1 ᒌᓴᔅ ᒫᒨ ᒌ ᓂᑑᒫᐤ ᑳ ᓃᔓᔖᐳᔨᒡ ᐅᒋᔅᒋᓂᐦᐊᒧᐙᑭᓐᐦ᙮ ᑳ ᒥᔮᑦ ᑭᔅᒋᐦᐅᐎᓂᔨᐤ ᑭᔮᐦ ᑎᐹᔨᐦᒋᒑᐎᓂᔨᐤ ᒑ ᒌ ᐎᔨᐐᑎᔑᐦᐙᔨᒡ ᒥᓯᐙ ᒥᒋᐊᐦᒑᐦᒄ ᑭᔮᐦ ᒑ ᒌ ᒦᓂᐙᒋᐦᐋᔨᒡ ᓂᓈᐦᑭᐤ ᐋᐦ ᐄᑖᔅᐱᓈᔨᒡ ᐊᐙᔨᐤᐦ᙮ 2 ᐋᒄ ᑳ ᒋᐦᒋᑎᔑᐦᐙᑦ ᒑ ᒌ ᓂᑑᑭᒑᔅᒀᔨᒡ ᒋᔖᒥᓂᑑ ᐅᒋᐦᒋᐅᒋᒫᐎᓂᔨᐤ ᐋᔨᐤᐦ ᒑ ᒌ ᒦᓂᐙᒋᐦᐋᔨᒡ ᐊᐙᔨᐤᐦ ᑳᐦ ᐋᐦᑯᓰᔨᒡ᙮

3 ᒌ ᐄᑎᔓᒫᐤ ᒫᒃ, “ᐆ ᒑ ᒋᔅᑐᐦᑖᔮᒄ ᐊᑳᐐ ᒋᑭ ᐅᐦᒋ ᑎᐦᑯᓈᓈᐙᐤ ᒑᒀᓐ᙮ ᐊᑳᐐ ᑎᐦᑯᓂᒧᒄ ᓯᔅᑭᐦᐅᓐ, ᓃᒨᑖᓐ, ᒦᒋᒻ, ᑭᔮᐦ ᐙᐙᒡ ᔓᐎᔮᓐ ᑭᔮᐦ ᐋᔨᐙᒡ ᒋᒋᒑᒀᓂᒧᐙᐤ ᐋ ᒋᒋᔥᑭᒫᒄ᙮ 4 ᑭᔮᐦ ᐊᓐ ᐙᔅᑳᐦᐄᑭᓐ ᑖᓂᑖᐦ ᒑ ᐲᐦᑎᑭᐦᐄᑯᐙᒀ, ᐋᑯᑖᐦ ᐊᓂᑎᐦ ᒑ ᑖᔮᒄ ᐹᑎᔥ ᓂᑭᑎᒫᒀ ᐊᓐ ᐃᐦᑖᐎᓐ᙮ 5 ᐅᑎᐦᑎᒫᒀ ᒫᒃ ᐃᐦᑖᐎᓐ ᐋᐦᐋᑳ ᐐᐦ ᐲᐦᑎᑭᐦᐄᑭᐎᔮᒀ, ᓂᑭᑎᒧᒄ ᐊᓐ ᐃᐦᑖᐎᓐ᙮ ᒑ ᐱᐦᐴᓯᑖᔑᒧᔮᒄ, ᐋ ᓅᑯᐦᑖᔮᒄ ᐋ ᐃᔮᒀᒥᒫᑯᒡ ᐋᐦᐋᑳ ᐅᐦᒋ ᐅᑎᓂᐦᒡ ᒥᔻᒋᒧᐎᓂᔨᐤ᙮” 6 ᐋᒄ ᐊᓂᒌ ᒋᔅᒋᓂᐦᐊᒧᐙᑭᓂᒡ ᑳ ᒋᔅᑐᐦᑖᒡ ᐊᓂᑖᐦ ᒥᓯᐙ ᓂᓈᐦᑭᐤ ᐃᐦᑖᐎᓂᐦᒡ ᑳ ᐄᑐᐦᑖᒡ ᐋ ᐙᐐᐦᑎᐦᒡ ᒥᔻᒋᒧᐎᓂᔨᐤ ᑭᔮᐦ ᐋ ᒦᓂᐙᒋᐦᐋᒡ ᑳᐦ ᐋᐦᑯᓰᔨᒡ, ᐊᓂᔮᔨᐤ ᐊᓂᑖᐦ ᑳ ᐊᑏᑑᐦᑖᒡ᙮

7 ᐄᔥᐱᐦ ᒫᒃ ᒋᐦᒋᐅᒋᒫᐤ ᐦᐁᕆᑦ ᐱᔮᐦᑎᐦᒃ ᑖᓐ ᐋ ᐄᔨᐦᑎᔨᒡ ᒌᓴᔅᐦ, ᓈᔥᑖᑆᐦ ᒌ ᐙᐙᓈᔨᐦᑎᒥᐦᐄᑰ ᐙᔥ ᒌᐦ ᑖᐅᒡ ᐄᔨᔨᐅᒡ ᐋ ᐱᐹᒫᒋᒧᒡ ᐋᐦ ᐃᔨᒡ, ᒞᓐ ᓰᑭᐦᐋᐦᑖᒑᓯᐤ ᐆ, ᒦᓐ ᑳᐤ ᐱᒫᑎᓰᐤ᙮ 8 ᒌᐦ ᑖᐅᒡ ᒦᓐ ᑯᑎᑭᒡ ᐋᐦ ᐃᔨᒡ, “ᐋᐅᒄ ᐆ ᐄᓛᐃᒑ, ᒦᓐ ᑳᐤ ᐱᒫᑎᓰᐤ᙮” ᐊᔮᐱᒡ ᒫᒃ ᒦᓐ ᒌᐦ ᑖᐅᒡ ᑯᑎᑭᒡ ᐄᔨᔨᐅᒡ ᐋᐦ ᐃᔨᒡ, “ᐋᐅᒄ ᐆ ᐹᔨᒄ ᐙᔥᑭᒡ ᐅᒋᔅᒋᐙᐦᐄᒑᓯᐤ ᒦᓐ ᑳᐤ ᐱᒫᑎᓰᐤ᙮” 9 ᐦᐁᕆᑦ ᒫᒃ ᒌ ᐃᔨᐤ, “ᐊᐙᓐ ᐆ ᑳ ᐄᔑ ᒫᒥᔥᑳᒡ ᐄᑖᒋᒫᑭᓅᑦ? ᓂᒥᔮᒑ ᐐᔨ ᓈᓂᑐ ᒞᓐ, ᓂᒑᔥᑎᓈᐦᐅᓐ ᐙᔥ ᓂᒌᐦᐄᑎᓲᐙᓐ ᒑ ᒌ ᒋᒥᒀᐦᐙᑭᓅᑦ ᐐᔨ ᒞᓐ᙮” ᐋᒄ ᓈᔥᒡ ᑳ ᐐᐦ ᐙᐱᒫᑦ ᐊᓂᔮᔨᐤᐦ ᒌᓴᔅᐦ᙮

