1 Tua ahikom suapui te awng, na pumpi uh sia a thiangtho, Pathian tungah a san thamman, a nungta biakpiakna pia tu in, Pathian i hesuakna tungtawn in kong thum hi, hi thu sia nasep tu uh a pha le a kilawm nasep a hihi.

2 Taciang hi leitung pianzia zil in zui heak vun: ahihang na pha, a san thamman le Pathian deina kicing tetti na lak thei natu uh in, na thinsung puaphat kikna tungtawn in na nuntak zia uh lai in om tavun.

3 Banghangziam cile note sungah mi khatsim in, ama taw a ki phu ngawl in a sang mama in ama le ama ki ngaisun ngawl a; Pathian in mihing khatsim tungah a piak upna bang in, pilvangtak in ngaisut tu sia, ka tung hongpiak thuthiamna tungtawn in kong son hi.

4 Banghangziam cile pumpi khat sungah khen tatuam tampi i nei bangma in, tua pumpi khen teng i nasep kibang siat ngawl hi:

5 Tasia bangma in, eite tam mama napi, Christ sungah pumkhat i hihi, taciang pumpi khen te sia khat le khat kizom dimdiam uh hi.

6 Eite tungah hongpiak thuthiamna bang in letsong atuam tek nei i hikom in, mailam thu pualakna letsong nga i hile, upna i sanna za in phuang tawng;

7 Ngual dang na seam tu i hile sepsak tawng: a hiltu i hile hil tawng;

8 Ngual hanthawn tu a hile, hanthotna nei tahen: piakna a hile, ngotak in pia tahen; ukna a hile, hanciam in uk tahen; hesuakna a hile, angtangtak in hesuak tahen.

9 Itna sia ki hitheamsakna omheak tahen. A pha ngawl sia lipkhap vun a; napha te beal kip tavun.

10 Suapui ki itna taw khat le khat ki it tavun; khat le khat ki zatak vawt tavun;

11 Datham ngawl in hanciam in naseam vun; lawptak in Topa na seam vun;

12 Lametna sungah lungdam vun; haksatna sungah thuak vun; a tawntung in thungen vun;

13 Mi thiangtho te i kisapna te hawm vun; leangna te phatak in zindo vun.

14 Note hong vawtsia te thupha pia vun: thupha pia vun a, hamsiat heak vun.

15 A lungdam te taw lungdam khawm tavun a, a kap te taw kap khawm tavun.

16 Khat le khat thinkhat lungkhat in om tavun. Noma le noma a sang mama in ki ngaisun heak vun, ahihang dinmun niam mihing te taw kikop vun. Noma le noma mipil khi hi, ci in ki ngaisun heak vun.

17 Siatna sia siatna ma taw thukkik heak vun. Mi theampo mai ah thuman in nungta vun.

18 Ahi thei le, na hi thei tawp in mi theampo taw a kilem in om vun.

19 Ka it te awng, note vateak in phulam heak vun, tasia sang in Pathian i thin-ukna sungah ap zaw vun: banghangziam cile, Topa in, phulakna sia keima a hi; keima in thukkik tu khi hi, ci hi, ci in ki at hi.

20 Tua ahikom na ngal te a ngil a kial le an pia in; a dang a tak le, tui pia in: banghangziam cile tabang na vawt ciang in a lu tungah meikam situa na hi tu hi.

21 Siatna in zosak heak in, ahihang siatna sia phatna taw zo zaw in.