9
Job ni Bildad a pathung
1 Job ni bout a pathung teh,
2 Hetheh doeh tie hah atangcalah ka panue,
hateiteh, Cathut e hmalah bangtelamaw tami teh a lan thai han.
3 Ama oun han ka ngai e awm pawiteh,
avai 1,000 touh dawkvah vai touh boehai pathung thai mahoeh.
4 Cathut teh, lungkaang poung e, athakaawme thayung lah ao.
Ama taranlahoi lung ka patak sak e,
a lam ka cawn e apimaw kaawm boi.
5 Monnaw hah a puen teh, a lungkhueknae hoi
a pathung torei teh, panuek awh hoeh.
6 Talai a onae hmuen koehoi a kâhuet teh,
a khomnaw hah koung a kâhuet sak.
7 Kanî hah kâ a poe teh, tâcawt hoeh.
Âsi angnae hah muen a ramuk.
8 Ama dueng lahoi kalvan hah a ramuk teh, tuipui tuicapa van a cei.
9 Ama ni Latum, Kangduetaphai, Baritca,
hoi akalae âsinaw hah a sak.
10 Be panue thai hoeh e hnokalen e hai,
touk thai hoeh e kângairu hnonaw hah a sak.
11 Ka teng vah a cei ei ama teh, ka hmawt hoeh.
Na ceihlawi e hai ka panuek hoeh.
12 Ama ni lat pawiteh, apinimaw a haw pouh thai han.
Apinimaw bangmaw na sak, atipouh thai han.
13 A lungkhueknae dawk hoi, Cathut ni kamlang takhai mahoeh toe.
A khok rahim vah tami kâoup e kabawmnaw teh a tabut awh.
14 Kai ni ama teh bangtelamaw, ka pathung thai han.
Ama oun nahanelah, bangpatet e lawk maw kârawi han
15 Bangtelah kalan nakunghai, ama teh ka pathung thai mahoeh.
Kai lawkcengkung koe pahrennae doeh ka hei hnawn han.
16 Ka kaw pawiteh, ama ni na pato han.
Ama ni ka lawk na thai pouh hane ka yuem hoeh.
17 Bangkongtetpawiteh, kahlî kathout ni na hmang teh,
a khuekhaw awm laipalah ka hmânaw hah a kampai sak.
18 Ka kâha thai laipalah, reithai hoi na kawi sak.
19 A thasainae dawkvah ama teh, athakaawme lah ao.
A lannae, kong dawk tetpawiteh,
lawkcengnae dawk apinimaw ka hnin hah a khoe thai han.
20 Ka kuep nakunghai, ka pahni ni yon na pen han,
tanouk hanelah kaawm hoeh nakunghai, ka lanhoehnae hah a kamnue sak han.
21 Toun hoeh nahanlah ka o.
Hateiteh, ka kâpanuek hoeh, ka hringnae heh ka hnueai toe.
22 Be kâvan doeh.
Hat dawk nahoehmaw, tamikathoutnaw hoi toun han kaawm hoeh e hoi,
be raphoe han telah ka dei vaw.
23 Hemnae ni vai touh hoi thet boipawiteh,
kayonhoehe khangnae teh, a panuikhai han.
24 Talai heh tamikathout e kut dawk poe lah ao teh,
a lawkcengkungnaw e minhmai a ramuk.
Ahni hoehpawiteh, api han na maw.
25 Ka hninnaw hateh, ka yawng e hlak hai hoe a rang,
a kamleng awh teh, hawinae hmawt awh hoeh.
26 Karang poung e lawng patetlah a khup teh,
Mataw ni moithang a ka cawp e patetlah a rang.
27 Ka phuenangnae ka pahnim vaiteh,
ka lungmathoenae minhmai he ka ta vaiteh,
minhmai kapancala ka o han ka ti navah,
28 Ka khangnae naw pueng heh, makkhak ka taki teh,
tamikayon hoeh e lah na pouk hoeh langvaih tie hah ka panue.
29 Yon pen e lah kaawm pawiteh,
bangdawkmaw ahrawnghrang e meng ka tawk han.
30 Tadamtui hoi ka kamhluk nakunghai,
ka kut heh sapet hoi ka kamsin nakunghai,
31 tangdong dawk na tâkhawng teh,
ka khohna ni patenghai na panuet han doeh.
32 Bangkongtetpawiteh, lawkcengnae koe rei cet vaiteh,
ama teh ka pathung thai nahanelah, ama teh tami lah tho hoeh.
33 Maimouh roi e van kut ka toung hanelah,
maimae rahak laicei awm hoeh.
34 Kai koe e sonron lat naseh
taki a thonae ni na taket sak hanh seh.
35 Hatdawkvah ama taket laipalah lawk hah ka dei han.
Hateiteh, kai koevah hottelah bout awm kalawn hoeh.