1 ᒉᒥᔅ ᓃᔨ, ᒋᔖᒥᓂᑑ ᑭᔮᐦ ᑎᐹᔨᐦᒋᒑᓯᐤ ᒌᓴᔅ ᙭ ᐅᑖᐱᒋᐦᐋᑭᓂᐙᐤᐦ᙮ ᒥᓯᐙ ᒋᒥᓯᓂᐦᐋᒫᑎᓈᐙᐤ, ᓂᐙᒋᔮᒥᒫᔨᐤᐦ ᒋᔖᒥᓂᑑ ᐅᑎᔨᔨᒻᐦ ᐹᐱᑐᔥ ᑳᐦ ᐋᑎ ᐃᔨᐦᑖᔨᒡ ᒥᓯᐙ ᐋᔅᐱᑎᔅᑭᒥᑳᔨᒡ ᐅᔮᔨᐤ ᐊᔅᒌᔨᐤ᙮

2 ᓃᒋᔖᓂᑎᒄ, ᒥᔻᔨᐦᑎᒧᒄ ᓂᓈᐦᑭᐤ ᐋ ᐄᔑ ᑯᒀᒋᐦᐄᑯᐎᔮᒄ ᐊᓐ ᐋᐦ ᐄᔑ ᐃᔨᒥᐙᐱᐦᑎᒫᒄ᙮ 3 ᐙᔥ ᒋᒋᔅᒑᔨᐦᑖᓈᐙᐤ ᐋ ᑯᒀᒋᐦᑖᑭᓂᐎᒡ ᒋᑖᑆᔮᔨᐦᑎᒧᐎᓂᓄᐤ ᐋᑯᑖᐦ ᐙᐦᒋ ᐃᔮᔨᒋᑳᐳᐦᐄᑯᔮᒄ᙮ 4 ᒋᑭ ᐐᐦ ᑐᑖᑯᓈᐙᐤ ᒑ ᒌ ᐃᔮᔨᒋᑳᐳᐎᔮᒄ ᒥᑐᓐ ᒑ ᒌ ᔖᐳᔥᑭᒫᒄ ᒥᒄ ᑖᓐ ᒑ ᐄᔑ ᓂᓂᒋᔥᑭᒧᐙᒀ᙮ ᐋᒄ ᒫᒃ ᒥᑐᓐ ᒑ ᑯᐃᔅᑯᑖᑎᓯᔮᒄ, ᐋ ᒥᓯᐙᓯᔮᒄ ᒋᑭ ᐃᓯᓈᑯᓯᓈᐙᐤ, ᓂᒧᐃ ᒥᑐᓐ ᒋᑭ ᐅᐦᒋ ᓅᐦᑖᔥᑳᓈᐙᐤ ᑖᓐ ᐊᓐ ᒑ ᐄᑖᔨᐦᑖᑯᓱᐙᑯᐱᓈ᙮ 5 ᐋ ᑖᒀ ᐊᐙᓐ ᐋᐦᐋᑳ ᒋᔅᒑᔨᐦᑎᐦᒃ ᑖᓐ ᓂᐦᐋᐤ ᒑ ᐄᔑᑳᐴᔥᑎᐦᒃ ᒑᒀᔨᐤ ᐋ ᓂᒋᔥᑭᐦᒃ, ᒋᔖᒥᓂᑑ ᒋᐱᐦ ᓂᑐᑎᒧᐙᐤ ᑭᒑᐦᑖᐙᔨᐦᑎᒧᐎᓂᔨᐤ᙮ ᒋᑭ ᒥᔨᑰ ᒫᒃ᙮ ᐙᔥ ᒋᔖᒥᓂᑑ ᒥᔻᔨᐦᑎᒻ ᐙᔪᒡ ᒥᔮᐤ ᒥᓯᐙ ᐊᐙᔨᐤᐦ ᑖᓐ ᐋ ᐄᔑ ᓂᑎᐙᔨᐦᑎᒫᑯᑦ ᒑᒀᔨᐤ ᐋᐦᐋᑳ ᐋᓍᔨᒫᑦ᙮ 6 ᒥᒄ ᒫᒃ ᐊᑳᐐ ᒋᑭ ᐅᐦᒋ ᐋᓍᐦᑎᒻ ᐊᓐ ᐊᐙᓐ ᑳ ᓂᑐᑎᒫᑦ, ᔮᔨᑖ ᑖᑆᔮᔨᐦᑎᒧᐎᓂᐦᒡ ᑭᑎ ᐄᔑ ᑐᑎᒻ᙮ ᐙᔥ ᐊᓐ ᐊᐙᓐ ᑳᐦ ᐋᓍᐦᑎᐦᒃ ᒧᔮᒻ ᑭᔥᑭᓐ ᐊᓂᑖᐦ ᓵᑭᐦᐄᑭᓂᐦᒡ ᐋᑯᑖᐦ ᐋ ᐃᓯᓈᑯᓯᑦ, ᒥᒄ ᑖᓂᑖᐦ ᐙᐦᒋᔪᐙᔨᒡ ᐋᑯᑖᐦ ᐋᐦ ᐃᔨᑖᐦᐅᑯᑦ᙮ 7-8 ᓂᒧᐃ ᒌ ᐎᔮᔨᐦᑎᒻ ᐆ ᐊᐙᓐ ᑖᓐ ᓂᐦᐋᐤ ᒑ ᐃᐦᑎᒃ᙮ ᐆ ᒫᒃ ᐋᔑᓈᑯᓱᐎᓈ ᐊᑳᐐ ᐱᑯᓵᔨᒻ ᒋᔖᒥᓂᑑ ᒑ ᒌ ᒥᔨᔅᒃ ᒑᒀᔨᐤ᙮

9 ᒌᒋᔖᓂᐤ ᑳ ᒋᔅᑎᒫᑎᓯᑦ ᒋᐱᐦ ᒥᔻᔨᐦᑎᒻ ᒋᔖᒥᓂᑑᐦ ᐋ ᒋᔅᑖᔨᐦᑖᑯᐦᐄᑯᑦ᙮ 10 ᐋᒄ ᐊᓐ ᐊᐙᓐ ᑳ ᐙᔪᑎᓰᑦ ᒋᐱᐦ ᒥᔻᔨᐦᑎᒻ ᐋ ᑎᐱᐦᑖᔨᐦᑖᑯᐦᐄᑯᑦ ᒋᔖᒥᓂᑑᐦ᙮ ᐙᔥ ᑭᔮᐦ ᐐᔨ ᑭᑎ ᐃᔥᒀᐱᔨᐤ ᐅᐱᒫᑎᓰᐎᓐ ᒧᔮᒻ ᓃᐲᔥ ᐋᐦ ᒌᔑ ᓂᐦᑖᐅᒋᐦᒡ ᐋ ᐄᔅᐱᔨᐦᒡ᙮ 11 ᐄᔥᐱᐦ ᒋᐦᒋᐙ ᐋᐦ ᐋᑎ ᓵᑳᔥᑎᐙᑦ ᐲᓯᒽ ᐋᒄ ᐋᑎᐃᔥᒀᓯᐦᒃ ᐊᓂᔮᐦ ᓃᐲᔥ, ᐋᒄ ᐱᔮᐦᐱᐦᒋᑎᓃᔨᔨᐦᒡ᙮ ᐋ ᔮᔫᐦᒡ ᐊᓐ ᑖᓐ ᑳ ᐄᔑ ᒥᔻᔑᐦᒡ᙮ ᐋᔪᐎᒄ ᒫᒃ ᒧᔮᒻ ᑭᔮᐦ ᐐᔨ ᒑ ᐃᓯᓈᑯᓯᑦ ᐊᓐ ᐊᐙᓐ ᑳ ᒥᓰᒋᓰᑦ, ᑭᑎ ᐴᓂᐱᒫᑎᓰᐤ ᑭᔮᐦ ᐐᔨ, ᐋᐦᐋᑦ ᒫᒀᒡ ᐋᐱᑎᓰᑦ᙮

