22
Eliphaz lawk
1 Teman tami Eliphaz ni a pathung teh,
2 Tami teh Cathut hanelah a cungkeinae a tawn thai han namaw,
A lungkaang e hai ama hanelah doeh cungkeinae ao.
3 Tamikalan lah na onae hah, Athakasaipounge, a lungkahawi sak e lah ao han namaw
Toun han awm laipalah na sak e na lamthung hah ahni hanelah a meknae ao han namaw
4 Ama na taki kecu dawk maw na toun teh,
lawkcengnae dawk na kâenkhai.
5 Na hawihoehnae hah a len poung teh,
pout laipalah na payonnae kecu dawk nahoehmaw.
6 A khuekhaw awm laipalah na hmaunawngha e hno hah na man pouh teh,
caici lah kaawm e hnicu hah na la pouh.
7 Tha ka tawn e koe, nei hane tui hah na poe hoeh teh,
von kahlamnaw hanelah vaiyei hah na pasoung pouh hoeh.
8 Hateiteh, tami athakaawme ni ram a coe teh,
a thung vah bari kaawm e tami ni kho a sak awh.
9 Lahmainu hah kut caici lah na ceisak awh teh,
manu ka tawn hoeh e naranaw e kut hah na khoe pouh awh.
10 Hatdawkvah na tengpam e karap ni na kalup teh,
puennae ni rucatnae na poe awh.
11 Na hmu thai hoeh nahanelah,
hmonae hoi tuikalen poung ni muen a khu awh.
12 Kalvan arasang nah koe, Cathut awm hoeh namaw
Karasangpoung e âsinaw hah khenhaw! banghloimaw arasang.
13 Nang ni, Cathut ni bangmaw a panue,
Hmonae hloilah lawk a ceng thai maw.
14 A hmu thai hoeh nahanelah, katha poung e tâmai ni a ramuk teh,
kalvan lathueng lah a kâhlai, telah na ti.
15 Tamikathoutnaw ni karawk e lam karuem dawk
meng na cei han namaw
16 Apimaw atueng kuep hoehnahlan vah la e lah kaawm niteh,
apini a ung e maw tuikalen ni a la.
17 Cathut koe, na cettakhai yawkaw,
Athakasaipounge ni ahnimouh hanelah bangmaw a sak thai telah ati awh.
18 Hateiteh a imnaw hah hnokahawi hoi akawi sak.
Hateiteh tamikathout e khokhangnae teh, kai koehoi kahlatpoung lah ao.
19 Tamikalan ni a hmu teh, a lunghawi.
Yonnae ka tawn hoeh e ni dudamkungnaw hah a panuikhai awh.
20 Ka tarannaw teh, raphoe katang lah ao teh,
kacawie naw hah hmai ni a kak han.
21 Ama koe kâpanuek sak nateh, karoumcalah awm,
haw hoi nang hanelah hnokahawi a tâco han.
22 Pahren lahoi amae kâko hoi ka tâcawt e hringnae na cangkhai e hah dâw haw.
Na lungthin thungvah amae lawk hah kahawicalah kuem.
23 Athakasaipounge, koevah na ban pawiteh, kangdout thai e lah o han.
Na payonpakai e hah na im dawk hoi kahlatpoung lah na takhoe han.
24 Nange sui teh, vaiphu dawk na ta han.
Ophir sui hah sawkca thung e, sadinaw patetlah na pâtung han.
25 Athakasaipounge teh,
nange sui hoi aphu kaawm e ngun lah ao han.
26 Hottelah Athakasaipounge dawkvah na lunghawi han.
Cathut koe lah na khet han toe.
27 Ama koe na ratoum vaiteh, na thai pouh han.
Na lawkkam hah na kuep sak han.
28 Hno buet touh na kâcai vaiteh, nama hanelah caksak lah ao han.
Hot patetvanlah na lamthung dawk angnae ni a tue han.
29 Na tâkhawng navah tawmrasang e lah na o han telah na ti han.
Hottelah kârahnoum e hah ama ni a rungngang han.
30 Ka yon hoeh e hah a rungngang han.
Na kut thoungnae hoi rungngang lah ao han, telah a ti.