐦᑖᑯᐦᐄᑎᓐ ᐃᔥᐱᔥ ᐐ ᒋᐐᒑᐙᑭᓂᒡ᙮
10 ᒋᔖᒥᓂᑑ ᑭᔮᐦ ᒌᐦ ᐄᑖᐤ,
ᒌᔨ, ᑎᐹᔨᐦᒋᒑᓯᐤ, ᑳ ᐅᔑᐦᑖᔨᓐ ᐊᔅᒌ ᐊᓂᑖᐦ ᒫᐅᒡ ᐅᔅᑭᒡ ᐋᔥᒄ ᐙᒸᔮ ᐙᐙᒡ ᐅᐦᒋ ᑎᑯᐦᒡ ᒑᒀᓐ ᑭᔮᐦ ᒌᔨ ᒋᑎᐦᒌᐦᒡ ᒋᒌ ᐅᐦᒋ ᐅᔑᐦᑖᓐ ᒋᐦᒋᒌᔑᒄ᙮ 11 ᐅᐦᐄ ᒫᒃ ᑳ ᐄᔑ ᐅᔑᐦᑖᔨᓐ ᐋᔥᒄ ᐹᔨᒀᐤ ᐋ ᒌᔑᑳᒡ ᒋᑭ ᐃᔅᒀᐱᔨᐤ ᒥᒄ ᒫᒃ ᑳᒋᒡ ᒋᑭ ᑖᓐ ᒌᔨ᙮ ᒋᐦᒋᒌᔑᒄ ᑭᔮᐦ ᐊᔅᒌ ᒋᑭ ᐋᑎᐃᔮᔨᐎᓐ ᒧᔮᒻ ᐱᒋᐎᔮᓈᒋᓐ ᐋ ᒫᔅᑎᔅᑳᑭᓂᐎᒡ᙮ 12 ᐋᔥᒄ ᐹᔨᒀᐤ ᐋ ᒌᔑᑳᒡ ᒋᑭ ᒀᔅᒋᓈᑯᐦᑖᓐ ᒋᐦᒋᒌᔑᒄ ᑭᔮᐦ ᐊᔅᒌ᙮ ᒧᔮᒻ ᐊᑯᐦᐱᔅᒌᔥ ᐋ ᓂᐦᐋᐙᒋᓂᑳᓂᐎᒡ ᐋᐅᒄ ᒑ ᑐᑎᒥᓐ᙮ ᒥᒄ ᒫᒃ ᒌᔨ ᒨᔥ ᐹᔨᑯᓂᐦᒡ ᒋᑭ ᐄᑖᔨᐦᑖᑯᓯᓐ, ᓂᒧᐃ ᓂᐦᑖ ᒋᑭ ᐅᐦᒋ ᐃᔅᒀᐱᔨᐤ ᒋᐱᒫᑎᓰᐎᓐ᙮
13 ᓂᒧᐃ ᒫᒃ ᓂᐦᑖ ᐅᐦᒋ ᐄᑖᐤ ᒋᔖᒥᓂᑑ ᐋᓐᒋᓐ,
ᐋᔥᑎᒻ ᐹᒋ ᐊᐱᐦ ᐅᑖᐦ ᓂᓂᐦᐄᐎᓂᐦᒡ᙮ ᓂᑭᔑᑰᒋᐦᐋᐅᒡ ᐊᓂᒌ ᑳ ᐅᐦᑳᑎᔅᒡ᙮ ᓂᑭ ᑐᑎᐙᐅᒡ ᒑ ᒌ ᐱᒋᔥᑖᔨᒧᓲᔅᑖᔅᒡ᙮
14 ᐊᐦᒑᐦᑯᒡ ᐋᐱᑎᓰᐎᒡ ᒫᒃ ᐋᓐᒋᓂᒡ᙮ ᒋᔖᒥᓂᑑᐦ ᐄᑎᔓᐦᐅᑯᒡ ᒑ ᒌ ᐙᐐᒋᐦᐋᒡ ᐊᓂᔮᔨᐤ ᒑ ᐱᒫᒋᐦᐄᒫᑭᓂᐎᔨᒡ᙮