2
ᒌᓴᔅ ᑳ ᒦᓂᐧᐋᒋᐦᐋᑦ ᓈᐹᐤ ᐋᑳ ᓈᔥᑎᔨᔥ ᒌᐋᐦᑎᓃᓲᔨᒡ
ᒫᕠᔫ 9:1-8; ᓘᒃ 5:17-26
1 ᓂᒧᐃ ᒥᐦᒑᑐ ᒌᔑᑳᐤᐦ ᐅᐦᒋ ᒥᔮᐅᐱᔨᐤ ᐋᒄ ᒌᓴᔅ ᒦᓐ ᑳ ᑎᑯᔑᐦᒃ ᐊᓂᑎ ᐊᓂᔮᔨᐤ ᐃᐦᑖᐧᐃᓂᔨᐤ ᑳᐱᕐᓈᔪᒻ ᑳ ᐃᔑᓂᐦᑳᑖᔨᒡ᙮ ᐄᔥᐱᐦ ᒫᒃ ᒨᔑᐦᐋᑭᓅᑦ ᒦᓐ ᐋ ᒌ ᐹᒋ ᒌᐧᐋᑦ ᐋᒄ ᑳ ᒥᔑᐦᑖᔮᒋᒧᓈᓂᐧᐃᔨᒡ ᒦᓐ ᐋᐦ ᑖᑦ᙮ 2 ᓄᐧᐃᒡ ᒫᒃ ᒥᐦᒑᑐ ᐊᐧᐋᔨᐤᐦ ᒌ ᐹᒋ ᑎᑯᔑᓂᔨᐤ, ᒑᒃ ᓂᒧᐃ ᐅᐦᒋ ᑖᐱᔅᑳᑐᔫᐦ ᐊᓂᔮᔨᐤ ᐧᐋᔅᑳᐦᐄᑭᓂᔨᐤ, ᐧᐋᐧᐋᒡ ᐊᓂᑖᐦ ᐧᐃᔨᐧᐄᑎᒥᐦᒡ ᐃᔥᐧᑳᐦᑖᒥᐦᒡ ᒑ ᒌ ᑎᐧᐋᔨᒡ᙮ ᒌ ᑭᒑᔅᒋᒫᐤ ᒫᒃ ᒌᓴᔅ ᐊᓂᔮᔨᐤ ᑳ ᑎᑯᔑᓃᔨᒡ, ᒋᔖᒥᓂᑑᐦ ᐅᑎᔨᒧᐧᐃᓂᔨᐤᐦ ᐋᐦ ᐋᔨᒨᑎᒧᐧᐋᑦ᙮ 3 ᐅᔮᔨᐤ ᒫᒃ ᒫᐧᑳᒡ, ᓈᐤ ᓈᐹᐅᒡ ᒌ ᐹᔓᐧᐋᐅᒡ ᐧᐄᑖᐹᐧᐋᐤ ᐋᐦᐋᑳ ᓈᔥᑎᔨᔥ ᒌ ᐋᐦᑎᓃᓲᔨᒡ ᐅᑎᔥᐱᔑᒧᐧᐃᓃᔨᒡ ᐋ ᐱᒥᔑᓃᔨᒡ᙮ 4 ᐊᓂᔮᔨᐤ ᒫᒃ ᑳ ᐃᔥᐱᔥ ᒥᐦᒑᑎᓈᓂᐧᐃᔨᒡ ᓂᒧᐃ ᐹᔓᒡ ᐅᐦᒌ ᓈᑖᐅᒡ ᒌᓴᔅᐦ᙮ ᐋᒄ ᑳ ᐱᑯᓈᐱᑎᐦᒡ ᐊᓂᑖᐦ ᑎᐦᑯᐦᒡ ᐊᓂᔮᔨᐤ ᐧᐋᔅᑳᐦᐄᑭᓂᔨᐤ ᓂᐦᐋᐤ ᑎᐱᔅᑯᒡ ᐊᓂᑎᐦ ᐋ ᒌ ᓃᐴᐧᐃᔨᒡ ᒌᓴᔅᐦ, ᐋᑯᑖᐦ ᑳ ᐅᐦᒋ ᔮᔖᐱᐦᒑᓈᒡ ᐊᓂᔮᔨᐤᐦ ᓈᐹᐤᐦ ᐊᔥᐱᔑᒧᓂᐦᒡ ᐋ ᐱᒥᔑᓃᔨᒡ᙮ 5 ᒌᓴᔅ ᒫᒃ ᒌ ᐧᐋᐱᐦᑎᐧᒫᐤ ᐅᔮᔨᐤᐦ ᓈᐹᐤᐦ ᐋ ᐃᔥᐱᔥ ᑖᑆᔮᔨᐦᑎᒥᔨᒡ, ᐋᒄ ᑳᐦ ᐄᑖᑦ ᐊᓂᔮᔨᐤᐦ ᓈᐹᐤᐦ ᐋᑳ ᓈᔥᑎᔨᔥ ᒌ ᐋᐦᑎᓃᓲᔨᒡ, “ᓂᑯᔅ, ᒋᐧᐋᐹᔨᐦᑎᒫᑭᐧᐃᓐ ᒋᒥᒋᐦᐧᑖᐧᐃᓐ᙮”
6 ᒌᐦ ᑖᐅᒡ ᐊᓂᑎᐦ ᐊᓂᒌ ᐧᐄᔓᐧᐋᐧᐃᓂᔨᐤ ᑳ ᒋᔅᑯᑎᒫᒑᒡ, ᐅᔮᔨᐤ ᐋ ᐄᔑ ᒫᒥᑐᓈᔨᐦᑎᐦᒡ, 7 “ᒑᐧᑳᔨᐤ ᐧᐋᐦᒋ ᐅᔮᔨᐤ ᐄᔑ ᐊᔨᒥᑦ ᐆ ᓈᐹᐤ? ᒫᔮᔨᐦᒑᐤ ᐅᔮᔨᐤ ᑳᐦ ᐃᔨᑦ, ᒫᔮᔨᒫᐤ ᒋᔖᒥᓂᑑ᙮ ᓂᒧᐃ ᐧᐄᔨ ᓈᐹᐤ ᑭᑎ ᒌ ᐧᐋᐹᔨᐦᑎᒫᒑᐤ ᒥᒋᐦᐧᑖᐧᐃᓐ, ᒥᒄ ᒋᔖᒥᓂᑑ ᑭᑎ ᒌ ᐧᐋᐹᔨᐦᑎᒫᒑᐤ᙮”
8 ᒌᓴᔅ ᒫᒃ ᑏᐧᐋᐦᒡ ᒌ ᒨᔑᐦᐆ ᐅᑎᐦᒑᐦᑯᐦᒡ ᐅᔮᔨᐤ ᐋ ᐄᔑ ᒫᒥᑐᓈᔨᐦᑎᒥᔨᒡ, ᐋᒄ ᑳᐦ ᐄᑖᑦ, “ᒑᐧᑳᓐ ᐧᐋᐦᒋ ᐊᓐ ᐄᔑ ᒫᒥᑐᓈᔨᐦᑎᒫᒄ? 9 ᑖᓐ ᐊᑎᑎᐤ ᐧᐃᔮᐦᑎᐦᒡ ᒑ ᒌ ᐄᑖᑭᓅᑦ ᐆ ᓈᐹᐤ ᐋᑳ ᓈᔥᑎᔨᔥ ᒌ ᐋᐦᑎᓂᓲᑦ, ‘ᒋᐧᐋᐹᔨᐦᑎᒫᑭᐧᐃᓐ ᒋᒥᒋᐦᐧᑖᐧᐃᓐ,’ ᑭᔮᐦ ᒫᒃ ᐄᑖᑭᓅᑦ ‘ᐧᐃᓂᔥᑳᐦ, ᐅᑎᓐᐦ ᒋᑎᔥᐱᔑᒧᓐᐦ ᑭᔮᐦ ᐱᒧᐦᑖᐦ?’ 10 ᒋᑭ ᐧᐋᐱᐦᑏᑎᓈᐧᐋᐤ ᒑᐧᑳᓐ ᒑ ᒋᒋᔅᒑᔨᐦᑎᒫᒄ ᐄᔨᔨᐅᑯᓯᓵᓐ ᑖᑆᐦ ᐧᐄᔨ ᐋ ᐃᔮᑦ ᑎᐹᔨᐦᒋᒑᐧᐃᓂᔨᐤ ᐅᑎᐦ ᐊᔅᒌᐦᒡ ᒑ ᒌ ᐧᐋᐹᔨᐦᑎᒫᒑᑦ ᒥᒋᐦᐧᑖᐧᐃᓐ᙮” ᐋᒄ ᑳᐦ ᐄᑖᑦ ᐊᓂᔮᔨᐤᐦ ᓈᐹᐤᐦ ᐋᑳ ᑳ ᓈᔥᑎᔨᔥ ᒌ ᐋᐦᑎᓃᓲᔨᒡ, 11 “ᒋᐧᐄᐦᑎᒫᑎᓐ, ᐱᓯᑰᐦ, ᐅᑎᓐᐦ ᒋᑎᔥᐱᔑᒧᓐᐦ, ᒑ ᒌᐧᐋᔨᓐᐦ᙮” 12 ᑏᐧᐋᐦᒡ ᒫᒃ ᒌ ᐅᐦᒋ ᐱᔑᑰ ᐊᓐ ᓈᐹᐤᐦ ᑖᐧᐋᔨᔥ ᐊᓂᑎᐦ ᐋ ᒥᐦᒑᑎᓈᓂᐧᐃᔨᒡ, ᑳᐦ ᐋᑎ ᐅᑎᓂᐦᒃ ᐊᓂᔮᔨᐤ ᐅᑎᔥᐱᔑᒧᓐ, ᐋᒄ ᑳ ᒫᒌᑦ᙮ ᒥᓯᐧᐋ ᒫᒃ ᐊᓂᒌ ᐊᓂᑎᐦ ᑳᐦ ᑖᒡ ᒌ ᒥᔅᑳᑖᔨᐦᑎᒥᐦᐄᑯᒡ ᐅᔮᔨᐤ ᑳ ᐄᔅᐱᔨᒡ ᑭᔮᐦ ᒌ ᒫᒥᐦᒋᒫᐅᒡ ᒋᔖᒥᓂᑑᐦ ᐋᐦ ᐃᔨᒡ, “ᓂᒧᐃ ᓂᐦᑖ ᓅᐦᒋ ᐧᐋᐱᐦᑖᓈᓐ ᐆ ᐋᐦ ᐄᔅᐱᔨᒡ᙮”
ᒌᓴᔅ ᑳ ᓂᑑᒫᑦ ᓖᕙᔨᐦ ᒑ ᒌ ᓅᔔᔥᑳᑯᑦ
ᒫᕠᔫ 9:9-13; ᓘᒃ 5:27-32
13 ᒌᓴᔅ ᒫᒃ ᑳᐤ ᒌ ᓈᔑᐹᐤ ᐊᓂᔮᔨᐤ ᑳᓕᓖ ᓵᑭᐦᐄᑭᓂᔨᐤ᙮ ᐋ ᒫᒨ ᒥᐦᒑᑎᔨᒡ ᐄᔨᔨᐤᐦ ᑳ ᐹᒋ ᓂᑎᐧᐋᐱᒥᑯᑦ, ᐋᒄ ᑳ ᒋᔅᑯᑎᒧᐧᐋᑦ᙮ 14 ᐊᓂᔮᔨᐤ ᒫᒃ ᐋᐦ ᐋᑎ ᐱᒧᐦᑖᑦ ᒌ ᐅᑎᐦᑖᐤ ᓈᐹᐤᐦ ᒋᐦᒋᐅᒋᒫᐤ ᔓᐧᐃᔮᓐ ᑳ ᒫᒨᔑᒋᓈᔨᒡ ᐋᐦ ᐄᑖᐱᑎᓰᔨᒡ᙮ ᓖᕙᐃᐦ ᒌ ᐃᔑᓂᐦᑳᓱᔨᐤ᙮ ᐊᓪᕕᔨᔅᐦ ᒌ ᐃᔑᓂᐦᑳᓱᔨᐤ ᐅᐦᑖᐧᐄᔨᐤᐦ᙮ ᒫᐧᑳᒡ ᐊᓂᑖᐦ ᐅᒥᓯᓂᐦᐄᒑᐅᑭᒥᑯᐦᒡ ᒌ ᐊᐱᐤ ᐆ ᓖᕙᐃᐦ᙮ ᐋᒄ ᑳᐦ ᐄᑖᑦ ᒌᓴᔅ, “ᐹᒋ ᓅᔔᔥᑯᐦ᙮” ᒌ ᐱᔑᑰ ᒫᒃ ᓖᕙᐃ ᑳᐦ ᐋᑎ ᐧᐄᒑᐧᐋᑦ ᒌᓴᔅᐦ᙮
