10
1 Cuꞌma̱ nguꞌ tyaꞌa ntsuꞌu chaꞌ jiꞌna loꞌo Jesús, tyucui tyiquee naꞌ lye tsa nchcuiꞌ tyaꞌna naꞌ loꞌo ycuiꞌ Ndyosi, chaꞌ cuaꞌni lyaá Ni jiꞌi̱ nguꞌ judío tyaꞌa naꞌ. 2 Liñi tsa chaꞌ nu chcuiꞌ naꞌ jiꞌi̱ nguꞌ biꞌ, chaꞌ tsoꞌo tsa nduꞌni tlyu nguꞌ jiꞌi̱ ycuiꞌ Ndyosi nquichaꞌ, pana ná jlo tsoꞌo tiꞌ nguꞌ ñiꞌya̱ laca cña nu ntiꞌ Ni chaꞌ cuaꞌni nguꞌ; 3 ná nchca cuayáꞌ tiꞌ nguꞌ biꞌ ñiꞌya̱ nduꞌni Ni chaꞌ ca tsoꞌo cresiya jiꞌi̱ ñati̱ cuentya jiꞌi̱ ycuiꞌ Ni. Xaꞌ ñaꞌa̱ ntiꞌ nguꞌ biꞌ; chaꞌ jiꞌi̱ ycuiꞌ ca nguꞌ nclyana nguꞌ ñiꞌya̱ caca tsoꞌo cresiya jiꞌi̱ nguꞌ, chaꞌ ná ntajaꞌa̱ nguꞌ jlya tiꞌ nguꞌ jiꞌi̱ cña nu ndyuꞌni ycuiꞌ Ndyosi. 4 Pana cua ñaa Jesús chalyuu juani, cua ngusñi na chaꞌ jiꞌi̱ yu, biꞌ chaꞌ taca ca tsoꞌo cresiya jiꞌna cuentya jiꞌi̱ ycuiꞌ Ndyosi; ngaꞌaa ntiꞌ chaꞌ taquiyaꞌ tsa na chaꞌ cusuꞌ nu cua nda jyoꞌo Moisés biꞌ, chaꞌ si juaꞌa̱ taca ca tsoꞌo cresiya jiꞌna.
5 Ndiꞌya̱ laca chaꞌ nu nguscua jyoꞌo Moisés lo quityi loꞌo nchcuiꞌ yu ñiꞌya̱ caca tsoꞌo cresiya jiꞌna, si taquiyaꞌ na lcaa chaꞌ cusuꞌ biꞌ: “Tsoꞌo ti tyiꞌi̱ na chalyuu, si cuaꞌni na lcaa ca cña nu ngulo ycuiꞌ Ndyosi jiꞌna”. Juaꞌa̱ nchcuiꞌ quityi biꞌ. 6 Pana chaca chaꞌ nscua lo quityi ñiꞌya̱ caca ca tsoꞌo cresiya jiꞌna loꞌo xñi ti na chaꞌ jiꞌi̱ Jesús; ndiꞌya̱ nchcuiꞌ quityi biꞌ: “Ná ngaꞌa̱ chaꞌ tsaa na tsaana na jiꞌi̱ Cristo ca su ntucua ycuiꞌ Ndyosi nde cua̱”, nacui̱ quityi, “chaꞌ tya̱a̱ loꞌo na jiꞌi̱ Cristo nde lo yuu. 7 Ná ngaꞌa̱ chaꞌ tsaa na tsaana na jiꞌi̱ Cristo ca su ntsiya jyoꞌo”, nacui̱ quityi, “chaꞌ tya̱a̱ loꞌo na jiꞌi̱ nde lo yuu chaca quiyaꞌ.” 8 Ndiꞌya̱ ntsuꞌu chaꞌ loꞌo jlya tiꞌ na jiꞌi̱ Ni: “Cacua tsa ntsuꞌu chaꞌ jiꞌi̱ Jesús jiꞌna. Taca tyuꞌu chaꞌ jiꞌi̱ Cristo nde tuꞌba na, taca tyuꞌu chaꞌ biꞌ nde neꞌ cresiya jiꞌna.” Biꞌ laca chaꞌ tsoꞌo nu ta na loꞌo nguꞌ, chaꞌ taca cuaꞌni lyaá Ni jiꞌna jiꞌi̱ nu cuxi, si chañi chaꞌ xñi na chaꞌ jiꞌi̱ Jesús. 