10 ᐄᔥᐱᐦ ᑖᑯᔑᐦᒡ ᐊᓂᒌ ᐋᑆᔅᑎᓕᒡ ᑳ ᒋᐦᒋᑎᔑᐦᐙᑭᓂᐎᒡ ᐋᒄ ᑳ ᐐᐦᑎᒧᐙᒡ ᒌᓴᔅᐦ ᑖᓐ ᑳᐦ ᐋᐃᐦᔨᑎᒡ ᑳ ᐃᔅᐱᐦᑎᓂᐦᐅᒡ᙮ ᐋᒄ ᑳ ᓂᑭᑖᒡ ᐊᓂᔮᔨᐤ ᑳ ᒥᐦᒑᑎᔨᒡ ᐄᔨᔨᐤ, ᑎᐹᓐ ᑳ ᐄᑐᐦᑖᒡ ᐋ ᐐᒑᐙᒡ ᒌᓴᔅᐦ ᐊᓂᑖᐦ ᐱᑦᓭᐃᑖᐦᒡ ᐃᐦᑖᐎᓂᔨᐤ ᑳ ᐃᔑᓂᐦᑳᑖᔨᒡ ᐋᐦ ᐄᑐᐦᑖᔨᒡ᙮ 11 ᐄᔥᐱᐦ ᒫᒃ ᒥᐦᒑᑐ ᐄᔨᔨᐅᒡ ᑳ ᐹᐦᑎᐦᒡ ᐋ ᒌ ᒋᔅᑐᐦᑖᔨᒡ ᐋᒄ ᑳ ᓅᓲᔅᑰᐙᒡ᙮ ᒌᓴᔅ ᒫᒃ ᒌ ᒥᔻᔨᐦᑎᒻ ᐋ ᑎᑯᔑᓃᔨᒡ᙮ ᒌ ᐙᐐᐦᑎᒧᐙᐤ ᒋᔖᒥᓂᑑ ᐅᒋᐦᒋᐅᒋᒫᐎᓂᔨᐤ ᐋ ᐄᑖᔨᐦᑖᑯᓃᔨᒡ ᑭᔮᐦ ᒌ ᒦᓂᐙᒋᐦᐋᐤ ᐊᓂᔮᔨᐤᐦ ᐊᐙᔨᐤᐦ ᑳ ᓂᑎᐙᔨᐦᑎᒥᔨᒡ ᒑ ᒌ ᒦᓂᐙᒋᐦᐄᒫᑭᓂᐎᔨᒡ᙮

12 ᔖᔥ ᒫᒃ ᒌ ᐋᑎ ᐅᑖᑯᔑᔨᐤ ᐋᒄ ᐊᓂᒌ ᓃᔓᔖᑉ ᒋᔅᒋᓂᐦᐊᒧᐙᑭᓂᒡ ᑳᐦ ᐄᑖᒡ ᒌᓴᔅᐦ, “ᒋᐦᒋᑎᔑᐦᐅᒡ ᒫᐦ ᐋᒄ ᐊᓂᒌ ᐄᔨᔨᐅᒡ ᒑ ᓈᓂᑎᐙᔨᐦᑎᐦᒡ ᒑᒀᔨᐤ ᒑ ᒦᒋᒡ ᐅᑎᐦ ᐹᔓᒡ ᐃᐦᑖᐎᓐ ᐋᐦᑖᑯᓃᔨᒡ ᑭᔮᐦ ᐋᑎ ᒑ ᒌ ᒥᔻᔨᒧᒡ ᒑ ᑎᐱᔅᑳᔨᒡ᙮ ᑖᐹ ᑎᑯᓐ ᒑᒀᓐ ᐅᑎᐦ ᐐ᙮” 13 ᐋᒄ ᒌᓴᔅ ᑳᐦ ᐄᑖᑦ, “ᒌᔨᐙᐤ ᒥᔮᐦᑯᒡ ᒑᒀᔨᐤ ᒑ ᒦᒋᒡ᙮” ᒋᔅᒋᓂᐦᐊᒧᐙᑭᓂᒡ ᒫᒃ ᒌ ᐄᑖᐅᒡ, “ᒥᒄ ᓂᔮᔪ ᐋᐃᐦᑯᓈᐆᒡ ᓃᔓ ᒫᒃ ᓂᒫᓯᒡ ᐋᐅᒄ ᒥᒄ ᐋ ᐃᔥᐱᔥ ᑎᑯᐦᒡ ᒑᒀᓐ᙮ ᒥᒄ ᑭᔨᑆ ᓃᔮᓐ ᓂᑑᐅᑎᓂᒫᐦᒑ ᒦᒋᒻ ᒑ ᒌ ᑖᐱᐦᐅᒡ ᐅᒌ ᐋ ᐃᑎᔑᒡ ᐄᔨᔨᐅᒡ᙮” 14 ᐎᔮᔥ ᓂᔮᔻᐤ ᒋᔖᒥᑖᐦᑐᒥᑎᓂᐤ ᒌ ᑎᔒᒑᓂᒋ ᓈᐹᐅᒡ ᐊᓂᑎᐦ ᑳ ᑎᔑᓈᓂᐎᒡ᙮ ᒌᓴᔅ ᑳᐦ ᐄᑖᑦ ᐊᓂᔮᔨᐤ ᒋᔅᒋᓂᐦᐊᒧᐙᑭᓐ, “ᐄᑖᐦᑯᒡ ᐊᓂᒌ ᐄᔨᔨᐅᒡ, ᓃᔮᔫᒥᑎᓂᐤ ᒑ ᐃᔮᑐᐱᒡ ᐹᔨᒀᐤ ᐊᓂᔮᔨᐤ ᐋ ᒫᐅᓯᑯᐱᐦᒡ᙮”

15 ᒋᔅᒋᓂᐦᐊᒧᐙᑭᓂᒡ ᒫᒃ ᒌᐦ ᑐᑎᒧᒡ ᐊᓂᔮᔨᐤ ᑳᐦ ᐄᑎᔓᒫᑭᓂᐎᒡ ᐋᒄ ᒥᓯᐙ ᐊᐙᓐ ᑳ ᐅᐙᔨᐱᑦ᙮ 16 ᐋᒄ ᒌᓴᔅ ᑳ ᐅᑎᓈᑦ ᐊᓂᔮᔨᐤ ᓂᔮᔪ ᐋᐃᐦᑯᓈᐤ ᑭᔮᐦ ᐊᓂᔮᔨᐤ ᓃᔓ ᓂᒫᔅ, ᐃᔥᐱᒥᐦᒡ ᑳ ᐄᑖᐱᑦ ᐋ ᓂᓈᔅᑯᒫᑦ ᒋᔖᒥᓂᑑᐦ᙮ ᑳ ᐱᐱᐦᒀᓈᒃ ᐊᓂᔮᔨᐤ ᒦᒋᒥᔨᐤ ᐋᒄ ᑳ ᒥᔮᑦ ᐊᓂᔮᔨᐤᐦ ᐅᒋᔅᒋᓂᐦᐊᒧᐙᑭᓐᐦ ᒑ ᒌ ᒫᑎᓂᒧᐙᔨᒡ ᐊᓂᔮᔨᐤ ᐄᔨᔨᐤᐦ᙮ 17 ᒥᓯᐙ ᒫᒃ ᐊᐙᓐ ᒌ ᒦᒋᓲ ᑭᔮᐦ ᒌ ᑖᐱᔥᑯᔨᐤ, ᐋᒄ ᐊᓂᔮᔨᐤᐦ ᐅᒋᔅᒋᓂᐦᐊᒧᐙᑭᓐᐦ ᑳ ᒫᒨᔅᒋᓂᒥᔨᒡ ᐊᓂᔮᔨᐤ ᐃᔅᑯᔥᑖᐎᓂᔨᐤ᙮ ᓃᔓᔖᑉ ᒫᒃ ᐅᑎᐲᐎᑦ ᒌ ᓵᑭᔅᒋᓂᑖᐅᒡ᙮

18 ᐹᔨᒀᐤ ᒌᓴᔅ ᒌ ᐊᔨᒥᐦᐋᐤ ᐋ ᐹᔨᑯᔑᑦ, ᒥᒄ ᐱᔅᒡ ᐅᒋᔅᒋᓂᐦᐊᒧᐙᑭᓐᐦ ᐹᔓᒡ ᒌᐦ ᑖᔨᐤ ᐋᒄ ᑳ ᑯᒀᒋᒫᑦ ᐋᐦ ᐄᑖᑦ, “ᐊᐙᓐ ᓃᔨ ᐋᑖᔨᒥᒡ ᐄᔨᔨᐅᒡ?” 19 ᑳᐦ ᐄᑎᑯᑦ, “ᑯᑎᑭᒡ ᐄᔨᔨᐅᒡ ᒞᓐ ᓰᑭᐦᐋᐦᑖᒑᓯᐤ ᒋᑎᐄᑖᔨᒥᑯᒡ, ᐋᒄ ᑯᑎᑭᒡ ᐊᓂᔮ ᐹᔨᒄ ᐅᒋᔅᒋᐙᐦᐄᒑᓯᐤ ᐄᓛᐃᒑ ᑳ ᐃᔑᓂᐦᑳᓱᑦ ᒋᑎᐄᑖᔨᒥᑯᒡ, ᐋᒄ ᒦᓐ ᑯᑎᑭᒡ ᐋᐦ ᑖᒡ ᐙᔥᑭᒡ ᐅᒋᔅᒋᐙᐦᐄᒑᓯᐤ ᒦᓐ ᑳᐤ ᐋ ᐱᒫᑎᓰᑦ ᐋ ᐄᑖᔨᒥᔅᒡ᙮” 20 ᐋᒄ ᒌᓴᔅ ᒦᓐ ᑳ ᑯᒀᒋᒫᑦ, “ᒌᔨᐙᐤ ᒫᒃ ᐐᐦ, ᐊᐙᓐ ᓃᔨ ᐋᑖᔨᒥᔮᒄ ᐋᐦ ᐋᐎᔮᓐ?” ᐲᑎᕐ ᒌ ᓂᔥᒀᐅᔑᐦᐋᐤ ᐋᐦ ᐄᑖᑦ, “ᐋᐅᒄ ᒌᔨ ᙭, ᐊᓂᔮᔨᐤ ᒋᔖᒥᓂᑑ ᑳᐦ ᐃᔨᑦ ᒑ ᐹᒋ ᐄᑎᔑᐦᐙᑦ᙮” 21 ᐋᒄ ᒌᓴᔅ ᑳᐦ ᐄᑎᔓᒫᑦ ᐅᒋᔅᒋᓂᐦᐊᒧᐙᑭᓐᐦ ᐋᑳ ᒑ ᒌ ᐐᐦᑎᒧᐙᔨᒡ ᑯᑎᒃ ᐊᐙᔨᐤᐦ ᐅᔮᔨᐤ᙮

22 ᐋᒄ ᑳᐦ ᐄᑖᑦ, “ᐄᔨᔨᐅᑯᓯᓵᓐ ᐄᑖᔨᐦᑖᑯᓂᔨᐤ ᒑ ᒌ ᒥᔅᑎᐙᐐᓯᒑᔨᐦᑎᒥᐦᐄᑯᑦ ᑭᔮᐦ ᒑ ᒌ ᐋᑎᐙᔨᒥᑯᑦ ᐊᓂᔮᔨᐤ ᑳ ᓃᑳᓂᔑᔨᒡ ᐊᔨᒥᐦᐋᐅᒋᒫᐤ, ᑭᔮᐦ ᐊᓂᔮᔨᐤ ᑳ ᓃᑳᓂᔥᑭᐙᔨᒡ ᐄᔨᔨᐤ, ᑭᔮᐦ ᒫᒃ ᐊᓂᔮᔨᐤ ᑳ ᒋᔅᑯᑎᒫᒑᔨᒡ ᐐᔓᐙᐎᓂᔨᐤ᙮ ᑭᑎ ᓂᐱᐦᐋᑭᓂᐤ ᑭᔮᐦ, ᒥᒄ ᒫᒃ ᒌ ᓂᔥᑐ ᒌᔑᑳᔨᒑ ᒦᓐ ᑳᐤ ᑭᑎ ᐱᒫᑎᓰᐤ᙮”