12 ᔑᐙᔨᐦᑖᑯᓱ ᐊᓐ ᐊᐙᓐ ᐋᑳ ᑳ ᔑᐦᑯᒋᐦᐄᑯᑦ ᑖᓐ ᐋ ᐄᔑ ᑯᒀᒋᐦᐋᑭᓅᑦ᙮ ᐙᔥ ᔖᐳᔥᑭᐦᒑ ᑖᓐ ᐋ ᐄᔑ ᑯᒀᒋᐦᐋᑭᓅᑦ ᒋᑭ ᒥᔨᑰ ᒋᔖᒥᓂᑑ ᐋ ᐙᔪᒡ ᒥᔻᔨᐦᑖᑯᓃᔨᒡ ᑳᒋᒡ ᐱᒫᑎᓰᐎᓂᔨᐤ, ᐊᓂᔮᔨᐤ ᑳ ᐄᔨᔨᒡ ᒑᔥᑎᓈᔥ ᒑ ᒥᔮᔨᒡ ᐊᓂᔮᔨᐤᐦ ᑳ ᓵᒋᐦᐄᑯᔨᒡ᙮ 13 ᐊᓐ ᐊᐙᓐ ᑳ ᑯᒀᒋᐦᐋᑭᓅᑦ ᒑ ᒌ ᒥᒋᐦᑐᑎᐦᒃ ᓂᒧᐃ ᒋᐱᐦ ᐅᐦᒋ ᐃᔨᐤ, “ᒋᔖᒥᓂᑑ ᓂ ᐹᒋ ᑯᒀᒋᐦᐄᒄ᙮” ᑖᐹ ᑭᑎ ᒌ ᑯᒀᒋᐦᐄᑰ ᒥᒋᐦᑣᐎᓂᔨᐤ ᒋᔖᒥᓂᑑᐦ ᑭᔮᐦ ᒫᒃ ᓂᒧᐃ ᑯᒀᒋᐦᐋᐤ ᐊᐙᔨᐤᐦ ᒑ ᒌ ᒥᒋᐦᑑᑎᒥᔨᒡ᙮ 14 ᑯᒀᒋᐦᐋᑭᓂᐤ ᐊᐙᓐ ᒑ ᒌ ᒥᒋᐦᑐᑎᐦᒄ ᐄᔥᐱᐦ ᐹᔅᒑᐱᑎᑯᐦᒡ ᐐᔨ ᑎᐱᔨᐙ ᐅᒥᒋᓂᑐᐙᔨᐦᑎᒧᐎᓐ ᐋ ᐅᐦᒋ ᓲᐦᒋᐱᑎᑯᑦ ᒑ ᒌ ᒥᒋᐦᑐᑎᐦᒃ᙮ 15 ᐄᔥᐱᐦ ᒫᒃ ᓵᑰᒋᐦᐄᑯᑦ ᐋᐦᐋᑳ ᓂᔥᑰᔥᑎᐦᒃ ᐋᒄ ᑖᑆᐦ ᐋᑎ ᐄᐦᑐᑎᐦᒃ ᐊᓂᔮᔨᐤ ᒥᒋᐦᑐᑎᒧᐎᓂᔨᐤ᙮ ᐄᔥᐱᐦ ᒫᒃ ᐋᐦ ᑎᐦᒃ ᐊᓂᔮᔨᐤ ᑖᓐ ᑳ ᐄᔑ ᒥᒋᓂᑐᐙᔨᐦᑎᐦᒃ, ᓂᐱᐎᓂᐦᒡ ᐄᑐᐦᑎᐦᐄᑰ᙮ 16 ᓃᒋᔖᓂᑎᒄ ᑳ ᓵᒋᐦᐄᑎᑯᒡ, ᐊᑳᐐ ᒋᑳᒌᔑᐦᐄᑯᓈᐙᐤ᙮ 17 ᒥᓯᐙ ᒥᔨᐙᐎᓐ ᑳ ᒥᔻᔑᒡ ᑭᔮᐦ ᒥᑐᓐ ᑯᐃᔅᒄ ᑳ ᐄᑖᔨᑖᑯᐦᒡ ᐊᓂᑖᐦ ᐃᔥᐱᒥᐦᒡ ᐅᐦᒋᐱᔨᐤ, ᐊᓂᑖᐦ ᒋᔖᒥᓂᑑ ᐋᐦ ᑖᑦ᙮ ᐋᐅᒄ ᐆ ᒋᔖᒥᓂᑑ ᑳ ᐅᔑᐦᑖᑦ ᒥᓯᐙ ᐙᔥᑖᐎᓂᔨᐤ ᐊᓂᑖᐦ ᒌᔑᑯᐦᒡ᙮ ᒨᔥ ᐹᔨᑯᓂᐦᒡ ᐄᑖᔨᐦᑖᑯᓯᐤ, ᓂᒧᐃ ᐃᓯᓈᑯᓯᐤ ᒧᔮᒻ ᐋ ᑎᑳᔥᑖᐦᑎᐦᒡ ᒑᒀᓐ ᐋᔅᑭᐤ ᐊᔨᐦᒡ ᒫᓐ ᐋ ᐃᓯᓈᑯᐦᒡ᙮ 18 ᐐᔨ ᐅᑎ ᐄᑖᐦᔨᑎᒨᐎᓂᐦᒡ, ᒋᒌ ᒥᔨᑯᓂᐤ ᐱᒫᑎᓰᐎᓂᔨᐤ ᐊᓂᑎᐦ ᐅᐦᒋ ᐊᓂᔮᔨᐤ ᐅᑎᔨᒧᐎᓐᐦ ᑳ ᑖᑆᒥᑭᓃᔨᒡ ᒌᔮᓂᐤ ᓃᔥᑎᒻ ᐊᔅᒌ ᐅᐙᔮᐱᒥᑯᓅᐤ ᒑ ᒌ ᑖᑆᔮᔨᒥᐦᒄ, ᐅᐦᒋ ᒥᓯᐙ ᐊᓂᔮᔨᐤ ᑳ ᐅᔑᐦᑖᑦ᙮

19 ᐊᑳᐐ ᐎᓂᒋᔥᒋᓯᒄ ᐆ ᓃᒋᔖᓂᑎᒄ ᑳ ᓵᒋᐦᐄᑎᑯᒡ᙮ ᒥᓯᐙ ᐊᐙᓐ ᓲᐦᒃ ᒨᔥ ᔮᒀᐦ ᒋᐱᐦ ᐐᐦ ᓂᑐᐦᑎᒻ, ᒋᐱᐦ ᒫᒥᑐᓈᔨᐦᑎᒻ ᑭᔮᐦ ᑖᓐ ᐙᐦ ᐃᔨᑦ ᑭᔮᐦ ᓂᒧᐃ ᑏᐙᐦᒡ ᒋᐱᐦ ᐅᐦᒋ ᒋᔑᐙᓲ᙮ 20 ᐋ ᒋᔑᐙᓯᑦ ᐊᐙᓐ ᓂᒧᐃ ᑯᐃᔅᒄ ᒌᐦ ᑐᑎᒻ ᐊᓂᔮᔨᐤ ᑳ ᐄᔑ ᓂᑎᐙᔨᒥᑯᑦ ᒋᔖᒥᓂᑑᐦ ᒑ ᒌᐦ ᑐᑎᐦᒃ᙮ 21 ᐋᐅᒄ ᒑ ᐅᐦᒋ ᐙᐱᓂᒧᒄ ᒥᓯᐙ ᐐᓂᓱᐎᓐ ᑭᔮᐦ ᒥᓯᐙ ᒥᒑᑎᓰᐎᓐ᙮ ᐱᒋᔥᑖᔨᒦᓱᒄ ᒋᔖᒥᓂᑑ ᐋᐦ ᑖᑦ, ᐅᑎᓂᒸᒄ ᐅᑎᔨᒧᐎᓐᐦ ᒋᑖᐦᐄᐙᐦᒡ ᑳ ᐲᐦᑎᐦᐋᐦᒃ ᐊᓂᔮᔨᐤ ᒑ ᒌ ᐅᐦᒋ ᐱᒫᒋᐦᐄᑯᐙᒄ᙮ 22 ᒥᒄ ᓂᑑᐦᑎᒸᒀ ᒋᔖᒥᓂᑑ ᐅᑎᔨᒧᐎᓐᐦ ᐋᑳ ᒫᒃ ᐅᑎᓂᒧᐙᒀ, ᒋᑳᒌᔑᐦᐄᓱᓈᐙᐤ᙮ ᑐᑎᒥᐦᒄ ᑖᓐ ᐋ ᐄᑎᔥᑖᔨᒡ᙮ 23 ᐊᓐ ᐊᐙᓐ ᒥᒄ ᑳ ᓂᑑᐦᑎᒸᑦ ᒋᔖᒥᓂᑑᐦ ᐅᑎᔨᒧᐎᓂᔨᐤᐦ ᐋᐦᐋᑳ ᒫᒃ ᑐᑎᐦᒃ ᑖᓐ ᐋᐦ ᐄᑎᔅᑖᔨᒡ ᒧᔮᒻ ᐊᓐ ᐊᐙᓐ ᑳ ᑭᓂᐙᐱᒦᓱᑦ ᐙᐱᒥᓱᐎᓂᐦᒡ ᐃᓯᓈᑯᓯᐤ᙮ 24 ᐄᔥᐱᐦ ᑳ ᑭᓂᐙᐱᒥᓱᒡ, ᒋᔅᑐᐦᑖᐤ ᐋᒄ ᑏᐙᐦᒡ ᐎᓂᒋᔥᒋᓯᑦ ᑖᓐ ᐋ ᐃᓯᓈᑯᓯᑦ᙮ 25 ᒋᔖᒥᓂᑑ ᐅᐐᔓᐙᐎᓐ ᓈᔥᑖᑆᐦ ᒥᔻᔨᐦᑖᑯᓂᔨᐤ ᑭᔮᐦ ᐱᑯᐦᐄᑯᒡ ᐄᔨᔨᐅᒡ᙮ ᐊᓐ ᒫᒃ ᐊᐙᓐ ᔮᒀᐦ ᑳ ᓂᑑᒋᔅᒑᔨᐦᑎᐦᒃ ᐅᔮᔨᐤ ᐐᔓᐙᐎᓂᔨᐤ, ᐋᐦᐋᑳ ᒫᒃ ᐴᓃᑦ ᐅᔮᔨᐤ ᐋᐦᑎᒃ, ᐋᐦᐋᑳ ᐎᓂᒋᔥᒋᓯᑦ ᑖᓐ ᑳ ᐄᔑ ᐹᐦᑎᐦᒃ, ᑭᔮᐦ ᑐᑎᐦᑳ ᑖᓐ ᐋᐦ ᐄᑎᔥᑖᔨᒡ ᐊᓂᑎᐦ, ᐋᐅᒄ ᒑ ᒋᔖᐙᑐᑖᑯᑦ ᒋᔖᒥᓂᑑᐦ ᒥᓯᐙ ᑖᓐ ᐋᑎ ᐋᔨᐦᑎᒃ᙮ 26 ᐊᐙᓐ ᐋᐦ ᐄᑖᔨᒦᓱᑦ ᐋ ᑯᐃᔅᑯᑖᑎᓰᑦ, ᒥᒄ ᒫᒃ ᐋᐦᐋᑳ ᒌ ᓈᓈᑭᒋᐦᑖᑦ ᑖᓐ ᐋᐦ ᐃᔨᑦ, ᑳᒌᔑᐦᐄᓲ ᐊᓐ ᐊᐙᓐ᙮ ᓂᒧᐃ ᐎᔮᔥ ᐄᑖᐱᑎᓂᔨᐤ ᐅᑎᔨᒥᐦᐋᐙᑎᓰᐎᓐ᙮ 27 ᐊᓐ ᐊᔨᒥᐦᐋᐙᑎᓰᐎᓐ ᑳ ᐄᑖᔨᐦᑎᐦᒃ ᒋᔖᒥᓂᑑ ᑳ ᐅᐦᑖᐐᒫᐅᑦ ᐋ ᑯᐃᔅᑯᓈᑯᓃᔨᒡ ᑭᔮᐦ ᐋ ᐱᔮᐦᒋᓈᑯᓃᔨᒡ᙮ ᒫᐤ ᐋ ᐃᓯᓈᑯᐦᒡ, ᑐᑖᑰ ᐊᐙᓐ ᒑ ᒌ ᒥᔪ ᐐᒋᐦᐋᑦ ᒋᐎᔑᔖᓂᔥᐦ ᑭᔮᐦ ᑳ ᐹᔨᑯᔨᒡ ᐃᔅᒀᐤᐦ ᒫᒀᒡ ᐋᐦ ᐋᔨᒧᐦᐅᔨᒡ ᑭᔮᐦ ᒫᒃ ᑐᑖᑰ ᐊᐙᓐ ᐋᑳ ᒥᑐᓐ ᒑ ᒌ ᐐᓂᐦᐄᑯᑦ ᒥᒑᑎᓰᐎᓂᔨᐤ ᑖᓐ ᐋ ᐄᔑ ᑎᑯᓃᔨᒡ ᐅᑎᐦ ᐊᔅᒌᐦᒡ᙮