19
ᒌᓴᔅ ᑳᐦ ᐋᔨᒨᑎᐦᒃ ᐋ ᐙᐱᓂᑐᓈᓂᐎᔨᒡ
ᒫᕐᒃ 10:1-12
1 ᐄᔥᐱᐦ ᒫᒃ ᒌᓴᔅ ᑳ ᒌᔥ ᐐᐦᑎᐦᒃ ᐅᔮᔨᐤ ᒌ ᒋᔅᑐᐦᑖᐤ ᐊᓂᑎᐦ ᑳᓕᓖᐦᒡ ᐅᐦᒋ, ᐋᒄ ᐊᓂᑖᐦ ᒎᑏᔮ ᐊᔅᒌᐦᒡ ᑳ ᐄᑐᐦᑖᑦ ᐊᑳᒥᐦᒡ ᐄᑖᐦᒑᑳᒻ ᐊᓂᔮᔨᐤ ᒞᕐᑎᓐ ᓰᐲᔨᐤ᙮ 2 ᒌ ᒥᐦᒑᑎᔨᐤ ᒫᒃ ᐄᔨᔨᐤ ᐋ ᓅᔔᔥᑳᑯᑦ, ᐋᑯᑖᐦ ᐊᓂᑖᐦ ᑳ ᒦᓂᐙᒋᐦᐋᑦ᙮
3 ᐱᔅᒡ ᒫᒃ ᐹᕆᓰᐦ ᒌ ᐹᒋ ᓂᑎᐙᐱᒥᑰ ᐋ ᐐᐦ ᑯᒀᒋᐦᐄᑯᑦ᙮ ᒌᐦ ᐄᑎᑰ ᒫᒃ, “ᐐᐦᑎᒨᓈᓐ ᒫᐦ, ᐋᐤ ᐋ ᐋᑎᔅᑖᒡ ᐐᔓᐙᐎᓂᐦᒡ ᒑ ᐱᒋᔅᑎᓈᑭᓅᑦ ᓈᐹᐤ ᒥᒄ ᒑ ᒌᐦ ᐄᔑ ᐙᐱᓈᑦ ᐐᐤᐦ?”
4 ᐋᒄ ᒌᓴᔅ ᑳ ᓂᔥᒀᐅᔑᐦᐋᑦ ᐋᐦ ᐄᑖᑦ, “ᓂᒧᐃ ᐋ ᑰᐦᒋ ᐊᔨᒥᐦᑖᓈᐙᐤ ᒋᐦᒋᒥᓯᓂᐦᐄᑭᓂᐦᒡ ᐊᓂᑎᐦ ᑳᐦ ᐄᑎᔥᑖᒡ, ᓃᔥᑎᒻ ᐄᔨᔨᐤ ᑳ ᐅᔑᐦᐋᑦ ᒋᔖᒥᓂᑑ, ᓈᐹᐤ ᑭᔮᐦ ᐃᔅᒀᐤ ᒌᐦ ᐅᔑᐦᐋᐤ᙮ 5 ᒌᐦ ᐃᔨᑖᑯᐱᓐ ᒫᒃ ᒋᔖᒥᓂᑑ, ‘ᐆ ᐅᐦᒋ, ᓈᐹᐤ ᒋᑭ ᓂᑭᑖᐤ ᐅᓃᒋᐦᐄᒄᐦ ᒑ ᐐᒋᒫᑦ ᐐᐤᐦ, ᐋᒄ ᐊᓂᔮᔨᐤ ᐊᓃᔑᒡ ᒑ ᐹᔨᑯᒡ’᙮ 6 ᓂᒧᐃ ᔖᔥ ᓃᓯᐎᒡ ᐄᔨᔨᐅᒡ, ᒫᒃ ᒥᒄ ᔖᔥ ᐋ ᐹᔨᑯᔑᑦ ᐊᐙᓐ᙮ ᐊᓂᔮᔨᐤ ᒫᒃ ᐊᐙᔨᐤᐦ ᒋᔖᒥᓂᑑ ᑳ ᐐᒋᑎᔮᑦ, ᓂᒧᐃ ᐊᐙᓐ ᒋᐱᐦ ᒌ ᐅᐦᒋ ᐱᐦᑳᓂᐦᐋᐤ᙮”