23 ᐋᒄ ᒌᓴᔅ ᒥᓯᐙ ᑳᐦ ᐄᑖᑦ, “ᐊᐙᓐ ᐙᐦ ᓅᔔᔥᑰᒀ ᐋᑯᔥ ᒌ ᐴᓃᐤ ᐊᓂᔮᔨᐤ ᐐᔨ ᑖᓐ ᐙᐦ ᐄᔑ ᓂᓂᐦᐋᔨᐦᑎᒥᐦᐄᓱᑦ, ᐋᔑᑯᒻ ᒌᔑᑳᐤᐦ ᒋᐱᐦ ᐅᑎᓈᐤ ᐅᑖᔑᑖᔮᐦᑎᑯᒻ ᐋᒄ ᒫᒃ ᓂᐱᐦ ᐹᒋ ᓅᔔᔥᑳᒄ᙮ 24 ᐙᔥ ᐊᓐ ᐊᐙᓐ ᑳ ᐐᐦ ᑭᓄᐙᔨᐦᑎᒫᓱᑦ ᐅᐱᒫᑎᓰᐎᓐ ᑭᑎ ᐎᓂᐦᑖᐤ᙮ ᐊᓐ ᒫᒃ ᐊᐙᓐ ᑳ ᐐᐦ ᐱᒋᔅᑎᓂᐦᒃ ᒥᓯᐙ ᒑᒀᔨᐤ ᑖᓐ ᑳ ᐐᐦ ᑐᑎᐦᒃ ᒫᒋᒫ ᑭᔮᐦ ᐅᐱᒫᑎᓰᐎᓐ ᐋ ᐐᐦ ᐹᒋ ᓅᔔᔥᑯᑦ ᐋᐅᒄ ᐊᓐ ᒑ ᒥᔮᑭᓅᑦ ᐱᒫᑎᓰᐎᓂᔨᐤ᙮ 25 ᑖᓐ ᒫᒃ ᒑ ᒌ ᐄᔑ ᐐᒋᐦᐄᑯᑦ ᐊᐙᓐ ᐋᑎ ᒥᓯᐙ ᒑᒀᔨᐤ ᒌ ᐱᑯᐦᑎᒫᓱᒑ ᐅᑎᐦ ᐊᔅᒌᐦᒡ, ᒑ ᐎᓂᐦᑖᒀ ᒫᒃ ᐅᐱᒫᑎᓰᐎᓐ᙮ 26 ᐊᐙᓐ ᒫᒃ ᐱᒫᒥᔒᔥᑑᐎᑦ ᓃᔨ ᐅᐦᒋ ᑭᔮᐦ ᓂᑎᔨᒧᐎᓂᔨᐤ ᐅᐦᒋ ᐋᐅᒄ ᒑ ᐱᒫᒥᔒᔅᑖᑯᑦ ᐄᔨᔨᐅᑯᓯᓵᓐ ᐄᔥᐱᐦ ᒦᓐ ᑎᑯᔑᓃᔨᒑ ᐅᒋᔅᑖᔨᐦᑖᑯᓯᐎᓃᔨᒡ᙮ ᐋᑯᑖᐦ ᒑ ᒋᔅᒑᔨᐦᑎᐦᒡ ᐄᔨᔨᐅᒡ ᐋ ᐃᔥᐱᔥ ᒋᔅᑖᔨᐦᑖᑯᓰᔨᒡ ᐄᔨᔨᐅᑯᓯᓵᓐ ᐙᔥ ᑭᑎ ᐙᐱᐦᑎᔨᐙᐅᒡ ᐅᐦᑖᐐᒫᐤ ᑭᔮᐦ ᑳ ᐱᔮᐦᒋᓰᔨᒡ ᐋᓐᒋᓂᒡ ᐋ ᐃᔥᐱᔥ ᒋᔅᑖᔨᐦᑖᑯᓰᔨᒡ᙮ 27 ᑖᑆᐦ ᒋᐐᐦᑎᒫᑎᓈᐙᐤ, ᑖᑆᐦ ᐋᐦ ᑖᒡ ᐅᑎᐦ ᐄᔨᔨᐅᒡ ᒑ ᐙᐱᐦᑎᐦᒡ ᒋᔖᒥᓂᑑ ᐅᒋᐦᒋᐅᒋᒫᐎᓂᔨᐤ ᒫᒀᒡ ᐋᔥᒄ ᐋ ᐱᒫᑎᓰᔨᒡ ᐅᑎᐦ ᐊᔅᒌᐦᒡ᙮”

28 ᐎᔮᔥ ᓂᔮᓈᓈᐤ ᑎᐦᑐ ᒌᔑᑳᐤᐦ ᑳ ᐃᔥᐱᔥ ᐋᔨᒸᐅᐦᐄᑯᑦ ᒌᓴᔅ ᐅᔮᔨᐤᐦ ᒑᒀᔨᐤᐦ, ᒌ ᒋᔅᑐᐦᑎᐦᐋᐤ ᐲᑎᕐ, ᒞᓐ ᑭᔮᐦ ᒉᒥᔅ, ᒌ ᓵᑭᒋᐙᐅᒡ ᒫᒃ ᐎᒌᔨᐤ ᐋᑎ ᒑ ᒌ ᓂᑑᐊᔨᒥᐦᐋᒡ᙮ 29 ᒫᒀᒡ ᒫᒃ ᐊᓂᔮᔨᐤ ᐋ ᐊᔨᒥᐦᐋᑦ ᐅᑖᔥᑎᒥᐦᒄ ᒌ ᒀᔅᒋᓈᑯᓂᔨᐤ ᑭᔮᐦ ᐅᒑᒀᓂᒻ ᓈᔥᑖᑆᐦ ᒌ ᐱᔮᑭᔅᒡ ᐙᐹᔨᐤ ᒥᑐᓐ ᐋ ᒌ ᐙᓯᑯᔥᑖᔨᔨᒡ᙮ 30 ᔑᔥᒋᑯᒡ ᒫᒃ ᒌ ᐅᐦᒋ ᓃᔑᔨᐤ ᓈᐹᐤ ᐋ ᐊᔨᒥᐦᐄᑯᑦ ᒌᓴᔅ᙮ ᐋᐅᑯᓂᒡ ᐊᓂᔮᐦᑳ ᒧᓱᔅ ᑭᔮᐦ ᐄᓛᐃᒑ᙮ 31 ᐋᒄ ᑳᐦ ᐋᔨᒨᑎᒧᐙᒡ ᒌᓴᔅᐦ ᔖᔥ ᐋ ᐹᔓᓈᑯᓃᔨᒡ ᒑ ᐴᓂᐱᒫᑎᓰᔨᒡ ᐊᓂᑖᐦ ᒋᕉᓯᓕᒥᐦᒡ, ᐊᓂᔮᔨᐤ ᒋᔖᒥᓂᑑ ᑳ ᐄᔑ ᐎᔨᔥᑖᔨᒡ ᒑ ᐄᔅᐱᔨᒡ᙮ ᓈᔥᒡ ᒫᒃ ᐋ ᒥᔻᔥᑖᔨᒡ ᒋᐦᒋᒌᔑᒄ ᒋᔅᑖᔨᑖᑯᓯᐎᓂᔨᐤ ᒌ ᐙᔥᑖᔨᐤ ᐊᓂᑎᐦ ᐙᔅᑳ ᐋᐦ ᑖᒡ᙮