9 Tsa biꞌ ti chaꞌ ntiꞌ, chaꞌ cachaꞌ na jiꞌi̱ nguꞌ chaꞌ Jesús laca nu Xuꞌna na, loꞌo juaꞌa̱ tyucui tyiquee na jlya tiꞌ na chaꞌ nguaꞌni ycuiꞌ Ndyosi chaꞌ ndyuꞌú Jesús chaca quiyaꞌ ca su nguatsiꞌ. Liꞌ taca jiꞌi̱ Ni cuaꞌni lyaá Ni jiꞌna, 10 chaꞌ nde neꞌ cresiya jiꞌna ntsuꞌu chaꞌ jiꞌi̱ Jesús nu cua ngusñi na, loꞌo la cuiꞌ juaꞌa̱ nde tuꞌba na ntsuꞌu chaꞌ jiꞌi̱ Jesús nu nchcuiꞌ na loꞌo ñati̱; liꞌ taca ca tsoꞌo cresiya jiꞌna cuentya jiꞌi̱ ycuiꞌ Ndyosi, loꞌo juaꞌa̱ cuaꞌni lyaá Ni jiꞌna jiꞌi̱ lcaa chaꞌ cuxi nu ntsuꞌu chalyuu.
11 Cua nscua chaca chaꞌ lo quityi jiꞌi̱ ycuiꞌ Ndyosi ndiꞌya̱: “Ni tsaca na, tyaꞌa ngusñi na chaꞌ jiꞌi̱ ycuiꞌ Ndyosi, ná ntsuꞌu chaꞌ caca taja tiꞌ na jiꞌi̱ Ni liꞌ”. Juaꞌa̱ nchcuiꞌ quityi. 12 Sca ti cuayáꞌ tyacua chaꞌ biꞌ jiꞌi̱ nguꞌ judío, la cuiꞌ juaꞌa̱ tyacua chaꞌ biꞌ jiꞌi̱ nguꞌ xaꞌ tsuꞌ, chaꞌ sca ti ycuiꞌ Ndyosi nu Xuꞌna na laca loo jiꞌi̱ lcaa ñati̱ chalyuu; sca ti cuayáꞌ tsoꞌo tsa nduꞌni Ni loꞌo lcaa ñati̱ nu jña chaꞌ clyu tiꞌ jiꞌi̱ ycuiꞌ Ni chacuayáꞌ jiꞌi̱ Jesús. 13 Ndiꞌya̱ ndyuꞌu chaꞌ nu nscua lo quityi cusuꞌ: “Cuaꞌni lyaá Ni jiꞌi̱ lcaa ñati̱ nu jña chaꞌ clyu tiꞌ jiꞌi̱ Ni chacuayáꞌ jiꞌi̱ ycuiꞌ nu Xuꞌna na”. 14 Pana ná caca chcuiꞌ nguꞌ loꞌo ycuiꞌ Ndyosi chacuayáꞌ jiꞌi̱ Jesús si bilya xñi nguꞌ chaꞌ jiꞌi̱ yu; juaꞌa̱ ná caca xñi nguꞌ chaꞌ jiꞌi̱ Jesús si bilya cuna nguꞌ chaꞌ biꞌ; ni ná caca cuna nguꞌ chaꞌ biꞌ si bilya caja ñati̱ nu ta chaꞌ biꞌ loꞌo nguꞌ. 15 Pana ná tucui caca jiꞌi̱ tsaa chaꞌ ta chaꞌ biꞌ loꞌo xaꞌ la nguꞌ si ná culo Ni cña jiꞌi̱ chaꞌ tsaa. Ndiꞌya̱ nchcuiꞌ quityi cusuꞌ: “Tsoꞌo tsa ntiꞌ na loꞌo tyalaa nguꞌ slo na chaꞌ ta nguꞌ chaꞌ tsoꞌo jiꞌi̱ ycuiꞌ Ndyosi loꞌo na, chaꞌ culuꞌu nguꞌ ñiꞌya̱ caca chaꞌ ti̱ ti tyiꞌi̱ tyiquee na”. Juaꞌa̱ nchcuiꞌ quityi.