7 ᐋᒄ ᑳᐦ ᐄᑎᑯᑦ ᐊᓂᔮ ᐹᕆᓰᐦ, “ᒑᒀᔨᐤ ᒫᒃ ᐙᐦᒋ ᐎᔨᔥᑖᑦ ᐅᔮᔨᐤ ᐐᔓᐙᐎᓂᔨᐤ ᒧᓱᔅ ᐋᐦ ᐄᑎᔥᑖᔨᒡ, ᓈᐹᐤ ᐐᐦ ᐙᐱᓈᒑ ᐐᐤᐦ ᔮᔨᑖ ᓂᔮᑭᓐᐦ ᒋᑭ ᐐᐦᑎᒧᐙᐤ ᒥᓯᓂᐦᐄᑭᓂᔨᐤ ᐋ ᒥᔮᑦ, ᐋᒄ ᒫᒃ ᐃᔮᒄ ᒑ ᓂᑭᑖᑦ?”
8 ᐋᒄ ᒌᓴᔅ ᑳ ᓂᔥᒀᐅᔑᐦᐋᑦ ᐋᐦ ᐄᑖᑦ, “ᒧᓱᔅ ᒋᒌ ᐱᒋᔅᑎᓂᑯᐙᐤ ᒑ ᒌ ᐙᐱᓂᒫᒄ ᒋᐅᐙᐤ ᐙᔥ ᒌ ᒋᔅᒑᔨᐦᑎᒻ ᐋ ᒥᔅᑳᐎᑖᐦᐋᑦ᙮ ᓂᒧᐃ ᒫᒃ ᐐᔨ ᒋᔖᒥᓂᑑ ᐅᐦᒋ ᓂᑎᐙᔨᐦᑎᒻ ᒑ ᒌᐦ ᐃᓯᓈᑯᓃᔨᒡ ᐅᔅᑭᒡ ᐙᔑᐦᐋᑦ ᓈᐹᐤ ᑭᔮᐦ ᐃᔅᒀᐤ᙮ 9 ᒋᐐᐦᑎᒫᑎᓈᐙᐤ ᒫᒃ, ᓈᐹᐤ ᐙᐱᓈᒑ ᐐᐤᐦ, ᐋᐦᐋᑳ ᒫᒃ ᐅᐦᒋ ᐱᓯᒀᑎᓰᔨᒡ ᐊᓂᔮᔨᐤ ᐐᐤᐦ, ᐊᓐ ᒫᒃ ᓈᐹᐤ ᐐᒋᒫᒑ ᑯᑎᒃ ᐃᔅᒀᐤ ᐱᓯᒀᑎᓯᐤ ᐊᓐ ᓈᐹᐤ᙮”
10 ᐋᒄ ᑳᐦ ᐄᑎᑯᑦ ᐅᒋᔅᒋᓂᐦᐊᒧᐙᑭᓐ, “ᐅᔮᔨᐤ ᐋᔅᐱᔨᐙᒀᓂᒌ ᓈᐹᐤ ᐐᐤᐦ, ᐋᑯᔥ ᒥᔻᓯᔨᐤ ᒑ ᐋᑳ ᒋᐦᒋᐐᒌᐦᑑᒡ ᐄᔨᔨᐅᒡ᙮”