32 ᐲᑎᕐ ᑭᔮᐦ ᐊᓂᒌ ᑯᑎᑭᒡ ᐄᔨᔨᐅᒡ ᒌᓴᔅᐦ ᑳ ᒌ ᐐᒑᐙᒡ ᒌ ᑰᐎᑯᔑᑖᐙᑯᐱᓐ᙮ ᒌ ᐹᑯᐱᔫᒡ ᒫᒃ ᑭᔮᐦ ᐄᔥᐱᐦ ᐎᔮᔅᑭᒫᔨᐦᑎᐦᒡ ᒌ ᐙᐱᐦᑎᒧᒡ ᐙᔥᑖᐎᓂᔨᐤ ᐙᔅᑳ ᒌᓴᔅᐦ ᐋᐦ ᑖᔨᒡ ᑭᔮᐦ ᒌ ᐙᐱᒫᐅᒡ ᐊᓂᔮᔨᐤ ᓃᔓ ᓈᐹᐤ ᐋ ᐐᒋᑳᐳᔥᑖᑯᔨᒡ᙮ 33 ᐄᔥᐱᐦ ᒫᒃ ᐊᓂᒌ ᓈᐹᐅᒡ ᐙᐦ ᓂᑭᑖᒡ ᒌᓴᔅᐦ, ᐲᑎᕐ ᒌᐦ ᐄᑖᐤ, “ᒋᔅᑯᑎᒫᒑᓯᐤ ᓄᐎᒡ ᒥᔻᔨᐦᑖᑯᓐ ᐅᑎᐦ ᒑ ᒌ ᑖᐅᐦᑯᐱᓈ᙮ ᐱᒋᔅᑎᓈᓐ ᒫᐦ ᒑ ᒌ ᐅᔑᐦᑖᔮᐦᒡ ᓂᔥᑐ ᑎᐱᓅᔑᒧᓐᐦ, ᐹᐦᐹᔨᒄ ᒑ ᐃᔮᔮᒄ, ᒌᔨ, ᒧᓱᔅ ᑭᔮᐦ ᐄᓛᐃᒑ᙮” ᐲᑎᕐ ᒫᒃ ᓂᒧᐃ ᒥᑐᓐ ᐅᐦᒋ ᓂᔅᑐᐦᑎᒻ ᒑᒀᔨᐤ ᐙᐦᒋ ᐃᔨᑦ ᐅᔮᔨᐤ᙮

34 ᒫᒀᒡ ᒫᒃ ᐋᔥᒄ ᐋ ᐊᔨᒥᑦ, ᑭᔥᑭᐎᓂᔥᒄ ᒌ ᐅᐦᒋ ᓅᑯᓯᔨᐤ ᒥᑐᓐ ᐋ ᐊᐅᑳᔥᑖᔥᑳᑯᒡ᙮ ᐊᓂᒌ ᒫᒃ ᒋᔅᒋᓂᐦᐊᒧᐙᑭᓂᒡ ᓈᔥᑖᑆᐦ ᒌ ᓵᒋᓯᐎᒡ ᐄᔥᐱᐦ ᒥᑐᓐ ᐋᑯᓂᐦᐅᑯᒡ ᐊᓂᔮᔨᐤ ᑭᔥᑭᐎᓂᔥᒄ᙮ 35 ᐊᓂᑎᐦ ᒫᒃ ᑭᔥᑭᐎᓂᔅᑰᐦᒡ ᒌ ᐅᐦᒋ ᐹᐦᑎᒧᒡ ᐹᐦᑖᑯᓯᐎᓂᔨᐤ, ᐊᐙᔨᐤᐦ ᐋᐦ ᐄᔨᔨᒡ, “ᐋᐅᒄ ᐆ ᓂᑯᔅ ᑳ ᐅᐙᔮᐱᒥᒃᐦ, ᓂᑐᐦᑎᐙᐦᒄ᙮” 36 ᐄᔥᐱᐦ ᒫᒃ ᑳ ᒌᔥ ᐊᔨᒥᑦ ᐊᓐ ᐊᐙᓐ, ᒌ ᐙᐱᒫᐅᒡ ᒌᓴᔅᐦ ᐋ ᐹᔨᑯᑳᐳᐎᔨᒡ᙮ ᐋᒄ ᐊᓂᒌ ᒋᔅᒋᓂᐦᐊᒧᐙᑭᓂᒡ ᓂᒧᐃ ᐅᐦᒋ ᐱᐹᒫᒋᒨᒡ ᐋᔥᒄ ᐅᔮᔨᐤ ᑳ ᐄᔑ ᐙᐱᐦᑎᐦᒡ ᐋᐦ ᐄᔅᐱᔨᒡ᙮

37 ᒦᓐ ᒫᒃ ᐎᔮᐱᓃᔨᒡ ᒌᓴᔅ ᑭᔮᐦ ᐊᓂᔮ ᓂᔥᑐ ᒋᔅᒋᓂᐦᐊᒧᐙᑭᓐ ᒌ ᓃᐦᑎᒋᐙᐅᒡ ᐊᓂᔮᔨᐤ ᐋ ᐱᔅᒀᐱᔅᑳᔨᒡ, ᒌ ᒥᐦᒑᑎᔨᐤ ᒫᒃ ᐊᐙᔨᐤᐦ ᐋ ᐹᒋ ᓂᒋᐦᐄᑯᑦ ᒌᓴᔅ᙮ 38 ᐊᓂᑎᐦ ᒫᒃ ᑖᐙᔨᔥ ᐋ ᒥᐦᒑᑎᓈᓂᐎᔨᒡ ᒌ ᑖᑆᐤ ᐹᔨᒄ ᓈᐹᐤ ᐋᐦ ᐄᑖᑦ ᐊᓂᔮᔨᐤ ᒌᓴᔅᐦ, “ᒋᔅᑯᑎᒫᒑᓯᐤ, ᒋᓂᑐᑎᒫᑎᓐ ᒑ ᒌ ᐐᒋᐦᐄᑦ ᓂᑯᔅ, ᐙᔥ ᐊᐅᒄ ᒥᒄ ᐋᐦ ᐹᔨᑯᔑᑦ ᓂᑎᐙᔒᒻ᙮ 39 ᒫᔑᐦᐄᑰ ᓂᔮᓂᑯᑐᓐᐦ ᒥᒋᐊᐦᒑᐦᒄ ᐋᐦ ᑐᑖᑯᑦ ᔑᔥᒋᑯᒡ ᒑ ᒌ ᐋᔑᐦᒀᑦ᙮ ᐋᒄ ᒫᒃ ᑭᔮᐦ ᐋ ᐅᒋᐱᑎᑯᑦ ᒫᓐ ᒥᑐᓐ ᐋ ᐲᔥᑖᐅᑖᐦᒧᑦ᙮ ᓈᔥᒡ ᓂᓈᐦᑳᑖᔨᐦᑎᒥᐦᐄᑰ ᐅᔮᔨᐤ ᒥᒋᐊᐦᒑᐦᒄ ᐋᐦᐋᑳ ᒫᒃ ᐐ ᓂᑭᑎᑯᑦ᙮ 40 ᐋᑦ ᒫᒃ ᓂᒌ ᑯᒀᒋᒫᐅᒡ ᒌ ᒋᔅᒋᓂᐦᐊᒧᐙᑭᓂᒡ ᒑ ᒌ ᐎᔨᐐᑎᔑᐦᐙᒡ ᐅᔮᔨᐤ ᒥᒋᐊᐦᒑᐦᒄ, ᓂᒧᐃ ᒫᒃ ᐅᐦᒌ ᑐᑎᒧᒡ᙮”

