2
Hannah ratoumnae
1 Hannah ni a ratoum e teh,
BAWIPA dawk ka lunghawi poung.
Ka ki hah BAWIPA ni a tawm toe.
Nange Rungngangnae dawk ka lung ahawi teh
ka tarannaw hmalah ka minhmai a pan.
2 BAWIPA a thoung e patetlah apihai thoung hoeh.
Nang patetlah e awm hoeh.
Kaimae Cathut patetlah kângue hane talung awm hoeh.
3 Hot patetlah e kâoupnae lawk dei hanh leih.
Na pahni dawk hoi lunglennae lawk tâcawt hanh naseh.
Bangkongtetpawiteh, BAWIPA teh
bangpueng ka panuek e Cathut lah ao teh,
sak awh e pueng hah a khing.
4 Athakaawme taminaw e licung a kâkhoe teh
a thakayounnaw thaonae a poe.
5 A von kapahanaw ca hane kawi a hmu nahan a tawng awh teh,
a von kahlamnaw vonhlam awh hoeh toe.
Napui cakaroe e ni vai sari touh ca a khe toe.
A ca moikapap ka khe e napui a tha a tâwn toe.
6 BAWIPA teh duesakthainae,
hringsakthainae,
phuen totouh duesaknae hoi thawsaknae kâ a tawn.
7 BAWIPA ni roedengsaknae, tawntasaknae,
a pabo teh tawmthainae kâ a tawn.
8 A ma ni pabo e vaiphu dawk hoi a tawm teh,
a tha kayoun e hraba dawk hoi a tawm teh,
tami katawntanaw hoi
rei tahungthainae bawilennae bawitungkhung a poe.
Bangkongtetpawiteh, talai dupuinaw teh BAWIPA e lah ao.
Hote adu pui dawk BAWIPA ni talaivan a kamtue sak.
9 Ama ni a tami kathoungnaw e a khok a khetyawt han.
Tamikathoutnaw teh a hmo thung dueng ao awh han.
Ma e thasainae hoi apihai tâ mahoeh.
10 BAWIPA ka taran e pueng reppasei lah a ta han.
Kalvan hoi khoparit lawk hoi a tuk han.
BAWIPA ni talai apout totouh lawk a ceng han.
Ama e siangpahrang hah thasainae a poe han.
Satui a awi e hah tawmdawm han telah a ti.
11 Hathnukkhu hoi Elkanah teh Ramah kho e a im vah a pha. Hatei camo teh vaihma Eli koe BAWIPA e thaw a tawk.
Eli capanaw cungkeihoehnae
12 Eli capanaw teh a rawk teh BAWIPA panuek a hoeh. 13 Tamimaya koe vaihmanaw oangnae teh, thuengnae moi a thawng lahunnah, vaihma e a san buet touh hoi moi sonae sum kathum samphei e a sin teh a tho. 14 Ukkang thung thoseh, hlaam dawk thoseh, thawngnae hlaam dawk thoseh a cuek awh teh moi sonae sum kathum samphei hoi a rasa e moinaw hah vaihma ni ouk a la, hot patetlah hawvah ka tho e Isarel tami pueng koe Shiloh vah a sak awh. 15 Hatnavah, a thâw a karê hoehnahlan, vaihma san a tho teh thuengnae ka sak e koevah vaihma hanelah pahai e moi na poe haw. Bangkongtetpawiteh, nang koe e thawng e moi lat mahoeh. Thawng hoeh e doeh a ngai telah a dei.
16 Ahni koevah ahrei hah hmaloe karê seh, hat hnukkhu vah na ngai yit touh na la han atipouh navah, ahni ni na hoeh bo atu roeroe na poe. Na poe hoehpawiteh, beng na lawp han ouk atipouh.
17 Hatdawkvah, vaihma thoundounnaw teh a yonnae BAWIPA mithmu vah a lenpoung. Bangkongtetpawiteh, BAWIPA e thuengnae noutna hoeh e lah a hno awh toe. 18 Camo Samuel teh vaihma e angkidung a khohna teh BAWIPA hmalah thaw a tawk. 19 Hothloilah, angkidung a manu ni a khui pouh teh, kumtangkuem thuengnae poe hanelah a vâ hoi a tho navah ouk a sin pouh. 20 Eli ni Elkanah hoi a yu teh yawhawi a poe teh, BAWIPA hanelah hno na poe e heh hete napui hno lahoi BAWIPA ni na patho naseh telah atipouh. Hottelah hoiyah im lah a ban awh.