15 ᐹᑎᒫ ᒫᒃ ᒌᓴᔅ ᑭᔮᐦ ᐅᒋᔅᒋᓂᐦᐊᒧᐧᐋᑭᓐᐦ ᐋ ᒌ ᐹᒋ ᐧᐄᒑᐅᑯᑦ ᒌ ᒦᒋᓯᐧᐃᒡ ᐊᓂᑖᐦ ᓖᕙᔨᐦ ᐧᐄᒋᔨᐦᒡ᙮ ᐋᑯᑖᐦ ᑳᐦ ᑖᔨᒡ ᑭᔮᐦ ᒥᐦᒑᑐ ᐊᓂᔮᔨᐤᐦ ᒋᐦᒋᐅᒋᒫᐤᐦ ᔓᐧᐃᔮᓐ ᐋ ᒫᒨᔑᒋᓈᔨᒡ ᑳ ᐄᑖᐱᑎᓰᔨᒡ ᑭᔮᐦ ᐊᓂᔮᔨᐤᐦ ᑯᑎᒃ ᐊᐧᐋᔨᐤᐦ ᑳ ᒥᒑᑎᓰᔨᒡ, ᐧᐋᔥ ᒥᐦᒑᑐ ᒌ ᓅᔔᔥᑳᑰ᙮ 16 ᐋᒄ ᐊᓂᒌ ᐹᕆᓰᔨᔅ ᐧᐄᔓᐧᐋᐧᐃᓂᔨᐤ ᑳ ᒋᔅᑯᑎᒫᒑᒡ ᒌ ᐧᐋᐱᒫᐅᒡ ᒌᓴᔅ ᐋ ᐧᐄᒋᒦᒋᓲᒫᔨᒡ ᐊᓂᔮᔨᐤᐦ ᒋᐦᒋᐅᒋᒫᐤ ᔓᐧᐃᔮᓐ ᐋ ᒫᒨᔑᒋᓈᔨᒡ ᑳ ᐄᑖᐱᑎᓰᔨᒡ ᑭᔮᐦ ᑯᑎᒃ ᐊᐧᐋᔨᐤᐦ ᑳ ᒥᒑᑎᓰᔨᒡ᙮ ᒌ ᑯᐧᑳᒋᒥᒫᐅᒡ ᐅᒋᔅᒋᓂᐦᐊᒧᐧᐋᑭᓂᔨᐤᐦ, ᐋᐦ ᐄᑖᒡ, “ᒑᐧᑳᔨᐤ ᐧᐋᐦᒋ ᐧᐄᒋᒦᒋᓲᒫᑦ ᐅᔮᔨᐤ ᑳ ᐄᑖᔨᐦᑖᑯᓰᔨᒡ᙮”
17 ᒌᓴᔅ ᒫᒃ ᒌ ᐹᐦᑎᐧᐋᐤ ᐅᔮᔨᐤ ᐋᐦ ᐃᔨᒡ, ᐋᒄ ᑳᐦ ᐄᑖᑦ, “ᓂᒧᐃ ᓂᑎᐧᐋᔨᒫᐅᒡ ᓂᑐᐦᑯᔨᓐ ᐊᓂᒌ ᐄᔨᔨᐅᒡ ᐋᑳ ᑳᐦ ᐋᐦᑯᓯᒡ, ᒥᒄ ᐊᓂᒌ ᑳᐦ ᐋᐦᑯᓯᒡ ᐋᐅᑯᓂᒡ ᓈᑐᐧᐋᔨᒫᒡ ᓂᑐᐦᑯᔨᓐ᙮ ᓂᒥᔮᐅᒡ ᐊᓂᒌ ᑳ ᑯᐃᔅᑯᑖᑎᓰᔨᒡ ᐧᐋᐦᒋ ᑎᑯᔑᓂᔮᓐ᙮ ᓂᒌᑎᑯᔑᓐ ᒑ ᒌ ᓂᑐᒥᐧᑳᐤ ᐅᒥᒋᐧᑖᐧᐃᒡ ᒑ ᒌ ᐧᑳᔅᑳᑎᓰᔨᒡ᙮”
ᐋᐦ ᐋᔨᐧᒫᐅᐦᐄᐧᐋᒡ ᐋᐦᐋᑳ ᒦᒋᓱᑦ ᐊᐧᐋᓐ ᒥᒄ ᒑ ᒌ ᐊᔨᒥᐦᐋᑦ