41 ᒌᓴᔅ ᒫᒃ ᒌᐦ ᐄᑖᐤ ᐊᓂᔮᔨᐤ ᐄᔨᔨᐤᐦ ᐊᓂᑎᐦ ᑳᐦ ᑖᔨᒡ, “ᒌᔨᐙᐤ ᐊᓅᐦᒡ ᑳ ᐱᒫᑎᓰᔮᒄ ᐋᑳ ᑳ ᐃᔮᔮᒄ ᑖᑆᔮᔨᐦᑎᒧᐎᓐ ᑭᔮᐦ ᐋᑳ ᑳ ᒀᔅᑳᑎᓰᔮᒄ, ᓂᒧᐃ ᑭᔮᐦ ᑯᐃᔅᒄ ᒋᑎ ᐄᔑ ᐱᒫᑎᓰᓈᐙᐤ᙮ ᑖᓐ ᒑ ᐃᔥᐱᔒ ᑖᔮᓐ ᐅᑎᐦ ᐋᐦ ᑖᔮᒄ ᐃᔮᒄ ᒑ ᐃᔮᔮᒄ ᑖᑆᔮᔨᐦᑎᒧᐎᓐ᙮ ᐹᔓᐙᐦᒄ ᐊᓐ ᓈᐹᔥ᙮” 42 ᒫᒀᒡ ᒫᒃ ᐋ ᐹᒋ ᓈᑖᑦ ᐊᓂᔮᔨᐤ ᒌᓴᔅᐦ ᐊᓐ ᓈᐹᔥ, ᒥᒋᐊᐦᒑᐦᒄ ᒥᑐᓐ ᒌ ᑭᐎᐙᐱᓂᑰ ᐋᒄ ᑳᐦᑐᑖᑯᑦ ᒑ ᒌ ᐅᒋᐱᑎᑯᑦ᙮ ᒌᓴᔅ ᒫᒃ ᒌ ᒋᔅᑎᐦᐋᒧᐙᐤ ᐊᓂᔮᔨᐤ ᒥᒋᐊᐦᒑᐦᒄ ᑳᐦ ᐄᑖᑦ ᒑ ᒌ ᓂᑭᑖᔨᒡ ᐊᓂᔮᔨᐤ ᓈᐹᔥᐦ᙮ ᐋᑯᑖᐦ ᒫᒃ ᑳᐦ ᐋᑎ ᒦᓂᐙᑎᓰᑦ ᐊᓐ ᓈᐹᔥ᙮ ᐋᒄ ᒌᓴᔅ ᑳ ᒌᐙᒥᔮᑦ ᐊᓂᔮᔨᐤ ᓈᐹᐤ ᐊᓂᔮᔨᐤ ᐅᑯᓯᔨᐤᐦ᙮ 43 ᒥᓯᐙ ᒫᒃ ᐊᓂᒌ ᐄᔨᔨᐅᒡ ᒌ ᒫᒥᔥᑳᑖᔨᐦᑎᒥᐦᐄᑯᒡ ᒋᔖᒥᓂᑑ ᐅᓲᐦᑳᑎᓰᐎᓂᔨᐤ᙮

ᒫᒀᒡ ᒫᒃ ᐋ ᒫᒥᔥᑳᑖᔨᐦᑎᒥᐦᐄᑯᒡ ᑖᓐ ᑳ ᐄᔑ ᑐᑎᒥᔨᒡ ᒌᓴᔅᐦ, ᒌ ᐊᔨᒥᐦᐋᐤ ᐅᒋᔅᒋᓂᐦᐊᒧᐙᑭᓐᐦ ᐋᐦ ᐄᑖᑦ, 44 “ᒋᔅᒍᒄ ᔮᔨᑖ ᑖᓐ ᒑ ᐄᑎᑯᒡ᙮ ᒋᑭ ᐱᒋᔅᑎᓈᑭᓂᐎᒡ ᐄᔨᔨᐅᒡ ᒑ ᒌᐦ ᑐᑎᐙᒡ ᑖᓐ ᐙᐦ ᑐᑎᐙᒡ ᐄᔨᔨᐅᑯᓯᓵᓐ᙮” 45 ᒥᒄ ᒫᒃ ᐊᓂᒌ ᒋᔅᒋᓂᐦᐊᒧᐙᑭᓂᒡ ᓂᒧᐃ ᐅᐦᒋ ᓂᔅᑐᐦᑎᒧᒡ᙮ ᓂᒧᐃ ᐅᐦᒋ ᒋᔅᒑᔨᐦᑎᒧᒡ ᑖᓐ ᑳ ᐐᐦ ᐄᔑ ᐐᐦᑎᒫᑯᒡ ᒌᓴᔅᐦ, ᐙᔥ ᐋᔥᒄ ᓂᒧᐃ ᐅᐦᒋ ᒥᔮᑭᓂᐎᒡ ᒑ ᒌ ᓂᔅᑐᐦᑎᐦᒡ᙮ ᒌ ᓵᒋᓯᐎᒡ ᒫᒃ ᒑ ᒌ ᑯᒀᒋᐦᒑᒧᒡ ᒑᒀᔨᐤ ᐅᔮᔨᐤ ᑳ ᐄᔨᔨᒡ᙮