21 BAWIPA ni Hannah teh a khetyawt teh camo a vawn teh ca tongpa kathum napui kahni touh a khe. Camo Samuel hai BAWIPA hmalah a roung.
Eli ni a capanaw a yue
22 Eli teh a matawng poung toe. Isarel pueng koe a canaw ni a sakyoe e pueng hoi kamkhuengnae lukkareiim takhang koe kamkhueng e napuinaw a ikhainae kong a thai a teh, 23 Ahnimouh koe bang kecu dawk maw het patetlah e hno hah na sak. Bangkongtetpawiteh, hetnaw koehoi e na sak awh e hnokahawi hoeh e kong hah ka thai. 24 Hawi hoeh ka canaw, BAWIPA e taminaw ni a dei awh e kamthang teh kamthang kahawi nahoeh. BAWIPA e taminaw lawk na ek sak. 25 Tami reira hah Tami buet touh ni yonnae sak pawiteh, ahni teh, lawkcengkung ni lawk a ceng han. Tami buet touh ni BAWIPA dawk yon pawiteh, apinimaw a kâhei pouh han telah ati. Hatei a na pa e lawk ngai laipalah a onae teh BAWIPA ni thei han a ngai dawk doeh. 26 Camo Samuel teh a roung takhang teh Cathut hoi tami e lungngai lah ao.
BAWIPA ni Eli imthung a pahnawt
27 BAWIPA e tami buet touh Eli koe a tho teh, BAWIPA ni hettelah a dei. Izip ram Faro im ao awh navah na pa e na catoun koe kamcengcalah ka kamnue nahoehmaw. 28 Ka thuengnae khoungroe koe cei hane hmuitui sawi hane, ka hmalah vaihma angki kho hane, Isarel miphun dawk hoi ahni teh ka rawi e lah awm hoeh namaw Isarel miphunnaw e hmaisawi thuengnae hai na pa e miphun koe kai ni ka poe. 29 Ka im dawk, kâ na poe e thuengnae hnonaw bangkong na khok hoi na coungroe awh. Kai hlak vah na capanaw na barihnawn, nama na kâthaw saknae dawk ka tami Isarelnaw ni thuengnae kahawi kahawi e na hno, telah a ti. 30 Hatdawkvah, BAWIPA Isarelnaw e Cathut ni kai ni na imthung hoi na pa imthung hah, a yungyoe ka hmalah ka thaw na tawk awh han telah kai ni na dei pouh ei, sahnin BAWIPA ni a dei e teh ka lawkkam teh kai hoi hlat naseh. Kai ka tawm e naw teh, kai ni ka tawm van han, kai bang lah ka noutna hoeh e naw teh bang lah ka noutna van mahoeh. 31 Na imthung dawk matawng ka phat hoeh lah na kut hoi na miphun e a kut hah a tâtuengnae tueng a pha han. 32 Ka im dawk e a rucatnae nang ni na hmu han. Isarel miphun lathueng kahawi hno ka sak e pueng kai ni ka poe nakunghai nange miphun dawk nâtuek hai a kum kacue matawng ka phat sak mahoeh. 33 Kaie thuengnae khoungroe dawk hoi ka raphoe hoeh e nange miphun teh na mit a ro vaiteh, lungthin kamathoesakkung lah ka o sak han. Na catounnaw ni a thoundoun lahun nah a due han. 34 Na ca roi hnin touh dawk rei a due roi han. Hethateh na ca Hophni hoi Phinehas dawk ka phat hane hno doeh.
35 Yuemkamcu vaihma ka lungthin hoi ka pouknae dawk kaawm e ka sak e tami hah ka kangdue sak han. Kacakpounge imthung lah ka kangdue sak vaiteh a yungyoe hoi satui ka awi e hmalah ao han. 36 Na im vah ka cawi rae pueng tangka hoi vaiyei a hei lahoi a cei awh han. A hmalah tabut awh vaiteh, vaiyei youn touh ka ca hanelah ka hmu thai nahan, pahren lahoi vaihma thaw na tawk sak yawkaw ati awh han telah a ti.