ᒫᕠᔫ 9:14-17; ᓘᒃ 5:33-39
18 ᐹᔨᐧᑳᐤ ᒫᐧᑳᒡ ᒞᓐ ᓰᑭᐦᐋᐦᑖᒑᓯᐤ ᐅᒋᔅᒋᓂᐦᐊᒧᐧᐋᑭᓐᐦ ᑭᔮᐦ ᐊᓂᒌ ᐹᕆᓰᒡ ᐅᒋᔅᒋᓂᐦᐊᒧᐧᐋᑭᓂᐧᐋᐤᐦ ᐋᐦᐋᑳ ᒦᒋᓱᒡ, ᒌᐦ ᑖᔨᐤ ᐊᐧᐋᔨᐤᐦ ᐅᔮᔨᐤ ᐋ ᐄᔑ ᑯᐧᑳᒋᒥᑯᑦ ᒌᓴᔅ, “ᒑᐧᑳᔨᐤ ᐧᐋᐦᒋ ᐋᑳ ᒦᒋᓱᔨᒡ ᒞᓐ ᐅᒋᔅᒋᓂᐦᐊᒧᐧᐋᑭᓐᐦ ᑭᔮᐦ ᐊᓂᒌ ᐊᔨᒥᐦᐋᐤ ᐧᐄᔓᐧᐋᐧᐃᓂᔨᐤ ᑳ ᒋᔅᑯᑎᒫᒑᒡ ᐅᒋᔅᒋᓂᐦᐊᒧᐧᐋᑭᓂᐧᐋᐤᐦ, ᒌᔨ ᒫᒃ ᒋᔅᒋᓂᐦᐊᒧᐧᐋᑭᓂᒡ ᓂᒧᐃ ᑑᐧᐃᒡ ᐧᐄᔨᐧᐋᐤ ᐋᐦᐋᑳ ᒦᒋᓱᒡ?”
19 ᒌᓴᔅ ᒌ ᓂᔥᐧᑳᐅᔑᐦᐋᐤ ᐋᐦ ᐄᑖᑦ, “ᒧᔮᒻ ᐊᓂᑖᐦ ᒫᐧᑳᒡ ᐋ ᒋᐦᒋᐧᐄᒋᑐᓈᓂᐧᐃᒡ ᒋᑭ ᒌᐦ ᑐᐧᐃᒡ ᒑᐦ ᐋᑳ ᒌ ᒦᒋᓱᒡ ᐊᓂᒌ ᑳ ᓂᑐᒫᑭᓂᐧᐃᒡ ᐋ ᒥᑯᔖᓂᐧᐃᔨᒡ? ᓂᒧᐃ ᓈᓂᑐ᙮ ᐋᔥᒄ ᒫᐧᑳᒡ ᐋᐦ ᑖᔨᒡ ᐊᓂᑎᐦ ᐋᐦᑖᐦᒡ ᐊᓂᔮᔨᐤᐦ ᐅᔅᒋᓈᐹᐧᐋᓐ ᓂᒧᐃ ᑭᑎ ᐅᐦᒋ ᐄᑖᔨᐦᑎᒧᒡ ᒑ ᐋᑳ ᒦᒋᓱᒡ᙮ 20 ᐹᑎᒫ ᑭᑎ ᐅᑎᐦᒋᐱᔨᐤ ᐊᓐ ᐋ ᒌᔑᑳᒡ ᒑ ᐹᒋ ᐅᑎᓈᑭᓅᑦ ᐊᓐ ᐅᔅᒋᓈᐹᐧᐋᓐ, ᐋᑯᑖᐦ ᒫᒃ ᐃᔮᒄ ᐊᓂᔮᔨᐤ ᐋ ᒌᔑᑳᒡ ᓂᒥ ᑭᑎ ᒦᒋᓱᒡ᙮”
