1 ᒋᔅᒋᓲᒥᒡ ᒋᑎᐄᔨᔨᒥᒡ ᒑ ᒌ ᓂᑑᐦᑎᐙᒡ ᑭᔮᐦ ᒑ ᒌ ᓂᓂᐦᐄᐦᑎᐙᒡ ᐊᓂᔮᔨᐤ ᑳ ᐅᒋᒫᒥᒡ ᑭᔮᐦ ᐊᓂᔮᔨᐤ ᑳ ᒋᐦᒋᐅᒋᒫᐤ ᐋᐱᑎᓰᔨᒡ ᑭᔮᐦ ᒨᔥ ᒑ ᒌ ᐃᔮᔅᑭᐎᔨᒡ ᒑ ᒌ ᐋᐱᑎᔒᔥᑎᐦᒡ ᑯᐃᔅᒄ ᐋ ᐃᓯᓈᑯᓃᔨᒡ ᐋᐱᑎᓰᐅᓂᔨᐤ᙮ 2 ᐐᐦᑎᒧᐎᒡ ᐋᑳ ᒑ ᒌ ᒥᒋᐋᔨᒨᒫᒡ ᐊᐙᔨᐤᐦ, ᒥᒄ ᒫᒃ ᒑ ᒌ ᒋᔮᒫᔨᐦᑖᑯᓯᒡ ᑭᔮᐦ ᒑ ᒌ ᒥᔻᔨᐦᑖᑯᓯᒡ᙮ ᒨᔥ ᒋᐱᐦ ᔫᔅᐹᑎᓰᔅᑎᐙᐅᒡ ᒥᓯᐙ ᐊᐙᔨᐤᐦ᙮ 3 ᐙᔥ ᑭᔮᐦ ᒌᔮᓂᐤ ᐹᔨᒀᐤ ᒋᒌ ᒌᔥᒀᐱᒫᑎᓰᓈᓂᐤ, ᓂᒧᐃ ᑰᐦᒋ ᓂᓂᐦᐄᐦᑐᐙᓂᐤ ᒋᔖᒥᓂᑑ, ᒋᒌ ᐎᓂᐲᐦᐄᑯᐎᓈᓂᐤ ᑭᔮᐦ ᒋᒌ ᔑᐦᑯᒋᐦᐄᑯᓈᓂᐤ ᓂᓈᐦᑭᐤ ᒥᒋᓂᑐᐙᔨᐦᑎᒧᐎᓐ ᑭᔮᐦ ᒥᒋᒥᔻᔨᐦᑎᒧᐎᓐ ᐅᐦᒋ᙮ ᐱᔑᔑᐦᒄ ᒋᒌ ᒥᒑᑎᓰᓈᓂᐤ ᑭᔮᐦ ᒋᒌ ᐅᐎᐦᑖᔨᒫᓅᒡ ᐄᔨᔨᐅᒡ᙮ ᒋᒌ ᐅᐦᑳᑖᑭᓂᐎᒡ ᐄᔨᔨᐅᒡ ᑭᔮᐦ ᐐᔨᐙᐤ ᒫᒃ ᒋᒌ ᐅᐦᑳᑖᓅᒡ᙮ 4 ᒥᒄ ᒫᒃ ᐄᔥᐱᐦ ᑳ ᐙᐱᐦᑎᔨᑎᐦᒄ ᒋᔖᒥᓂᑑ ᒋᐱᒫᒋᐦᐄᐙᓯᒥᓂᐤ ᐋ ᐃᔥᐱᔥ ᒋᔖᐙᑐᑖᑎᐦᒄ ᑭᔮᐦ ᐋ ᐃᔥᐱᔥ ᓵᒋᐦᐄᑎᐦᒄ 5 ᒋᒌ ᐱᒫᒋᐦᐄᑯᓂᐤ᙮ ᓂᒧᐃ ᐐ ᑖᓐ ᑳ ᐄᔑ ᒥᔪᑑᑎᒥᐦᒄ ᑰᐦᒋ ᐱᒫᒋᐦᐄᑯᓂᐤ, ᒥᒄ ᐊᓂᔮᔨᐤ ᒋᔖᒥᓂᑑ ᐋ ᒌ ᒋᔅᑎᒫᒑᔨᒥᑎᐦᒄ ᐋᑯᑖᐦ ᑳ ᐅᐦᒋ ᐱᒫᒋᐦᐄᑎᐦᒄ᙮ ᑳ ᐱᔮᐦᒋᓰᑦ ᐊᐦᒑᐦᒄ ᐅᐦᒋ ᒋᒌ ᐱᔮᐦᒋᐦᐄᑯᓂᐤ ᑭᔮᐦ ᒦᓐ ᒋᒌ ᐅᔅᒋᐦᐄᑯᓂᐤ, ᒑ ᒌ ᐃᔮᐦᐆᐦᒄ ᐋᐅᔅᑳᔨᒡ ᐱᒫᑎᓰᐎᓂᔨᐤ᙮ 6 ᒋᔖᒥᓂᑑ ᒌ ᐙᔫᒋᐱᔨᔨᐤ ᐋ ᓰᒋᓂᒫᑎᐦᒄ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ ᐊᓂᑎᐦ ᐋ ᑖᐅᐦᒄ ᐊᓂᔮᔨᐤ ᐅᐦᒋ ᑖᓐ ᑳ ᐄᔑ ᑐᑎᒫᑎᐦᒄ ᒌ ᐱᒫᒋᐦᐄᐙᓯᒥᓂᐤ ᒌᓴᔅ ᙭᙮ 7 ᐋᒄ ᒫᒃ ᐊᓂᔮᔨᐤ ᐋ ᒌ ᒋᔖᐙᑐᑖᑎᐦᒄ ᒋᔖᒥᓂᑑ ᒋᒌ ᑐᑖᑭᓂᐤ ᒑ ᒌ ᑯᐃᔅᑯᓈᑯᓲᐦᒄ ᐋᒄ ᒫᒃ ᒋᔮᔥᑎᓈᑖᔨᐦᑎᒥᐦᒄ ᒑ ᐃᔮᔨᐦᒄ ᑳᒋᒡ ᐱᒫᑎᓰᐎᓐ᙮ 8 ᑖᑆᒥᑭᓐ ᐆ ᑳ ᐃᔮᓐ᙮ ᒌ ᓂᑎᐙᔨᒥᑎᓐ ᔮᔨᑖᐃ ᒑ ᒌ ᔒᐦᒋᒥᑣᐤ ᐊᓂᒌ ᑳ ᑖᑆᔮᔨᒫᒡ ᒋᔖᒥᓂᑑ ᒑ ᐐᐦ ᒥᔪᑐᑎᒧᐙᒡ ᑯᑎᒃ ᐊᐙᔨᐤᐦ᙮ ᐙᔥ ᒥᔻᔑᔨᐤ ᑭᔮᐦ ᒋᑭ ᒥᔪ ᐐᒋᐦᐄᑯᒡ ᒥᓯᐙ ᐄᔨᔨᐅᒡ᙮

9 ᑖᐅᒡ ᐄᔨᔨᐅᒡ ᐋ ᒥᒋᐱᔨᒡ ᐋᐦ ᐋᔨᒨᑎᐦᒡ ᒎᐄᔨᔨᐤ ᐐᔓᐙᐎᓐ ᑖᓂᔮᔨᐤ ᒋᐱᐦ ᑭᓄᐙᔨᐦᑖᑭᓂᔨᐤ ᑭᔮᐦ ᐋᐦ ᐋᔨᒨᑎᐦᒡ ᑖᓐ ᐋ ᐄᑎᔅᑳᑐᔨᒡ ᐅᑖᓂᔥᒑ ᐅᐙᐦᑯᒫᑭᓂᐙᐤ᙮ ᐊᑳᐐ ᐃᔮᐱᑖᔨᐦᑎᒧᒄ ᒑ ᒌ ᐋᔨᒨᑎᒫᒄ ᐅᐦᐄ ᒑᒀᓂᐦᐄ ᐙᔥ ᑖᐹ ᐎᔮᔥ ᐄᑖᐱᑎᓐ ᑭᔮᐦ ᓂᒧᐃ ᒥᑐᓐ ᐐᒋᐦᐄᑯᒡ ᐄᔨᔨᐅᒡ᙮ 10 ᑖᒑ ᐊᐙᓐ ᒨᔥ ᐋᐦ ᑐᑎᐙᑦ ᒑ ᒌ ᒥᒋᐱᔨᔨᒡ ᐅᒫᒨᐊᔨᒥᐦᐋᐤ ᑭᔮᐦ ᒑ ᒌᐦ ᑐᑎᐙᑦ ᒑ ᒌ ᐱᐦᑳᓂᐱᔨᐦᐅᔨᒡ ᐐᐦᑎᒨ ᐹᔨᒀᐤ ᑭᔮᐦ ᒫᒃ ᓃᔣᐤ ᒑ ᒌ ᐴᓃᑦ ᐊᓂᔮᔨᐤ ᐋᐦᑎᒃ᙮ ᐋᑳ ᒫᒃ ᓂᑑᐦᑖᔅᑳ ᐋᑯᔥ ᐋᑳ ᐃᔮᐱᑖᔨᒻ᙮ 11 ᒋᒋᔅᒑᔨᒫᐤ ᐋ ᒌ ᒥᒋᐦᑐᑎᐦᒃ ᐊᐙᓐ ᐅᔮᔨᐤ ᐋᐦᑎᒃ, ᐋᑯᑖᐦ ᓅᑯᓃᔨᒡ ᐋ ᐎᓂᐱᔨᑦ᙮

12 ᓂᑎᐄᑖᔨᐦᑖᓐ ᒑ ᒌ ᐄᑎᔑᐦᐅᒃ ᐊᕐᑎᒥᔅ ᑭᔮᐦ ᒫᒃ ᑖᐃᑭᑭᔅ ᐊᓂᑖᐦ ᐋᐦ ᑖᔨᓐ᙮ ᐄᔥᐱᐦ ᒫᒃ ᑎᑯᔑᑳ ᐊᓂᑖᐦ ᐋᐦ ᑖᔨᓐ ᒑ ᑯᒋᐦᑖᔨᓐ ᑏᐙᐦᒡ ᒑ ᒌ ᐹᒋ ᓂᒋᔥᑭᐎᔨᓐ ᐊᓂᑖᐦ ᓂᑳᑆᓕᔅ ᑳ ᐃᔑᓂᐦᑳᑖᒡ ᐃᐦᑖᐎᓐ ᐙᔥ ᐋᑯᑖᐦ ᑳ ᐐᐦ ᑖᔮᓐ ᐃᔅᑭᓐ ᐱᐳᓐ᙮ 13 ᑭᑎ ᒋᔅᑐᐦᑖᐅᒡ ᐊᓐ ᑎᐹᔅᑯᓂᒑᓯᐤ ᓭᓈᔅ ᑭᔮᐦ ᒫᒃ ᐊᑆᓗᔅ᙮ ᓲᐦᒃ ᒑ ᑯᒋᐦᑖᔨᓐ ᒑ ᒌ ᐐᒋᐦᐄᑣᐤ ᐋ ᐃᔮᔅᑭᐎᔨᒡ, ᒑ ᓂᑑᒋᔅᒑᔨᒥᑣᐤ ᔮᔨᑖ ᒥᓯᐙ ᒑᒀᔨᐤ ᒑ ᐃᔮᒡ ᑖᓐ ᒑ ᐄᔑ ᓂᑎᐙᔨᐦᑎᐦᒡ᙮ 14 ᐊᓂᒌ ᒫᒃ ᒌᔮᓂᐤ ᒋᑎᐄᔨᔨᒥᓅᒡ ᒋᐱᐦ ᐐᐦ ᒋᔅᒑᔨᐦᑎᒧᒡ ᑖᓐ ᒋᐱᐦ ᒌ ᐄᔑ ᒥᔪ ᑐᑎᒫᒑᐅᒡ, ᐋ ᐐᒋᐦᐋᒡ ᐊᐙᔨᐤᐦ ᓈᔥᒡ ᐋ ᓂᑎᐙᔨᐦᑎᒥᔨᒡ ᒑ ᒌ ᐐᒋᐦᐄᒫᑭᓂᐎᔨᒡ᙮ ᓂᒧᐃ ᒋᐱᐦ ᐅᐦᒋ ᐃᓯᓈᑯᓯᐎᒡ ᐋᐦᐋᑳ ᒑᒀᔨᐤ ᐅᐦᒋ ᑐᑎᐦᒡ ᐅᐱᒫᑎᓰᐎᓂᐙᐦᒡ᙮

15 ᒥᓯᐙ ᒫᒃ ᐄᔨᔨᐅᒡ ᐅᑎᐦ ᑳᐦ ᑖᒡ ᐋᐦ ᑖᔮᓐ ᒋᐙᒋᔮᒥᑯᒡ᙮ ᐙᒋᔮᒥᒡ ᒋᐐᒑᐙᑭᓂᐎᒡ ᐊᓂᒌ ᑳ ᑖᑆᔮᔨᐦᑎᐦᒡ᙮ ᒋᑎᔨᒥᐦᐋᔅᑎᒫᑎᓈᓐ ᒋᔖᒥᓂᑑ ᒑ ᒌ ᒋᔖᐙᑐᑖᑖᒄ ᒥᓯᐙ ᐋ ᑎᔑᔮᒄ᙮