46 ᒋᔅᒋᓂᐦᐊᒧᐙᑭᓂᒡ ᒫᒃ ᒌ ᐅᔥᑖᐱᔫᒡ ᐋ ᐃᔮᔥᑖᒥᑐᒡ ᐊᐙᓐ ᐊᓂᑎᐦ ᐋ ᐃᑎᔑᒡ ᒫᐅᒡ ᒑ ᒑᔅᑖᔨᐦᑖᑯᓯᑦ᙮ 47 ᒌᓴᔅ ᒫᒃ ᒌ ᒋᔅᒑᔨᒫᐤ ᑖᓐ ᐋ ᐄᔑ ᒫᒥᑐᓈᔨᐦᑎᒥᔨᒡ ᐋᒄ ᑳ ᐅᑎᓈᑦ ᐊᐙᔑᔥ ᐋ ᐊᐱᔒᔑᔨᒡ ᐋᒄ ᑳ ᓃᐴᐦᐋᑦ ᐊᓂᑎᐦ ᐅᐦᐱᒫ ᐋᐦ ᑖᑦ᙮ ᑳᐦ ᐄᑖᑦ ᐊᓂᔮᔨᐤᐦ ᐅᒋᔅᒋᓂᐦᐊᒧᐙᑭᓐᐦ, 48 “ᐊᐙᓐ ᐋ ᐅᑎᓈᑦ ᐹᔨᒄ ᐅᔮᔨᐤ ᐊᐙᔑᔥ ᓂᑎᔑᓂᐦᑳᓱᐎᓂᐦᒡ ᐅᐦᒋ, ᒧᔮᒻ ᑭᔮᐦ ᓃᔨ ᐋ ᐅᑎᓂᑦ ᐋᔪᐎᒄ ᐋ ᐃᓯᓈᑯᓃᔨᒡ᙮ ᐊᓐ ᒫᒃ ᐊᐙᓐ ᑳ ᐅᑎᓂᑦ, ᐊᓂᔮᔨᐤ ᑳ ᐹᒋ ᐄᑎᔑᐦᐅᔨᒡ ᐋᔨᐅᑯᓐ ᐊᓂᔮᔨᐤ ᐙᑎᓈᑦ᙮ ᐙᔥ ᐊᓐ ᐊᐙᓐ ᒫᐅᒡ ᓅᐦᑖᔮᔥ ᑳ ᐄᑖᔨᐦᑖᑯᓯᑦ ᐊᓂᑎᐦ ᐋ ᑎᔑᔮᒄ ᐋᐅᒄ ᐊᓐ ᒫᐅᒡ ᒑᔅᑖᔨᐦᑖᑯᓯᑦ᙮”

49 ᐋᒄ ᒞᓐ ᑳᐦ ᐄᑖᑦ, “ᒋᔅᑯᑎᒫᒑᓯᐤ, ᓂᒌᐙᐱᒫᓈᓐ ᓈᐹᐤ ᐋ ᐎᔨᐐᑎᔑᐦᐙᑦ ᒥᒋᐊᐦᒑᐦᒄ ᒋᑎᐃᔑᓂᐦᑳᓱᐎᓂᔨᐤ ᐋᐦ ᐋᐱᒋᐦᑖᑦ, ᐋᒄ ᑳ ᒋᔅᑎᐦᐋᒧᐎᒋᐦᑦ, ᐙᔥ ᑖᐹ ᐅᑖᐦ ᒌᔮᓂᐤ ᐋ ᑖᐎᐦᒄ ᐄᔑ ᐐᒋᐦᐄᐙᐤ᙮” 50 ᒌᓴᔅ ᑳᐦ ᐄᑖᑦ, “ᐊᑳᐐ ᒋᔅᑎᐦᐋᒧᐙᐦᒄ᙮ ᐙᔥ ᐊᓐ ᐊᐙᓐ ᐋᑳ ᑳ ᓂᔥᑰᔥᑖᑎᐦᒄ ᒌ ᐐᒋᐦᐄᑯᓂᐤ᙮”

51 ᓈᓈᓂᒌᒻ ᒫᒃ ᒌ ᐋᑎ ᐹᔓᓈᑯᓂᔨᐤ ᒌᓴᔅ ᒋᐦᒋᒌᔑᑯᐦᒡ ᒑ ᐄᔑ ᐅᑎᓈᑭᓅᑦ ᐋᒄ ᓈᔥᒡ ᑳ ᐄᑖᔨᐦᑎᒃ ᔮᔨᑖ ᒑ ᒌ ᐄᑐᐦᑖᑦ ᒋᕉᓯᓕᒥᐦᒡ᙮ ᐋᒄ ᒫᒃ ᑳ ᒋᔅᑐᐦᑖᑦ᙮ 52 ᒫᒀᒡ ᒫᒃ ᐊᓂᔮᔨᐤ ᐋᐦ ᐋᑎ ᐱᒧᐦᑖᑦ ᒌ ᓃᑳᓂᑎᔑᐦᐙᐤ ᐊᐙᔨᐤᐦ ᐊᓂᑖᐦ ᐊᓂᔮᔨᐤ ᐃᐦᑖᐎᓂᔨᐤ ᓵᒫᕆᔮ ᐄᔨᔨᐤ ᑳᐦ ᑖᔨᒡ, ᒑ ᒌ ᓂᑑᐃᔮᔅᑰᔥᑖᔨᒡ ᐊᓂᑎᐦ ᒑ ᒌᐦ ᑖᑯᐱᓈ ᐊᓂᔮᔨᐤ ᒑ ᑎᐱᔅᑳᔨᒡ᙮ 53 ᒥᒄ ᒫᒃ ᐊᓂᔮᔨᐤ ᐄᔨᔨᐤᐦ ᐊᓂᑎᐦ ᑳᐦ ᑖᔨᒡ ᓂᒧᐃ ᐅᐦᒋ ᐐᐦ ᐲᐦᑎᑭᐦᐄᑰ ᐙᔥ ᒌ ᒋᔅᒑᔨᒥᑰ ᒋᕉᓯᓕᒥᐦᒡ ᐋ ᐐᐦ ᐄᑐᐦᑖᑦ᙮ 54 ᐄᔥᐱᐦ ᒫᒃ ᐊᓂᒌ ᒋᔅᒋᓂᐦᐊᒧᐙᑭᓂᒡ ᒉᒥᔅ ᑭᔮᐦ ᒞᓐ ᑳ ᐹᐦᑎᐦᒡ ᐅᔮᔨᐤ ᒌ ᐄᑖᐅᒡ ᐊᓂᔮᔨᐤ ᒌᓴᔅᐦ, “ᑎᐹᔨᐦᒋᒑᔨᓐ, ᒌ ᓂᑎᐙᔨᒥᓈᓈ ᒑ ᒌ ᓂᑎᐙᔨᐦᑎᒫᐦᒡ ᐃᔥᑯᑖᐤ ᒋᐦᒋᒌᔑᑯᐦᒡ ᒑ ᒌ ᐅᐦᒋᐱᔨᐦᒡ ᒑ ᒌ ᓂᔑᐎᓈᒋᐦᐄᑯᒡ ᐊᓂᒌ ᐄᔨᔨᐅᒡ ᒧᔮᒻ ᐊᓂᔮ ᐄᓛᐃᒑ ᑳᐦ ᑐᑎᐦᒃ᙮” 55 ᒌᓴᔅ ᒫᒃ ᒌ ᒀᔅᒋᑳᐳᔥᑎᐙᐤ ᑳ ᒋᔅᑎᐦᐋᒧᐙᑦ ᐅᔮᔨᐤ ᐋ ᐄᔑ ᐊᔨᒥᔨᒡ᙮ ᒌᐦ ᐄᑖᐤ, “ᐆ ᐋᑖᔨᐦᑎᒫᒄ ᓂᒧᐃ ᐐᔨ ᒋᔖᒥᓂᑑ ᐋᐦ ᑖᑦ ᐅᐦᒋᐱᔨᐤ, 56 ᐙᔥ ᐄᔨᔨᐅᑯᓯᓵᓐ ᓂᒧᐃ ᐅᐦᒋ ᑎᑯᔑᓐ ᒑ ᒌ ᓂᔑᐎᓈᒋᐦᑖᐙᑦ ᐊᐙᔨᐤᐦ ᐅᐱᒫᑎᓰᐎᓂᔨᐤ, ᒌ ᑎᑯᔑᓐ ᒑ ᒌ ᐱᒫᒋᐦᐄᐙᑦ᙮” ᐋᒄ ᐊᓂᑖᐦ ᑯᑎᒋᔨᐤ ᐃᐦᑖᐎᓂᔨᐤ ᑳ ᐄᑐᐦᑖᒡ᙮

