30
1 Hatei, atuteh kai hlak ka camo e naw ni
Kai na pathoe awh.
A napanaw hah kai ni ka panuet teh,
kaie tuhu ka ring e uinaw koe patenghai bawk van hoeh.
2 A thaonae hah kai hanelah bangmaw cungkeinae kaawm.
A thayung tawn awh hoeh toe.
3 Takangnae hoi voutthoup dawk a kamsoe awh teh,
kahrawngum kingdinae hmuen koe tang a yawng awh.
4 Pho um e angmai hna a la awh teh,
samphokung e a tangpha hah rawca hanelah a tai awh.
5 Ahnimouh teh, tami koehoi pâlei awh teh,
tamru patetlah a hramsin awh.
6 Tangkom thung hoi lungngoum thung o hanelah doeh ao awh.
Talai hoi talung kâko dawk ao awh.
7 Caprapum vah a hram awh teh,
pâkhingum vah a tabo awh.
8 Ahnimouh teh tamipathu e canaw doeh.
Bang pato patang hoeh e canaw doeh.
Ram thung hoi hrek e naw doeh.
9 Atu teh la lah na sak awh hanelah ka o toe.
Na pathoe e lah ka o toe.
10 Na panuet awh teh kai hoi kâhlat lah na o awh.
Ka minhmai na tamthawi awh.
11 Bangkongtetpawiteh, lirui hah a rasu awh teh, na ka pacekpahlek awh.
Ka hmalah kammoumrui a rasu awh.
12 Kaie aranglah nawsainaw a kangdue teh, ka khok hah a phen awh.
A rawkphainae lamthung hah kai taranlahoi a sak awh.
13 Ka lamthung hah a raphoe awh.
Kai ka tâlaw nahanelah a kâyawm awh.
Ahnimouh kâhruetcuet ka poe hane apihai awm hoeh.
14 Ka kaw poung e kâko dawk hoi a tho awh teh,
ningkatim rahim vah na kalup awh.
15 Takithopoung e ka lathueng vah a pha.
Bari lah ka onae hah kahlî patetlah a pâlei awh.
Ka tawn e naw hah tâmai patetlah a kahma.
16 Ka kângairunae ni ka hringnae teh a rabawk toe.
Ka khangnae hninnaw ni khak na kuet.
17 Karum lah ka hru hah koung a thut teh,
ka tharui patawnae ni roum thai hoeh.
18 Ka patawpoung e ni hnicu hoi kayo e patetlah na kayo teh,
angki lahuen patetlah na katek.
19 Tangdong dawk na tâkhawng teh,
hraba hoi vaiphu patetlah ka o toe.
20 Nama koe ka hram, hateiteh, na pato hoeh.
Ka kangdue teh na khet.
21 Hatei, kai hanelah ka pahngawpahrak e lah na o.
Na kut thasainae ni na taran.
22 Kahlî dawk na tawm teh,
a lathueng vah na kâcui sak.
23 Bangkongtetpawiteh, nama ni duenae dawk na ceikhai hane hah ka panue.
Hringnae katawnnaw pueng hanelah,
na pouk pouh tangcoung e im dawkvah.
24 BAWIPA ni a kut a dâw torei teh,
a kâhei nakunghai, banglah tho hoeh toe. A raphoe torei teh,
a hram nakunghai hawinae awm hoeh toe.
25 Runae ka kâhmonaw hanlah ouk ka ka nahoehmaw.
Karoedengnaw hanlah lungreithai hoi kaawm boihoeh maw.
26 Hateiteh, hawinae ka tawng navah,
hno kahawihoehe hah ka lathueng vah a pha.
Angnae ka ring navah hmonae a pha.
27 Ka lungthin a tâsue teh roum thai hoeh.
Ka khangnae hninnaw ni na tho sin.
28 Panuinae koelah tho hoeh niteh, lungmathoe koelah ka cei.
Kamkhuengnaw rahak vah, ka kangdue teh, kabawpnae ka hei teh ka hram.
29 Kahrawnguinaw e hmaunawngha lah ka o.
Kalauk tavanaw hoi huiko lah ka o.
30 Ka vuen teh hoehoe a tamang teh kai koehoi a bo,
Ka hrunaw teh puenghoi a kâan
31 Ka ratoung teh ka lungmathoenae lah a coung,
ka tamawi teh kâlawk lah a coung.