21 “ᓂᒧᐃ ᐊᐧᐋᓐ ᐋᐱᒋᐦᑖᐤ ᐱᒋᐧᐃᔮᓈᒋᓂᔨᐤ ᐋᔥᒄ ᐋᐦᐋᑳ ᐅᐦᒋ ᐅᒋᐱᔨᔨᒡ ᐋ ᐧᐄᐦ ᒦᔑᐦᐋᐦᒃ ᐊᑯᐦᐱᔅᒌᔑᔨᐤ᙮ ᐧᐋᔥ ᐅᔮᔨᐤ ᒦᔑᐦᐄᑳᒑᒑ ᐅᒋᐱᔨᔨᒑ ᒫᒃ ᐊᑎᑎᐤ ᑭᑎ ᐋᐧᑳᒋᐱᔨᐤ ᐊᓐ ᐊᑯᐦᑉ ᐊᓂᑎᐦ ᐋ ᒌ ᐲᑯᐱᔨᐦᒡ᙮ 22 ᑭᔮᐦ ᒫᒃ ᓂᒧᐃ ᐊᐧᐋᓐ ᐲᐦᑖᐹᐅᑖᐤ ᐋ ᐅᔥᑳᑭᒥᔨᒡ ᔔᒥᓈᐴᔨᐤ ᐊᓂᑖᐦ ᐧᐋᔥᑭᒡ ᔖᔥ ᐋ ᒌ ᐋᐱᑎᓃᔨᒡ ᔔᒥᓈᐴᔨᐤ ᐲᓵᑭᓐ ᐧᐄᐦᐧᑳᔮᔨᐤ᙮ ᐧᐋᔥ ᐅᔮᔨᐤ ᑐᑎᐦᒑ ᒥᑐᓐ ᑭᑎ ᐹᐦᑳᐱᔨᐤ ᐊᓂᔮᔨᐤ ᐧᐄᐦᐧᑳᔮᔨᐤ, ᐋᒄ ᒫᒃ ᒥᓯᐧᐋ ᒑ ᐃᔮᔪᓃᔨᒡ ᐊᓂᔮᔨᐤ ᔔᒥᓈᐴᔨᐤ ᑭᔮᐦ ᐊᓂᔮᔨᐤ ᐧᐄᐦᑯᔮᐤ᙮ ᓂᒧᐃ ᒫᒃ ᒦᓐ ᑭᑎ ᒌ ᐋᐱᑎᓐ᙮ ᓂᒧᐃ ᐊᐧᐋᓐ ᐅᔮᔨᐤ ᑐᑎᒻ, ᐧᐋᔥ ᐋ ᐅᔥᑳᑭᒦᐦᒡ ᔔᒥᓈᐳᐃ ᐊᓂᑖᐦ ᐋ ᐅᔥᑳᒡ ᐲᓵᑭᓐ ᐧᐄᐦᐧᑳᔮᐦᒡ ᐲᐦᒋᑭᐅᑖᑭᓂᐤ᙮”
ᒌᓴᔅ ᑳᐦ ᐋᔨᒨᑎᐦᒃ ᐋ ᐊᔨᒥᐦᐋᐅᒌᔒᑳᔨᒡ
ᒫᕠᔫ 12:1-8; ᓘᒃ 6:1-5
23 ᐹᔨᐧᑳᐤ ᐋ ᒎᐤ ᐊᔨᒥᐦᐋᐅᒌᔒᑳᔨᒡ ᒌᓴᔅ ᒌ ᐱᒧᐦᑖᐤ ᐊᓂᑖᐦ ᐱᐦᐧᑳᔑᑭᓂᒥᓈᐦᑎᒄ ᐋ ᓂᐦᑖᐅᒋᐦᑖᑭᓂᐧᐃᔨᒡ᙮ ᐅᒋᔅᒋᓂᐦᐊᒧᐧᐋᑭᓐ ᒌ ᐧᐄᒑᐅᑰ᙮ ᐊᓂᔮᔨᐤ ᒫᒃ ᐋᐦ ᐋᑎ ᐱᒧᐦᑖᔨᒡ ᒌ ᓂᓈᐧᑖᓂᒥᔨᐤ ᐊᓂᑎᐦ ᐋ ᐧᐃᓂᔥᐧᑳᔅᑯᓃᔨᒡ ᐅᔮᔨᐤ ᐱᐦᐧᑳᔑᑭᓂᒥᓐ ᐋ ᒦᒋᔨᒡ᙮ 24 ᐋᒄ ᐹᕆᓰᒡ ᐋᑖᒡ ᒌᓴᔅᐦ, “ᒑᐧᑳᓐ ᐧᐋᐦᒋ ᑐᑎᐦᒡ ᐊᓐ ᒑᐧᑳᔨᐤ ᐋᑳ ᒑ ᑐᑎᒧᐧᐋᐧᐋᑯᐱᓈ ᐋ ᐊᔨᒥᐦᐋᐅᒌᔑᑳᒡ?”