11 ᐋᒄ ᒌᓴᔅ ᑳᐦ ᐄᑖᑦ, “ᓂᒧᐃ ᒥᓯᐙ ᐊᐙᓐ ᒋᑭ ᐅᑎᓂᒻ ᐅᔮᔨᐤ ᒋᔅᑯᑎᒫᒑᐎᓂᔨᐤ, ᒥᒄ ᐊᓐ ᐊᐙᓐ ᑳ ᒥᔮᑦ ᐅᔮᔨᐤ ᒑ ᒌᐦ ᐄᔑ ᐱᒫᑎᓰᔨᒡ᙮ 12 ᐱᔅᒡ ᒫᒃ ᐄᔨᔨᐅᒡ ᓂᒧᐃ ᒋᑭ ᒌ ᒋᐦᒋᐐᐎᒡ ᐙᔥ ᐋᔪᐎᒄ ᔖᔥ ᑳ ᐄᔑ ᐎᔨᔅᑖᔨᒡ ᐅᔅᑭᒡ ᑳ ᐱᒫᑎᓰᑦ, ᐋᒄ ᑯᑎᑭᒡ ᓂᒧᐃ ᐱᒋᔅᑎᓈᑭᓂᐎᒡ ᒑ ᒌ ᒋᐦᒋᐐᐎᒡ, ᐋᒄ ᑯᑎᑭᒡ ᐐᔨᐙᐤ ᐎᔮᔨᐦᑎᒧᒡ ᒑᐦ ᐋᑳ ᒋᐦᒋᐐᐎᒡ ᐙᔥ ᐄᑖᔨᐦᑎᒧᒡ ᐊᐅᔅᑖ ᒋᐦᒋᒌᔑᒄ ᒋᐦᒋᐅᒋᒫᐎᓂᔨᐤ ᒑ ᒌᐦ ᐋᐱᑎᔒᔥᑖᒡ ᒥᒄ ᐋ ᐹᔨᑯᒡ᙮ ᐊᓐ ᒫᒃ ᐊᐙᓐ ᒑ ᒌᐦ ᐅᑎᓂᐦᒃ ᐅᔮᔨᐤ ᐋᑯᔥ ᒋᑭ ᑐᑎᒻ᙮”
ᒌᓴᔅ ᑳ ᔑᐙᔨᒫᑦ ᐊᐙᔑᔥ
ᒫᕐᒃ 10:13-16; ᓘᒃ 18:15-17
13 ᒌ ᐹᔓᐙᐅᒡ ᒫᒃ ᐄᔨᔨᐅᒡ ᐅᑎᐙᔑᔒᒥᐙᐤᐦ ᐊᓂᑖᐦ ᒌᓴᔅᐦ ᐋᐦ ᑖᔨᒡ ᐋ ᒌ ᓂᑎᐙᔨᒫᒡ ᒑ ᒌ ᑖᐦᒋᓈᔨᒡ ᒑ ᒌᐦ ᐊᔨᒥᐦᐋᔥᑎᒧᐙᔨᒡ ᒫᒃ, ᒥᒄ ᒫᒃ ᐊᓂᒌ ᒋᔅᒋᓂᐦᐊᒧᐙᑭᓂᒡ ᒌ ᒋᔅᑎᐦᐋᒧᐙᐅᒡ ᐊᓂᔮᔨᐤᐦ ᐄᔨᔨᐤᐦ᙮ 14 ᐋᒄ ᒌᓴᔅ ᑳᐦ ᐄᑖᑦ, “ᐱᒋᔅᑎᓈᐦᑯᒡ ᐊᐙᔑᔑᒡ ᒑ ᒌ ᐹᒋ ᓈᓯᒡ, ᐊᑳᐐ ᐅᐦᒋ ᒋᔅᑎᐦᐋᒫᑯᒡ, ᐙᔥ ᐅᔮᔨᐤ ᑳ ᐄᑖᔨᐦᑖᑯᓯᒡ ᐄᔨᔨᐅᒡ, ᒋᐦᒋᒌᔑᒄ ᒋᐦᒋᐅᒋᒫᐎᓂᔨᐤ ᐐᔨᐙᐤ ᑎᐹᔨᐦᑎᒨᒡ᙮”