57 ᒫᒀᒡ ᒫᒃ ᐊᓂᔮᔨᐤ ᐋ ᐱᒧᐦᑖᒡ ᒌ ᓂᒋᔥᑳᑯᒡ ᓈᐹᐤᐦ᙮ ᐋᒄ ᐊᓐ ᓈᐹᐤ ᑳᐦ ᐄᑖᑦ ᐊᓂᔮᔨᐤ ᒌᓴᔅᐦ, “ᒋᑭ ᐱᐹᐐᒑᐅᑎᓐ ᑖᓂᑖᐦ ᒥᒄ ᒑ ᐄᑐᐦᑖᐅᓈ᙮” 58 ᐋᒄ ᒌᓴᔅ ᑳᐦ ᐄᑖᑦ, “ᒥᐦᒑᔔᒡ ᑎᑯᓂᔨᐤ ᐅᐙᑎᑯᐙᐤ, ᐱᔮᔒᔑᒡ ᑭᔮᐦ ᑎᑯᓂᔨᐤ ᐅᒋᔥᑐᓂᐙᐤ, ᒥᒄ ᒫᒃ ᐄᔨᔨᐅᑯᓯᓵᓐ, ᓂᒧᐃ ᐋᔮᔨᐤ ᑖᓂᑖᐦ ᒑ ᒌ ᐅᐙᔨᓯᐦᒃ ᒑ ᒌ ᐋᔨᐙᓯᑦ᙮”

59 ᐋᒄ ᒌᓴᔅ ᑳᐦ ᐄᑖᑦ ᑯᑎᒃ ᓈᐹᐤ, “ᐹᒋ ᐐᒑᐅᐦ᙮” ᐋᒄ ᐊᓐ ᓈᐹᐤ ᑳᐦ ᐄᑖᑦ ᒌᓴᔅᐦ, “ᑎᐹᔨᐦᒋᒑᔨᓐ, ᐱᒋᔅᑎᓐ ᐱᑎᒫ ᒑ ᒌ ᓂᐦᐄᐦᑯᒃ ᓅᐦᑖᐐ ᐴᓂᐱᒫᑎᓰᒑ ᐋᒄ ᒫᒃ ᐃᔮᒄ ᒑ ᐐᒑᐅᑖᓐ᙮” 60 ᐋᒄ ᒌᓴᔅᐦ ᑳᐦ ᐄᑎᑯᑦ, “ᐊᓂᒌ ᒧᔮᒻ ᑳ ᐴᓂᐱᒫᑎᓰᔨᒡ ᑳ ᐄᑖᔨᐦᑖᑯᓯᒡ ᐄᔨᔨᐅᒡ ᐋᑯᔥ ᑭᑎ ᓂᐦᐄᐦᑯᐙᐅᒡ ᐊᓂᔮᔨᐤ ᐅᑎᔨᔨᒧᐙᐤ ᑳ ᐴᓂᐱᒫᑎᓰᔨᒡ᙮ ᒌᔨ ᒫᒃ, ᒫᒌᐦ ᒑ ᐙᐎᐦᑖᒨᑦ ᒋᔖᒥᓂᑑ ᐅᒋᐦᒌᐅᒋᒫᐎᓐ᙮” 61 ᒦᓐ ᑯᑎᒃ ᓈᐹᐤ ᒌᐦ ᐄᑖᐤ ᐊᓂᔮᔨᐤ ᒌᓴᔅᐦ, “ᑎᐹᔨᐦᒋᒑᔨᓐ, ᒋᑭ ᐱᐹᐐᒑᐅᑎᓐ, ᒥᒄ ᒫᒃ ᓃᔥᑎᒻ ᓂᑭ ᒌᐙᓐ ᐋᒄ ᒑ ᓂᑎᐙᒋᔮᒥᒀᐤ ᓂᓃᒋᐦᐄᑯᒡ ᑭᔮᐦ ᓃᒋᔖᓂᒡ᙮” 62 ᐋᒄ ᒌᓴᔅ ᑳᐦ ᐄᑖᑦ, “ᐊᐙᓐ ᔖᔥ ᐋ ᒋᐦᒋᐱᔨᐦᑖᑦ ᐋᐦ ᐋᐱᑎᔒᔥᑎᐙᑦ ᒋᔖᒥᓂᑑ, ᒨᔥ ᒫᒃ ᐋ ᒌᐙᒫᒥᑐᓈᔨᐦᑎᒥᐦᐄᑯᑦ ᐙᔥᑭᒡ ᐅᑎᐃᑖᑎᓰᐎᓐ ᓂᒧᐃ ᐄᑖᔨᐦᑖᑯᓯᐤ ᒑ ᒌ ᐋᐱᑎᔒᔥᑖᒸᑦ ᒋᔖᒥᓂᑑ ᐅᒋᐦᒋᐅᒋᒫᐎᓂᔨᐤ᙮”