25 ᒌᓴᔅ ᒌ ᓂᔥᐧᑳᐅᔑᐦᐋᐤ ᐋᐦ ᐄᑖᑦ, “ᒋᒌ ᐊᔨᒥᐦᑖᓈᐧᐋᒑ ᒌᐦᒋ ᒥᓯᓂᐦᐄᑭᓂᐦᒡ ᐊᓂᑎᐦ ᑖᐹᒋᒫᑭᓅᑦ ᐊᓂᔮ ᒋᐦᒋᐅᒋᒫᐤᐦ ᑌᕕᑦ, ᑭᔮᐦ ᒫᒃ ᒥᓯᐧᐋ ᐊᓂᔮᔨᐤᐦ ᑳ ᐧᐄᒑᐅᑯᑦ ᑖᓐ ᑳᐦ ᑎᒡ ᐄᔥᐱᐦ ᑳ ᐧᐄᐦ ᒦᒋᓱᒡ᙮ 26 ᒌ ᐲᐦᒑᐤ ᒋᔖᒥᓂᑑ ᐅᐧᐋᔅᑳᐦᐄᑭᓂᒥᔨᒡ, ᐋᒄ ᑌᕕᑦ ᑳᐦ ᒧᐧᐋᑦ ᐊᓂᔮᔨᐤ ᑳ ᐱᔮᐦᒋᓰᔨᒡᐦ ᐋᔨᐦᑯᓈᐤ, ᐋᒄ ᑳ ᐊᔑᒫᑦ ᐊᓂᔮᔨᐤ ᐅᐧᐄᒑᐧᐋᑭᓐᐦ᙮ ᒫᐧᑳᒡ ᐋᐱᔮᕦᕐ ᒌ ᒋᔖᐊᔨᒥᐦᐋᐅᒋᒫᐧᐄᒑ ᐅᔮᔨᐤ᙮ ᒥᒄ ᒫᒃ ᐊᔨᒥᐦᐋᐅᒋᒫᐅᒡ ᐄᑖᔨᐦᑖᑯᓯᐧᐃᒡ ᒑ ᒌ ᒧᐧᐋᒡ ᐅᔮᔨᐤ ᐋᔨᐦᑯᓈᐤ, ᐧᐋᔥ ᐋᔪᐧᐃᒄ ᐋᑎᔥᑖᒡ ᐊᔨᒥᐦᐋᐤ ᐧᐄᔓᐧᐋᐅᓯᓂᐦᐄᑭᓂᐦᒡ᙮”
27 ᐋᒄ ᑳᐦ ᐋᑎ ᐄᑖᑦ ᒌᓴᔅ, “ᒋᔖᒥᓂᑑ ᒌ ᐅᔑᐦᑖᐤ ᐋ ᐊᔨᒥᐦᐋᐅᒌᔒᑳᔨᒡ ᒑ ᐧᐄᒋᐦᐄᑯᔨᒡ ᓈᐹᐤᐦ, ᓂᒧᐃ ᐅᐦᒋ ᐅᔑᐦᐋᐤ ᓈᐹᐤ ᐋ ᐊᔨᒥᐦᐋᐅᒌᔑᑳᔨᒡ ᒑ ᒌ ᓂᓈᑭᑐᐧᐋᔨᐦᑎᒥᔨᒡ᙮ 28 ᐄᔨᔨᐅᑯᓯᓵᓐ ᒫᒃ, ᐧᐋᐧᐋᒡ ᐋ ᐊᔨᒥᐦᐋᐅᒌᔒᑳᔨᒡ ᑎᐹᔨᐦᑎᒻ᙮”