15 ᒌᓴᔅ ᑳ ᑖᐦᒋᓈᑦ ᐊᓂᔮᔨᐤ ᐊᐙᔑᔥ ᐋᒄ ᑳ ᒋᔅᑐᐦᑖᑦ᙮
ᑳ ᒦᓰᒋᓰᑦ ᓈᐹᐤ
ᒫᕐᒃ 10:17-31; ᓘᒃ 18:18-30
16 ᐹᔨᒀᐤ ᓈᐹᐤ ᒌ ᐹᒋ ᓂᑎᐙᐱᒫᐤ ᒌᓴᔅᐦ ᐋᐦ ᐄᑖᑦ, “ᒋᔅᑯᑎᒫᒑᓯᐤ, ᒑᒀᓐ ᒑ ᒌᐦ ᑐᑎᒫᓐ ᐋ ᒥᔻᔑᒡ ᒑ ᒌᐦ ᐅᐦᒋ ᐃᔮᔮᓐ ᑳᒋᒡ ᐱᒫᑎᓰᐎᓐ᙮”
17 ᐋᒄ ᒌᓴᔅ ᑳᐦ ᐄᑖᑦ, “ᒑᒀᓐ ᐙᐦᒋ ᑯᒀᒋᒥᔨᓐ ᒑ ᒌ ᐐᐦᑎᒫᑖᓐ ᒑᒀᓐ ᒫᔻᔑᒡ? ᒥᒄ ᐹᔨᒄ ᐊᐙᓐ ᒥᔪᐦᑣᐤ᙮ ᓂᓃᐦᑎ ᐄᑎᔓᐙᐎᓐᐦ ᐐᐦ ᐃᔮᔨᓈ ᑳᒋᒡ ᐱᒫᑎᓰᐎᓐ᙮”
18 ᐋᒄ ᐊᓐ ᓈᐹᐤ ᑳᐦ ᐄᑖᑦ, “ᒑᒄ ᐐᔓᐙᐎᓐ?” ᒌᓴᔅ ᑳ ᓂᔥᒀᐅᔑᐦᐋᑦ ᐋᐦ ᐄᑖᑦ, “ᐊᑳᐐ ᒋᑭ ᓂᐱᐦᐄᐙᓐ, ᐊᑳᐐ ᒋᑭ ᐱᓯᒀᑎᓯᓐ, ᐊᑳᐐ ᒋᑭ ᑭᒑᒧᑎᓐ, ᐊᑳᐐ ᒋᑭ ᓂᓂᑎᔮᒋᒫᐤ ᐊᐙᓐ, 19 ᒥᔪᑐᑎ ᐋ ᒋᔅᑖᔨᒥᑦ ᑰᐦᑖᐐ ᑭᔮᐦ ᒋᑳᐐ, ᑭᔮᐦ ᓵᒋᐦᐄᐦ ᒌᒋᐃᔨᔨᐤ ᒧᔮᒻ ᒌᐦ ᐋ ᐃᔥᐱᔥ ᓵᒋᐦᐄᓱᔨᓐ᙮”
20 ᐋᒄ ᐊᓐ ᐅᔅᒋᓃᒎ ᑳᐦ ᐃᔨᑦ, “ᔖᔥ ᓂᒌ ᓂᓂᐦᐄᐦᑖᓐ ᐅᐦᐄ ᐄᑎᔓᐙᐎᓐ ᑳ ᐹᒋ ᐊᐙᔑᐎᔮᓐ᙮ ᒑᒀᓐ ᒫᒃ ᐊᔮᐱᒡ ᐋᔥᒄ ᓂᐱᐦ ᑐᑖᓐ?”
21 ᐋᒄ ᒌᓴᔅ ᑳᐦ ᐄᑖᑦ, “ᒥᑐᓐ ᒥᓯᐙ ᒑᒀᓐ ᐙᐦ ᑐᑎᒧᓈ ᒑ ᒌᐦ ᑯᐃᔅᑯᑖᑎᓯᔨᓐ, ᓂᑑᐊᑖᐙᒑ ᒥᓯᐙ ᑖᓐ ᐋ ᐄᔑ ᐃᔮᔨᓐ, ᐋᒄ ᐊᓐ ᔓᐎᔮᓐ ᑳ ᒋᔅᑎᒫᑎᓰᔨᒡ ᒑ ᒥᔨᑣᐤ᙮ ᐋᒄ ᒫᒃ ᒑ ᐃᔮᔨᓐ ᒦᓯᒋᓰᐎᓐ ᒋᐦᒋᒌᔑᑯᐦᒡ ᑳᐦ ᑎᑯᐦᒡ᙮ ᒌᐦ ᑐᑎᒥᓈ ᒫᒃ ᐆ ᐋᔥᑎᒻ ᐋᒄ ᒫᒃ ᒑ ᐹᒋ ᓅᔔᔥᑭᐎᔨᓐ᙮”
22 ᐄᔥᐱᐦ ᒫᒃ ᐱᔮᐦᑎᐦᒃ ᐊᓐ ᐅᔅᒋᓃᒎ ᐅᔮᔨᐤ ᓈᔥᑖᑆᐦ ᒌ ᒥᒑᔨᐦᑎᒻ ᐙᔥ ᓈᔥᒡ ᒌ ᒦᓯᒋᓰᐤ᙮
23 ᐋᒄ ᒌᓴᔅ ᑳᐦ ᐄᑖᑦ ᐊᓂᔮᔨᐤ ᐅᒋᔅᒋᓂᐦᐊᒧᐙᑭᓐᐦ, “ᑖᑆᐦ ᒋᐐᐦᑎᒫᑎᓈᐙᐤ, ᐊᐙᓐ ᑳ ᒥᓰᒋᓰᑦ ᑖᑆᐦ ᒋᑭ ᐋᔨᒥᓂᔨᐤ ᒑ ᒌ ᐲᐦᒑᑦ ᒋᐦᒋᒌᔑᒄ ᒋᐦᒋᐅᒋᒫᐎᓂᐦᒡ᙮ 24 ᒦᓐ ᐹᔨᒀᐤ ᓂᑭ ᐃᔨᓐ, ᐊᑎᑎᐤ ᐋᔨᒥᓂᔨᐤ ᐊᐙᓐ ᐋ ᒥᓰᒋᓰᑦ ᒑ ᒌ ᐲᐦᒑᑦ ᒋᔖᒥᓂᑑ ᐅᒋᐦᒋᐅᒋᒫᐎᓃᔨᒡ ᐃᔥᐱᔥ ᐐᔨ ᐊᓐ ᑳᒥᓪ ᒑ ᒌ ᔖᐳᔥᑭᐦᒃ ᔖᐳᓂᑭᓂᔨᐤ ᐊᓂᑖᐦ ᐋ ᐱᑯᓈᔮᐱᔅᑳᔨᒡ᙮”
25 ᐄᔥᐱᐦ ᒫᒃ ᐱᔮᐦᑎᐦᒡ ᐊᓂᒌ ᒋᔅᒋᓂᐦᐊᒧᐙᑭᓂᒡ ᐅᔮᔨᐤ, ᓈᔥᒡ ᒌᐦ ᑯᔥᒀᔨᐦᑎᒧᒡ, ᐋᒄ ᑳ ᐄᑐᒡ, “ᐊᐙᓐ ᒫᒃ ᐋᒄ ᒑ ᒌ ᐱᒫᒋᐦᐅᑦ?”
26 ᐋᒄ ᒌᓴᔅ ᑯᐃᔅᒄ ᑳ ᑭᓂᐙᐱᒫᑦ ᐋᐦ ᐄᑖᑦ, “ᑖᓂᔮᔨᐤ ᐋᐦᐋᑳ ᒌᐦ ᑐᑎᐦᒃ ᐄᔨᔨᐤ ᒋᔖᒥᓂᑑ ᒫᒃ ᐐᔨ ᒥᓯᐙ ᒑᒀᔨᐤ ᒌᐦ ᑐᑎᒻ᙮”
27 ᐋᒄ ᐲᑎᕐ ᑳᐦ ᐄᑖᑦ, “ᑭᓂᐙᐱᐦᑏ ᒫᐦ᙮ ᔖᔥ ᒥᓯᐙ ᒑᒀᓐ ᓂᒌ ᓂᑭᑖᓈᓐ ᒑ ᒌ ᓅᔔᔥᑳᑖᐦᒡ᙮ ᐆ ᒫᒃ ᑳ ᐄᔑ ᑐᑎᒫᐦᒡ, ᒑᒀᔨᐤ ᒫᒃ ᒑ ᒥᔨᑯᔮᐦᒡ?”
28 ᐋᒄ ᒌᓴᔅ ᑳᐦ ᐄᑖᑦ, “ᑖᑆᐦ ᒋᐐᐦᑎᒫᑎᓈᐙᐤ, ᐄᔥᐱᐦ ᐄᔨᔨᐅᑯᓯᓵᓐ ᐊᐱᐦᒑ ᓈᔥᒡ ᑳᒋᔅᑖᔨᐦᑖᑯᓃᔨᒡ ᒋᐦᒋᐅᒋᒫᐤ ᑖᐦᑎᐴᓂᐦᒡ ᒦᓐ ᐅᔅᑳᒑ ᐊᔅᒌ, ᐋᒄ ᑭᔮᐦ ᒌᔨᐙᐤ ᓂᒋᔅᒋᓂᐦᐊᒧᐙᑭᓂᑐᒄ ᒑ ᐊᐱᔮᒄ ᓃᔓᔖᑉ ᐅᒋᒫᐤ ᑖᐦᑎᐱᐎᓐ, ᒑ ᑎᐹᔅᑯᓈᑯᒡ ᓃᔓᔖᑉ ᑳ ᑎᐦᑐᔅᑳᓈᓯᒡ ᐃᔅᕋᐄᓪ ᐄᔨᔨᐅᒡ᙮ 29 ᒥᓯᐙ ᐊᐙᓐ ᑳ ᓂᑭᑎᐦᒃ ᐐᒡ ᑭᔮᐦ ᑳ ᓂᑭᑖᑦ ᐐᒋᔖᓐ, ᐅᓃᒋᐦᐄᒄᐦ ᑭᔮᐦ ᐅᑎᐙᔑᔒᒻ ᑭᔮᐦ ᒫᒃ ᑳ ᓂᑭᑎᐦᒃ ᐅᑎᐦ ᐊᔅᒌ ᓃᔨ ᐅᐦᒋ, ᐊᐅᔅᑖ ᒥᑖᐦᑐᒥᑎᓈᐙᐤ ᒋᑭ ᐃᔥᐱᔥ ᒌᐙᒥᔮᑭᓂᐤ ᑭᔮᐦ ᑳᒋᒡ ᐱᒫᑎᓰᐎᓂᔨᐤ ᒋᑭ ᒥᔮᑭᓂᐤ᙮ 30 ᒥᒄ ᒫᒃ ᒥᐦᒑᑐ ᐊᓂᒌ ᓈᔥᒡ ᐋ ᒋᔅᑖᔨᐦᑖᑯᓯᒡ ᑳ ᐄᑖᔨᒫᑭᓂᐎᒡ, ᓂᒧᐃ ᒋᑭ ᐅᐦᒋ ᒋᔅᑖᔨᐦᑖᑯᓯᐎᒡ ᐊᓂᑖᐦ ᒋᔖᒥᓂᑑ ᐅᒋᐦᒋᐅᒋᒫᐎᓃᔨᒡ ᑭᔮᐦ ᒥᐦᒑᑐ ᐊᓂᒌ ᑳ ᐄᑖᔨᒫᑭᓂᐎᒡ ᐋᐦᐋᑳ ᓈᔥᑎᔨᔥ ᒋᔅᑖᔨᐦᑖᑯᓯᒡ, ᓈᔥᒡ ᒫᒃ ᒋᑭ ᒋᔅᑖᔨᐦᑖᑯᓯᐎᒡ ᐊᓂᑖᐦ ᒋᔖᒥᓂᑑ ᐅᒋᐦᒋᐅᒋᒫᐎᓃᔨᒡ᙮”