16 Ná ndyuna tsoꞌo lcaa ñati̱ chaꞌ nu nda na loꞌo nguꞌ, nu loꞌo ndachaꞌ na jiꞌi̱ nguꞌ ñiꞌya̱ cuaꞌni lyaá Ni jiꞌi̱ ñati̱. La cuiꞌ juaꞌa̱ ngua loꞌo jyoꞌo Isaías cua saꞌni. “Ndyosi Xuꞌna ya, ná tucui ndu̱ tsiyaꞌ ti nu ngusñi chaꞌ jinuꞌu̱ nu nchcuiꞌ ya loꞌo nguꞌ”, nacui̱ jyoꞌo biꞌ. 17 Pana nu na ni, cua ngusñi na chaꞌ jiꞌi̱ Jesús nu ngua tya clyo, tya loꞌo ndyuna na chaꞌ tsoꞌo nu cua nchcuiꞌ nguꞌ loꞌo na chaꞌ jiꞌi̱ Cristo.
18 Ntiꞌ naꞌ xcuane naꞌ sca chaꞌ jiꞌi̱ cuꞌma̱: ¿Ha bilya cuna nguꞌ judío chaꞌ jiꞌi̱ Cristo lacua? Cua ndyuna nguꞌ, chaꞌ cua nscua sca chaꞌ lo quityi cusuꞌ nu nchcuiꞌ ndiꞌya̱:
Tyucui ñaꞌa̱ chalyuu nguañi chaꞌ nu nda nguꞌ loꞌo;
lcaa seꞌi̱ ndyalaa chaꞌ nu nchcuiꞌ nguꞌ, masi ca su cua tyijyuꞌ la cua ndyalaa chaꞌ biꞌ.
Juaꞌa̱ nchcuiꞌ quityi. 19 Chaca chaꞌ xcuane naꞌ jiꞌi̱ ma̱ liꞌ: ¿Ha ná nda nguꞌ judío cuentya ñiꞌya̱ ndyuꞌu chaꞌ biꞌ lacua? Saꞌni tsa nguscua jyoꞌo Moisés chaꞌ jiꞌi̱ nguꞌ biꞌ, ndiꞌya̱ nchcuiꞌ quityi biꞌ:
Cuaꞌni naꞌ chaꞌ caca liyeꞌ tiꞌ ma̱ ñaꞌa̱ ma̱ jiꞌi̱ xaꞌ ñati̱ nu siꞌi ñati̱ tsoꞌo laca nguꞌ ntiꞌ ma̱, nacui̱ Ni.
Nacui̱ ma̱ chaꞌ ple tsa nguꞌ; ná nchca cuayáꞌ tiꞌ nguꞌ, ntiꞌ ma̱.
Ta naꞌ chaꞌ ñasi̱ꞌ tiꞌ jiꞌi̱ ma̱, xquiꞌya chaꞌ cua ngusñi ñati̱ biꞌ chaꞌ jnaꞌ; masi cuꞌma̱ ni, ná ntiꞌ ma̱ cuna ma̱ chaꞌ jnaꞌ, nacui̱ Ni.
20 Loꞌo juaꞌa̱ liñi tsa chaꞌ nu nda jyoꞌo Isaías nu ngua saꞌni cuentya jiꞌi̱ ycuiꞌ Ndyosi:
La cuiꞌ ñati̱ nu bilya clyana nguꞌ chaꞌ ꞌna, cua ngujui chaꞌ jnaꞌ jiꞌi̱ nguꞌ juani, nacui̱ Ni.
Masi bilya jña nguꞌ sca chaꞌ tsoꞌo jnaꞌ, cua nclyuꞌuloo naꞌ jiꞌi̱ nguꞌ biꞌ juani.
21 Pana xaꞌ ñaꞌa̱ nguscua jyoꞌo Isaías chaꞌ jiꞌi̱ nguꞌ Israel: “Tyucui tsa̱ ngusiꞌyana naꞌ jiꞌi̱ nguꞌ”, nacui̱ Ni, “pana ná ndaquiyaꞌ nguꞌ biꞌ ꞌna tsiyaꞌ ti; xcuiꞌ na nxu̱u̱ tyaꞌa ti nguꞌ loꞌo naꞌ”. Juaꞌa̱ nchcuiꞌ quityi.